Yave wukamba Samueli: ‘Yenda ku nzo yi Isai. Kibila wumweka mu bana bandi nandi wunkwiza ba ntinu wu bana ba Isaeli.’ Samueli bo kavitila kuna, wumona mwana wutheti wu Isai ayi wuyindula: ‘Bukyedika, nandi yifweti sola mwingi kaba ntinu.’ Vayi Yave wulwengisa Samueli ayi wunkamba: ‘Minu yisodilanga ko mutu mu kutala kizizi, vayi mu kutala ma kadi mu ntima.’

Isai wubwe monisina Samueli bana bandi basambanu bankaka, vayi Samueli wutuba: ‘Yave kasa sola ko ni wumweka mu bawu. Ngye wisi ko mwana wunkaka?’ Isai wumvutudila: ‘Minu yidi mwana wunkaka wu dibakala wutsuka bantanguninanga Davidi, vayi nandi bekwenda kwe dikila mamemi.’ Bo Davidi kavitila, Yave wukamba Samueli: ‘Nandi wufweti sola!’ Samueli wundukudila malasi ku ntu ayi wunsola mwingi kaba ntinu wu bana ba Israeli.

Vasa vyoka ko bilumbu biwombo, bana ba Isaeli batona kunwana mvita ayi Bafilisteia. Basi Filisteia batwamisa va ntwala disodi diawu diba dizangama beni ayi diluta mangolo baba tedilanga Ngoliati. Bwilu ayi mwinya, nandi waba sevanga bana ba Isaeli ayi waba tendukanga: ‘Filanu disodi dimweka mwingi kanwana yama. Na kununga befu tunkwiza ba mimvika minu, vayi minu kununga, beno lunkwiza ba mimvika mitu.’

Davidi bo kayenda kabikila bidya kwidi zikhomba zyandi baba mu dingumba di masodi ma Isaeli bayenda mu mvita beni, nandi wuyuwa phila Ngoliati kaba sevila dikabu di Yave, diawu katubila: ‘Minu yinwana yandi!’ Vayi ntinu Sauli wunkamba: ‘Ngye wisi ko phunga yi kunwanisina disodi di thama banga Ngoliati.’ Davidi wumvutudila mu lufyatu: ‘Yave ma katsadisa.’

Sauli wumeka kuvwika Davidi bikhutu byandi bi kisengu kaba nwaninanga mimvita, vayi Davidi wunkamba kabika kwandi. Bosi Davidi wubonga fizika ayi wukuluka mu luvwa. Nandi wusola mamanya matanu mamboti ayi wutula mawu mu khutu’andi. Davidi wuduma zithinu mwingi kwe dengana Ngoliati. Ngoliati bo kamona phunga yi Davidi wunlenza ayi wutuba: ‘Fikama avava mwana ditoko. Bubu yi kukitula bidya bi zinuni ayi bibulu bi nsitu.’ Davidi kasa mona ko boma, vayi wumvutudila: ‘Ngye wunkwizila mu mbedi ayi dyonga, vayi minu mu dizina di Yave yi kukwizila. Kibila bakana ko befu wunnwanisa, angi Nzamb’itu. Diawu batu boso badi avava, ma bamona ti Yave nandi lutidi ke na mbedi ayi dyonga dyaku. Nandi wunkwiza tunungisa bubu.’

Davidi wutula dimanya mu fizika ayi wukuba diawu mu mangolo mandi moso. Mu lusalusu lu Yave, dimanya beni dikota va mbulu yi Ngoliati, wumyakama va tsi ayi wufwa. Basi Filisteia bo bamona abobo, batona kuduma zithinu mwingi kuvukisa myela myawu. Ngewu, wumfyatilanga Yave banga Davidi?

Bo Davidi kavonda Ngoliati, Ntinu Sauli wumbyeka nkulutu wu masodi mandi. Davidi wubwe nunga mimvita miwombo, diawu kayiza zabikinina beni. Bo kaba fuminanga mu mvita, bakyeto baba kundengananga mu malwimbu ayi makinu maba tuba: ‘Sauli wuvonda mafunda, vayi Davidi kumi di mafunda!’ Mawu mavanga Sauli kulanda nsoki ayi kuba kiphala mu Davidi ayi wutona kutomba phila kalenda kumvondila.

Davidi waba sikanga buboti ngitala. Diawu kilumbu kinkaka bo kaba sikila Sauli ngitala, Sauli wubonga dyonga dyandi ayi wukuba mwingi kavonda Davidi. Davidi wubutama mu thangu beni ayi dyonga diza simama mu kibaka. Bosi, Sauli wubwe meka khumbu ziwombo kuvonda Davidi. Diawu Davidi katinina ayi kakotila ku zithandu kuba myongo mwingi kaswama.

Sauli wunata 3,000 di masodi mwingi kufyela Davidi. Nandi wutona kukota mu mamanya manneni Davidi kaswamina. Masodi bakamba Davidi: ‘Luaku lumboti widi mwingi kuvonda Sauli.’ Davidi wumanga ayi kasa bika ko masodi mandi bavonda ntinu Sauli vayi wuzenga to mwa kitendi mu kikhutu kyandi ayi Sauli kasa bakula ko. Bobuawu Davidi wuba beni mu kyunda bo kakhambu monisa lukinzu mu kuzenga kikhutu ki Sauli ntinu wuba va luyalu Yave kasola. Bo katatuka vaba Sauli, nandi wutenduka ayi wunkamba: ‘Minu khanu yima kuvonda kibila yibedi lwaku lu kuvanga mawu vayi yisa mavanga ko’. Sauli wubalula mayindu mandi mu mamboti amomo Davidi kamvangila?

Mve. Sauli wutatamana kulenda Davidi. Kilumbu kinkaka Davidi ayi mwan’andi khazi Abisai bayenda mu malembi vaba lala Sauli. Abineli, nsungi wu Sauli mvandi ku tolo kaba. Abisai wukamba Davidi: ‘Lwaku lumboti twidi! Bika yinkimita dyonga khumbu yimweka to mwingi kafwa.’ Vayi Davidi wumvutudila: ‘Bika, Yave nafeka wala tadila mambu mandi. Angi ndoko tunata to dyonga dyandi ayi kingundu kyandi kannyinanga nlangu.’

Bo Davidi kaba va mbata mongo, nandi wutela mfumu masodi baba sunganga Sauli: ‘Abineli, kibila mbi be khambu kengidila mfumu’aku? Tala dyonga ayi kingundu kyandi.’ Sauli bo kayuwa ti yiba mbembo yi Davidi, nandi wumvutudila: ‘Ngye maba lwaku mwingi kuphonda, vayi sa vanga ko mawu. Minu yizebi ti ngye wunkwiza ba ntinu wu bana ba Isaeli.’ Bosi ko Sauli wuvutuka ku nzo’andi. Vayi bakana ko batu boso baba va dikanda di Sauli baba lendanga Davidi.