DISOLO DI NDONGOKOLO 40
NKUNGA 30 Tata na ngai, Nzambe na ngai, mpe moninga na ngai
Yehova weta “vukisa bobo baluala mu ntima”
‘Yehova weta vukisa bobo baluala mu ntima; ayi weta fuka ziphuta ziawu.’—Nku. 147:3.
MAMBU MO MADI MU KHATI DISOLO DIADI
Yehova weta kitatikisa buwombo mu diambu di batu bobo baluala mu ntima voti mu diambu di bobo balembo tatakana buwombo mu mayindu. Disolo diadi madi tumonisa phila yoyi Yehova keta dekudila ziphasi zieto ayi phila yoyi keta kutusadisila tubomba batu bankaka.
1. Yehova mayindu mbi kadi mu diambu di bisadi biandi?
MBI Yehova keta mona mu thangu keta tala bisadi biandi va ntoto? Weta mona zikhini zieto ayi ziphasi zieto. (Nku. 37:18) Weta yangalala mu thangu keta kutumona ti tulembo tudi ngolo mu kunsadila kadiambu ko tuidi mu kiunda! Mu buela, phuila yingolo kakala yi kutusadisa ayi yi kutubomba.
2. Mambu mbi Yehova keta vanga mu diambu di batu bobo baluala mu ntima, ayi bue tulenda bakila mamboti mu phila yoyi keta kubasadisila?
2 Minkunga 147:3 yitubidi ti Yehova ‘weta fuka ziphuta’ zi batu bobo baluala mu ntima. Verse yoyi yilembo monisa phila yoyi Yehova keta kipila batu bobo badi mu kiunda ayi phila yoyi keta kubasadisila. Mbi tulenda tula muingi tubaka mamboti mu phila yoyi Yehova keta kutusadisila? Tutadila kifuani kimosi. Munganga nioni zebi bumboti mboti kisalu, kalenda vanga mambu mawombo mu diambu di sadisa mutu nioni luedi kabeluka. Mu diambu di mutu beni kabeluka, kafueti landakana bumboti mboti zithumunu zi munganga. Mu disolo diadi, matu mona mambu momo Yehova katubidi mu Mbembo’andi mu diambu di sadisa batu bobo badi mu kiunda ayi matu mona phila yisadila zindongi ziandi zi luzolo.
YEHOVA WETA KUTUMONISA TI MFUNU WOMBO TUIDI VA MESO MANDI
3. Bila mbi batu bankaka beta banzila ti basi ko mfunu?
3 Tulembo zingila mu nza yoyi yikambulu luzolo, ayi diambu dikiadi, batu bawombo beta banzila ti basi ko mfunu. Khomba mosi wunketo widi mu dizina Helenea tubidi ti: “Ndiyonzukila mu dikanda diodi dikambulu luzolo. Siama wuba mutu wukikhesi ayi weba kutuvangilanga mambu mambimbi kadika lumbu ayi yawu yitula ti tumona ti tuisi ko mfunu.” Bulendakana banga Helene, ngeyo phe bavangila mambu mambimbi, bavueza mu khumbu ziwombo voti weta kimona ti bazolanga ko. Enati buawu buididi, wulenda mona phasi mu kikinina ti kuidi na mutu weta kutudila thalu mu bukiedika.
4. Mu tadila Minkunga 34:18, sikididi mbi Yehova katuveni?
4 Buba ti batu bankaka bavangila mambu mambimbi, wulenda ba sikididi ti Yehova weta kuzola ayi weta kubongila mu mfunu wombo. Niandi widi “wufikama kuidi batu bobo badi mintima mikofakana.” (Tanga Minkunga 34:18.) Enati widi na “pheve yidi mu kiadi kingolo,” bambuka moyo ti Yehova wumona mambu mamboti mu ntim’aku ayi wubenda kuidi niandi. (Yow. 6:44) Wukala kaka wukubama mu kusadisa bila mfunu wombo widi kuidi niandi.
5. Dilongi mbi tulenda longuka mu phila yoyi Yesu keba vangilanga mambu kuidi batu bobo beba monanga kuidi batu bankaka ti badi batu baphamba?
