Batu bawombu ba bika kutakana mu binganga biawu kibila basa baka ko mbombolo ayi mimvutu mi lufyatu mi byuvu biawu. Kibila mbi fweti landikinina zikhutukunu zi Zimbangi zi Yave? Mbi wala dengana kuna?

Mayangi mu kuba na batu badi luzolo ayi baḿvwanga ǹkinza mu baǹkaka. Baklisto ba theti baba balulama mu bimvuka ayi baba vanganga zikhutukunu mwingi kubwongimina Nzambi, kulonguka Kibibila ayi kukindisa baǹkaka. (Ebeleo 10:24, 25) Mu zikhutukunu zi mayangi ayi zi luzolo, baba monanga nyenzi ku ba kithwadi na bakundi bakyedika: Zikhomba ziawu zi kiphevi. (2 Tesalonika 1:3; 3 Yoane  14) Befo tuǹlandanga ǹtungulu’awu ayi tuḿmonanga mayangi buka bawu.

Ndandu yi kuzingila mu miǹswa mi Kibibila. Buka mu thangu yi khulu, babakala, bankyeto ayi bana balezi baǹkutakananga va kimweka. Minlongisi mi ndwenga baǹsadilanga Kibibila mu kutusadisa tuzaba bulandikinina miǹswa mi Kibibila lumbu ka lumbu. (Deutelonomi 31:12; Nehemia 8:8) Batu boso balenda koluka mu dyambu kumonisa kiminu kiawu, mu kuvutula miḿvutu ayi mu kwimbila miǹkunga.—Ebeleo 10:23.

Lusakumunu kukindisa kiminu kyaku mu Nzambi. Ḿvwala Polo wu tuba mu kimvuka kimweka mu thangu’andi: ‘Bila phwila yiwombu yidi yi kulumona, mwingi kumu samuna mambu ma phevi, mu dyambu mu ba batu ba kwikama mu kiminu; ayi mwingi tukindasana befu na befu mu kiminu mwidi ayi kyo befu mvitu twidi.’ (Loma 1:11, 12) Mu zikhutukunu, tuǹkindisananga kiminu bo tuǹkwangalalanga na zikhomba.

Tu kutumisa wu kutakana yitu mu lukutukunu luǹkwiza mwingi wumona kivisa ki mambu wu matanga va yilu. Ndizulu yi mboti tu kuvana! Ba kongolanga ko makaba mu zikhutukunu zitu zyoso.

• Mu zikhutukunu zitu, ǹtungulu mbi tuǹlandakananga?

• Bwidi kulandakana zikhutukunu zitu zilenda ku tusadisila?

Kuba ti ǹsitu tuḿvyoka, mvula tuǹnokunu, mwinya tuǹtebulu, phasi zi luzingu voti phokongo yi kisalu tummona, angi tu bikanga ko kwenda mu zinkutukunu. Kibila mbi Zimbangi zi Yave bamvangilanga ǹtindu mangolo amomo ma kukutakana?

Mu dyambu di mamboti mitu. Mu matedi kithwadi ki zikhomba mu kimvuka, ḿvwala Polo wu tuba ti tufweti ba ‘nzolasani ye mu baǹkaka.’ (Ebeleo 10:24) Bikuma abyobyo bimmonisa ti tufweni zaba mboti zikhomba zitu. Biawu, bimmonisa ǹkinza wu tuḿvwanga mu baǹkaka. Mu kuzaba makanda maǹkaka ma baklisto ma nunga mu malema dedi ma tummona, malenda kutusadisa tununga.

Maǹtwadisanga bakundi bamboti. Mu zikhutukunu zitu, tumonanga ko zikhomba buka batu ba tuzebi, angi bakundi ba lozolo. Mu zikhumbu ziǹkaka tuḿbanga yawu mwingi tusakana mboti. Bwidi kukala va kimweka na zikhomba zitu ku tulandukila? Tuǹlongukanga bwidi bu bwedila lukinzu mu baǹkaka, ayi kindisa luzolo lwitu. Diawu twidi ba kubama mu kusadisa zikhomba zitu bo bamonokono mambu. (Zingana 17:17) Mu kukangala na zikhomba zitu zi kimvuka, yawu mpila tukimonisinanga ǹkinza.—1 Kolinto 12:25, 26.

