Mimvu miwombo Yosua katwadisila dikabu di Yave, nandi wuyiza fwila mu 110 di mimvu. Mu luyalu lwandi, bana ba Isaeli batatamana kubwongimina Yave. Vayi bo Yosua kafwa, bana ba Isaeli batona kubwongimina bitumba bivanga basi Kanani. Bo bana ba Isaeli bamanga Yave kaba twadisa, Nandi wubikila Yabini ntinu basi Kanani mwingi kaba tovula. Ziphasi bo zisabila ngolo, bawu badinda lusalusu kwidi Yave. Dyawu Yave kasodila ntinu wumona baba tedilanga Balaki, mwingi katwadisa ayi kubasadisa bavutula kithwadi na Yave.

Yave wufila ḿbikudi wunkyeto baba tanguninanga Debola kwidi Balaki mwingi kankamba mayindu mandi. Nandi wukamba Balaki: ‘Nata 10.000 di babakala, mwingi be nwana na masodi ma Yabini ku divula di Ngoseni. Kwawu wala nungina Sisela, mfumu yi masodi ma Yabini.’ Balaki wukamba Debola: ‘Minu yinkwenda, ti ngye mvaku wunkwenda yitu.’ Nandi wumvutudila: ‘Minu yinkwenda yinu. Angi wisi ko ngye wala vonda Sisela. Kibila Yave wukhamba ti mwana nkyeto mweka wala mvonda.’

Debola wuyenda na Balaki ayi masodi mandi ku Mongo Taboli. Bo batula kuna, bawu bakubama mwingi kunwana mvita. Bo Sisela kazaba mawu, nandi mvandi wukubika masodi mandi, makalu mawu ma kunwanina mimvita ayi banengumuka mu ḿbwinga wu Kisoni. Bosi ko Debola wukamba Balaki: ‘Bubu Yave wukunungisa mu mvita awuwu.’ Balaki ayi 10,000 di masodi mandi bakuluka mongo mwingi kunwana na Sisela ayi masodi mandi.

Yave wutwadisa khuka yinneni mu mwila wu Kisoni ayi makalu ma mvita ma Sisela mamana kukandana mu diyanga. Sisela wubika dikalu kaba dyatila ayi wutona kutina. Balaki ayi masodi mandi banunga mvita beni, vayi basa baka ko Sisela! Kibila nandi wutina, wuswama ku divwala di nkyeto baba tanguninanga Yaeli. Nkyeto beni wumvana leta kanwa ayi wumfuka ku tsi divunga. Sisela wubaka tolo kibila phokongo yisabila ngolo. Zebi mbi Yaeli kavanga? Nandi mu malembi, wutitika nti kaba tsikikilanga divwala ayi wumviva wawu mu ntu. Sisela wiza fwa.

Balaki waba tomba beni Sisela. Vayi Yaeli bo kammona wunkamba: ‘Yiza tala theti dibakala adidi, ḿba nandi wuntomba.’ Bo Balaki kakota wumona Sisela wubukama va tsi befwa. Balaki ayi Debola bazitisa Yave mu minkunga bo kanungisa bana ba Isaeli mu mvita banwana na zimbeni ziawu. Ayi bana ba Isaeli bayiza zingila mu ndembama nanga 40 di mimvu.

Bo ku Isaeli kuyiza ba nzala yiwombo, nkyeto wumweka mwisi Isaeli baba tanguninanga Naomi, bayenda ayi nnuni’andi na bana bawu babwadi kwezingila ku tsi yi Moabi. Vasa vyoka ko bilumbu biwombo, nnuni Naomi wiza fwa. Bana bandi biza kwela bakyeto basi Moabi, mazina mawu: Luti ayi Olopa. Vayi vasa bwe vyoka ko mimvu miwombo, bana bandi ba babakala mvandi biza fwa.

Naomi bo kayuwa ti nzala yimana ku Isaeli, nandi wubaka makani ma kuvutuka ku tsi’andi. Luti ayi Olopa batona kunlandakana. Angi mu nzila, Naomi wubakamba: ‘Benu mubedi bakazi bamboti kwidi bana bami ayi mwidi bakwekizi bamboti kwidi minu. Vayi minu yintomba benu mu bwe kwela. Dyawu vutukanu ku Moabi.’ Bawu bamvutudila: ‘Befu tukuzolanga beni! Tutidi kwenda yaku.’ Angi Naomi wutatamana kubakamba bavutuka ku tsi’awu. Olopa, bo kamona abobo, wiza vutuka kwandi, vayi Luti wumanga. Diawu Naomi kankambila: ‘Tala, Olopa mavutuka kwidi dikanda dyandi ayi zinzambi zyandi, mboti muingi wuvutuka ku nzo mam’aku wunlandakana!’ Vayi Luti wumvutudila: ‘Minu yisi kubika ko. Dikanda dyaku, dyala ba dikanda dyami ayi Nzambi’aku yala ba Nzambi’ami.’ Mu mbwenu’aku, bwidi Naomi kamwena mu ntima bo kayuwa mambu ma nkamba Luti?

Luti ayi Naomi batula ku tsi yi Isaeli mu thangu batu bantonanga kuvela mbongo. Kilumbu kimweka, Luti wuyenda mu ndima yi Boazi mwana wu Lahabi mwingi kuvela mbongo. Boazi wuyuwa ti Luti wuba nkyeto mwisi Moabi wuba wukwikama mu kukala na Naomi. Dyawu kakambila bisadi byandi babika mwa nkadu mbongo mwingi Luti kanata ku nzo.

Bo bwisi buyila, Luti wuvutuka ku nzo. Naomi wunyuvula: ‘Ndima yi nani be sadila mu kilumbu akiki?’ Luti wumvutudila: ‘Mu ndima yi Boazi.’ Naomi wunkamba: ‘Boazi mwisi dikanda di nnuni’ami. Diawu, tatamana kusadila mu ndima yi Boazi na bakyeto bankaka, ngye wala ba nsika.’

Luti wutatamana kusadila mu ndima yi Boazi ti bamana kuvela mbongo. Boazi wumona ti Luti waba tyanga beni kusala ayi zikhadulu zimboti ziba yandi. Mu thangu beni, boti dibakaIa fwidi mu khambu buta mwana na nkazi’andi, muna dibakala dinkaka va dikanda beni wuba nswa mu kukwela nkyeto beni befwulu nnuni. Diawu Boazi kakwedila Luti. Bawu babuta mwana wumweka batedila Obedi, wuyiza ba khaya voti khaka yi ntinu Davidi. Bakundi ba Naomi bayangalala beni ayi bankamba: ‘Yave wukuvana theti Luti wunkwangidikanga beni ntim’aku, nandi ma kuvana mvandi ntekolo. Bika Yave kazitusu.’