Bana ba Isaeli babika Mongo wu Sioni, bavyokila mu thandu Palani ayi batula va kibwangu baba tanguninanga Kadesi. Vawu Yave kakambila Mose: ‘Sola 12 di babakala mu kadika mvila wu bana ba Isaeli ayi wuba fila mwingi balenga ntoto wu Kanani, kibila wawu yinkwiza vana bana ba Isaeli.’ Diawu Mose kasodila 12 di babakala ayi wubakamba: ‘Yendanu ku Kanani mwingi mu bakula ti wawu ntoto wumboti mu kuvata mbongo. Talanu mvandi phila mbi batu banzingilanga kuna, ti badi mangolo voti basi ko ayi talanu ti mu mavwala bankalanga voti mu mavula.’ Bawu bayenda ku Kanani. Mu kumi wadi beni di minlenga, muba mvandi Yosua ayi Kalebi.

Bo vavyoka 40 di bilumbu, minlenga mi mambu beni, bavutuka ayi batwala makundi bamvangilanga vinyu, zifigu ayi makundi mankaka. Minlenga mambu beni batuba: ‘Ntoto wu Kanani wumboti beni, vayi batu bankalanga kuna, badi batu bazangama ayi badi beni mangolo. Kadika divula didi luphangu luzangama.’ Vayi Kalebi wutuba: ‘Befu tulenda kubanunga.’ Ngye zebi kibila mbi Kalebi kabakambila abobo? Kibila nandi ayi Yosua baba lufyatu mu Yave. Vayi kumi dinkaka di minlenga batuba: ‘Tubikanu kwenda! Kibila batu bankalanga kuna, badi bazangama! Befu va ntwal’awu twidi banga makhokodo voti mindeka.’

Bana ba Isaeli bavonga. Bawu batona kunyonga ayi baba kambasanga bafeka: ‘Ndokwanu tusola mfumu yinkaka mwingi tuvutuka ku Ngipiti! Mu kibila mbi tufweti kwendila ku Kanani mwingi tufwila kuna?’ Yosua ayi Kalebi batuba: ‘Bikanu kulevula lutumu lu Yave ayi bikanu kumona boma. Kibila Yave wala ku tukyeba.’ Angi bana ba Isaeli basa bakuwila ko. Bawu batomba kuvonda Yosua ayi Kalebi!

Mambu mbi Yave kavanga? Nandi wukamba Mose: ‘Kheti mamboti moso yimavangila bana ba Isaeli, vayi bawu bakhidi levula zithumu zyama. Diawu bawu bankwiza kadila mu thandu 40 di mimvu, ayi kwakuku bawu bankwiza fwila. Bana bawu to, Yosua ayi Kalebi bala baka lwaku lu kuzingila mu ntoto wu Kanani yikanikisa ku muvana.’

Buvyokila thangu bo bana ba Isaeli baba mu thandu, Kola, Datani, Abilami ayi 250 di babakala bankaka, babayisa Mose. Bawu bankamba: ‘Befu tuma kudifuka! Kibila mbi tufweti bela ku tsi luyalu lwaku to ayi Aloni kafweti bela nandi to Nganga Nzambi va khat’itu?’ Yave kasa zola ko mambu bawu batuba. Kibila kubayisa Mose ayi Aloni batu Yave kaba sadila, didi buka nafeka Yave babayisa!

Mose wukamba Kola ayi baba ku khonzo’andi: ‘Kyala ba yonu, Yizanu ku Nzo Yinlongo, twalanu mbazu ayi malasi ma kusemina. Kibila Yave wala monisa nani kasola mwingi kutwadisa dikabu dyandi.’

Kilumbu beni bo kifwana, Kola ayi 250 di babakala baba ku khonzo’andi badengana na Mose ku Nzo Yinlongo yi Yave. Kola ayi badi’andi bawu batwama kuvika malasi banseminanga. Vayi Yave wufwema mu mambu bavanga kibila basa ba ko nswa. Diawu kakambila Mose ayi Aloni: ‘Tatukanu Kola ayi dingumba dyandi.’

Kola wuyenda ku Nzo Yinlongo yi Yave, vayi Datani, Abilami na makanda mawu bamanga kukwenda. Diawu Yave kakambila bana ba Isaeli batatuka mu thinu mu mavwala ma Kola, Datani ayi Abilami. Bawu batatuka mu thinu. Mu thangu beni, bazimbukila ntoto wutona kubuka ayi wumana kumina dikanda di Kola, Datani, Abilami ayi makanda mawu baba ku nganda. Kola ayi 250 di babakala baba ku Nzo Yinlongo, bawu mvawu bamana kuvya mu mbanzu yifumina kuyilu.

Bosi Yave wukamba Mose: ‘Kamba bakulutu boso mu kadika mvila, mwingi batwala minkawu miawu ayi sonika mazina mawu momo. Vayi mu matedi mvila wu Levi, sonika dizina di Aloni. Bosi lunda minkawu myoso ku Nzo Yinlongo. Wosokwa nkawu wala basisa biteka, muna nandi yibe sola.’

Mu kilumbu kinkaka, Mose wubasisa minkawu myoso ku nganda ayi wumonisa kwidi bakulutu boso. Vayi nkawu wu Aloni wawu to wumena biteka ayi makundi mabenga. Mu phila ayoyo, buawu Yave kamonisina ti nandi Aloni kasola mwingi kaba Nganga yi Nzambi.