Vuvu kiaku mu diambu di bilumbu binkuiza kiela lungana

1. Bila mbi tulenda tubila ti Abalahami vuvu kikiedika kaba?

YEHOVA wuvana nkundi’andi Abalahami tsila ti makanda moso ma ntoto mela baka lusakumunu mu nzila yi nkun’andi. (1 Mose 15:5; 22:18) Bo yidi ti Abalahami wuba na minu kingolo kuidi Nzambi, wukikinina ti tsila beni yela lungana. Kadiambu ko buawu, mu thangu Abalahami kaba 100 ki mimvu ayi nketo’andi 90 ki mimvu, basie ba ko kadi muana. (1 Mose 21:1-7) Vayi Bibila kituba ti: “Wutula diana, [Abalahami] ayi wuwilukila mu diambu di kaba dise di makanda mawombo banga bunkambila Nzambi.” (Loma 4:18) Mezaba ti vuvu ki Abalahami kilungana. Wuyiza ba disa di Isaki muana nio keba vingilanga tona thama. Bila mbi Abalahami kabela sikididi ti Yehova wela lungisa tsil’andi?

2. Bila mbi Abalahami kakikinina ti tsila yi Yehova yela lungana?

² Abalahami wuba na nguizani yingolo ayi Yehova, “bila wuzaba kuandi bumboti ti mutu wowo wuvana tsila [Nzambi] beki lulendo mu dukisa yawu.” (Loma 4:21) Yehova wukikinina Abalahami ayi wuntedila mutu wusonga mu bila ki minu kiandi. (Zaki 2:23) Banga phila buididi mu Loma 4:18, minu ki Abalahami ayi vuvu kiandi nguizani biba. Buabu tutadila phila yoyi thumu Polo katubidi diambu ditedi minu banga phila buididi mu Loma kapu 5.

3. Polo mbi katusudikisidi mu diambu ditedi vuvu?

³ Polo wusudikisa bila mbi tufueti bela sikididi ti “vuvu kieto kiela sie fuisu ko tsoni.” (Loma 5:5) Wutusadisa diaka muingi tusudika bue vuvu kieto ki bukristu kilenda yonzukila. Bo tulembo tadila ziphova zi Polo zio zidi mu Loma 5:1-5, yindula theti ngeyo veka mambu momo wudengana. Ngeyo kubutudila, mu kondo finda phaka mawu zaba ti kumanima ma bilumbu vuvu kiaku ki bukristu kiela luta ba kikiedika. Disolo dieto diadi madi sadisa wuzaba bue wulenda tudila minu kiaku kiba kingolo buba ti kisi ko ngolo mu bilumbu biabi. Tutubila theti vuvu kinkembo kio Polo katubidi ti kiela sie tufuisa ko tsoni.

VUVU KIETO KINKEMBO

4. Loma 5:1, 2 diambu mbi yitubidi?

⁴ Tanga Loma 5:1, 2. Polo wusonika mambu beni momo kuidi kimvuka ki Loma. Bakhomba ba babakala ayi ba baketo, balonguka mambu matedi Yehova ayi Yesu, bayiza monisa minu ayi bayiza ba bakristu. Nzambi “wubakitula batu basonga mu nzila yi minu,” ayi wubavinda mafuta ma pheve santu. Ninga babaka vuvu kikiedika ayi ki kitoko.

5. Vuvu mbi kidi kuidi batu bo batulu mafuta mu kipheve?

⁵ Kuntuala Polo wusonikina bakristu bo bavindu mafuta ku Efeso mu diambu ditedi vuvu kioki batedelo. Vuvu beni kitomba phe ti babaka “kimvuama ki nkembo ki kiuka kiandi va khati tsika banlongo.” (Efe. 1:18) Ayi Polo wubue kamba diaka kuidi basi Kolosayi ti vuvu kiawu kiela lungana, wukitedila “vuvu kioki lukubukulu mu diyilu.” (Kol. 1:4, 5) Vuvu beni ki bakristu bo bavindu mafuta, kidi ki kue zingi mu luzingu lu mvu ka mvu ku diyilu kumanima ma pfulukuluʼawu, mu thangu bela yadila va kimosi ayi Kristu.​—1 Tes. 4:13-17; Tso. 20:6.

