Buvyokila thangu bana ba Isaeli babayisa Yave ayi batona kubwongimina zinzambi zi luvunu. Sambwadi di mimvu basi Midiani baba kwibanga bibulu bi basi Isaeli ayi baba tumunanga bima baba vatanga. Mwingi bavuka mu myoko mi basi Midiani, basi Isaeli baba swamanga ku mbata myongo ku tsi mamanya manneni. Diawu bawu badindila lusalusu kwidi Yave. Nandi wufila mbasi kwidi mwana ditoko bantedilanga Ngidoni. Mbasi beni wukamba Ngidoni: ‘Yave ngye kasodidi mwingi wuvukisa dikabu dyandi mu mvita.’ Nandi wumvutudila: ‘Bwidi yinkwisa vukisila bana ba Isaeli? Minu yisa zaba ko ni kyuma!’

Bwidi Ngidoni kazabila ti Yave wunsola? Mwingi kabaka bu kuzabila, nandi wubonga kitendi ki nledi wutula va tsi ayi wukamba Yave: ‘Yono va meni, minu kudenga kitendi akiki kibondama, vayi ntoto wuyuma, yala zaba ti ngye be tsola mwingi kukula Isaeli.’ Va meni beni nandi wudenga kitendi kibondama angi ntoto wuyuma dedi bo kadindila Yave! Vayi Ngidoni wutuba: ‘Bika yono va meni kitendi akiki kiba kiyuma vayi ntoto woso wuba wubondama. Bo Yave katambudila mvandi nsambu wutsuka kavanga, Ngidoni wuyiza kikinina ti Yave wunsola. Diawu wukutikisa masodi mandi mwingi banwanisa basi Midiani.

Yave wukamba Ngidoni: ‘Minu yinkwiza nungisa bana ba Isaeli. Vayi masodi mawombo madi yaku. Diawu mwingi wubika bala ti ngye feka wunkwiza nunga mvita beni, vutula ku nzo masodi moso madi boma.’ Mu thangu beni 22.000 di masodi bavutuka ku nzo, ayi 10,000 masyala yandi. Yave wubwe kamba Ngidoni: ‘Minu yimmona ti masodi mawombo makhidi yaku, diawu wuba twala va ndeku mwila ayi wuba kamba banwa nlangu.’ Ayi wubwe nkamba: ‘Baboso bannwa nlangu vayi bankengidila, bawu bankwenda yaku.’ Ngye zebi, mu baboso 300 to banwa nlangu mu kukengidila. Yave wukanikisa Ngidoni ti mu thalu beni, yawu kala nungina 135.000 di masodi ma basi Midiani.

Mu bwilu beni, Yave wukamba Ngidoni: ‘Thangu yimafwana mwingi kunwanisa basi Midiani!’ Ngidoni wuvana masodi mandi ziphoka ayi bibasa bineni biba minda mu khati. Bosi wukamba masodi mandi: ‘Talanu akuku ayi vanganu mambu moso yimvanga.’ Ngidoni wusika phoka yiba yandi, wukuba kibasa kyandi va tsi, wutatika mwinda wuba yandi ayi wutenduka: ‘Mbedi yi Yave ayi yi Ngidoni!’ Ayi 300 di masodi mandi, bawu mvawu bavanga mawu. Basi Midiani bamona boma ayi batona kutina banga malawu mu zikhonzo zyoso. Ayi batona kuvondasana baveka. Bukyedika, Yave wubwe sadisa bana ba Isaeli kununga zimbeni zyawu.

Mwisi Isaeli wumweka baba tedilanga Elekana wuba bakyeto bwadi, mazina mawu Hana ayi Penina. Vayi nandi waba zolanga beni Hana. Thangu zyoso Penina waba sakininanga Hana kibila wuba kisita, angi Penina wuba bana bawombo. Mu kadika mvu, Elekana waba natanga dikanda dyandi ku Nzo Yinlongo yi Yave yiba ku Silo. Kilumbu kinkaka bo kamona Hana, nkazi’andi wu luzolo mu kyunda, Elekana wufikama vana ayi wunkamba: ‘Lemvuka bika kudila, minu yisa vyoka ko na bana wuntomba? Tala, minu yi kutyanga beni!’

Kilumbu kinkaka, Hana wuyenda nafeka ku Silo mwingi kasambila. Nandi kasa lembu ko kudila mu thangu kaba dinda Yave lusalusu. Hana wukanikisa Yave: ‘Ngye kuphana mwana, buna minu yala kumvana kwidi ngyewu mwingi kasaladila ku nzo’aku yinlongo mu luzingu lwandi loso.’

Bo nganga Nzambi baba tanguninanga Eli kamona Hana waba dila, nandi kabadila ti Hana bekolo malavu. Diawu Hana kamvutudila: ‘Mfumu’ami, minu yisa kolu ko. Angi dyambu dimweka di kuphanga beni phasi, diawu yinkamba Yave mu nzila yi nsambu.’ Eli wumona ti foto kaba, diawu kakambila Hana: ‘Bika Nzambi ka kuvana byabyoso wuntomba.’ Hana wuyangalala beni ayi wuvutuka ku nzo. Ava mvu wuduka, nandi wuyiza buta mwana ayi wumvana dizina di Samueli. Ngye wulenda yindula mayangi Hana kamona!

Hana kasa zimbakana ko mambu kakanikisa Yave mu nsambu. Diawu bo kalembusa Samueli mabeni, nandi wunnata ku nzo yinlongo yi Yave. Hana wukamba Eli: ‘Mwana beni yidinda mu nsambu kwidi Yave nandi wuwu. Yima kwiza mbika mwingi kasadila Yave mu luzingu lwandi loso.’ Elekana ayi Hana baba kwendanga mu kadika mvu ku Silo mwingi kuntala ayi baba kunnatinanga mimvwatu mimona. Yave wubwe vana Hana bana batatu ba babakala ayi babwadi ba bakyeto.