Tu kudinda wu vanga kikundi ayi bantu bamvanganga luzolo lu Nzambi. Wala baka bakundi mu Zimbangi zi Yave. Bika kubikidila mambu maǹkaka ma kuvanga wu bika kangala yitu.

• ◼ Bwidi tulenda bakila ndandu mu kintwadi ki zikhutunu?

• Thangu mbi tidi zabila kinkomba kitu mu lukutukunu?

Mu zikhutukunu zi baklisto batheti, baba kwimbilanga, sambilanga ayi baba sa landakananga ko bikhulu mu thangulu yi Kibibila. (1 Kolinto 14:26) Mawu wala mona mu zikhutukunu zitu.

Malongi ma bongolu mu Kibibila madi ǹkinza lumbu ka lumbu. Va tsuka yi kadika sabala, bimvuka byoso baǹkutakananga mu kulandakana Dilongi di Kibibila mu 30 di minutu mwingi kuzaba bwidi Masonoko Manlongo ma tusadisila mu luzingu. Befu boso tuǹlandakananga matangu ma Kibibila mu Bibibila bitu. Bosi, tuǹlandakananga Ndongukulu yi Kibanga ki Nsungi, yiḿvangiminanga mu kilokolo ki mweka. Ayi wosokwa mutu kalenda nanguna koko mwingi kukoluka. Tuǹsadilanga Kibanga ki Nsungi ki kulongikila mu kimvuka. Kiawu mvandi ki tusadisanga kuzingila malongi ma Kibibila. Mu 110.000 (di bivevi) di bimvuka bidi mu nza yimvimba, baǹlongukanga malongi ma mweka.

Tuḿbakanga lusadusu bu longila buboti. Diawu kadika kimvuka va khati Sabala, banlandakananga lukutukunu Nzingulu Ayi Kisalu Kitu ki Buklisto, lwidi lukutukunu lu kabuka mu bikhuku bitatu. Masolo ayi malongi mambongulwanga mu nkanda wuthwadusulu tuntambulanga. Kikhuku kitheti Kyuka Kidi mu Dyambu di Nzambi, ki tusadisanga kuvisa ayi kuzingila matangu ma Kibibila ma sabala, batu boso mu kimvuka babe tanga. Kikhuku kimmwadi, Pisuka mu Kisalu ki Kusamuna; kidi zimbonosonu mu phila tulenda kolukila na batu bankaka matedi Kibibila. Ayi Ntwadisi wutu landudilanga mu dyambu kutu vana malongi mwingi tubwela pisuka. (1 Timoteo 4:13) Kikhuku ki tsuka Zingila mu Buklisto, kitu sadisanga kuzaba bwidi tulenda zingila mu minswa mi Kibibila lumbu ka lumbu. Tumbanga mvandi disolo di byuvu ayi mimvutu mu dyambu tuluta visa buboti kyedika ki Kibibila.

Bo wela kwenda mu zikhutukunu zitu, bu kyedika ti wela kwituka mu phila yimboti yi longila Kibibila.—Yesaya 54:13.

• Mbi wulenda kuwa mu zikhutukunu zi Zimbangi

• Mu zikhutukunu zitu, lukutukunu mbi wuǹtomba landakana?

Ma mona zi foto zidi mu mwa buku ayiyi phila Zimbangi zi Yave baḿvwatilanga bo baǹkwendanga mu zikhutukunu? Kibila mbi tuḿvwatilanga bu fweni?

Mwingi kumonisa Nzamb’itu lukinzu. Bu kyedika, Nzambi ka talanga phwatulu ko. (1 Samueli 16:7) Angi bo tuǹkutakananga mu kuḿbwongimina, mayindu mitu ma kumonisa lukinzu mu nandi ayi zikhomba zitu. Boti kunzo lufundusu ba tutumisini, tuǹtombanga vwata mboti mu dyambu kinzika ḿfundusi. Diawu, tuḿvwatilanga buboti bo tuǹkwendanga mu zikhutukunu mu dyambu kukinzika ‘Ḿfundusi wu ǹtoto wumvimba’ Yave Nzambi, ayi bwangu tu kuḿbwongiminanga.—Ngenesi 18:25.

