Mose wuzingila ku divula di Midiani 40 di mimvu. Kuawu ka kwedila ayi kubutila bana. Kilumbu kinkaka bo kaba sunga mamemi ku mongo wu Sioni, nandi wumona mangitukulu. Wumona mwa nti waba lema mbazu mu khambu vya. Dyawu kabakila diyindu di kufikama mwingi kamona buboti. Muna thangu beni, wuyuwa mbembo yaba basikila va khati mbazu beni yintela: ‘Mose! Bika kufikama beni akuku ayi botula zisapatu zyaku, kibila kibwangu akiki kinlongo.’ Ngye zebi yiba mbembo yinani? Yiba mbembo yi Yave, yiba kuwakana mu nzila yi mbasi katuma.

Mose wuba beni boma, dyawu kafukimina ayi kaswekila kizizi kyandi. Yave wubwe nkamba: ‘Minu yimmonanga ziphazi zi bana ba Isaeli. Minu yintomba kubavukisa mu myoko mi basi Ngipiti mwingi kubavana tsi yimboti. Dyawu, yakutumina mwingi kukula dikabu dyama didi ku tsi Ngipiti.’ Mu mbwenu’aku, Mose kasa kwituka ko mu mambu Yave kankamba?’

Mose wuyuvula Yave: ‘Bana ba Isaeli ba kukhuvula nani be kutuma mvutu mbi yala bavana?’ Nzambi wuvutudila Mose: ‘Tala wubakamba ti minu yidi Yave, Nzambi yi bakulu baku; Nzambi Abalami, yi Isaki ayi yi Yakobi yima kuthuma.’ Mose wubwe tuba: ‘A Yave kheti yibakembi mawu, bawu kukhambu kuwa mbi yifweti vanga?’ Bosi Yave wumonisina Mose bidimbu ti nandi wala kunsadisa mu thangu zyoso. Nandi wukamba Mose kakuba va tsi nkawu kaba sungilanga mamemi. Zebi mbi bimonika? Wawu wukituka nyoka yinneni. Vayi bo Mose kasimba nyoka beni, yawu yibwe vutuka nkawu. Bosi Yave wunkamba: ‘Ngye kuvanga mangitukulu amomo, bawu bala kikinina ti minu yima kutuma.’

Mose wubwe tuba: ‘A Yave, minu yisa zaba ko kukoluka buboti.’ Yave wunkanikisa: ‘Minu yala kukamba mambu wala koluka, ayi yala kuvana khomb’aku Aloni mwingi ka kusadisa.’ Bo kazaba ti Yave Nzambi wala kunsadisa, nandi wuyenda kwelanda nkazi ayi bana bandi mwingi benda ku Ngipiti.

Bana ba Isaeli baba salanga bisalu bi ngolo banga mimvika. Dyawu Yave katumina Mose ayi Aloni kwidi ntinu Falawo mwingi bankamba: ‘Bika dikanda dyama, mwingi benda be mbwongimina ku thandu.’ Vayi Falawo wuba vutudila: ‘Minu yisimvanga ko mambu Yave kabe tuba ayi yisimbika ko bana ba Isaeli benda.’ Nandi wubwela kuvana bisalu bi ngolo kwidi bana ba Isaeli. Dyawu Yave kakambila Mose: ‘Falawo mengi kukhuwila. Yono va meni bo kala kwenda ku nlangu kayobila, ngye mvaku yenda kuna ayi nkamba ti bo bekhambu bika bana ba Isaeli mwingi benda be bwongimina Yave, dyawu mwila woso wu Nilo yambaludila wawu buka menga.’ Mose wutumamana Yave ayi wukamba mambu beni kwidi Falawo. Falawo wumona Aloni bo kabonga nkawu’andi, wutula wawu mu mwila Nilo ayi nlangu woso wubaluka buka menga. Zimfu zyoso zi ba muna zimana kufwa ayi nlangu wumana wala mfuku ayi basa baka ko nlangu wu kunwa. Kheti bobo Falawo kasa bika ko bana ba Isaeli benda be bwongimina Yave.

Sambwandi di bilumbu bivyoka, Yave wubwe tuma Mose kwidi Falawo mwingi kankamba: ‘Ngye kukhambu bika dikabu dyama benda be mbwongimina, buna Ngipiti woso yinkwiza wala bisyoto.’ Aloni wubwe kuba nkawu’andi va ntoto ayi bisyoto biza tona kutyamuka mu ntoto woso wu Ngipiti. Bisyoto beni bimana kutyamuka mu zinzo, mu bika ayi mu zindonga. Bisyoto biwala mu bibwangu byoso! Falawo wukamba Mose mwingi kakamba Yave kamanisa kivunga beni. Nandi wukanikisa kubika bana ba Isaeli benda. Yave wumanisa tsingulu beni, angi mfuku yi bisyoto bifwa yimana kuwala ntoto woso wu basi Ngipiti dyawu bazikila byawu mu ntoto. Vayi bo bwawu Falawo kasa bika ko bana ba Isaeli benda.

Yave wubwe kamba Mose: ‘Kamba Aloni kabwe kuba nkawu’andi va tsi mwingi ntoto wubasisa zimbu zintebila batu. Mu thangu beni zimbu ziwala muma moso. Falawo ayi batu bankaka batuba ti kivunga akiki Nzambi be tufidisa kyawu. Vayi Falawo, wumanga kubika bana ba Isaeli benda be bwongimina Yave.