6. Khomba mosi wutulu mafuta mu kipheve, diambu mbi katubidi mu diambu ditedi vuvu kiandi?

⁶ Bakristu bobo bavindu mafuta mu kipheve beta yangalala mu minu beni kioki. Khomba Frederick Franz, wutuba mu ntim’andi ti: “Vuvu kieto kidi diambu dikiedika, ayi kiela lungana kuidi dingumba dioso di 144 000 ki batu, dio didi nkangu wufioti ayi mu phila mosi yo katuisi yindudila ko.” Kumanima masadila Nzambi mu kuikama koso mu mimvu miwombo, khomba Franz wubue tuba mu 1991 ti: “[Tuisi] zimbisa ko mfunu wu vuvu beni. . . . Tulembo kiyangala buwombo bo tulembo kivingila mu thangu yi nila. Didi diambu difuana mu vingila buba ti ditombidi milio yi mosi yi mimvu. Ndieta tanina vuvu kiama mu phila mosi yingolo viokila mimvu mibedi.”

7-8. Batu bawombo vuvu mbi kidi yawu? (Loma 8:20, 21)

⁷ Batu bawombo lumbu kiaki beta sambila Yehova badi na vuvu ki phila nkaka. Vuvu kioki Abalahami kaba​—kiba kizinga luzingu lu mvu ka mvu kutsi lutuadusu lu Kipfumu ki Nzambi va mbata ntoto. (Ebe. 11:8-10, 13) Polo wusonika nkembo wo weta ba mu vuvu beni kuidi bobo balembo kivingila. (Tanga Loma 8:20, 21.) Thangu wuwa mu khumbu yitheti zitsila zitheti mu diambu di bilumbu binkuiza, diambu mbi diyangidika kuwombo? Diba mu bila kio wela bela mutu wuduka nio kela sie bue vanga ko masumu? Voti wuyangalala bo wuzaba ti batu bobo weta zola bela bue zinga diaka ku paladiso va mbata ntoto? Diawu dintula ti wuba na mambu mawombo mavingila mu “mu vuvu kioki” Nzambi katuvana.

⁸ Buba ti tulembo yangalala vingila luzingu lu mvu ka mvu ku diyilu voti va ntoto, tuidi na vuvu kinkembo kioki kilembo tuvani mfunu wumona zikhini. Vuvu kieto ki zikhini kilenda bue ba diaka kingolo. Mambu mo Polo kasonika kuntuala mamonisini bue diambu beni diela lunginina. Tutadila mambu mbi kasonika mo matadidi vuvu kieto. Beto kubutudila, yawu mayi tusadisa tuba sikididi ti vuvu kieto kiela tatamana yonzuka ayi kadi khumbu kiela dekuka.

BUE VUVU KIETA YONZUKILA

9-10. Mu tadila banga phila bumonisini kifuani ki Polo, bakristu diambu mbi balenda vingila? (Loma 5:3) (Tala phe zifoto.)

⁹ Tanga Loma 5:3. Polo wutuba mu thangu tulembo moni ziphasi vuvu kieto kilenda kuiza ba diaka ngolo. Diawu dilenda kutuyitukisa. Bukiedika, balonguki boso ba Kristu balenda kuawu dengana phe zinzomono. Tutadila kifuani ki Polo. Wukamba kuidi bakristu ba Tesalonika ti: “Mu thangu tuba yeno, tululubula ti tufueti mona ziphasi ziwombo, ayi buawu busalimina.” (1 Tes. 3:4) Ayi kuidi basi Kolinto wusonika ti: “Bakhomba tutidi luzaba phila ziphasi ziozi tumona . . . Tutumbu sakula diana ti tulenda bue zinga diaka.”​—2 Ko. 1:8; 11:23-27.

¹⁰ Lumbu kiphila yayi, bakristu balenda dengana mintindu miwombo mi zithatukusu. (2 Tim. 3:12) Bosi ngeyo? Bo weta tula minu kiaku kuidi Yesu ayi kunlandakana, wume keta dengana zithatukusu? Bulendakana bakundi baku voti bakhomba ziaku bavueza voti basekinina. Voti bavangila phe mambu mu kikhesi. Nzengolo yo wubaka yitubanga kiedika mu mambu moso, yitombila zithatukusu mu kisalu kiaku? (Ebe. 13:18) Wume keta dengana zinzomono kuidi Leta mu bila kisamuna vuvu kiaku kuidi batu bankaka? Buba ti zioso kuandi mintindu mi zinzomono tun’dengana, diawu, Polo katubila ti tufueti banga mu zikhini. Bila mbi?