TMwingi kuyindula miǹswa miǹnatisa luzingu lwitu. Kibibila kiǹtuba ti baklisto ba fweti vwata mboti ayi mu lukinzu. (1 Timoteo 2:9, 10) Kuvwata mboti kuǹsundula kumanga phwatulu yi khambu fwana, yiḿmonisanga nyitu ayi miḿvwatu mi khufi. Angi, kuba kikansansa ki mboti ki tusadisa mu sola miḿvwatu mi mboti mi manga luta mu nyitu ayi miǹtula divunza mu nyitu. Miǹswa beni milenda bikila mutu ka mutu kasola bo katidi vwatila. Kheti mu zikhadulu zitu zimboti, tulenda zitisa Nzambi. (Tito 2:10; 1 Petelo 2:12) Phwatulu’itu yimboti bo tuǹkwendanga mu zikhutukunu, yilenda sadisa bantu ba kinzika mbwongiminu’itu kwidi Yave.

Nketi wisiko mimwatu dedi midi mu zifoto azizi, bika kutina kwenda mu zikhutukunu. Mimvwatu mitu misi ǹtombila ko mi ba mithalu, vayi mi fweti ba misukulu ayi miḿmonikina mboti.

• Kibila mbi phwatulu’itu yididi ḿfunu bo tuḿbwongimina Nzambi?

• Miǹswa mbi miǹtwadisanga phwatulu’itu?

Bo ti ngyewu wuǹlongukanga Kibibila na Zimbangi zi Yave, muna wuǹkubikanga kadika dilongi tuǹkwiza longuka. Buawu fweni silanga, bo wuǹkwenda mu zikhutukunu mu dyambu wu baka ndandu mu malongi ma wuǹkuwa. Kulandakana mawu lumbu ka lumbu, wala baka ndandu yi lutidi.

Sola vama ayi thangu tidi longukila. Thangu mbi wuḿbanga ǹsika mwingi wu longuka? Va meni bosi wuǹtona kusala, voti va bwilu bana ba kulala? Boti wisi ko thangu yiwombo yi longukila, kubika thangu yi fweni ayi ka wu bikila mambu maǹkaka ma kuvunzikisa. Tomba vama va khembu lusuku, zimisa bisengo bi miziki, lumweno lu kimona meso ayi ǹsinga mayo. Kusambila bosi wuǹtona longuka, ma kusadisa wu bwisa mayindu maku mu dyambu di Nzambi.—Filipi 4:6, 7.

Tula bidimbu ma wuǹkubika mwingi wuvana mvutu. Theti, zaba ǹtu dyambu. Yindula ǹtu dyambu, ove fyonginina bwidi mwa miǹtu mi dyambu miǹlandudila ǹtu wonso wu dyambu ayi landikinina zi mfikula ayi byuvu bi mputukulu bimmonisa malongi ma ḿfunu. Bosi, tanga kadika kindwika ayi bakula miḿvutu mi byuvu. Tomba voti tanga matanga ma Kibibila ayi yindula bwidi mawu maǹlandudila dilongi. (Mavanga 17:11) Ngye kubakula ḿvutu, tula kidimbu mu bikuma biḿfunu byela kusadisa tebuka moyo mu lukutukunu. Wulenda nanguna koko ngye kutya, ayi vana ḿvutu mu bikuma byaku.

Kulonguka malongi maswasana mu kadika lumingu mu zikhutukunu, mala bwela mayindu ma mona mu kyuka ki luzabu lwaku lu Kibibila.—Matai 13:51, 52.

• Kifu mbi fweti ba mwingi wukubamanga mboti mu zikhutukunu?

• Bwidi wulenda kubimina mwingi wu vana ḿvutu mu zikhutukunu?

Tona mu thangu yi khulu, Yave wutomba makanda moso ba vyokisa thangu va kimweka, mwingi ba kindasana mu kiphevi. (Deutelonomi 6:6, 7) Diawu makanda ma Zimbangi zi Yave bambikilanga thangu mu kadika lumingu mwingi kubwongimina Nzambi, bankolukanga mu mayangi mambu ma kiphevi ba vwidi nkinza mu luzingu. Kheti ngye veka wunkalanga, wulenda vanga ndongulu’aku yi Kibibila mwingi wufikama Yave. Wulenda sola dyambu di Kibibila di lutidi mfunu mu ngyewu mwingi wu longuka.