5 Tulenda luta zaba phila yoyi Yehova keta kimuena mu tadila kifuani ki Yesu. Mu thangu kaba va ntoto, Yesu wutula thalu kuidi batu bobo beba monanga kuidi batu bankaka ti badi batu baphamba, ayi weba kubamonisinanga ntima kiadi. (Mat. 9:9-12) Mu thangu nketo nioni weba bela kimbevo kingolo kasimba minledi miandi muingi kabeluka, Yesu wum’bomba ayi wumfelisite mu bila ki minu kiandi kingolo. (Mlk. 5:25-34) Yesu weta monisa bumboti mboti bumutu bu Siandi. (Yow. 14:9) Diawu, wulenda ba sikididi ti Yehova weta kubongila mu mfunu wombo ayi weta mona bikadulu biaku, buba phe minu kiaku ayi luzolo luaku kuidi niandi.
6. Mbi wulenda tula enati weta kimona ti wisi ko mfunu?
6 Mbi wulenda tula enati wulembo tatamana kukimona kaka ti wisi ko mfunu? Tanga ziverse zi Bibila ziozi zikuvana sikididi wumona ti mfunu widi kuidi Yehova ayi wuziyindudila mu buphinda.b (Nku. 94:19) Enati wukadi koka dukisa lukanu lumosi voti enati vongidi nitu mu bila kioki wukadi nungina sala buwombo banga batu bankaka, kadi kukisambisa buwombo. Yehova kakadi kulomba mambu momo ka wulendi ko koka vanga. (Nku. 103:13, 14) Enati bebisa babebisa mu thama, kadi kukivana foti mu mambu momo m’bebisi beni kavangila. Bambuka moyo ti Yehova wela futisa nkanu kuidi mutu nioni wuvangila mambu mambimbi, vayi bika kuidi ngeyo. (1 Pi. 3:12) Sandra, nioni babebisa mu bumuana buandi, tubidi ti: “Thangu ka thangu ndieta lomba Yehova katsadisa ndikimona mu phila yifuana, banga phila yoyi niandi keta kumbuena.”
7. Mu phila mbi mambu momo tudengana mu thama malenda kutusadisila mu kisalu kieto kuidi Yehova?
7 Kadi finda phaka ti Yehova kalenda kusadila muingi wusadisa batu bankaka. Wuvana lukumu bo kasobula wusala yandi mu kithuadi mu kisalu ki tsamununu. (1 Ko. 3:9) Mambu momo wudengana mu thama bulendakana matula ti wumonanga batu bankaka kiadi ayi wusudikanga phila yoyi beta kukimuena. Wulenda vanga mambu mawombo mu diambu di kubasadisa. Helene, nioni tutekidi tubilanga, wubaka lusadusu ayi lumbu kiaki wuyika wufuana mu sadisa batu bankaka. Tubidi ti: “Ndiba kifu ki kukimonanga ti ndisi ko mfunu vayi Yehova wutula ndikimona ti beta kunzola ayi weta kutsadila mu diambu di sadisa batu bankaka.” Helene widi mu zikhini ziba n’zibudi nzila wu thangu ka thangu.
YEHOVA TIDI TI TUKIKININA NLEMVO’ANDI
8. Sikididi mbi Yehova katuveni mu Yesaya 1:18?
8 Bisadi biwombo bi Yehova beta kitatikisa buwombo mu mambu momo bavanga mu thama, buba tuamina babaka mbotama voti kumamima mabaka mbotama. Vayi matu vanga diambu dimboti mu bambuka moyo ti Yehova wuvana khudulu mu diambu di luzolo lungolo lolo kakala kuidi beto. Bukiedika, tidi ti tukikinina dikaba diandi. Yehova wutuveni sikididi ti beto thumbu “bongisa mambu”c ayi niandi, kalendi ko bue tutangila masumu meto. (Tanga Yesaya 1:18.) Tuidi na phutudulu matondo mawombo kuidi Yehova Disa dieto di luzolo mu phila yoyi keta zimbikinina masumu meto mathama! Ayi kadi khumbu kela zimbakana phe mambu mamboti momo tuvanga.—Nku. 103:9, 12; Ebe. 6:10.
