Bo Salomo kabiala ntinu wu Isaeli, Yave wunyuvula: ‘Mbi wuntomba minu yi kuvana?’ Salomo wutambudila: ‘Minu yikhidi ditoko, ayi yisa zaba ko ma kuvanga. Diawu phana luzabu mwingi yibaka bu kutwadisila dikabu diaku.’ Yave wumvutudila: ‘Bo makhambu dinda busina vayi luzabu, minu yinkwiza kukitula mutu wulutidi luzabu ayi busina va ntoto woso. Ayi ngye kutumamana minsiku myami, ngye wala zinga mimvu miwombo’

Salomo wutona kutunga nzo yinlongo ayi wusadila wola, palata, mabaya ayi mamanya. Bivevi na bivevi di babakala ayi bakyeto bakivana mu kisalu ki kutunga nzo yinlongo yi Yave. Sambwadi di mimvu mivyoka biza mana kutunga, ayi yiba thangu mwingi kuyundula nzo beni kwidi Yave. Bawu bakubika meza yi kuvikila mikhayilu ayi bavika mikhayilu miwombo. Salomo wufukama va ntwala meza yi mikhayilu ayi wusambila: ‘A Yave, yizebi ti nzo ayiyi yisi ko yinneni ayi yimboti mu kutala phila wuzangimina, vayi lemvuka kikana mbwongimin’itu ayi minsambu mitu.’ Bwidi Yave kamwena nsambu Salomo kavanga? Bukyedika ti Yave wukikana nsambu beni. Kibila bo Salomo kamana kusambila, mbazu yifumina kuyilu yikuluka ti vaba mikhayilu nandi kakubika ayi mikhayilu beni mimana kuvya. Bo bana ba Isaeli bamona mawu, bayangalala beni.

Ntinu Salomo, wuba beni wuzabakana ku Isaeli ayi zitsi zinkaka mu kibila ki ndwenga voti luzabu luwombo Nzambi kamvana. Batu baba fuminanga kinanu baba kwizanga kwidi nandi mwingi kudedikisa mambu mawu. Ntinu wunkyeto ku Saba, mvandi wuyuwa tsangu yi luzabu lu Salomo ayi wuyiza mwingi kanthota mu byuvu bi phasi. Mimvutu kayuwa ayi ma kamona mamvanga kutuba: ‘Minu yisa kikana ko bo batu bakhamba, vayi minu veka yima visa ti luzabu lwaku kuvyoka mu phila bakhambila. Bukyedika ti Nzambi’aku Yave wukusakumuna beni.’ Bukyedika, thonono yi luyalu lu Salomo yiba yimboti ayi bana ba Isaeli baba beni mu mayangi. Vayi kuntwala mambu matona kubaluka.

Bo Salomon kaba bwongiminanga Yave, ndembama yiba yiwombo ku Isaeli. Angi bo katona kukwela bakyeto ba zitsi zinkaka baba sambilanga zinzambi zi bitumba, nandi wutona kubalula mavanga ayi kusambidila zinzambi beni zi bitumba. Yave wufwema beni ayi wunkamba: ‘Kimfumu ki Isaeli kyambotuka va dikanda dyaku ayi yinkwiza kaba kiawu khonzo wadi. Khonzo yilutidi yala vana yawu kwidi wumweka mu bisadi byaku mwingi kayala, angi dikanda dyaku mwa dingumba to bala yala.

Yave mwingi kasudikisa buboti makani maba yandi, wufila ḿbikudi Ahia mwingi kadengana mu nzila Yelobami kisadi ki Salomo waba kwenda ku buala bunkaka. Ḿbikudi Ahia wuzenga dizwela dyandi mu 12 di bitini ayi wukamba Yelobami: ‘Yave wunkwiza botula kimfumu ki Isaeli va dikanda di ntinu Salomo ayi wunkwiza kaba kyawu konzo wadi. Tambula ngyewu kumi di bitendi mu bitini byoso yibe zenga. Mansundula ti ngye wunkwiza yadila kumi di mimvila mi Isaeli. Ntinu Salomo bo kayiza zaba mawu, wutona kukuka Yelobami mwingi kamvonda! Diawu nandi katinina ku Ngipiti. Kuntwala bo Salomo kafwa, mwan’andi Lehabami wiza byala ntinu. Bosi ko Yolobami wisa vutuka ku Isaeli.

Bakhulutu ba Isaeli bakamba Lehabami: ‘Ngye kutwadisa batu buboti, bawu bala kwikama mu ngye ayi bala kutumukina.’ Nandi kasa bakuwila ko angi wulandakana malongi bakundi bandi ba matoka bankamba: ‘Ngye fweti ba lukasu kwidi batu mwingi ba kumona boma. Wuba sadisa bisalu bi ngolo kuvyoka mavanga tat’aku.’ Kyadi beni ayi kyunda kibila malongi amomo kalandakana, mavanga batu boso bambalukila, bakaba kintinu ayi babyeka Yelobami ntimu wu kumi di mimvila wuyiza zabakana ntinu wu Isaeli. Mimvila mi myodi minkaka mi yiza zabakana kintinu ki Yuda, bawu to baba mu luyalu lu Lehabami. Bukyedika 12 di mimvila mi Isaeli mi yiza kabuka.

Yelobami kabasa bikanga ko batu baba ku khonzo’andi mwingi benda babwongimina Nzambi ku Yelusalemi kuba ntinu Lehabami ayi nzo yinlongo. Zebi mu kibila mbi? Nandi boma kaba, ayi kaba mwenanga ti balenda vutuka ku khonzo yi Lehabami ayi kumbwela myoko. Mambu mbi kavanga? Nandi wuvanga bitumba byodi bi wola ayi wukamba dikabu diandi dyoso: ‘Yelusalemi kinanu wombo, beno mulenda bwongimina kwinu akuku nzambi.’ Diawu batu batona kubwongimina bitumba bi wola, vayi bazimbakana Yave Nzambi yikyedika.