Yangalala mu zikhini ziozi zikala mu kaba

1-2. Bila mbi Yehova katuvangila mu diluaku di monanga zikhini mu thangu tunkabila batu bankaka?

YEHOVA wutuvangila mu diluaku dimonanga zikhini ziwombo mu thangu tunkabila batu bankaka viokila zikhini ziozi zikala mu thangu batukabidi. (Mav. 20:35) Yawu yimmonisa ti tumonanga ko zikhini mu thangu batukabidi? Nana. Tuzebi phila yoyi tueta bela mu zikhini mu thangu batukabidi. Vayi tueta luta mona diaka zikhini ziwombo mu thangu tukabidi mutu. Ayi bukiedika yidi mu diambu di mamboti meto veka bo Yehova katuvangila mu phila beni yoyi. Bila mbi?

² Bo Yehova katuvangila mu phila beni yoyi, tulenda yonzula zikhini zieto ayi kukitula tuluta ba mu zikhini. Tulenda yonzula zikhini zieto mu tomba maluaku mankaka makabila batu. Didi diambu dimboti mu zaba ti Yehova buawu katuvangila.​—Nku. 139:14.

3. Bila mbi tulenda tubila ti Yehova widi “Nzambi yi zikhini”?

³ Masonoko matuveni sikididi ti kaba kueta nata “zikhini ziwombo.” (1 Tim. 1:11) Diawu, tulendi ko yituka mu wa ti Yehova widi Nzambi yi zikhini. Bila, niandi wutheti mu monisa kadulu ki kaba ayi widi nkabi nioni lutidi wunneni, “bila mu diambu diandi tulembo zingila, tun’diatila ayi tuididi” banga phila butubila thumu Polo. (Mav. 17:28) Diawu, “kadika dikaba dimboti” ayi kadika dikaba difuana, kuidi Yehova dieta ba.​—Zaki 1:17.

4. Mbi mabi tusadisa tuluta ba mu zikhini?

⁴ Beto boso tueta luta tomba baka zikhini ziozi zikala mu kaba. Tulenda kubutudila mu sokudila kadulu ki kaba ki Yehova. (Efe. 5:1) Mu disolo diadi, matu longuka kadulu kiandi kimboti ki kaba ayi matu longuka phe diambu diodi tulenda vanga enati tumueni mutu nioni tume kabila kakadi monisa phutudulu matondo. Mayindu beni mama tusadisa tutatamana ayi buba phe tubuela zikhini ziozi tueta mona mu kaba.

SOKUDILA KADULU KI KABA KI YEHOVA

5. Bima mbi bikinsuni Yehova katuveni?

⁵ Mu ziphila mbi Yehova keta monisina kadulu ki kaba? Tutadila mua ndambu bifuani. Yehova weta kutuvana bima biobi tuidi phuila muingi tuzinga. Bulendakana tuisi ko bima bithalu vayi mu lusadusu lu Yehova, bawombo mu beto badi na bima biobi badi phuila. Mu kifuani, weta kutusadisa tubaka kima kidia, kivuata ayi vama va leka. (Nku. 4:8; Mat. 6:31-33; 1 Tim. 6:6-8) Yehova kuika tueta kunkuika mu kingolo mu diambu di kadukisa ziphuila zieto zi kinsuni? Nana! Bila mbi keta kubutudila kuidi beto?

6. Dilongi mbi tubeki mu Matayi 6:25, 26?

⁶ Yehova weta kutuzola, diawu keta dukisila ziphuila zieto zi kinsuni. Tutadila ziphova zi Yesu ziozi zidi mu Matayi 6:25, 26. (Tanga.) Yesu wusadila bifuani bi tsemono. Mu thangu katubila zinuni, Yesu wutuba ti: “Zikunanga ko, zivelanga mim’butu ko ayi zilundanga bidia mu bilundulu ko.” Diawu, tala diaka mambu katubidi: “Dise dieno widi ku diyilu weta kuzidikila.” Ayi Yesu wuyuvula ti: “Beno luisi kuziviokila ko mu mfunu?” Dilongi mbi tubeki? Yehova weta luta bongila bisadi biandi mu mfunu wombo viokila bibulu. Bo tuzebi ti Yehova weta dukisa ziphuila zi bibulu, tulenda ba phe na sikididi ti wela dukisa ziphuila zieto! Banga kuandi phila yoyi disa di luzolo di mutu keta kipila bumboti bana bandi, Yehova weta dukisa ziphuila zi bana bandi mu luzolo.​—Nku. 145:16; Mat. 6:32.