Yawu, thangu yi kufikimina Yave. ‘Lufikama Nzambi, nandi wala kulufikama.’ (Yakobi 4:8) Tulenda zaba buboti Yave befu kulongukanga matedi zikhandulu ayi mavanga mandi mu zi tsyelo zi Kibibila. Phila yi khembu phasi yi kutonina vanga mbwongimini va dikanda, yidi mu kutanga Kibibila mu mbembu yinangama, wulenda landakana ndyatusulu yi kadika sabala mu lukutukunu Nzingulu ayi Kisalu Kitu ki Buklisto. Kadika mutu va dikanda kalenda tanga mwa lutangu lu vyakana lu Kibibila, bosi baboso balenda tuba ndandu babeki mu matangu beni.

Yawu, thangu yi kufikimina kadika mutu va dikanda. Banuni ayi bakazi, matata ayi bana bambwelanga kukifikama bo banlonguka Kibibila va kimweka. Yifweti ba thangu yi mayangi ayi yi ndembama, thangu yimfunu kadika lumingu. Matata balenda sola mambu malutidi nkinza mu ndyonzukulu yi bana bawu, voti balenda sadila Kibanga ki Nsungi ayi Despertai! voti khond’itu mayo jw.org. Balenda longuka bwidi bu kukindimina mu ziphukumunu ziwombo bana bandengananga mu kikola. Balenda kubika minkunga mi zikhutukunu zinkwiza ayi kudya va tsuka yi mbwongimini va dikanda.

Mbwongimini beni yi Yave yimvangiminanga va dikanda mu kadi lumingu, yala sadisa baboso ba yangalala mu longuka dyambu di Nzambi ayi nandi wala sakumuna mangolo mawu.—Minkunga 1:1-3.

• Kibila mbi tumbotulanga thangu mwingi kuvanga mbwongimini va dikanda?

• Mu thangu beni, bwidi matata balenda vangila baboso ba yangalala?

Kibila mbi batu abobo mu zi foto badidi mayangi? Lukutukunu lunneni banlandakana. Buka bisadi bi Nzambi mu thangu yi khulu baba vanganga khumbu zitatu mu mvu zikhutukunu zinneni, befu mvitu tuziteminanga mu mayangi. (Deutelonomi 16:16) Mu kadika mvu tumbanga minkungi mitatu: zikhutukunu ziwadi zi divula zi kilumbu ki mweka, ayi lukutukunu lu mavula lu bilumbu bitatu. Ndandu mbi tumbakanga mu minkungi beni?

Ziawu zinkidisanga kinkomba kitu. Buka bana ba Isaeli ba yangalala mu zitisa Yave mu “zikhutukunu zinneni,” befu mvitu tuntyanga kubwongimina Nzambi mu zikhutukunu zinneni. (Minkunga 26:12; 111:1) Tumbakanga phwasa yi kuzaba Zimbangi zi Yave zi bimvuka binkaka voti zi tsi zinkaka. Vayi thangu tumvundanga mwingi kudya, yawu thangu tumbakanga phwasa yi kumonisina luzolo ayi kuzabasana ayi bankaka mu zikhutukunu beni. (Mavanga 2:42) Muawu, tummonanga luzolo lu kithwadi ki ‘kikomba kitu,’ mu nza yimvimba.—1 Petelo 2:17.

Ziawu zi tusadisanga kukonzuka mu kiphevi. Mu zikhutukunu beni bana ba Isaeli baba bakanga ndandu mu kuvisa dyambu di Nzambi. (Nehemia 8:8, 12) Befu mvitu, tunkinzikanga malongi ma Kibibila ma tumbakanga mu zikhutunu zi zinneni. Kadika lukutukunu lwidi ntu dyambu wumbongulwanga mu Kibibila. Mu nzila yi malongi, mu bitini bi malongi ayi zimbonosonu zimboti, tunlongukanga bwidi bu kuvangila luzolo lu Nzambi mu luzingu lwitu. Tunbakanga khindusulu bo tunkuwa binongo bi batu banunga zithotolo mu matedi luzingu lu buklisto. Mu zikhutukunu zi mavula tummonanga bifwani bi bongulu mu binongo bi Kibibila ayi bammonisanga mfunu madi mu luzingu lwitu. Mu zinkhutukunu beni bambotikanga batu batidi kukivana kwidi Nzambi.

• Kibila mbi zikhutukunu zinneni zididi thangu yi mayangi?

• Ndandu mbi wulenda baka ngye kulandakana zikhutukunu zinneni?