9. Bila mbi tufueti tudila ngolo mu luta tula mayindu meto mu mambu momo tumvanga thangu yayi ayi mu mambu momo tuela vanga mu bilumbu binkuiza va buangu kitula mayindu meto mu mambu mathama?
9 Enati weta kitatikisa mu mambu momo masalama mu thama, tula ngolo mu luta tula mayindu maku mu mambu momo wumvanga thangu yayi ayi mu momo wela vanga mu bilumbu binkuiza va buangu kitula mayindu maku mu mambu mathama. Tutadila kifuani ki thumu Polo. Weba kitatikisanga mu phila yoyi kazomina mu kikhesi Bakristu, vayi wuzaba ti Yehova wunlemvukila. (1 Tim. 1:12-15) Wutatamana kukitatikisa mu masumu momo kavanga mu thama? Mu kondo finda phaka, kasi kubutudila ko banga kuandi phila kasi tudila ko mayindu mandi mu mambu momo kavanga mu thama mu dingumba di Bayuda. (Flp. 3:4-8, 13-15) Va buangu ki kubutudila, Polo wuluta tula mayindu mandi mu kisalu kiandi ki tsamununu ayi wutala kuntuala. Banga Polo, wulendi ko balula mambu momo masalama mu thama. Vayi wulenda vana Yehova lukumu mu mambu momo wumvanga thangu yayi ayi tula mayindu maku mu mambu momo katuvanini tsila mu bilumbu binkuiza.
10. Mbi tulenda tula enati mambu momo tuvanga mu thama malueka mintima mi batu?
10 Wulenda kukitatikisa mu mambu momo wuvangila batu bankaka momo mabalueka mu thama. Mbi bilenda kusadisa? Tula ngolo wubongisa mambu momo wuvanga ayi lomba nlemvo wukiedika. (2 Ko. 7:11) Lomba Yehova kasadisa batu bobo baluala mu ntima mu mambu momo wuvanga. Kalenda kusadisa ngeyo ayi batu bobo wulueka lumonisa mvibudulu ayi lubaka ndembama.
11. Malongi mbi tulenda baka mu kifuani ki Yona? (Tala foto va.)
11 Baka malongi mu zinzimbala ziozi wuvanga mu thama ayi ba wukubama mu bikila Yehova nzila kasadila mu phila yoyi katididi. Tutadila kifuani ki m’bikudi Yona. Va buangu kikuenda ku Ninive kuma koko Nzambi kantuma, Yona wuyenda kuandi ku mbanza yinkaka. Yehova wusemba Yona ayi wubaka malongi mu zinzimbala ziandi. (Yona 1:1-4, 15-17; 2:7-10) Yehova kasi yekula ko Yona. Nzambi wumvana diluaku dinkaka dikuendila ku Ninive, ayi wuyiza tumukina mu ntima mosi. Kasi bikila ko nzila nzimbala yoyi katula mu thama yinkakidila kakikinina kisalu kioki Yehova kantumina.—Yona 3:1-3.
Kumanima ma vuka mu nzomono mu khati mbizi yinneni, Yehova wukamba Yona kenda diaka ku Ninive mu kue samuna tsangu’andi (Tala paragrafi 11)
YEHOVA WETA KUTUBOMBA MU NZILA YI PHEVE SANTU’ANDI
12. Bue Yehova keta kutuvanina ndembama mu thangu tudengini mambu momo makutumonisa tsisi voti mu thangu tufuilulu? (Filipi 4:6, 7)
12 Mu nzila yi pheve santu’andi, Yehova weta kutubomba mu thangu tulembo dengana mambu momo makutumonisa tsisi voti mu thangu tufuilulu. Tutadila kifuani ki Ron ayi Carol. Diambu dikiadi, muan’awu wukivonda. Batubidi ti: “Tuketa dengana mambu maphasi vayi diadi dilutidi. Mabuilu mawombo tutula mu kondo leka mu diambu di sambila, ayi tuyiza baka ndembama yoyi batubidi mu Filipi 4:6, 7.” (Tanga.) Enati zinzomono zingolo wulembo dengana, wulenda zibudila Yehova ntim’aku woso mu lusambulu mu zioso kuandi zikhumbu tididi ayi yoso kuandi thangu tidi. (Nku. 86:3; 88:1) Lomba Yehova mu khumbu ziwombo pheve santu’andi ayi kadi khumbu kela lasakana zindombolo ziaku.—Luka 11:9-13.
