DISOLO DI NDONGOKOLO 28
NKUNGA 123 Tótosaka ebongiseli ya Teokrasi
Weta zaba kiedika?
“Lutelama, lukanga kiedika mu luketo lueno banga sentila.”—Efe. 6:14.
MAMBU MO MADI MU KHATI DISOLO DIADI
Tulonguka suasikisa kiedika kioki tulonguka kuidi Yehova ayi mayuya momo Satana ayi bambeni zieto beta tembikisa.
1. Bue weta muena kiedika?
BISADI bi Yehova bieta zola kiedika kioki kidi mu Mbembo Nzambi. Mu kiawu tume tungila minu kieto. (Lom. 10:17) Tuwilukila ti Yehova niandi wutula kimvuka ki bukristu banga “dikunzi ayi singumunu ki kiedika.” (1 Tim. 3:15) Ayi tueta tumukina mu luzolo lueto loso “mintuadisi mieto” bila bawu beta kutusudikisa kiedika ki Bibila ayi beta kutuvana zithumunu ziozi zidi mu nguizani ayi lukanu lu Nzambi.—Ebe. 13:17.
2. Mu tadila Zaki 5:19, vonza mbi tulenda dengana kumanima ma longuka kiedika?
2 Diawu, buba ti tukikinini kiedika ayi lutuadusu lu khubukulu yi Nzambi mu phila yoyi yeta kutuvanina malongi momo mafueni tudulu ntima, tulenda kueto kaka phe vunuka. (Tanga Zaki 5:19.) Bukiedika Satana keta tomba tulembo tudila Bibila ntima ayi tulembo phe tudila ntima lutuadusu lolo tueta baka mu khubukulu yi Nzambi.—Efe. 4:14.
3. Bila mbi tufueti bela bakangama mu kiedika? (Efeso 6:13, 14)
3 Tanga Efeso 6:13, 14. Fioti fisiedi, Diabulu maka sadila zingolo zitembikisa luvunu mu diambu di vukumuna zitsi zitula kimbeni kuidi Yehova. (Tso. 16:13, 14) Tufueti zaba diaka ti Satana wela yedisa zingolo ziandi mu tomba vuna bisadi bi Yehova. (Tso. 12:9) Diawu, didi diambu dimfunu tulongukanga zaba suasikisa kiedika ayi luvunu ayi tumukinanga phe kiedika beni. (Lom. 6:17; 1 Pi. 1:22) Tufueti butudila muingi tueba vuka mu ziphasi zinneni!
4. Mbi tueka ntadila mu disolo diadi?
4 Mu disolo diadi tueka mmona bikadulu biodi bimfunu biobi bifueti kutusadisa tuzaba kiedika kioki kibedi mu Bibila ayi tukikinina lutuadusu lolo lubedi mu khubukulu yi Nzambi. Ayi matu tadila phe mambu matatu momo tufueti landakana muingi tutatamana ba bakangama mu kiedika.
BIKADULU BIOBI TUFUETI BA MUINGI TUZABA KIEDIKA
5. Mu phila mbi mona Yehova tsisi kulenda kutusadisila muingi tuzaba kiedika?
5 Mona Yehova tsisi. Enati tuyonzudi kadulu kimona Yehova tsitsi, matu n’zola buwombo ayi kadi khumbu tuela vanga diambu diodi dikunniongisa. Tuidi na phuila yi longuka suasikisa mambu mamboti ayi mambu mambimbi, kiedika ayi mayuya muingi tukikununu kuidi Yehova. (Zin. 2:3-6; Ebe. 5:14) Tulendi ko bikila tsitsi yi mutu yiluta viokila luzolo lueto mu diambu di Yehova, bila mambu momo meta luta yangidika batu, khumbu ziwombo mayangidikanga ko Yehova.
