Mu kilumbu kinkaka, Yosua wutuma milenga myodi mi mambu ku divula di Yeliko. Bawu bavitila ku nzo yi mwana nkyeto baba tedilanga Lahabi. Ntinu wu Yeliko bo kazaba mawu, wutuma masodi ku nzo beni. Vayi Lahabi wusweka milenga mi mambu mi basi Isaeli ku yilu kibanga ayi wumonisa masodi ma Yeliko khonzu yinkaka mwingi babila. Nandi wukamba milenga mi mambu: ‘Minu yi musadisidi kibila yizebe ti Yave widi ku khonzu’inu ayi benu munkwinza nunga basi Yeliko. Yizebi ti ntoto awuwu wunkwiza ba winu. Diawu lemvukanu, khanikisanu ti benu munkwinza phukisa ayi dikanda dyama.’

Bawu bakamba Lahabi: ‘Befu tu kukanikisa ti vasi ko mutu va dikanda dyaku wala mona phasi.’ Babwe kunkamba: ‘Dengidika nsinga wubenga va nela, mwingi dikanda dyaku bavuka.’

Bosi Lahabi wukuludila milenga mi mambu mu nsinga va nel’andi. Bo bakuluka, baswama mu mongo bilumbu bitatu ava bavutuka kwidi Yosua. Vangi bana ba Isaeli basabuka mwila wu Yolidani. Bawu baba bakubama mwingi kuvwa ntoto wu Yeliko, ayi diawu divula ditheti bawu banunga mu mvita. Ngye zebi bwidi banungina? Yave wuba kamba badyengidila divula beni mu bilumbu bisambanu, ntulu wumweka mu kilumbu. Vayi mu kilumbu ki sambwadi, bawu badyengila sambwadi di mintulu. Bosi Zinganga zi Nzambi batona kusika zi tulumbeta ayi masodi batenduka khumbu yimweka mu mbembo yinangama. Bibaka bi divula beni bibuka ayi bitolumuka! Vayi bibaka bi nzo yi Lahabi bisa bwa ko. Lahabi ayi dikanda dyandi bavuka kibila bafyatila Yave.

Yeliko mu phila yitulukila, tsangu yityamuka mu zi tsi zinkaka ziba ku Kanani. Diawu mintinu myoso babakila makani mwingi kunwanisa dikabu di bana ba Isaeli. Vayi basi Ngiboni bamanga. Bawu babaka mankani mankaka, bavwata bikhutu bibakuka ayi bayenda kwidi Yosua. Bawu bankamba: ‘Befu tsi yi kinanu tuma ba. Tuma kwizila kibila tuyuwidi matedi Yave Nzamb’inu, mambu kavangila tsi yi Ngipiti ayi Moabi. Diawu befu tukikinini kuba bavika binu, vayi wutukanikisanu ti lwisi kutunwanisa ko mvita.’

Yosua wukikana mambu batuba ayi wukanikisa kumanga kuba nwanisa. Bilumbu bitatu bivyoka, Yosua wuyiza zaba ti bawu basa ba ko mu ntoto wu kinanu. Vayi babasikila mu divula di Kanani. Dyawu nandi katedila basi Ngiboni ayi wubakamba: ‘Kibila mbi benu lu tuvunina?’ Bawu bamvutudila: ‘Befu boma tubedi! Tuzebi ti Yave Nzamb’inu nandi wuku munwanina. Tala wutu lemvukilanu, bikanu kutuvonda.’ Yosua wuyindula mambu kaba kanikisa ayi wuba bikila.

Vasa vyoka ko thangu yiwombo, mintinu mitanu mi Kanani ayi masodi mawu babundana mwingi kunwanisa basi Ngiboni. Yosua ayi masodi mandi baba dyengila bwilu boso mwingi kuba kula. Va meni batona kunwana mvita na mintinu mitanu mi Kanani. Mintinu beni basa nunga ko dyawu batinina ayi batyakana mu zikhonzo zyoso. Yoso kwa khonzo baba tinina, Yave waba kuba bwisila mamanya manneni ma gelo. Dyawu Yosua bo kamona ti bwisi bwankwila, wudinda Yave katelimisa mwinya. Kibila mbi kadindila ntindu dyambu adyodyo ka disalamanga ko tona nza yivangama? Yiba mbonosono ti Yosua waba fyatilanga beni Yave. Bukyedika, kilumbu beni bwisi bwisa kwila ko ti bana ba Isaeli bamana kuvonda zimbeni zyawu.