DISOLO DI NDONGOKOLO 36
NKUNGA 89 Yoká, tosá mpe pambwamá
“Lutumukinanga Mbembo Nzambi”
“Lutumukinanga Mbembo Nzambi vayi bika sia ti ko wa na wa kaka.”—ZAKI 1:22.
MAMBU MO MADI MU KHATI DISOLO DIADI
Disolo diadi madi tusadisa tuyonzula phuila bika kaka yitanga Mbembo Nzambi lumbu ka lumbu vayi yi kuyiyindudila phe mu buphinda ayi luta sadila phe mo tuntanga mu luzingu lueto.
1-2. Mbi bieta tula ti bisadi bi Nzambi biba mu zikhini? (Zaki 1:22-25)
YEHOVA ayi muan’andi batidi ti tuba mu zikhini. Nsoniki wu Minkunga 119:2 tubidi ti: “Khini kuidi bobo bankebanga zinzengolo ziandi ayi bankutombanga mu ntim’awu woso.” Yesu wuvana lukindusu lunkaka mu tuba ti: “Khini kuidi bobo beti wa ayi beti tumukina mambu ma Nzambi!”—Luka 11:28.
2 Bo tuidi bisadi bi Yehova, tuidi dikanda diodi didi mu zikhini. Bila mbi? Tuidi na bibila biwombo, vayi tubika zimbakana ti tueta tanga Bibila kadika lumbu ayi tueta tula ngolo mu sadila mambu momo tuntanga.—Tanga Zaki 1:22-25.
3. Mamboti mbi tueta baka mu thangu tunsadila mambu momo tulembo tangi mu Mbembo Nzambi?
3 Kuidi na ziphila ziwombo ziozi tueta bakila mamboti mu thangu tulembo “sadila Mbembo Nzambi.” Yitheti theti tuzebi ti kubutudila didi diambu dimfunu diodi dieta tula ti tuyangidika Yehova ayi beto kubutudila, tueta kuiza ba mu zikhini. (Mpo. 12:13) Beto sadila mambu momo tuntanga mu Mbembo Nzambi yoyi yisonimina mu pheve santu’andi, matu bongisa nzingulu’eto mu dikanda ayi matu yonzula nguizani yingolo ayi bakhomba zieto Bakristu. Bulendakana buawu phe busalimina mu luzingu luaku. Mu buela, tueta kukitanina mu bivonza biobi bieta dengana batu bobo ka balandakananga ko zinzila zi Yehova. Bukiedika, tueta kikinina diambu diodi Ntinu Davidi katuba. Kumanima ma mana yimbila mu tubila minsiku, zithumunu, ayi tsambusulu yi Yehova, wuyiza sukisila mu ziphova ziazi, zio zitubidi ti: “Mfutu wunneni widi mu kuzikebanga.”—Nku. 19:7-11.
4. Bila mbi yikadila phasi mu sadila Mbembo Nzambi?
4 Mu tala ayi mu mona, thangu zioso dikala ko diambu difioti mu tanga ayi mu sadila Mbembo Nzambi. Buba ti mambu mawombo tuidi mavanga, tufueti bakanga thangu yitanga ayi longuka Bibila muingi tusudika mambu momo Yehova katidi tuvanga. Diawu, tubue tadila mua ndambu mambu momo mafueti kutusadisa muingi tutanganga Bibila kadika lumbu. Matu tadila phe mambu momo makuiza tusadisa muingi tuyindudilanga mu buphinda mambu momo tuntanga ayi matu mona phila yoyi tulenda sadila mambu momo tunlonguka mu luzingu lueto.
BAKANGA THANGU YITANGILANGA MBEMBO NZAMBI
5. Mambu mbi meta luta dia thangu’eto?
5 Nduka nduka bisadi biwombo bi Yehova bikala na mambu mawombo mavanga mu luzingu. Tueta sadila thangu’eto mu vanga mambu maphila mu phila mamfunu. Mu kifuani, batu bawombo mu beto, tueta luta sala mu diambu di dukisa ziphuila zieto ayi ziozi zi makanda meto. (1 Tim. 5:8) Bakristu bawombo beta sadisa bambuta ziawu bobo bame yonzuka voti bobo badi na bimbevo. Ayi kipa buvini bueto bunitu, kueta tudia thangu. Botula mambu beni momo, tukala phe na mambu mavanga mu khati kimvuka. Dimosi mu mambu momo tueta vanga dilutidi mfunu, didi sala mu kipfuzi kisalu ki tsamununu. Buba mambu momo wumosi mosi mu beto kadi mavanga, bue tulenda bakila thangu yitangilanga Bibila kadika lumbu, yi yindudilanga mu buphinda mambu momo tuntanga, ayi kumasadila?