Ava Yesu kafwa nandi wutuba: ‘Ayi zitsangu azizi zimbote zi Kintinu zyela longo mu nza yimvimba mwingi kuvana kimbangi kwidi batu ba makanda ma zitsi zyoso, ayi bosi tsukulu yi nza yala kwiza.’ (Matai 24:14) Vayi bwidi kisalu ki kusamuna mu nza yimvimba kinkwiza vangimina? Mu kulandakana ntungulu Yesu kabika bo kaba va ntoto.—Luka 8:1.

Tuntombanga batu mu zinzo ziawu. Yesu wu longisa minlonguki myandi bu kusamunina tsangu zimboti mu zinzo. (Matai 10:11-13; Mavanga 5:42; 20:20) Minsamuni beni mitheti, ba tambula bizunga bi kusamuna. (Matai 10:5, 6; 2 Kolinto 10:13) Bo buawu thangu’itu, kisalu ki kusamuna kidi kilulama, kibila kadika kimvuka kidi kizunga bansamuninanga. Yawu phila tuntumukinanga nswa wu Yesu ‘wukusamuna ayi kuvana kimbangi kwidi baboso’.—Mavanga 10:42.

Tumvanganga mangolo mu kulonga batu boso vosu vama bankalanga. Yesu wumonisa ntungulu bo kalonga mumvyokilanga batu boso, mu lukweku lu ḿbu ove mu bisima bi nlangu. (Malako 4:1; Yoane 4:5-15) Buka Yesu, befu mvitu tunkolukanga na batu mu zi nzila, mu mazandu ove mu nsinga mayo. Tumvananga kimbangi bankalanga yitu va nsengi, bansalanga voti bankotanga yitu mu kikola ayi badi va dikanda. Mu mangolo moso amomo tumvanganga, mafunda ma batu mu nza yimvimba balenda kuwa zitsangu zimboti zi luvukusu.—Minkunga 96:2.

Zebi mutu wulenda kamba zitsangu zimboti zi Kintinu ki Nzambi mwingi kunsudikisa ndandu kala baka kuntwala? Bika sweka zitsangu azizi voti kutomba ndandu ngyewu feva to. Kamba bankaka mu nswalu.

• ‘Zitsangu mbi zimboti’ zifweti samunu?

• Bwidi Zimbangi zi Yave baǹlandikinina kifwani ki Yesu?

“Ǹtwami ǹtwala,” mutu wuǹtwamanga ǹtwala mu kisalu ki kusamuna mu kimvuka. Tulenda tuba ti Yesu ḿvandi wu ba ǹtwami ǹtwala kisalu wu filwa va ǹtoto mu kusamuna tsangu yi vukisa myela mi batu ayi wuzibula nzila yi phulusu. (Matai 20:28) Bubu miǹlandikini myandi baǹlandakana ǹtungulu Yesu ka bika wu kusamuna ayi kuvanga minlongisi. (Matai 28:19, 20) Bawombo ba kivananga mu kisalu kikusamuna thangu ka thangu.

Ǹtwami ǹtwala wu kisalu, ǹsamuni wu thangu ka thangu. Zimbangi zyonso zi Yave badi miǹsamuni mi zithangu zimboti. Baǹkaka baǹkubamanga mu kusamuna banga miǹtwami ǹtwala mi kisalu, baǹsamunanga 70 li bilokula mu ngonda. Diawu bawombo baǹtombilanga kisalu ki thangu mbata. Baǹkaka baǹsolwanga mu kuba miǹtwami ǹtwala mi kisalu mi filwa mu bibwangu bi lutidi kisalu kikusamuna tsangu zi Kiǹtinu, baǹsamunanga 130 li bilokula mu ngonda. Miǹtwami ǹtwala mi kisalu ba tulanga ko mayindu mu kunata luzingu lukubaka beni, angi baḿfyatilanga ti Yave wala ba kubikila bi baǹtomba. (Matai 6:31-33; 1 Timoteo 6:6-8) Bo ba nkambu lwaku mu kuba miǹtwami ǹtwala mi kisalu ki thangu ka thangu khumbu ziǹkaka balenda sala buka miǹsadisi miǹtwami ǹtwala mi kisalu mu kusamunanga 30 ove 50 li bilokula mu ngonda.