7. Bue tulenda sokudila kadulu ki kaba ki Yehova? (Tala phe foto.)

⁷ Banga Yehova, beto phe tulenda sadisa batu mu kinsuni mu luzolo. Mu kifuani, zebi khomba mosi wu mukristu nioni widi phuila yi bidia, voti yi minledi mu diambu di kavuata? Yehova kalenda kusadila muingi wusadisa mutu nioni widi phuila yi lusadusu. Bisadi bi Yehova balutidi zabakana mu kadulu kiawu ki kaba mu phila yoyi beta sadisila bakhomba ziawu bobo beta builukulu bimvonza. Mu thangu yi vunga ki COVID-19 bakhomba ba babakala ayi babaketo, bakaba bidia, minledi ayi bima binkaka kuidi bobo baba mu phuila. Bawombo mu bawu, babuela diaka mioko mu vana makaba mu diambu di kisalu ki Bambangi zi Yehova mu nza yimvimba. Diawu ditula ti khubukulu yibaka zimbongo mu diambu di sadisa batu bobo babuilukulu bimvonza mu nza yi mvimba. Babongila mu mfunu wombo ziphova zi Ebelewo 13:16 ziozi zitubidi ti: “Lubika zimbakananga vanganga mamboti ayi kabulanga kuidi zikhomba bila makaba maphila yoyi mawu mammonisanga Nzambi khini.”

8. Bue Yehova keta kutuvanina zingolo mu diambu di sadisa? (Filipi 2:13)

⁸ Yehova weta kutuvana zingolo. Yehova weta yangalala vana bisadi biandi bikuikama zingolo ziandi ziozi kazi sukanga ko. (Tanga Filipi 2:13.) Wuma keta sambila mu diambu di wubaka zingolo zisiamina mu nzomono voti mu diambu di wubaka zingolo zimonisina mvibudulu mu nzomono yimosi yiphasi? Bulendakana wusambila phe mu diambu di wubaka zingolo muingi wutatamana ba wukuikama. Enati lusambulu luaku muingi wubaka zingolo luvanunu mvutu, wulenda kikinina ziphova ziozi Polo kasonika: “Mu mambu moso ndieta baka ngolo mu lusadusu lu Nzambi, mutu nioni weta kuphana ngolo.”​—Flp. 4:13.

9. Bue tulenda sokudila Yehova mu sadila zingolo zieto mu diambu di sadisa batu bankaka? (Tala phe foto.)

⁹ Kadiambu ko tuidi batu bakambu duka, tulenda sokudila Yehova phila yoyi keta sadila zingolo ziandi mu diambu di kaba. Mu kimutu, tulendi ko nunga vana batu bankaka zingolo zieto. Vayi tulenda sadila zingolo zieto mu diambu di sadisa batu bankaka. Mu kifuani, tulenda sadisa batu bobo bayonzuka voti bobo badi bieta mu kue basumbila bima ku zandu voti kubasadisa mu bisalu bi nzo. Enati bulendakana, tulenda kukivana mu luzolo lueto veka mu diambu di sukula, kombula ayi bongisa Nzo yi Kipfumu. Tufueti sadila zingolo zieto mu diambu di mamboti ma batu bobo beta sadila Yehova.