6. Bue mona mutu tsitsi kuvukumunina kumi ki bapfumu ku Iseli mu balula kiedika?
6 Enati tunluta mona batu tsitsi viokila Nzambi, tulenda tatukila kiedika. Tubonga kifuani ki 12 ki bapfumu bobo bayenda mu kue fipi tsi yoyi Yehova kavanina bana ba Iseli tsila. Yiba na kumi ki bapfumu mu bawu baluta mona basi Kana tsitsi viokila luzolo luawu mu diambu di Yehova. Bakamba kuidi bakhomba ziawu bana ba Iseli ti: “Tuisi ko zingolo zinuanisina batu beni, bila bawu balutidi ngolo viokila beto.” (4 Mo. 13:27-31) Ninga, diba diambu dikiedika bila mu mbueno yi kimutu, basi Kana bawu baluta ngolo viokila bana ba Iseli. Vayi yimonika ti, batula Yehova va ndambu mu yindula ti balendi ko nunga bambeni ziawu. Kumi beni ki bapfumu, nginu baluta tula mayindu mawu mu mambu momo Yehova keba ntomba kuidi bana ba Iseli. Nginu bayindula mambu momo Yehova kabavangila kumanima ma mua bilumbu. Nginu babambuka moyo ti ngolo zi basi Kana zilendi ko dedakana kadi fifioti ayi ngolo zi Yehova. Mu luviakunu lu kumi ki bapfumu beni, Yosua ayi Kalebi bakikununu kuidi Yehova. Bakamba dikanda di Iseli ti: “Enati tukikununu kuidi Yehova, mu kondo finda phaka ma katukotisa mu tsi beni.”—4 Mo. 14:6-9.
7. Bue tulenda yedisila kadulu kimona Yehova tsisi? (Tala phe foto.)
7 Mu diambu di tuyedisa kadulu kimona Yehova tsisi, tufueti tula ngolo mu kunyangidika mu zinzengolo zioso tum’baka. (Nku. 16:8) Mu thangu weta tanga masolo ma Bibila, wukiyuvulanga, ‘Enati minu ndiba mu diambu beni, nginu nzengolo mbi ndibaka?’ Mu kifuani, wukitudi banga ngeyo kumi ki bapfumu beni balembo kambi mambu momo bame kue mona kutsi beni. Bue wummuena, nginu mbi wutula, kikinina kumi ki bapfumu beni ayi kukiyekula mu mona batu tsisi, voti zola Yehova ayi ba phuila yi kunyangidika? Bana ba Iseli bawombo basi wilukila ko ti mambu momo Yosua ayi Kalebi batuba maba makiedika. Yawu yitula ti bazimbisa diluaku dikota kutsi yi tsila.—4 Mo. 14:10, 22, 23.
Nginu nani wuwilukila? (Tala paragrafi 7)
8. Kadulu mbi diaka tufueti tudila ngolo mu yonzula, ayi bila mbi?
8 Kukikulula. Yehova weta monisa kiedika kuidi batu bobo badi kadulu ki kukikulula. (Mat. 11:25) Mu kukikulula koso, tukikinina lusadusu mu diambu di longuka kiedika. (Mav. 8:30, 31) Ka diambu ko tufueti keba mu kambu ba luniemo. Luniemo lulenda kutupusa mu mona ti mayindu meto mawu malutidi mfunu viokila zitsikudukusu zi Bibila ayi lutuadusu lu khubukulu yi Yehova.
9. Bue tulenda simbidila kadulu kieto ki kukikulula?
9 Muingi tusimbidila kadulu kieto ki kukikulula, tufueti bambukanga moyo keva koko tuidi va ntuala Yehova. (Nku. 8:3, 4) Tulenda lomba phe Yehova muingi katusadisa tuluta ba phe kadulu ki kukikulula ayi tuba batu bobo balembo luti longo kuidi niandi. Yehova maka tusadisa tuluta tula va ntuala mambu mandi momo tueta longuka mu Mbembo’andi ayi mu khubukulu’andi, viokila mambu meto. Mu thangulu’aku yi Bibila, tomba zaba phila yoyi Yehova keta zodila kadulu ki kukikulula ayi phila yoyi keta lendila luniemo. Ayi thangu zioso wufueti tula ngolo mu tatamana ba kadulu ki kukikulula enati baveni kiyeko kimosi ki kisalu kioki kintula ti batu bavana lukumu.