11. Bila mbi tufueti bakila nzengolo yimonisa mvibudulu mu zinzomono?

¹¹ Tulenda yangalala mu thangu tudengini zinzomono mu bila ki mambu momo ziawu zieta bimisa. Loma 5:3 yitubidi, “Ziphasi ziawu zieti buta mvibudulu.” Bakristu boso bela dengana mambu ma ziphasi, diawu bakristu boso bafueti ba mvibudulu. Tufueti baka nzengolo yimonisa mvibudulu va ntuala zioso kuandi zinzomono tulenda dengana. Beto kubutudila, yawu yifueti tula ti tumona lungana ku vuvu kieto. Tubika ba banga bobo Yesu kadedikisa badi banga mbongo yi kununu va ntoto widi matadi. Baketa kikinina phova yi Nzambi mu zikhini vayi “kumanima ma ziphasi voti zinzomono” bayiza ta sakuba. (Mat. 13:5, 6, 20, 21) Diawu, dengana zinzomono voti zithatukusu dikala ko diambu difioti voti dimboti, vayi kuzimonisina mvibudulu yeta nata mamboti. Mu phila mbi?

12. Bue tufueti bakila mamboti mu thangu tulembo monisa mvibudulu?

¹² Nlonguki Zaki wutuba mamboti momo makala mu monisa mvibudulu mu zinzomono. Wusonika ti: “Mvibudulu wumanisa kisalu kiandi mu diambu di lumonika batu bafuana ayi baduka mu mambu moso muingi lubika kambu kadi diambu.” (Zaki 1:2-4) Zaki sudikisidi mvibudulu banga kiyeko ayi kisalu kisala. Mvibudulu kisalu mbi wulenda dukisa? Mvibudulu wulenda kusadisa wuyonzula mu phila yizangama bikadulu biabi banga monisa ntima wunila, minu ayi tudila Nzambi ntima. Ayi tufueti baka diaka mamboti mankaka mawombo ti tumonisini mvibudulu.

13-14. Mim’butu mbi mvibudulu weta nata? (Loma 5:4)

¹³ Tanga Loma 5:3. Polo wutuba ti mvibudulu weta nata “kimutu kifuana.” Mvibudulu’aku wulenda tula ti wukikinunu kuidi Yehova. Vayi yawu ko yin’zola sundula ti Yehova khini kammona bo wulembo dengana ziphasi voti zinzomono. Nzambi niandi bumutu buaku bo wummonisa buawu keta kikinina. Mvibudulu’aku mawu natina bumutu bufuana. Lolo luawu lusakumunu lungitukulu!​—Nku. 5:12.

¹⁴ Bambuka moyo ti Abalahami wumonisa mvibudulu mu zinzomono ayi Nzambi wunkikinina. Yehova wuntadila banga nkundi’andi ayi wunkikinina ti widi wusonga. (1 Mose 15:6; Loma 4:13, 22) Beto phe tulenda bubela. Yisi ko ti mu bisalu bio tueta sala voti biyeko bio tuidi buawu Yehova keta tukikinina. Vayi weta tukikinina mu bila ki mvibudulu’eto wukuikama. Buba mimvu mbi tuidi, nzingulu’eto, voti maluaku meto, beto boso tulenda kueto monisa mvibudulu. Widi na nzomono yo wulembo monisina mvibudulu mu bilumbu biabi? Enati buawu buididi, baka lukindusu mu zaba ti beki bukikununu kuidi Nzambi. Zaba ti Nzambi wutukikinini, kulenda kutukindisa ayi kulenda kindisa vuvu kieto.