6. Bue wulenda tudila thangulu yi Bibila va buangu kitheti? (Tala phe foto.)
6 Lutangulu lu Bibila luidi mu mosi mu mambu “malutidi mfunu” kuidi beto Bakristu, diawu tufueti kulutulanga va buangu kitheti. (Flp. 1:10) Mu diambu di mutu kaba mu zikhini, nkunga wutheti wutubidi ti: “Weta yangalala mu mina mi Yehova ayi weta kumitanga muini ayi builu.” (Nku. 1:1, 2) Yawu yimmonisa ti tufueti bakanga thangu yitangilanga Bibila. Thangu mbi yilutidi yimboti yitangilanga Bibila? Mu lumbu, wumosi mosi mu beto lenda ba ayi thangu’andi yitangilanga Bibila. Vayi, tufueti sobula thangu yoyi yikutusadisa muingi tukitanganga kadika lumbu. Khomba mosi wubakala widi mu dizina Victor tubidi ti: “Ndieta yangalala buwombo tanga Bibila va nsuka. Buba ti ndifika kotukanga ko, kukala ko mambu mawombo momo malenda fika kuphuvula va nsuka. Mu thangu beni yina, mayindu mama makala mafuana ayi ndimonanga ko phasi mu tula mayindu mu momo ndintanga.” Bulendakana phe buawu bukadila kuidi ngeyo. Wukiyuvula, ‘Thangu mbi yilutidi yimboti kuidi minu mu tanga Bibila?’
Thangu mbi yilutidi yimboti yitangilanga Bibila? Thangu mbi yifueni kuidi ngeyo muingi wutanganga Bibila kadika lumbu? (Tala paragrafi 6)
YINDUDILANGA MU BUPHINDA MAMBU MOMO WUNTANGA
7-8. Mbi bilenda kutukakidila mu luta baka mamboti mu momo tuntanga? Vana kifuani.
7 Bukiedika yilenda ba tulembo tangi buwombo vayi tukadi kueto thumbu sudika mambu momo tuntanga. Wume keta tanga diambu dimosi ayi mu mua thangu wukadi kuaku bue dibambukila moyo? Beto boso tueta dengana diambu beni. Diambu dikiadi, dilenda salama phe mu thangu tulembo tangi Bibila. Bulendakana tukitudila lukanu lutanganga mua ndambu bikapu bi Bibila kadika lumbu. Didi diambu dimboti mu kubutudila. Tufueti kukitudila zikhanu ayi tula ngolo mu kuzidukisa. (1 Ko. 9:26) Vayi tanga Bibila yidi kuandi thonono. Tufueti luta bue vanga mambu momo mantombana muingi tukibakila mamboti.
8 Yindudila kifuani kiaki: Nti muingi wuyonzuka phuila yinlangu wukala. Vayi mvula wawu nokina ngolo, nti beni wedi bue yonzuka ko bumboti. Mvula wawu nokina ngolo, wubue banga ko diaka mfunu. Ntoto thangu weta tomba muingi wumina maza mu diambu di bima biobi bimmena mu wawu biyonzuka bumboti. Bobuawu phe, tufueti manganga kifu kitanganga Bibila mu nsualu nsualu, bila kuawu kulenda tula ti tumona phasi mu yindudila mu buphinda mambu momo tuntanga, mu kumabambukila moyo ayi mu kumasadila.—Zaki 1:24.
Bobuawu bobo ntoto wukadila phuila yi nlangu wumvula muingi bima biobi bidi mu wawu biyonzuka, beto phe phuila yi thangu tukala muingi tuyindudila mu buphinda ayi sadila mambu momo tuntanga mu Mbembo Nzambi (Tala paragrafi 8)
9. Mbi tufueti tula enati kifu tukala kitanganga Bibila nsualu nsualu?
9 Kifu wukala kitanganga Bibila nsualu nsualu? Enati buawu, mbi wufueti tula? Dekula thinu. Bakanga thangu yi yindudila mu buphinda mambu momo wuntanga voti momo metanga. Kubutudila kubika kumonisa tsisi. Enati kubutudila kulembo monisa tsisi, ba sikididi ti diambu diodi wufueti vanga didi diyindudila mu buphinda mambu momo metanga. Wulenda kudisa phe thangu yindongokolo’aku muingi wubaka thangu yi yindudila mu buphinda. Voti wulenda baka nzengolo yitanganga mua ndambu ziverse muingi wubaka thangu yi yindudila mu buphinda mambu momo wuntanga. Victor nioni tuketidi tubilanga, tubidi ti: “Ndieta tula ti lutangulu luama lu Bibila luba lukhufi, bulendakana tanga kuandi kapu kimosi. Bo ndieta tanga Bibila nsuka nsuka, kuawu kueta kutsadisa mu lumbu kioso ndiyindudila mu buphinda mambu momo thengi.” Buba yoso kuandi phila yoyi ngeyo weta sadila mu tanga Bibila, bulutidi mboti wukitangila mu phila yoyi yikusadisa wuluta baka mamboti mu momo wuntanga.—Nku. 119:97; tala ankadre “Biuvu bitadila.”
