Yonatani nandi wuba mwana wutheti wu Sauli, ayi wuba disodi di ngolo dikhambu boma. Diawu Davidi katubila ti Yonatani vyokidi Kibala mu nzaki ayi vyokidi mangolo ke na Khosi. Kilumbu kinkaka bo Yonatani kadengana 20 ma basi Filisteia va mbata mongo nandi wukamba masodi mandi: ‘Tunkwiza nwana yawu, Yave na kutuvana kidimbu mwingi tuvanga ma katidi. Ba kutuba tutombuka mwingi tunwana yawu, bosi ma tutombuka mongo mwingi kuba nwanisa.’ Basi Filisteia bo batenduka: ‘Yizanu tunwana’ bosi bawu batombuka ayi banunga mvita beni.

Bo kaba mwana wutheti mu bana boso ba Sauli, mu nswa khanu nandi wuvinginina tat’andi va luyalu. Vayi Yonatani wuzaba ti Yave Davidi kasola mwingi kuvinginina Sauli va luyalu lu bana ba Isaeli, ayi nandi kasa mona ko Davidi nsoki. Angi nandi wuyiza ba nkundi ngolo wu Davidi. Bawu bakanikisa kukyebasana ayi kusalasana. Yonatani wuvana Davidi yunga kyandi, mbedi, ḿbasu ayi cinto mwingi kamonisa kikundi ki ngolo kaba mu Davidi.

Bo Davidi kaba tina ntinu Sauli, Yonatani wuyenda mwingi kakindisa Davidi ayi wunkamba: ‘Kindama ayi ba kibakala. Yave ngye kasodidi mwingi wuba ntinu ayi tat’ami zebi mawu buboti.’ Ngye mvaku tidi kuba nkundi wu lufyatu buka Yonatani?

Kilumbu kinkaka, Yonatani wubwe tula luzingu lwandi va kingela bo kabakula ti tat’andi Sauli waba tomba kuvonda Davidi. Nandi wukamba tat’andi: ‘Ngye kuvonda Davidi disumu dibobo wambakana; kibila ni dyambu dimbi kasa kuvanga ko. Yindula phila kama kusadisila.’ Sauli wufwema beni. Vasa vyoka ko bilumbu biwombo, Sauli ayi Yonatani bafwila mu mvita.

Bo Yonatani kafwa, Davidi wutomba Mefiboseti mwana wu Yonatani. Bo kambakula, nandi wunkamba: ‘Mu kibila ki kikundi kimboti tubedi na tat’aku, minu yimtomba ngye wuzinga yama, yinkwiza kusadisa mu zitsatu zyaku zyoso zi luzingu ayi wunkwiza dilanga va mesa mami yindilanga.’ Bukyedika, Davidi kasa zimbakana ko nkundi’andi Yonatani.

Bo Sauli kafwa, Davidi wuvingana va luyalu ayi 30 di mimvu kaba. Bwilu bunkaka mu mimvu mitheti mi luyalu lwandi, bo katelama kuyilu kibanga ki nzo’andi, nandi wumona nkyeto wungana waba kobila, nandi wunzinina ayi wutumisa nkyeto beni baba tanguninanga Beta Seba ku nzo’andi ayi wubundana yandi nyitu. Davidi wumeka kusweka disumu kavanga. Diawu katumina Ulia nnuni wu Beta Seba mu mvita ayi wukamba mfumu masodi katwika Ulia va ntwala ayi ba kumona ti zimbeni bama fikama bantatuka mwingi bamvonda. Ulia bo kafwa mu mvita beni, Davidi wiza kwela Beta Seba.

Angi Yave bo kamona mamoso maba vyoka, diawu kafidila mbikudi Natani kwidi Davidi. Natani wukamba Davidi mu nongo: ‘Dibakala dimweka wuba busina ayi mamemi mawombo, angi dibakala dinkaka wuba kiphumbulu ayi mwana dimemi dimweka to diba yandi kaba zolanga beni. Vayi dibakala wuba busina wubonga mwana dimemi beni kiphumbulu kaba zolanga.’ Davidi wufwema beni bo kayuwa mawu ayi wutuba: ‘Kisina beni khanu kafweti fwa!’ Bosi Natani wusundudila Davidi nongo ayi wunkamba: ‘Ngyewu kisina beni!’ Davidi wukotinina kyunda ayi wukikana disumu kavanga: ‘Bukyedika Minu yibe vola disumu di ngolo kwidi Yave.’ Disumu beni ditwadisila Davidi ayi dikanda dyandi ziphasi ziwombo. Yave kasa vonda ko Davidi, vayi wunsembila mu phila yinkaka kibila Davidi wu kikulula ayi wufungula mambu moso.

Kuntwala, Davidi wudinda mwingi katunga nzo yinlongo yi Yave, vayi Yave wusola Salomon mwana wu Davidi mwingi katunga yawu. Diawu Davidi katona kukubikila byuma mwingi mwan’andi katungila ayi wutuba: ‘Nzo yinlongo yi Yave yifweti lezama. Bo Solomon kadi kilezi, yifweti kunkubikila byuma byoso.’ Davidi wuvana zimbongo ziwombo, wutomba batu bazebi tunga buboti, wukubika mvandi wola, palata ayi mabaya mamboti mawombo maba fuminanga ku Sidoni. Ava kafwa, Davidi wumonisina Salomon phila kafweti tungila nzo beni. Nandi wunkamba: ‘Yave matsadisa kukubika byuma ayi kufikula phila wufweti tungila nzo beni. Fyatila mu nandi ayi nandi wala kusadisa. Bika mona boma vayi ba kibakala ayi tula myoko mu kisalu.’