VUVU KIO KILUTIDI NGOLO

15. Diambu mbi diaka dinkaka Polo katubila ayi bila mbi diyitukisa batu bankaka?

¹⁵ Banga phila Polo kasudikisila, tulenda kikununu kuidi Yehova mu monisa mvibudulu mu zinzomono mu phila yifuana. Sudika phila yoyi Polo katatiminina tubila diambu beni ti: “Mvibudulu weta buta kimutu kifuana, kimutu kifuana kieta buta [vuvu], ayi vuvu kilendi fuisu tsoni ko.” (Loma 5:4, 5) Diawu dilenda yitukisa batu bankaka. Bila mbi? Mu tadila Loma 5:2, thumu Polo wutuba ti bakristu ba Loma baba na vuvu, “vuvu mu diambu di nkembo Nzambi.” Diawu bankaka balenda kiyuvula, enati bakristu beni bakibela na vuvu, bila mbi Polo katubila diaka vuvu kuntuala mu disolo diandi?’

16. Bue vuvu kieta tonina yonzukila kuidi mutu? (Tala phe zifoto.)

¹⁶ Tulenda sudika mambu momo Polo kazola tuba mu thangu tutudidi mu mayindu meto ti vuvu kidi kima kio kieta yonzuka. Mu kifuani: Wukhidi bambuka moyo mu khumbu yitheti yo wuwa vuvu ki kitoko kio kidi mu phova yi Nzambi? Mu thangu beni yina nanga weba yindulanga ti diyindu diba mu luzingu lu mvu ka mvu ku paladiso va mbata ntoto yidi kuandi ndozi yi dibaba. Diawu, mu thangu wulonguka Yehova ayi zitsila ziandi zi Bibila, wuluta bue kikinina ti zitsila ziandi ziela lungana.

17. Bue vuvu kiaku kieta yonzukila kumanima ma ku kivana ayi baka mbotama?

¹⁷ Buba kumanima ma kukivana kuaku ayi baka mbotama, vuvu kiaku kiyiza tatamana yonzuka bo wutatamana longuka ayi yonzuka mu kipheve. (Ebe. 5:13–6:1) Wumona kiedika ku mambu momo madi mu Loma 5:2-4. Wudengana zinzomono zi phila mu phila vayi wuzimonisina mvibudulu ayi wumona ti Nzambi wukikinini. Bo widi na vuvu ti Nzambi wulembo yangalala, buabu widi na sikididi kivingila bima biobi katuveni tsila. Vuvu kiaku kime yonzuka viokila banga phila kibela va thonono. Dieka diambu dikiedika kuidi ngeyo. Kilembo luti tuadisa luzingu luaku. Tulenda tuba ti kiawu kilembo diatisa mambu maku moso ma luzingu luaku ayi kieta balula phil’aku yi vangila mambu mu dikanda diaku, phila yibakila zinzengolo buba phe phila yo weta sadila thangu’aku.

18. Sikididi mbi Yehova katuveni?

¹⁸ Thumu Polo wubuela diaka diambu dimfunu ditadidi vuvu kio mebaka kumanima ma kikununu kuidi Nzambi. Wuveni sikididi ti vuvu kiaku kiela lungana mu bukiedika. Bila mbi tufueti luta kudikikinina? Polo wutubila sikididi kiaki kituadusu mu pheve santu kuidi bakristu ti: “Vuvu kilendi fuisu tsoni ko bila pheve santu yoyi batuvana yidukula luzolo lu Nzambi mu mintima mieto.” (Loma 5:5) Bibila bidi yaku mu kikinina vuvu beni​—vuvu kiaku.

19. Diambu mbi fueti bela sikididi mu vuvu kiaku?

¹⁹ Yindula tsila yo Yehova kavana Abalahami ayi phila yo kantadila banga nkundi’andi. Abalahami vuvu kiandi kisi ba ko ki phamba. Bibila kitubidi ti: “Mu mvibudulu wungolo Abalahami kavingidila ayi katambudila mambu momo mamvanina Nzambi tsila.” (Ebe. 6:15; 11:9, 18; Loma 4:20-22) Bukiedika kasi fua ko tsoni. Wulenda ba sikididi ti enati tatimini ba wukuikama vuvu kiaku kiela kuvana mamboti. Vuvu kiaku kidi kikiedika ayi kidi mu diambu di makhini ayi wela sie nionga ko! (Loma 12:12) Polo wusonika ti: “Bika Nzambi tho yi diana kaluwesa mu khini yoso ayi mu ndembama ayi mu diambu di minu kioki muidi mu niandi muingi diana diba diwombo mu beno mu lulendo lu pheve santu.”​—Loma 15:13.