BUE TULENDA KANGIMINA MU KIEDIKA
10. Banani Yehova kasadila mu vana zithumunu ayi lutuadusu kuidi batu bandi?
10 Tatamana tudila ntima mu lutuadusu lu khubukulu yi Yehova. Mu Iseli dithama, Yehova weba sadilanga Mose ayi kuntuala wuyiza sadila Yosua mu diambu di vana zithumunu kuidi dikanda diandi. (Yos. 1:16, 17) Bana ba Iseli beba bakanga lusakumunu mu thangu yoyi beba monanga ba bakala beni bana banga mimmonisi mi Yehova Nzambi. Kumanima ma zikhama zi mimvu mu thangu kimvuka ki Bukristu kiyiza tulu mu khumbu yitheti, 12 ki mimvuala kieba vananga lutuadusu. (Mav. 8:14, 15) Kuntuala dingumba beni diyiza tola mu thangu bayiza mu kotisa bakulutu bankaka ba Yelusalemi. Mu thangu beba tumukinanga lutuadusu beni lolo luba kuidi ba bakala beni bakuikama, ‘bimvuka beni biba bikinda mu minu ayi thalu yi batu yiyiza buelama kadika lumbu.’ (Mav. 16:4, 5) Mu bilumbu bieto biabi tueta baka phe lusakumunu mu thangu tueta landakana lutuadusu lu khubukulu yi Yehova. Vayi bue Yehova kalenda muena enati tukadi kikinina batu bobo kasobudi mu kututuadisa? Tulenda vana mvutu mu kiuvu beni kioki beto tadila mambu momo masalama mu thangu beba nata bana ba Iseli ku Tsi yi Tsila.
11. Mu Iseli dithama, mambu mbi mabuilukulu batu bobo bamanga tumukina Mose nioni Yehova kasobula mu tuadisa dikanda di Iseli? (Tala phe foto.)
11 Mu thangu beba kuenda mu Tsi yi Tsila, thangu mosi plina batu bobo baba luvalu mu dikanda di Iseli batona findisa Mose ziphaka ayi kiyeko kioki Yehova kamvana. Batuba ti: “Dikanda dioso didi di busantu [bika kaka Mose] vayi bawu boso bila Yehova widi mu khati bawu.” (4 Mo. 16:1-3) Buba ti diba dikiedika vantuala Nzambi “ti dikanda dioso diba di busantu,” Yehova wusobula Mose mu diambu di katuadisa batu bandi. (4 Mo. 16:28) Mintombuki beni bo mieba vuezanga Mose, yawu yimonisa ti Yehova phe beba vuezanga. Beba luta tulanga ko mayindu mawu mu mambu momo Yehova kazola—bawu baluta tula mayindu mawu mu mambu momo bawu veka bazola ayi batomba luta ba mfunu vantuala meso ma batu. Nzambi wuvonda bamfumu zi mintomboki beni ayi zimili zi batu bobo baba kundambusu’awu. (4 Mo. 16:30-35, 41, 49) Lumbu kiaki phe, tulenda ba sikididi ti Yehova kayangalalanga ko batu bobo ka bazitisanga ko mambu ma khubukulu’andi.
Nginu kundambusu nani wuba? (Tala paragrafi 11)
12. Bila mbi tulenda tatiminina tudila khubukulu yi Yehova ntima?
12 Tulenda tatamana tudila khubukulu yi Yehova ntima. Mu thangu yeta monika ti tufueti balula phil’eto yoyi tueta sudikila kiedika kimosi ki Bibila, voti balula diambu dimosi mu phila yoyi tueta sadila Yehova, batu bobo beta tuadisa bamematanga ko mu balula mambu enati buawu buididi. (Zin. 4:18) Beta kubutudila bila Yehova beta keta tomba yangidika. Beta tula ngolo ti zinzengolo ziozi bam’baka zisimbimina mu Mbembo Nzambi, nsiku wowo bisadi bioso bi Nzambi beta tumukina.
13. “Kebanga bumboti mambu makiedika,” muna mbi, ayi mbi tufueti tula?
13 “Kebanga bumboti mambu makiedika.” (2 Tim. 1:13) “Mambu makiedika” madi malongi ma bukristu momo madi mu Bibila. (Yow. 17:17) Malongi beni maphila yoyi, mawu masimbidi mambu moso momo tueta wilukila. Khubukulu yi Yehova yeta tulonga tukangama kaka mu malongi beni. Beto tatamana kubutudila buawu tuela bakila lusakumunu.
