Bana ba Isaeli babwe bayisa Yave ayi babwongimina zinzambi zi luvunu. Vayi mu thangu basi Amoni baba nwanisa bana ba Isaeli, zinzambi beni zi luvunu basa vanga ko ni dyambu dimvela mwingi kuba sadisa. Mu mimvu miwombo bana ba Isaeli batovukila mu myoko mi basi Amoni. Diawu badindila Yave mu nzila yi lusambulu: “Befu tusumukidi, wutu lemvukila, ayi wutuvukisa mu myoko mi zimbeni zitu.’ Bana ba Isaeli batulula zinzambi zi bitumba ziba yawu ayi bavutuka kubwongimina Yave. Nandi kasa tya ko dikabu dyandi batatamana kumona ziphasi.

Diawu Yave kasodila dibakala dimweka bantedilanga Yefeta mwingi katwadisa masodi mu thangu bamwana mvita na basi Amoni. Nandi wukanikisa Yave mu nsambu: ‘Ngye kutusadisa kununga mvita tunkwiza nwana, buna mutu wutheti wala basika va mwelo wu nzo’ama bo yala vutuka, yala mvana mwingi kasadila ku nzo’aku yinlongo.’ Yave wuyuwa nsambu wu Yefeta ayi wunsadisa kanunga mvita beni.

Bo Yefeta kavutuka ku nzo, mutu wutheti wubasika wuyiza ndengana mu makinu ayi ndungu, mwan’andi mweka to wunkyeto. Mbi Yefeta kavanga? Mu thangu nandi wutebuka moyo lukanu kavanga kwidi Yave ayi wutuba: ‘Oh, mwan’ami! Khanu wisi ko ngyewu, ntim’ami wube lwala! Minu lukanu yivanga kwidi Yave. Mwingi yivanga mambu ma yikanikisa Yave, yifweti ku kufila ku nzo yinlongo yi Yave ku Silo mwingi wusadila kuna luzingu lwaku loso.’ Angi mwan’andi wumvutudila: ‘Tata, boti mambu wukanikisa Yave, muna wufweti vanga mawu. Vayi dyambu to yi kudinda, phana zingonda wadi mwingi yivyokisa thangu na bakundi bama mu mbata myongo, bosi yala kwenda.’ Mwana wu Yefeta wusadila ku nzo yinlongo yi Yave mu ntima woso luzingu lwandi loso. Mu kadika mvu, bakundi bandi baba kwendanga ku Silo mwingi kantala.

Eli wuba nganga Nzambi yi nkulutu ayi wuba bana bwadi baba salanga yandi ku nzo yilongo yi Yave. Wutheti dizina dyandi Hofini ayi wumwadi Fineyasi. Bawu basa tumamananga ko minsiku mi Yave ayi baba vanganga mambu mambi kwidi batu. Bo bana ba Isaeli baba kwe vananga mikhayilu kwidi Yave, Hofini ayi Fineyasi baba bonganga minsuni mi bibulu beni. Eli wuyuwa ayi wuzaba mambu bana bandi baba vanganga, vayi nandi kasa vanga dyambu ko mwingi kusemba bana bandi. Bukyedika ti Yave khanu wubikila mambu amomo mabwela kumonika thangu zyoso?

Kheti Samueli wuba beni mwana ditoko, nandi kasa landakananga ko mambu Hofini ayi Fineyasi baba vanganga. Yave mayangi beni kamona phila Samueli kabela lukwikumunu mu nandi. Bwilu bunkaka bo Samueli kaba lala, nandi wuyuwa mbembo yi mutu waba tela dizina dyandi: ‘Samueli!, Samueli!’ Nandi wutelama ayi wuyenda vaba Eli ayi wunkamba: ‘Minuk’awu!’ Angi Eli wumvutudila: ‘Minu yisa kutela ko. Yenda wevutuka kulala. Mawu mabe monikina khumbu wadi. Diawu Eli kakambila Samueli ti na kube kuwa mbembo beni yi kuntela ntulu wuntatu, muna katuba: ‘Yave, Mfumu yoluka kwaku, ka minu yi kukuwa.’

Samueli bo kavutuka va kika wubwe kuwa mbembo yaba tela: ‘Samueli!, Samueli! Nandi wutambudila: ‘Yave, Mfumu yoluka kwaku, ka minu yi kukuwa.’ Yave wunkamba: ‘Kamba Eli ti Minu yinkwiza bunga nafeka ayi dikanda dyandi. Kibila nandi wummonanga mambi bana bandi bamvanganga ku nzo’ama yinlongo vayi kasa vanga dyambu ko mwingi kubasemba.’ Mu kilumbu kilanda va meni, Samueli wuzibula myelo mi nzo yinlongo beni dedi bu kaba vangilanga lumbu ka lumbu. Nandi wuba na boma mu kukamba Eli mambu Yave kankamba. Diawu Eli kankambila: ‘Mwan’ami wu luzolo, khamba mambu Yave kabe kukamba?’ Bosi ko Samueli wunkamba mambu moso Yave kankamba.

Yave kasa bika ko Samueli tona bulezi bwandi ti kayiza ba ditoko. Dikabu dyoso di Isaeli bazaba ti Yave wusola Samueli mwingi kaba mbikudi ayi mfundusi mu bana ba Isaeli.