10. Sudikisa phila yoyi wulenda sadila mambu momo wuntanga. (1 Tesalonika 5:17, 18)
10 Buba yoso kuandi thangu yi lumbu yoyi weta tangila Bibila ayi thangu yoyi weta viokisa mu kukitanga, kadi zimbakana ti wufueti tomba phila yisadila mambu momo wuntanga. Ngeyo tanga mua ndambu ziverse, wukiyuvula, ‘Bue ndilenda sadila mambu momo ndime tanga tona thangu yayi voti mu bilumbu binkuiza?’ Mu kifuani, tutula banga ngeyo metanga 1 Tesalonika 5:17, 18. (Tanga.) Kumanima mamana tanga ziverse beni ziozi, wulenda kukiyuvula keni weta sambila buwombo ayi keni weta kubutudila mu ntim’aku woso. Mu buela, wulenda yindula mambu momo mafueti kupusa wuvutudila Yehova matondo. Wulenda baka nzengolo yivutudila Yehova matondo mu mambu matatu mamfunu. Ngeyo yindudilanga mu phila beni yoyi buba mu mua ndambu miniti, mayi sadisa wuba mutu nioni weta wa ayi weta sadila Mbembo Nzambi. Yindula mu mamboti momo wukuiza baki ngeyo kubutudilanga kadika lumbu mu bibuku binkaka bi Bibila biobi wuntanga! Ninga, mawu luta ba mutu nioni weta sadila Mbembo Nzambi. Vayi buabu mbi wulenda tula ngeyo mona ti widi na mambu mawombo mabalula mu luzingu luaku?
WUKITUDILA ZIKHANU ZIFUANA
11. Bila mbi thangu zinkaka wulenda muena ti mambu mame viokakana tezo? Vana kifuani.
11 Mu thangu wulembo tangi Bibila, wulenda vonga nitu ngeyo bakula ti widi na mambu mawombo momo wufueti bongisa mu luzingu luaku. Tubonga kifuani: Lumbu kiaki bo tengi Bibila, lutangulu beni luveni zindongi mu diambu di wubika ba thalu zizi. (Zaki 2:1-8) Mueni ti wufueti bongisa phila yoyi weta tadila batu bankaka, diawu beki nzengolo yiludika mambu. Didi diambu dimboti mu kubutudila! Vayi lumbu kioki kilandikini tengi diaka masonoko momo malembo tubila mfunu wowo wufueti fionguninanga mambu momo wuntuba. (Zaki 3:1-12) Bakudi ti lumbu kimosi phila yoyi wutubila yisi ba ko beni yimboti. Diawu, beki nzengolo yiba mutu nioni wuntubanga mambu mamboti ayi momo mankindisanga batu bankaka. Lutangulu luaku lu Bibila lo lulandikini luiza bue kumonisa mfunu wukambu ba nkundi wu nza yayi. (Zaki 4:4-12) Bakudi diaka ti wufueti tadila bumboti mboti mambu momo weta tanga, momo weta tala ayi momo weta wa. Mu lumbu ki n’ya, wulenda mona phasi mu mana bongisa mambu moso momo mu luzingu luaku.
12. Bila mbi ka wulendi vongila ko nitu enati lutangulu luaku lu Bibila lulembo monisa ti wufueti bongisa mambu mu luzingu luaku? (Tala phe noti kuwanda phapi.)
12 Enati widi na mambu mawombo mabongisa mu luzingu luaku, kadi vonga nitu. Ngeyo sudika ti mambu mawombo widi mabongisa mu luzingu luaku, yawu yimmonisa ti widi na kadulu ki kukikulula ayi mayindu mamboti widi. Mutu nioni widi kadulu ki kukikulula ayi nioni ka kakivunanga ko, weta tanga Bibila mu lukanu lubakula mambu momo kafueti bongisa mu luzingu luandi.a Kadi zimbakana ti vuata “bumutu bumona” didi diambu diodi tufueti tatamana vanga. (Kol. 3:10) Mbi mabi sadisa wutatamana sadila Mbembo Nzambi?