Miǹtwami ǹtwala mi kisalu badi luzolo kwidi Nzambi ayi batu. Buka Yesu, tuǹzabanga tsatu yi kiphevi yi batu bubu. (Malako 6:34) Befu twidi malongi malenda sadisa batu bubu, kubavana dyana diǹsika kuǹtwala. Luzolo lu ǹtwami ǹtwala mu batu, luḿvanganga kasadila thangu ayi mangolo mandi mwingi kazabikisa nsangu zimboti mu baǹkaka. (Matai 22:39; 1 Tesalonika 2:8) Mawu, maǹkindisanga kiminu kyandi, ma kuḿfikikanga kwidi Nzambi ayi ma kuḿbwelanga mayangi.—Mavanga 20:35.

• Nani ǹtwami ǹtwala wu kisalu?

• Mbi biḿvanganga baǹkaka basala buka miǹtwami ǹtwala mi kisalu thangu ka thangu?

Tona mu thama, kikola ki malongi ma Kibibila, phila yimboti Zimbangi zi Yave baǹlongukilanga. Ndongusulu beni yiḿvanwanga kwidi baboso ba kivana mu kisalu ki thangu ka thangu mu kusamuna tsangu zi Kiǹtinu, mwingi ba phisuka mu kuvanga ‘kisalu kiawu mboti.’—2 Timoteo 4:5.

Kikola ki Miǹtwami Ǹtwala mi Kisalu. Bo ǹtwami ǹtwala kisalu kadukisidi ḿvu mu kisalu ki thangu ka thangu, ba kuǹtumisanga mwingi ka baka ndongusulu yi kikola ki miǹtwami ǹtwala mi kisalu mu bilumbu bi 6. Kibila ki ḿfunu ki kikola beni, mu dyambu kusadisa ǹtwami ǹtwala ka bwela fikama Yave, bwela phisuka mu kisalu ki kusamuna ayi kubwela ba lufyatu mu tatamana mu kisalu beni.

Kikola ki Miǹsamuni mi Kiǹtinu. Kikola beni kiḿvangamanga mu ngonda wadi, kiǹkubikanga miǹtwami ǹtwala mi kisalu mi phisuka ayi ba kivana, mwingi ba filwa ku lutidi kisalu. Kulandakana kifwani ki Yesu Klisto ǹlongisi wu filwa va ǹtoto, bawu ḿvawu baǹtubanga, ‘minuk’awu mfila.’ (Yesaya 6:8; Yoane 7:29) Kusadila kinanu kuǹtombila kolama nzingulu yimona; Buka ndiwulu, kikhulu, ǹlangu wu kunwa voti biǹkaka bilenda ba diswasana na nzingulu wuba. Malenda tombila kulonguka mbembo yiǹkaka. Kikola beni kiǹsadisanga bakwela ayi ba khambu kwela badi 23 ti 65 di miḿvu, mwingi babaka zikhadulu zimboti zi kiphevi zilenda kuba sadisa vanga mboti kisalu ki Yave mu ǹkangu’andi wululama.

Kikola ki Kibibila ki Ngiladi. Mu Kiebelewo, “Ngiladi” yiǹsundula “Zimbangi Ziwombo.” Tona mu ḿvu 1943, ku vyoka 8.000 di batu ba ma baka ndongusulu beni ayi bafilwa buka bamisyoni mu dyambu kuvana kimbangi mu nza yoso yiḿvimba. (Mavanga 13:47) Bo ba misyoni ba tuka ku ǹtoto wu Peru, basa denga ko kimvuka. Vayi mu thangu ayiyi kweka 1.000 di bimvuka. Bo ba tuka ku tsi yi Japão, basa denga ko ni kumi di Zimbangi zi Yave. Angi mu thangu ayiyi ba mavyoka 200.000. Mu zingonda zi tanu baḿbakilanga ndongusulu yi Ngiladi, baǹlongukanga mambu maphinda ma Kibibila. Baǹtumisanga miǹtwami ǹtwala mi kisalu mi filwa, bamisyoni, zibetelita voti Miǹsungi mi divula mwingi babaka ndongusulu beni, mu dyambu kuvana mangolo kisalu ki kusamuna mu nza yimvimba.

• Ǹkinza mbi kidi Kikola ki Miǹtwami Ǹtwala?

• Nani wulenda landakana Kikola ki Miǹsamuni mi Kiǹtinu?