Biuvu Bi Mintangi

Levitiku 19:16 muidi lutumu luntuba: “bika kutomba kutengula menga ma wadi yaku.” Mbi mawu mansundula ayi mbi tulenda longuka?

Yave wukamba bana ba Isaeli ti bafueti ba banlongo. Ayi muingi kusadisa dikabu kuvanga mawu, Yave wuba vana zithuadusulu azizi: “Bika kifu ki kuediatanga va khati dikabu, muingi kusekila wunkaka buezi. Bika kutomba kutengula menga ma wadi yaku. Minu yidi Yave.”—Levi. 19:2, 16.

Mbi kikuma “bika kutengula menga ma wadi yaku” kinsundula? Buku yimueka yintubila kikhulu ki basi Yuda yituba: “Kitini ki lutangu alolo . . . phasi kuvisa kiawu buboti mu phila kisonimina mu Kiebeleu.

Vayi batu ba luzabu mu mambu ma Kibibila, bantubanga ti ḿba kiawu kidi nguizani na mambu madi mu lutangu 15 mantuba:“Bikanu kumonisa kukhambu ku busonga mu lufundusu luinu, mulendi monisa ko luvasanu kuidi kiphumbulu ayi kunungisa nkua busina. Fueti fundisila wadi yaku mu busonga.” (Levi. 19:15) Boti lutangu beni luidi nguizani na madi mu lutangu 16, buna kubika tengula menga ma wadi yaku kulenda sundula, kubika kumfundisila mu phila yikhambulu yisonga, kuba kuandi mu nzo yi lufundusu, mu mambu ma lungoso voti va dikanda. Buna mawu mansundula ti va khati dikabu di Isaeli, vabasa tombila ko mutu kubaka ndandu mu biuma bi wadi yandi. Bukiedika ti tulendi vanga ko mambu amomo, vayi vadi phisulu yilutidi sulama.

Va thonono lutangu 16 Yave wutuba ti, bika kuba kifu ki kuediatanga va khati dikabu muingi kusekila wunkaka buezi. Nkiza beni kutebuka moyo ti kusekila buezi kuisi ko to kutubila bubi luzingu lu wadi yaku. (Zinga. 10:19; Mpovi 10:12-14; 1 Timo. 5:11-15; Yako. 3:6) Kibila bo wunsekila buezi wunkaka, mu lutia luaku ngie widi mu kuvuna mambu ayi kubivisa kimutu kiandi. Ayi mutu wunseka buezi kalenda telimina kimbangi ki luvunu kuidi wadi yandi kheti mu kuzaba ti mambu beni, malenda kuntuadisila lufua. Dedi, yindula babakala buadi bavunina Naboti mambu, kimbangi ki luvunu bantelimina, kituadisa lufua lu Naboti, bo dikabu dioso bankuba mamanya. (1 Minti. 21:8-13). Dedi buntubila Levitiku 19:16, mutu wunsekila wunkaka buezi, widi buka nandi wuntengula menga voti wuntuadisa lufua lu wunkaka.

Mvandi, bo mutu kansekila wunkaka buezi, mawu mammonisa ti wu kunlendanga. 1 Yoane 3:15, wuntuba: “Woso wunlenda khomb’andi, widi mvondi ayi benu muzebi ti ni mvondi wumueka kalendi tambula ko luzingu lu mvu ka mvu. “ Diawu bo Yave Nzambi kamana kutubila mu lutangu 16 matedi kutengula menga, Nandi wubue tuba: “Bika lenda khomb’aku mu ntima.”—Levi. 19:17.

Ayi kheti lutangu alolo luidi nkadu disuasana na Levitiku 19:16, vayi yidi ndubu yinneni kuidi befu Baklisto. Tufueti vanga mangolo muingi tubika ba mayindu mambi ayi kusekila bankaka buezi. Kibila kuvanga mawu, mammonisa ti “tunlendanga khomba mu ntima” ayi tuidi mu kutengula menga mandi. Tuzebi ti befu Baklisto, tulendi kuma vanga ko!—Matai 12:36, 37.