Bo zimvula zikangama ku tsi yi Isaeli, Yave wukamba Elia: ‘Yenda ku Salapeta, kuawu nkyeto wumweka wufwilu nnuni kala kuvanina bidya.’ Bo Elia kavitila va mwelo wu divula beni nandi wumona nkyeto waba nanguna bitini bi mabaya. Elia wudinda nkyeto beni nlangu mwingi kanwa. Bo kayenda kwe landa nlangu beni, Elia wubwe nkamba kannatina dipha mwingi kadya. Angi nkyeto beni wumvutudila: ‘Minu yisi ko dipha ni dimweka mwingi kuvana. Vayi yidi mwa farinha ayi nkadu mafuta yinkwiza vangila dipha mwingi minu ayi mwan’ami tubaka bubu ki kulalila. Elia wunkamba: ‘Yave wukhanikisa ti ngye kuphangila dipha mwingi yidya, muna farinha ayi mafuta maku malasa mana ko ti zimvula zyala tona kunoka.’

Nkyeto beni wukota ku nzo ayi wuvanga dipha mwingi kuvana mbikudi wu Yave. Dedi bo Yave kakanikina nkyeto beni ayi mwan’andi, basa khambu ko bidya. Ti zimvula zibwe tona kunoka, kilundulu kyandi ki farinha ayi ki mafuta kiba kiwala kiwala.

Angi dyambu di phasi diyiza monika! Mwana wu mfwizi beni, wiza bakana kimbevo ki ngolo ayi wiza fwa. Nkyeto beni wudinda Elia lusalusu. Elia wunanguna mwana beni ayi wunnata ku quarto yiba ku kibanga ki tsuka, wunlalisa va kika ayi wusambila: ‘Yave, lemvuka vutula moyo mu mwana awuwu mwingi kabwe zinga.’ Mu mbwenu’aku, diba dyambu diphasi mwingi Yave kuvulubula mwana beni? Dedi bo tuzabidi tona nza yivangama ti mu thangu beni, ni mutu wumweka wufwa wubwe vutuka mwingi kazinga. Dyambu dinkaka, nkyeto beni ayi mwan’andi basa ba ko basi Isaeli.

Angi mwana beni wuvutuka kubwe zinga ayi kuvumuka! Bosi Elia wuzabikisa ngudi’andi: ‘Tala, mwan’aku ma vulubuka.’ Nandi wuba beni mu mayangi ayi wukamba Elia: ‘Bukyedika, ngye widi mutu wusolwa kwidi Nzambi! Yizabidi mawu kibila mamoso ngye wunkoluka, madi mambu Nafeka Nzambi katumini mwingi wuyoluka.’

Va nela kibanga kyandi kiba ku divula di Yizileli, ntinu Akabi wumona ayi wuzinina tsola yi vinu yi dibakala baba tanguninanga Naboti. Akabi wudinda mwingi Naboti kansumbisa tsola beni, vayi nandi wumanga kibila Yave wukandimina bana ba Isaeli kusumbisa kikuta ki dikanda dedi ntoto voti zitsola. Akabi wudasuka beni ayi wumanga kudya ni kubasika ku nganda mu kibila Naboti kamanga kunsumbisa tsola beni.

Isabeli nkazi’andi wuba mavanga mambi bo kazaba mawu wukamba Akabi: ‘Ngye ntinu wu Isaeli, ngye wulenda baka byabyoso wuntomba. Minu yinkwiza botula mu mangolo tsola yi Naboti mwingi yiba yaku.’ Isabeli bosi wusonikina bakhulutu bankaka ba tsi minkanda mwingi bavuna ti Naboti wutubila Nzambi mambu mambi, diawu bafweti kumvondila mu mamanya. Zimfumu beni balandakana Isabeli ayi bavonda Naboti. Bosi Isabeli wukamba Akabi: ‘Naboti mafwa! Tsola yi vinu yeka yaku.’

Naboti kasi ko nandi mutu wutheti wukhambu kibila Isabeli kavondisa. Bawombo mu bawu baba bisadi bi Yave. Nandi bitumba kaba sambilanga ayi mambu mankaka mambi kaba vanganga. Yave waba monanga mambi moso kaba vanganga. Mbi kavanga mu nandi?

Bo Akabi kafwa, mwan’andi Yolami wuvingana va luyalu. Yave wufila dibakala baba tanguninanga Yehu mwingi kufutisa Isabeli ayi dikanda dyandi mambi moso bavanga.

Yehu wumaka mu dikalu dyandi ayi wuyenda ku Yizileli kuba kalanga Isabeli. Yolami bo kamona Yehu, wuyenda ndengana mu thinu ayi wunyuvula: ‘Bwidi, ndembama yidi?’Yehu wumvutudila: ‘Tulendi ba ko ndembama kibila ngudi’aku kasimbika ko kuvanga mambu mambi.’ Yolami bo kabalula dikalu mwingi kavutuka Yehu wumbasula ku mbusa, ayi wufwa.

Boso Yehu wuvitila ti ku nzo yi Isabeli. Bo kazaba ti Yehu waba fikama ku nzo’andi, nandi wutona kuvanga minlengi myandi ayi wumaka ku kibanga kitsuka va ndeko nela. Yehu bo kavitila ti va kaba, Isabeli wuvana Yehu mboti mu lunangu. Yehu wukamba masodi mandi: ‘Dodulanu nandi ku tsi mwingi kafwa.’ Bawu bannunguna va nela yi kibanga ki tsuka, ti va tsi ayi buawu kafwila!

Yehu kasa sukila ko vovo, wubwe vonda 70 di bana ba Akabi ayi wumanisa mbwongimini yi Bali. Wisimmona ko ti Yave wummonanga mamoso mamvyoka, ayi mu thangu yifwana nafeka wumvananga mvutu kwidi batu bavanganga mambi?