13. Phila mbi yifuana yikukitudila zikhanu mu sadila mambu momo melonguka? (Tala phe foto.)
13 Va buangu kitomba sadila mu khumbu mosi mambu moso momo metanga, wulenda kukitudila lukanu lutomba sadila diambu dimosi voti mammuadi. (Zin. 11:2) Wulenda meka sadila diambu diadi: Sonika lisite yi mambu momo wufueti bongisa mu luzingu luaku, ayi sobula dimosi voti mammuadi momo wufueti keta tuamina bongisa ayi momo mankaka tomba kumabongisa mu bilumbu biobi binlandakana kuntuala. Mu diambu mbi wufueti tonina?
Va buangu kitomba sadila mambu moso momo wuntanga mu Bibila mu khumbu mosi, bila mbi kawulendi kukitudila ko zikhanu zifuana? Wulenda keta baka lukanu lusadila diambu dimosi voti mamuadi (Tala paragrafi 13-14)
14. Mu lukanu mbi wulenda tonina?
14 Wulenda baka nzengolo mu tonina bongisa diambu diodi dikembolo phasi kuidi ngeyo. Voti mu bongisa diambu diodi wummona ti diawu dilutidi mfunu kuidi ngeyo. Ngeyo thumbu bakula diambu diodi wufueti bongisa mu luzingu luaku, tula zithombolo mu minkanda mieto, mu kifuani, mu lusadusu lu Index des publications des Témoins de Jéhovah voti mu Buku ya bolukiluki mpo na Batatoli ya Yehova. Sambila mu diambu diodi tidi bongisa mu luzingu luaku mu lomba Yehova kavana “phuila ayi zingolo zisadila.” (Flp. 2:13) Ayi tomba sadila mambu momo wunlonguka. Ngeyo nunga bongisa diambu ditheti mu luzingu luaku, mawu ba phe phuila yibue tomba bue bongisa diambu dinkaka. Diawu, mu thangu wulembo moni ti nungini bongisa diambu dimosi mu luzingu luaku, voti nungini yonzula kadulu kimosi ki Bukristu, mawu baka lukindusu lutatamana bongisa mambu mu luzingu luaku ayi bulendakana wela sie bue mona ko phasi mu bongisa mambu mankaka.
BIKA MBEMBO NZAMBI “YISALA MU NGEYO”
15. Mu mbi bisadi bi Yehova badidi luviakunu na batu bankaka bobo beta tanga Bibila? (1 Tesalonika 2:13)
15 Batu bawombo beta tuba ti bawu bame mana tanga Bibila kikioso mu khumbu ziwombo. Vayi bukiedika beta wilukila mambu momo Bibila kieta longa? Batomba zingila mu nguizani ayi mambu momo Bibila kieta longa ayi tomba balula luzingu luawu? Nana, bila nduka nduka batu bawombo balandakanang’awu ko zindongi zi Bibila. Vayi bisadi bi Yehova buawu ko beta tadila Bibila! Banga Bakristu ba tandu kitheti, tueta tadila Bibila “bobuawu bobo kididi, Mbembo yi Nzambi.” Mu buela, tueta tula zingolo mu monisa ti Bibila kieta sala mu luzingu lueto.—Tanga 1 Tesalonika 2:13.
16. Mbi bilenda kutusadisa tuba batu bobo bansadilanga Mbembo Nzambi?
16 Thangu zioso yikala ko diambu difioti mu tanga ayi mu sadila Mbembo Nzambi. Tulenda mona phasi mu baka thangu yitangila Mbembo Nzambi. Voti tulenda ba kifu ki kuyitangilanga mu nsualu nsualu mu kondo thumbu visa mambu moso momo tuntanga. Voti tulenda mona ti mambu momo tufueti bongisa mu luzingu lueto mawokidi ngolo. Buba ti phasi weta mona mu tanga ayi sadila mambu momo Bibila kieta longa, wulenda kuaku nunga. Mu lusadusu lu Yehova, wulenda kubutudila. Tubaka nzengolo yikikinina lusadusu lu Yehova, ayi bika ba kaka batu bobo bakala kue wa na wa, vayi tuba batu bobo beta sadila Mbembo Nzambi. Mu kondo finda phaka, bobuawu tunluta tangila Mbembo Nzambi ayi kuyisadila mu luzingu lueto, buawu matu luta bela mu zikhini.—Zaki 1:25.
NKUNGA 94 Botɔndi mpo na Liloba ya Nzambe
a Tala mu jw.org video Mambu momo mintueni batubidi—Tanga Bibila.