10. Bue tulenda sadila zingolo zieto zi tuba mu diambu di mamboti ma batu bankaka?

¹⁰ Tubika zimbakana ti mambu momo tuntuba malenda kindisa batu bankaka. Zebi mutu nioni wulenda baka lukindusu ngeyo kunniemisa mu mambu momo kamvanga? Zebi mutu widi mu phuila yi lukindusu? Mu mambu beni momo, bila mbi kawulendi bakila ko diyindu di kue m’bati muingi wunkindisa mu ziphova ziaku? Wulenda kue ntadi ku nzo’andi, kuntela mu telefoni voti kunsonikina nkanda voti kuntindila mesaje mu nzila telefoni. Kadi kukitatikisa buwombo mu momo wukuiza kue tubi. Mua ndambu ziphova zimboti ziozi zibedi mu ntima, zilenda sadisa Mukristu nioni widi phuila yi tatamana ba wukuikama voti nioni tidi kukimona mboti mu mambu mandi momo madi yandi voti momo malembo ntatisa.​—Zin. 12:25; Efe. 4:29.

11. Bue Yehova keta sadila ndueng’andi?

¹¹ Yehova weta kutuvana nduenga. Thumu Zaki wutuba ti: “Enati vadi na mutu mu beno kambulu nduenga, muna bika kalomba kuidi Nzambi wumvananga mu luzolo kuidi batu boso ayi niandi wumvananga mu kambu tsembolo.” (Zaki 1:5; nkp.) Banga phila bumonisini verse beni, Yehova kalundanga ko ndueng’andi mu diambu di niandi veka. Weta kaba ndueng’andi kuidi bankaka. Sudika diaka ti Yehova weta kaba ndueng’andi “mu kambu tsembolo,” voti “mu kambu tomba zinzimbala.” Katianga ko ti tumona phasi mu kunlomba lutuadusu. Kutu, weta kutukindisa tunlomba nduenga.​—Zin. 2:1-6.

12. Mu maluaku mbi tulenda kabila ndueng’eto?

¹² A buabu, beto phe tulenda sokudila Yehova mu sadisa batu bankaka bazaba ndueng’eto? (Nku. 32:8) Bisadi bi Yehova badi na maluaku mawombo mazabikisa mambu momo bazebi kuidi batu bankaka. Mu kifuani, tueta vana formasio kuidi minsamuni mimona mu kisalu ki tsamununu. Bakulutu beta sadisa mu mvibudulu woso bisadi mu kisalu ayi bakhomba ba babakala bobo babaka mbotama balonguka sadila bumboti biyeko biawu mu kimvuka. Ayi bakhomba bobo bazebi mambu mawombo mu kisalu kithungulu ayi mu kisalu kibongisa, beta sadisa mu vana formasio kuidi bobo bakambulu zaba mambu mawombo muingi banunga sala mu bibuangu biobi bidi zinzo zikhubukulu yi Yehova.

13. Mu thangu tulembo vani batu bankaka formasio, bue tulenda sokudila Yehova mu phila yoyi keta kabudila ndueng’andi?

¹³ Batu bo beta vana formasio beta vanga diambu dimboti mu sokudila phila yoyi Yehova keta kabila ndueng’andi. Bambukanga moyo mu phila yoyi Yehova keta kabila ndueng’andi mu luzolo luandi loso. Bobuawu, beto phe tufueti kabula mu kondo kuiku nzayilu’eto ayi diela dieto kuidi batu bobo balembo longuka. Tulendi ko kukikakidila mu monisa batu mambu mankaka momo tuzebi mu mona tsisi ti beto kubamonisa mawu buna baba tuvinginina va buangu kieto. Tulendi ko ba mbueno yiphila yayi mu tuba ti: ‘Minu kadi mutu kasi kundongisa ko! Bika kalonguka niandi veka.’ Kifu kiphila yoyi kisi ko kadi buangu kuidi bisadi bi Yehova. Va buangu ki kubutudila, mu luzolo lueto loso tueta zabikisa mambu momo tuzebi kuidi batu bankaka vayi phe ‘kukivana’ mu diambu di batu bobo tumvana formasio. (1 Tes. 2:8) Tuidi na vuvu ti “bawu phe bela kumalongisa kuidi batu bankaka.” (2 Tim. 2:1, 2) Beto kaba ndueng’eto mu luzolo loso kuidi batu bankaka, bawu ayi beto matu luta ba nduenga ayi matu luta ba mu zikhini.