13. Bue pheve santu yilenda kutusadisila tutatamana sambila Yehova mu bukuikama? (Efeso 3:16)
13 Wuteka dengana nzomono mosi yiphasi yoyi yivongisa? Pheve santu yilenda kuvana ngolo wutatamana sambila Yehova mu bukuikama. (Tanga Efeso 3:16.) Tutadila kifuani ki khomba mosi wunketo widi mu dizina Flora. Baba bamisionere mu thangu nnuni’andi kasi kuiza bue ba ko wukuikama kuidi niandi ayi bayiza vonda dikuela diawu. Tubidi ti: “Ndikitatikisa buwombo mu bila ki kambu kuandi ku kuikama ayi mawu kaka mambu ndieba lembo ka yindulanga. Ndisambila Yehova kaphana pheve santu’andi muingi nditatamana. Yehova wutsadisa ndibeluka ayi ndinunga mambu momo vathonono ndibanzila ti ndilendi ko kumanunga.” Flora wumona ti Nzambi wunsadisa kantudila ntima ayi wuzaba ti wela kunsadisa mu zinzomono ziandi zioso. Tubidi diaka ti: “Ziphova zi Minkunga 119:32 zithadila, zio zitubidi ti: ‘Ndilembo zawula mu nsolo wu zithumunu ziaku bila ngeyo zibudi ntim’ama.’”
14. Bue tulenda bikila pheve santu nzila yisala mu beto?
14 Ngeyo mana lomba Yehova pheve santu, mbi wufueti tula? Vanga mambu momo mantula ti pheve santu yisala mu ngeyo. Mambu beni madi kutakana mu zikhutukunu ayi sala kisalu ki tsamununu. Wesa mayindu maku mu mambu ma Yehova mu tanganga Mbembo’andi kadika lumbu. (Flp. 4:8, 9) Mu thangu wulembo tangi Bibila, tula thalu mu batu bobo Bibila kitubidi bobo badengana zinzomono ayi yindudila mu buphinda phila yoyi Yehova kabasadisila batatamana. Sandra, nioni tutekidi tubilanga, wudengana mambu mawombo maphasi mu luzingu luandi. Tubidi ti: “Disolo di Yosefi disimba buwombo ntim’ama. Kasi bikila ko zinzomono nzila ayi mambu makambu ku busonga momo kadengana madekula nguizani’andi ayi Yehova.”—1 Mo. 39:21-23.
YEHOVA WETA KUTUBOMBA MU NZILA YI BAKHOMBA ZIETO BAKRISTU
15. Kuidi banani tulenda bakila mbombolo ayi bue balenda kutusadisila? (Tala phe foto.)
15 Mu thangu tulembo moni ziphasi, bakhomba zieto Bakristu balenda ba “tho yimbombolo yinneni.” (Kol. 4:11) Yimosi mu ziphila yoyi Yehova keta kutumonisina luzolo luandi, yidi mu nzila yi bakhomba zieto Bakristu. Bakhomba zieto bakristu balenda kutubomba mu kutuwa mu ntima kiadi woso, voti mu thangu balembo viokisa yeto thangu. Balenda kututangila verse yi Bibila yoyi yilenda kutukindisa voti balenda tula lusambulu ayi beto.d (Lom. 15:4) Thangu zinkaka, khomba mosi wubakala voti wunketo kalenda kutubambula moyo mayindu ma Yehova ayi kutusadisa tutatamana simbidila bukhati khati bueto. Bakhomba zieto Bakristu balenda phe kutuvana lusadusu lu kinsuni, banga kutukabila bidia mu thangu tuidi mu kiunda.
