Mintinu myoso bayadila kintinu ki Kumi di mimvila di Isaeli baba mavanga mambi, vayi ntinu Akabi nandi wuluta. Kibila nkyeto kakwela baba tedilanga Isabeli, wumvukumuna kusambila nzambi yi luvunu baba tanguninanga Bali. Akabi ayi nkazi’andi, bawesa tsi yoso mbwongimini yi Bali ayi wutatamana kuvonda mimbikudi mi Yave. Mbi Yave kavanga? Nandi wufila mbikudi Elia mwingi kazabikisa mayindu mandi kwidi ntinu Akabi.

Elia wukamba ntinu Akabi ti mu kibila ki mavanga mandi mambi, Yave kalasa nokisa ko zimvula mu mimvu mitatu ayi ndambu ku Isaeli. Va vyoka mimvu mitatu mbongo bavata yimana kuvya ayi nzala yiza ba yiwombo ku Isaeli. Yave wubwe fila mbikudi Elia kwidi Akabi. Ntinu Akabi wukamba Elia: ‘Mambu moso amama mu kibila kyaku mankwizila.’ Elia wumvutudila: ‘Bakana minu ko yikanga zimvula, vayi ngyewu mu kubwongimina Bali nzambi yi luvunu.’ Angi bo wumfinda ziphaka twambotula kivisa. Tumisa batu boso ayi mimbikudi mi luvunu bansambilanga Bali ku mbata mongo bantanguninanga Kalimeli.

Batu bakutakana ku mongo beni ayi Elia wutuba: ‘Yuwanu benu boso, bubu twanzaba nani Nzambi yi kyedika mufweti landakana Yave voti Bali. Diawu twantumisa 450 di mimbikudi mi Bali mwingi bakubika mikhayilu ayi badinda kwidi nzambi’awu. Minu mvami yankubika myami ayi yandinda kwidi Yave. Nzambi yinkwiza vana mvutu mu kufila mbazu yawu Nzambi Yikyedika.’ Batu boso bazola diyindu beni ayi bakikana.

Mimbikudi mi Bali batona kudinda kwidi nzambi’awu: ‘Oh Bali, wututambudila, lemvuka bika kutufwisa tsoni!’ Bo nzambi’awu kakhambu tambudila, Elia wiza tona kuba sakinina: ‘Tala, bwelanu kunanguna zimbembo ḿba Bali ku kilo ki tolo kadi kasinkuwa ko, voti bafweti kunkotula kwidi mutu wunkaka.’ Bawu batatamana kutenduka ti bwisi buyila ni mvutu basa baka ko.

Elia wiza kubika mikhayilu myandi va mesa baba vikilanga myawu, wiza tula biswadi ayi wutuma batu badukula vawu nlangu wuwombo. Bosi wutona kusambila: ‘A Yave, bika batu boso bubu bazaba ti ngyewu to Nzambi yikyedika.’ Mu thangu beni, Yave wufila mbazu yimana kuvika mikhayilu Elia kakubika. Batu boso bayitukila va kimweka: ‘Ahh, bukyedika Yave nandi to Nzambi yikyedika.’ Bosi Elia wukamba batu boso: ‘Vondanu mimbikudi myoso mi luvunu mi Bali, ni wumweka kabika sobila.’ Mu kilumbu beni 450 di mimbikudi mi Bali bamana kufwa.

Bo mwa dituti di mvula dimonika ku diyilu ku khonzo yi ḿbu, Elia wukamba ntinu Akabi: ‘Kivuka kingolo kinkwiza, diawu kubika dikalu dyaku mwingi wufika vitila ku nzo’aku.’ Matuti mamana kunomba, phemo yingolo ayi mvula yiza tona kunoka. Akabi wudumisa dikalu mu mangolo mandi moso. Vayi mu lusalusu lu Yave Elia wuduma zithinu ayi wuvyoka dikalu diba ntinu Akabi. Mu mbwenu’aku mambu moso mamana? Tunkwiza bwela kuzaba mawu.

Isabeli bo kayuwa mamonikina mimbikudi mi Bali, wufwema beni ayi wufila batu mwingi bakamba Elia: ‘Yono wala fwa, buka bufwididi mimbikudi mi Bali.’ Elia wumona beni boma ayi wutina kuba zithandu. Nandi wusambila: ‘Yave yima vonga kutovuka. Bika to yifwa kwama.’ Elia bosi wiza lala kutsi nti.

Mbasi yi yiza kunkotula mu malembi: ‘Kotuka mwingi wudya.’ Elia wukotuka ayi wumona va khonzo dipha ayi mbungu yiba nlangu wu kunwa. Bo kadya ayi kanwa nlangu beni, wiza bwe lala. Mbasi wubwe kunkotula ayi wunkamba: ‘Bwe dya mwa nkadu mwingi wubaka mangolo ma kudyatila ayi kuvyokisila kilumbu akiki.’ Elia wubwe dya mwa nkadu. Bosi nandi wutelama ayi wudyata 40 di bilumbu bwilu ayi mwinya ti kavitila ku mongo Holebi. Bo kavitila kuna, nandi wuswama ku tsi dimanya dinneni mwingi kalala. Yave wuyoluka yandi ayi wunyuvula: ‘Mbi wumvanga akuku?’ Elia wutambudila: ‘Bana ba Isaeli basinsadila ko mambu bawu bakanikisa kuvanga mu dizina dyaku. Bawu bama mana kutolumuna bibwangu byoso tukubwongiminanga ayi kuvonda mimbikudi myaku. Buabu minu bantomba kuvonda.’

Yave wubwe kamba Elia: ‘Botuka avava ayi yenda kala va mbata mongo.’ Momu thangu beni Elia kazimbukila theti phemo yingolo, bosi nyikunini yinneni yi ntoto ayi mbazu. Elia wuyuwa mvandi mbembo yi mutu yaba koluka mu malembi. Diawu kabongila yunga kyandi wiza fuka ntu ayi kizizi. Bosi Yave wunyuvula kibila mbi kaba tinina. Elia wutambudila: ‘Kibila minu veka to yibe syala yikhidi bwongimina Yave Nzambi.’ Angi Yave wumvutudila: ‘Bukyedika, ngye wisi ko ngye to besyala, vayi mvandi 7.000 di batu ku Isaeli bakhidi kumbwongimina.’ Yenda ayi sola Elisa mwingi kaba mbikudi va bwangu kyaku.’ Mu thangu beni Elia wuyenda mwingi kusadila mambu Yave kankamba. Ngye mvaku, widi lufyatu ti Yave wala kusadisa na kutuma wuvanga mambu nandi kantomba? Ndoko theti tubakula dyambu dinkinza dimonika bo mvula yikhambu noka ku Isaeli.