ENATI BATU BOBO TUNKABILA BAKADI MONISA PHUTUDULU MATONDO

14. Bue nduka nduka batu beta bela mu thangu tubakabidi?

¹⁴ Mu thangu tulembo monisa kadulu ki kaba nduka nduka kuidi bakhomba zieto ba babakala ayi babaketo, bawu phe beta monisa phutudulu matondo. Balenda kututindila mua nkanda wu phutudulu matondo voti balenda monisa phutudulu’awu matondo mu phila yinkaka. (Kol. 3:15) Phila beni yoyi yiphutudulu matondo yeta kutubuela zikhini.

15. Diambu mbi tufueti simba mu mayindu meto enati bankaka bakadi monisa phutudulu matondo?

¹⁵ Mu tuba kiedika, batu bankaka bamonisanga ko phutudulu matondo mu mambu momo tueta kubavangila. Thangu zinkaka tulenda vana thangu’eto, ngolo zieto, voti baka kueto kuidi batu bankaka vayi kutsuka tulenda kukiyuvula keni beta bongila kuawu mu mfunu wombo mambu momo tueta kubavangila. Enati batu beni bakadi bongila mu mfunu wombo mambu momo tukubavangila, mbi tulenda tula muingi tubika zimbisa zikhini zieto voti muingi tubika ba nganzi? Tubambukila moyo ziphova zi disolo ziozi zisimbidi disolo dieto mu Mavanga 20:35. Zikhini zieto zikaba zisi simbimina ko mu phila yoyi batu beta tadila mambu momo tukubavangila. Tulenda baka nzengolo yizola kabila batu bankaka buba ti bakadi monisa phutudulu matondo. Mu phila mbi? Tutadila mua ndambu ziphila zi kubutudila.

16. Mu diambu mbi tufueti luta tula mayindu meto mu thangu tunkaba?

¹⁶ Luta tudi mayindu maku mu sokudila Yehova. Weta vana bima bimboti kuidi batu buba babiyangididi voti nana. (Mat. 5:43-48) Yehova veni tsila ti beto kabila batu bankaka mu “kambu ba mayindu keni baba tuvutudila,” mu na “mfutu’eto mawu ba wunneni.” (Luka 6:35) Buba ti bakadi yangalala mu momo tukubavangila, tulenda kueto kaka ba mu zikhini. Kadi zimbakana ti Yehova wela kuvana nsendo mu mamboti momo wulembo vangi mu diambu di sadisa batu bankaka bila widi mutu nioni weta ‘kaba mu zikhini.’​—Zin. 19:17; 2 Ko. 9:7.

17. Diambu mbi dilutidi mfunu diodi difueti kutupusa mu kabila batu bankaka? (Luka 14:12-14)

¹⁷ Diambu dinkaka tulenda vanga mu diambu di sokudila Yesu mu thangu tunkaba, didi mu sadila mambu momo katuba mu Luka 14:12-14. (Tanga.) Yisi’andi ko mbimbi mu monisa kadulu kiyamba voti kikabila batu bobo balenda kubutudila phe mu diambu dieto. Mambu mbi malenda salama beto banga kifu kibanzila ti beto kabila batu ti bawu phe maba tuvutudila? Madi ba diambu dimboti beto tomba sadila mambu momo Yesu katuba. Tulenda monisa kadulu kiyamba batu bobo ka balendi ko nunga kubutudila kuidi beto. Matu ba mu zikhini bila tulembo sokudila Yehova. Ba mbueno beni yoyi maku tusadisa phe tutatamana ba mu zikhini buba ti bankaka bakadi monisa phutudulu matondo mu momo tukubavangila.

18. Diambu mbi tufueti manga vanga ayi bila mbi?

¹⁸ Kadi banzila ti batu boso bamonisanga ko phutudulu matondo. (1 Ko. 13:7) Enati batu bankaka bakadi monisa phutudulu matondo, tulenda kukiyuvula: ‘Basi ko phutudulu matondo voti bulendakana zimbakana kuandi bazimbikini mu kubutudila?’ Bulendakana kuidi na mambu momo matudidi ti babika monisa phutudulu matondo banga phila yoyi tuntombila. Batu bankaka balenda tomba monisa phutudulu matondo mawombo vayi phasi beta mona kubutudila. Balenda mona tsoni mu kikinina lusadusu nduka nduka enati mu thama bawu beba sadisanga batu bankaka. Buba boso kuandi bum’bela, luzolo lu Bukristu malu tupusa tubika yindudila bakhomba zieto ba babakala ayi babaketo mayindu mambimbi ayi tutatamana baka zikhini ziozi zikala mu kaba.​—Efe. 4:2.

