Mbi Kibibila Kibikula—Matedi Zindikununu zi Ntoto?

Kadika mvu, kummonikanga bivevi na bivevi bi zindikununu zi ntoto. Kheti khumbu zinkaka ziawu zituadisanga ko beni ziphasi vayi zinkaka zintuadisanga ziphasi ziwombo ayi lufua lu batu bawombo. Ayi khumbu zinkaka ziawu zintuadisanga ziphemunu zingolo zintululanga ayi zimvondanga batu bawombo. Bukiedika ti Kibibila kibikula matedi zindikununu zi ntoto?

Mu dilongi adidi

• Kibibila kibikula matedi zindikununu zi ntoto?

• Zindikununu zi ntoto zimmonisa ti mambu Kibibila kikanikisa madi mu kusalama?

• Mbi mbikudulu yi Kibibila matedi zindikununu zi ntoto yinsundula kuidi befu?

• Mambu matedi zimbikudulu zi Kibibila ayi zindikununu zi ntoto

Kibibila kibikula matedi zindikununu zi ntoto?

Kibibila kintuba matedi ndikununu yi ntoto mu mbikudulu mueka Yesu katuba. Ayi mawu madi masonama mu zibuku zitatu zi Kibibila. Kiawu kintuba:

‘Kibila tsi yimueka yala nuanisa tsi yinkaka ayi kintinu kimueka kiela nuanisa kintinu kinkaka, kuela ba nzala yiwombo ayi zindikununu zi ntoto mu bibuangu biwombo.’—Matai 24:7.

‘Kibila tsi yimueka yala nuanisa tsi yinkaka ayi kintinu kimueka kiela nuanisa kintinu kinkaka, kuala ba zindikununu zi ntoto mu bibuangu biwombo ayi kuela ba nzala yiwombo.’—Malako 13:8.

‘Kuela ba zindikununu zinneni zi ntoto, nzala ayi bimbevu mu bibuangu bioso.’—Luka 21:11.

Yesu wubikula ti kuala ba ‘zindikununu zinneni zi ntoto’ mu ‘bibuangu biwombo’ ayi mu thangu beni mvandi kuala ba mimvita, nzala ayi zimbela ziwombo. Mambu moso amomo, mammonisa ti tuidi mu kuzingila ‘mu bilumbu bitsuka bi nza ayiyi.’ (Matai 24:3; 2 Timoteo 3:1) Befu kufiongunina buboti Kibibila, tunkuiza mona ti ‘bilumbu bitsuka’ bitona mu mvu 1914 ayi tukhidi zingila mu bilumbu beni.

Zindikununu zi ntoto zimmonisa ti mambu Kibibila kikanikisa madi mu kusalama?

Ngete. Kibila bubu tummonanga mambu Yesu kabikula matedi zindikununu zi ntoto ayi mambu mankaka kusalama. Tona mu mvu 1914, va mamonika kuvioka 1.950 di zindikununu zi ntoto zituadisa lufua lu bivevi na bivevi bi batu.a Tala bifuani binlanda.

Mvu 2004—Oceano Índico. Ndikununu yi ntoto yituadisa phemu yingolo yituka mu zitsi ziwombo ayi yivondisa nduka 225.000 di batu.

Mvu 2008—China. Ndikununu yi ntoto yinneni beni yitulula mavula mawombo, ayi yivondisa nduka 90.000 di batu, nduka 375.000 di batu bavangana phasi ayi yitulula zinzo zi bivevi bi batu.

Mvu 2010—Haiti. Ndikununu yi ntoto yivondisa kuvioka 300.000 di batu ayi yitulula zinzo zi bivevi na bivevi bi batu.

Mvu 2011—Japão. Ndikununu yi ntoto yituadisa phemu yingolo yivondisa nduka 18.500 di batu ayi yivanga bivevi binkaka bi batu kuezingila mu bibuangu binkaka. Ayi kibuangu kiaba vananga minda ku divula beni kituluka ayi mawu matuadisa ziphasi ziwombo. Kheti vama vioka 10 di mimvu, vayi nduka 40.000 di batu baba kalanga va ndeku kibuangu beni banungini’abu ko kuvutuka mu zinzo ziawu kibila vadi biuma biwombo bilenda bavanga phasi.

Mbi mbikudulu yi Kibibila matedi zindikununu zi ntoto yinsundula kuidi befu?

Mbikudulu yi Kibibila matedi zindikununu zi ntoto yitusadisa kumona mambu mala monika mu bilumbu binkuiza. Yesu wutuba: ‘Benu kumona mambu amomo kumonika, buna zabanu ti Kintinu ki Nzambi kima fikama.’—Luka 21:31.

Kibibila kinsudikisa ti Kintinu ki Nzambi kidi ku dyilu ayi Yesu Klistu nandi Ntinu wu Kintinu beni. Ayi Yesu wulongisa minlandikini miandi kusambila matedi Kintinu beni.—Matai 6:10.

Bo Kintinu ki Nzambi kiala yala ntoto, Nzambi wala manisa bivuka bioso. Kubunda mvandi zindikununu zi ntoto zintuadisanga ziphasi ziwombo kuidi batu. (Yesaya 32:18) Mvandi, Kintinu beni kiala manisa boma batu bambanga mu kibila ki zindikununu zi ntoto. (Yesaya 65:17; Nzaikusu 21:3, 4) Muingi wubuela zaba, tanga dilongi dintuba: “Mbi Kintinu ki Nzambi Kiala Vanga?”