14. Bue Bakristu bankaka bayiza lembolo kuawu “kebanga bumboti mambu makiedika”?
14 Mambu mbi tulenda dengana enati tutatukidi “mambu makiedika”? Tutadila kifuani kimosi. Mu tandu kitheti bakristu bankaka batona tembikisa nungu nungu yimosi ti lumbu ki Yehova kiyiza fuana. Bulendakana kuba na nkanda mosi wowo—babanzila ti kuidi thumu Polo wubedi—mu wikimisa tsangu beni. Mu kondo baka thangu yi fiongunina bumboti mboti, bakristu bankaka ku Tesalonika bakikinina nungu nungu beni ayi bayitembikisa. Nginu basi vunuka ko enati babambukila mambu momo Polo kabalonga mu thangu yoyi kabela ayi bawu. (2 Tes. 2:1-5) Polo wulonga bakhomba ziandi ti babika wilukilanga bingua ngua. Ayi muingi kabasadisa mu diambu di bedi bue vunuka mu woso kuandi nkanda, Polo wuba monisa phila yoyi niandi keta sukisila minkanda miomi keta sonika mu phila yoyi kasukisila nkanda wummuadi wowo kasonikina kuidi basi Tesalonika ti: “Minu Polo ndiluveni mboti mu koko kuama, buawu bobo ndieta tudila dimbu kutsuka yi kadika nkanda; bobo Ndieti sonikina.”—2 Tes. 3:17.
15. Bue tufueti kukitanina mu zitsangu zimayuya ziozi zimmonika banga zikiedika? Vana kifuani. (Tala phe foto.)
15 Mambu mbi tulenda longuka mu ziphova ziozi Polo kasonikina basi Tesalonika? Mu thangu tuwilu diambu dimosi diodi disi ko mu nguizani ayi mambu momo tulonguka mu Bibila voti mu thangu tuwilu nungu nungu yimosi yoyi yime mana tembakana, tufueti sadila diela disuasikisila mambu. Mu thangu yi ex Union Sovietique batembikisa nkanda wumosi wowo batu babanzila ti ku bilu kieto kinneni wubedi. Nkanda beni wukindisa bakhomba bafonda khubukulu yinkaka yoyi yintuadusu kuidi batu bankaka bika kuidi khubukulu yi Yehova. Nkanda beni wumonika ti banga widi wukiedika. Vayi bakhomba bobo baba bakuikama basi vunuka ko. Bayiza bakula ti tsangu yoyi yiba mu nkanda beni, yisi ba ko nguizani ayi mambu momo babalonga. Lumbu kiaki phe bambeni zi kiedika beta sadila bisadulu bitekinoloji biobi bilembo yumi mu nza yayi mu lukanu lu kutuvuadikisa ayi lu kutuvambisa. Va buangu ‘ki kukitatikisa [mu] mayindu meto,’ tulenda kukitanina mu yuvula enati mambu momo tunwa voti tuntanga keni nguizani madi ayi mambu momo tulonguka.—2 Tes. 2:2; 1 Yow. 4:1.
Kadi vunukanga mu mayuya momo mammonika banga makiedika (Tala paragrafi 15)a
16. Mu tadila Loma 16:17, 18, mbi tufueti tula enati mutu metatukila kiedika?
16 Tatamana ba mu bumosi ayi bobo badi bakuikama kuidi Yehova. Nzambi katidi ti tuba mu bumosi mu tsambudulu’eto. Bobuawu tunkangimina mu kiedika buawu tuela tatiminina bela mu bumosi. Batu boso bobo beta tatukila kiedika beta nata khabuani mu khati kimvuka, diawu Nzambi katulubudidi ti “tubatatukila.” Beto kambu kubutudila beto veka phe tulenda tatukila kiedika.—Tanga Loma 16:17, 18.
17. Mamboti mbi tueta baka mu zabanga kiedika ayi beto luta kangama mu kiawu?
17 Beto tomba zabanga kiedika ayi beto kangamanga mu kiawu, kipheve kieto maki ba mu lutanunu ayi maki ba mu buvini bumboti. (Efe. 4:15, 16) Matu ba mu lutanunu mu kondo landakana malongi maluvunu ayi zitsangu ziluvunu zi Diabulu ayi tuela ba mu lutanunu lu Yehova mu thangu yi ziphasi zinneni. Luluta kangama mu mambu makiedika, “ayi ndembama yi Nzambi yela ba ayi beno.”—Flp. 4:8, 9.
NKUNGA 122 Tópikama makasi, tóninganaka te!
a TSUDUKUSULU YI FOTO MU: Foto mosi yi thama vame vioka mimvu miwombo, yilembo monisa bakhomba zi ex Union Sovietique mu thangu babaka nkanda wowo wumonika ti banga ku bilu kinneni wubedi vayi kuidi bambeni zieto wuba. Mu thangu’eto phe yayi, bambeni zieto balenda sadila phe interneti mu diambu di tembikisa diambu dimosi di luvunu mu diambu ditedi khubukulu yi Yehova.