19-20. Bila mbi mvibudulu wididi mfunu mu thangu tulembo kabila batu bankaka? (Tala phe foto.)

¹⁹ Ba mvibudulu. Mu diambu ditedi kaba, ntinu wunduenga Solomo wusonika ti: “Loza dipha diaku mu nlangu bila kumanima ma bilumbu biwombo wela bue dibaka diaka.” (Mpo. 11:1) Banga phila bumonisini ziphova beni, batu bankaka balenda monisa phutudulu matondo mu diambu di kadulu kieto kikaba “kumanima ma bilumbu biwombo.” Tutadila kifuani kimosi kioki kilembo monisa diambu beni bumboti mboti.

²⁰ Vame vioka mimvu miwombo, nketo wu nkengi zunga mosi wutinda nkanda wu luzolo kuidi khomba mosi wunketo nioni wubaka mbotama vasi vioka ko bilumbu biwombo, mu nkanda beni wunkindisa katatamana ba wukuikama. Kumanima ma nana di mimvu, khomba beni wunketo wuyiza vutula mvutu mu nkanda beni, ayi wutuba ti: “Ndimona ti ndifueti kusonikina kaka muingi ndivutudila matondo mu lusadusu lolo wuphana vame vioka mimvu miwombo buba ti wukadi bue lubambukila moyo.” Wubue tuba diaka ti: “[Nkanda wowo wutsonikina] wundiangidika buwombo vayi masonoko mawu maluta simba ntim’ama ayi kadi khumbu ndisi kuma zimbakana ko.”a Kumanima mamana tubila mambu maphasi momo kadengana, khomba beni wunketo wutuba ti: “Thangu zinkaka ndiyiza ba phuila yibika, yikambu bue ba Mbangi Yehova voti yikambu bue kunsadila. Vayi bibuku bi Bibila biobi wusonika mu nkanda beni, bisimba ntim’ama ayi ndiyiza ba phuila . . . yitatamana.” Wutuba diaka ti: “Kuisi ba ko kadi diambu diodi dikhindisa mu nana di mimvu miomi mime vioka viokila lukindusu lolo wuphana.” Yindula phila yoyi nketo wu nkengi wu zunga beni kayiza bela mu zikhini ziwombo ziyamba nkanda beni “kumanima ma bilumbu biwombo”! Beto phe balenda kutuvutudila matondo kumanima ma mimvu miwombo bo tusadisa batu mu yoso kuandi phila.

21. Bila mbi tufueti bakila nzengolo yitatamana sokudila kadulu ki kaba ki Yehova?

²¹ Banga phila tuditubidingi, Yehova wutuvanga ayi diluaku dimfunu wombo. Kadiambu ko tueta mona khini mu thangu batukabidi, vayi tueta luta mona zikhini mu thangu tulembo kabila batu bankaka. Tueta yangalala mu thangu tueta ba na diluaku disadisila bakhomba zieto ba babakala ayi babaketo mu minu. Ayi tueta ba mu zikhini mu thangu bamonisini phutudulu matondo. Buba ti nioni tukabidi, wutumonisini phutudulu matondo voti nana, tulenda kueto kaka ba mu zikhini mu diambu diodi tuvengi. Tubika zimbakana ti, buba kioso kuandi kioki tunkabila mutu, “Yehova widi na diluaku di kutuvanina biwombo viokila biobi tunkaba.” (2 Lus. 25:9) Diawu, Yehova wela luta kusakumuna buwombo! Kuisi ko kadi makhini momo malutidi viokila lusakumunu lu Yehova. Diawu, tuba bakubama mu tatamana sokudila kadulu ki kaba ki Disa dieto di mazulu.