Mose ayi Aloni bavutuka mwingi kukamba Falawo mambu Nzambi kaba kamba: ‘Ngye kumanga kubika dikabu dyama benda kuawu, yinkwiza fila maveku manneni mu zinzo zyoso zi basi Ngipiti.’ Mu thangu beni Ngipiti yoso yiwala maveku manneni, mu zinzo zi bisina ayi bakhambu busina. Angi ku divula basi Isaeli baba kalanga, kwisa monika ko mambu moso amomo. Tona kwandi kivunga akiki kinna ti ki tsuka, basi Ngipiti to baba monikinanga ziphasi beni. Falawo wudinda kwidi Mose: ‘Kambanu Yave kamanisa tsingulu ayiyi ka minu yambika bana ba Isaeli benda kuawu.’ Vayi bo Yave kamanisa kivunga beni, Falawo wumanga kubika bana ba Isaeli benda. Bukyedika kwandi ti Falawo wulonguka dyambu mu matedi bivunga bimonika?

Yave wubwe tuba: ‘Falawo na kukhambu bika dikabu dyama benda, minu yala tula bibulu byoso bi basi Ngipiti kimbevo ki ngolo ayi biawu binkwiza mana kufwa. Vayi bibulu bi bana ba Isaeli bisi mfwa ko. Bobuawu Falawo kasa bika ko bana ba Isaeli.

Diawu Yave kabwe kambila Mose kavutuka kwidi Falawo ayi kabonga dibombi kakuba ku yilu. Dibombi beni dikituka makengele, maba twadisa zimbeza kwidi basi Ngipiti ayi bibulu byawu. Vayi bobuawu, Falawo kasa bika ko bana ba Isaeli.

Yave wubwe fila Mose kanata tsangu’andi kwidi Falawo: ‘Ngye wukhidi manga kubika dikabu di Nzambi benda? Yave katubidi, yono kwala noka mvula yi mamanya ma gelo.’ Mu kilumbu kilandila, Yave wumonisa zitsyemo, biduma ayi mbazu. Yawu tsingulu yiluta ngolo basi Ngipiti bamona, kibila minti myoso ayi bidya byoso biba mu zitsola bi mana kufwa, vayi bi bana ba Isaeli bisa fwa ko. Falawo wubwe tuba: ‘Kambanu Yave kamanisa tsingulu ayiyi kibila yambika bana boso ba Isaeli benda mwingi be bwongimina Yave, Nzambi’awu’. Vayi bo kamona ti mvula beni yima mana, nandi wubalula mayindu ayi kasa bika ko bana ba Isaeli benda.

Bosi Mose wutuba: ‘Makhoko voti mindeka, tonanu kudya zitsola zisyedi.’ Tsi yi Ngipiti yi yiza wala Makhoko, bamana kudya meza ma minti myoso ayi byuma byoso bavata. Falawo wudinda Mose: ‘Kamba Yave kamanisa kivunga akiki.’ Vayi bo Yave kamanisa Makhoko, Falawo wubwe monisa ntu ngolo mu khambu bika bana ba Isaeli.

Yave wukamba Mose: ‘Nonuna koko kwaku ku yilu.’ Mu thangu beni, kubwa kitombi ki ngolo mu bibwangu byoso. Bilumbu bitatu bivyoka, basi Ngipiti basa baka ko bu kumwena kizizi ki mutu wunkaka voti kyuma kibila kitombi kisabila ngolo. Vayi mu zinzo zi bana ba Isaeli mwisa ba ko kitombi beni.

Falawo wukamba Mose: ‘Ngye ayi bana boso ba Isaeli yendanu kwinu. Angi mufweti bika bibulu binu byoso.’ Mose wumvutudila: ‘Befu tufweti nata bibulu bitu, kibila byawu minkhayilu tufweti vana kwidi Yave Nzamb’itu.’ Falawo wufwema beni ayi wukamba Mose mu nganzi: ‘Botuka va ntwal’ama! Ngye bwe kwiza akuku, yala kuvonda.’

Mose wukanikisa Falawo ti kyawu kiki kilumbu kitsuka wu kumbona. Vayi ava kenda, nandi wunkamba: ‘Va khati bwilu abubu, bana boso batheti ba babakala kutona mwan’aku wutheti nate bana ba mimvika bankwiza mana kufwa.’

Yave wukamba bana ba Isaeli bavanga nkungi wu pasika. Wubakamba: ‘Vondanu dimeme di mbakala didi mvu wumweka voti khombo, ayi bonganu menga mandi mu vinda mu myelo mi zinzo zinu. Vayi nsuni’andi vikanu ku mbazu mwingi mu dila mu mapha bakhambu tulu luvi.’ Wubakamba mvandi: ‘Kubamanu kibila, bwilu abubu yinkwiza mukula mu tsi yi Ngipiti.’ Ngye wulenda yindula mayangi bana ba Isaeli bamona!

Va khati bwilu, mbasi yi Yave wuvyokila mu zinzo zyoso zi Ngitipi ayi wuvonda bana boso batheti ba babakala baba mu zinzo zi khambulu ba menga mu myelo. Basi Ngipiti boso bafwilu mwana wutheti; kaba kwandi ti kisina voti kiphumbulu. Vayi mu matedi bana ba Isaeli, baboso bavuka mu kivunga beni.

Ngye zebi! mwana wutheti wu Falawo mvandi wufwa. Nandi kasa bwe kindama ko dyawu mu thangu beni kakambila Mose ayi Aloni: ‘Tala, yendanu mwe bwongimina Nzamb’inu. Natanu bana binu, bibulu ayi byuma byoso mu baka.’

Mu thangu bwisi bukya, bana ba Isaeli bakubama mu mimvila ayi makanda. Bana boso ba Isaeli, baba nanga 600.000 di babakala, bakyeto ayi bana balezi. Mu kilumbu beni batu bawombo ba zi tsi zinkaka bayenda yawu mwingi kubwongimina Yave. Bana ba Isaeli baba beni mu mayangi kibila Yave wuba kula mu ziphasi!

Mwingi kutebukila moyo phila Yave kaba kudila, bawu baba kembanga nkungi beni mvu ka mvu. Batedila wawu nkungi wu Pasika.