Bakundi bobo bayonzuka mu kipheve ayi bobo bafueni tudulu ntima, balenda vana mbombolo yiwombo ayi lusadusu (Tala paragrafi 15)
16. Mbi tufueti tula muingi tubaka lusadusu lu batu bankaka?
16 Muingi tubaka lusadusu lu batu bankaka, bulendakana tufueti kulutomba. Bakhomba zieto ba babakala ayi babaketo beta kutuzola ayi batidi kutusadisa. (Zin. 17:17) Bulendakana basi zaba ko mambu momo malembo tutatikisa ayi bima biobi tuidi phuila. (Zin. 14:10) Enati mu kiunda widi, ba wukubama mu kamba mambu momo malembo tatisa kuidi bakundi bobo bayonzuka mu kipheve. Wubazabikisa ziphuila ziaku. Wulenda kamba mambu momo malembo tatisa kuidi nkulutu mosi voti babuadi bobo ka wumonanga ko phasi mu solula ayi bawu. Bakhomba bankaka babaketo babaka mbombolo mu kamba mambu momo malembo batatisa kuidi khomba wunkaka wunketo nioni wuyonzuka mu kipheve.
17. Mambu mbi maphasi malenda kutukakidila mu baka lukindusu, ayi bue tulenda kumanungina?
17 Nunga manga kifu ki kue banga kaka va ngeyo veka. Mu bila ki mambu momo makututatikisa, tulenda ba phuila yikambu solula ayi batu bankaka. Thangu zinkaka bakhomba ba babakala ayi babaketo balenda kondo kitula va buangu kiaku voti balenda kambu zaba sobula ziphova zimboti ziozi zilenda kukindisa. (Zaki 3:2) Kadi bikila nzila mambu maphila yoyi makakidila mu baka lukindusu lolo widi phuila. Nkulutu mosi widi mu dizina Gavin, nioni wubela kimbevo ki tatakana mu mayindu, tubidi ti: “Ba va kimosi ayi bakundi bama diba diambu diodi ndibe monanga phasi mu vanga.” Vayi diambu di lukindusu, Gavin kasi bikila ko nzila mayindu maphila yoyi mankakidila mu baka mamboti ma batu bankaka. Khomba mosi widi mu dizina Amy tubidi ti: “Mu bila ki mambu momo ndidengana mu thama, mawu mathula ti ndimona phasi mu tudila batu ntima. Vayi ndilembo tudi ngolo mu zola bakhomba ba babakala ayi babaketo ayi kubatudila ntima banga phila Yehova keta kubutudila. Nzebi ti kubutudila kuawu kueta tula Yehova kaba mu zikhini ayi minu phe.”
ZITSILA ZI YEHOVA MU DIAMBU DI BILUMBU BINKUIZA ZILENDA KUTUBOMBA
18. Mambu mbi tulenda vingila mu diambu di bilumbu binkuiza ayi mbi tulenda tula tona thangu yayi?
18 Tulenda vingila bilumbu binkuiza mu sikididi kioso mu zaba ti Yehova weka nduka tuvukisa mvimba mvimba mu ziphasi zioso ziozi tulembo moni. (Tso. 21:3, 4) Mu thangu beni yina, mambu moso maphasi “tuela sie bue mabambukila ko moyo.” (Yes. 65:17) Banga phila tubumueniningi, Yehova wulembo ‘fuki ziphuta zieto’ tona thangu yayi. Luta baki mamboti mu zikhubukulu zi luzolo zi Yehova ziozi zieta kutunatina mbombolo ayi lukindusu. Kadi memata kadi fifioti mu kikinina ti Yehova weta “kubanzila.”—1 Pi. 5:7.
NKUNGA 7 Yehova azali makasi na biso
a Mazina mankaka balulu mabalulu.
b Tala ankadre “Yehova weta kubongila mu mfunu wombo.”
c Muingi “tubongisa mambu” ayi Yehova, tufueti monisa ti tubaludi ntima mu kunlomba nlemvo katulemvukila masumu meto ayi balula mavanga meto. Enati tuvengi disumu dinneni, tufueti lomba phe lusadusu kuidi bakulutu mu kimvuka.—Zaki 5:14, 15.