Biuvu Bi Mintangi

Zikhadulu bantubila mu Ngalatia 5:22, 23, ziawu to zidi mu “Mbutu wu phevi”?

Matangu amomo mantubila 9 di zikhadulu baklisto bafueti kuna: “Luzolo, mayangi, ndembama, mvibudulu, mamboti, kuvanga mamboti, kiminu, kulembama ayi kukiyala.” Vayi masinsundula ko ti zikhadulu aziozio, ziawu to phevi yinlongo yi Nzambi yitu sadisanga kukuna.

Tala mambu mvuala Polo kasonika mu Ngalatia 5:19-21: ‘Mavanga ma kinsuni madi: kitsuza, zinsumukunu, kindumba, tsambudulu yi bitumba, kindoki, kithatu, ziphaka, kiphala, nganzi, divunza, luvasu, kuvekuka mu malongi makiedika, nsoki, kukolu malavu, phulu yi kudia, ayi yi kunua ayi mambu ma phila ayoyi.’ Bo Polo kasadila bikuma ‘mambu maphila ayoyi,’ nandi waba monisa ti vadi mambu mankaka madi mu khati mavanga ma kinsuni dedi bummonisina Kolosai 3:5. Bobuawu mvandi bo Polo katubila matedi 9 di zikhadulu zimboti, nandi wusonika: ‘Mu matedi mambu amomo vasi ko nsiku.’ Mu kusadila bikuma abiobio, Polo kabasa monisa ko ti aziozio, ziawu zikhadulu zioso tulenda kuna mu lusalusu lu phevi yinlongo.

Tulenda visa mawu mu kudedikisa mambu Polo kasonikina zikhomba ku Efeso: ‘Kibila kiezila kimbutanga mamoso madi mamboti, masonga ayi makiedika.’ —Efeso 5:8, 9

Mvuala Polo wukindisa Timoteo muingi kalandakana ‘busonga, kukiyekula mu kusadila Nzambi, kiminu, luzolo, lukuikumunu ayi nlembami.’ (1 Timoteo 6:11) Vayi mu zikhadulu aziozio zisambanu, zitatu to zidi mu “mbutu wu phevi” (kiminu, luzolo, ayi nlembami). Vayi muingi Timoteo kakuna zikhadulu zinkaka zitatu bantubila mu matangu amomo: busonga, kukiyekula mu kusadila Nzambi ayi lukuikumunu, vaba tombulu lusalusu lu phevi yinlongo.—Dedikisa na Kolosai 3:12; 2 Petelo 1:5-7.

Tulenda tuba ti Ngalatia 5:22, 23, yisintubila ko zikhadulu zioso zimboti baklisto bafueti kuna. Bukiedika, phevi yinlongo yi Nzambi yilenda tusadisa kukuna 9 di zikhadulu zi “mbutu wu phevi”. Vayi vadi zikhadulu zinkaka zimboti tufueti kuna muingi tuba batu bayonzuka mu kiphevi ayi ‘kuvuata bumutu bumona, buvangulu boso buididi luzolo lu Nzambi, mu busonga bukiedika ayi lukuikumunu.’—Efeso 4:24