Phila yoyi tueta bakila mamboti mu luzolo lu Yehova

1. Mbi tulenda tula mu diambu di tuyangidika Yehova?

YINDULA buna banga ngeyo wulembo vani kuidi mutu nioni weta zola kima kimosi ki sipesiali kioki kidi diaka phe kimboti ayi kioki kilenda sadulu. Mawu nionga enati mutu beni weniaka kima beni koko beta lundila bima ayi kakadi kukikipa! Vayi mawu ba mu zikhini niandi sadila kima beni mu phila yimboti ayi niandi monisa phutudulu matondo mu kima beni. Kifuani beni kioki mbi kikutumonisa? Yehova wuvana Muan’andi mu diambu di mamboti meto. Yehova maka mona khini ziwombo beto monisa phutudulu matondo mu dikaba beni dimfunu wombo ayi mu luzolo luandi lolo lutula ti katuvana khudulu!​—Yow. 3:16; Loma 5:7, 8.

2. Mbi tueka ntadila mu disolo diadi?

² Bobuawu bunkuendila mimvu, tulenda tona zimbisa phutudulu’eto matondo mu khudulu. Mayi ba banga beto tuye lunda dikaba di Nzambi vama vamosi. Matu yangalala baka dikaba beni, vayi mayi ba banga beto tudisuekidi. Muingi tubika kubutudila, tufueti monisanga thangu ka thangu phutudulu’eto matondo mu mambu momo Nzambi ayi Kristu batuvangila. Disolo diadi madi tusadisa tubutudila. Matu mona phila yoyi tulenda bakila mamboti mu khudulu tona thangu yayi ayi phila yoyi tulenda kuyibakila mamboti mu bilumbu binkuiza. Matu mona phe phila yoyi tulenda monisina phutudulu matondo mu luzolo lu Yehova, nduka nduka mu tsungi yayi yi Mbambukulu moyo.

PHILA YOYI TUETA KUYIBAKILA MAMBOTI MU BILUMBU BIABI

3. Bue tueta bakila mamboti mu khudulu mu bilumbu biabi?

³ Tueta baka deja mamboti mu nkayilu wukhudulu wu Kristu. Mu kifuani, mu bila ki khudulu, Yehova weta lemvukila masumu meto. Tulendi ko kunkuika mu kingolo katulemvukila. Vayi niandi veka weta zola kubutudila. Nsoniki wu Minkunga wumonisa phutudulu matondo mu yimbila ti: “Ngeyo, O Yehova, widi wumboti ayi weta lemvukila.”​—Nku. 86:5; 103:3, 10-13.

4. Kuidi banani Yehova kavana khudulu? (Luka 5:32; 1 Timote 1:15)

⁴ Batu bankaka balenda mona ti basi fuana ko baka nlemvo wu Yehova. Kutu beto boso nginu tuisi fuan’eto ko baka nlemvo wu Yehova. Kutu mvuala Polo wusudika ti kasi “fuana ko mu tedolo mvuala.” Kadiambu ko wubue tuba ti: “Mu nlemvo wu Nzambi ndidi buabu mu phila yi ndididi.” (1 Ko. 15:9, 10) Mu thangu tueta lembo vanga masumu meto, Yehova weta kutulemvukila. Bila mbi? Yisi ko ti tufueni lemvukulu, vayi bila weta kutuzola. Enati weta kukimona ti wisi fuanu ko lemvukulu, bambuka moyo ti Yehova kasi vana ko khudulu mu diambu di batu bobo bakambulu masumu vayi mu diambu di bankua masumu.​—Tanga Luka 5:32; 1 Timote 1:15.

5. Kuidi na wumosi mu beto wulembo kukimoni ti niandi widi na luve lumonusunu ntima kiadi wu Yehova? Sudikisa.

⁵ Kuisi ko kadi wumosi mu beto nioni wukukimona ti niandi widi na luve lumonusunu ntima kiadi wu Yehova, buba ti mimvu miwombo tume viokisa mu kisalu kiandi. Kadiambu ko Yehova weta yangalala kuikama kueto. (Ebe. 6:10) Wutuvana Muan’andi Yesu banga dikaba di ofele, vayi bika banga mfutu mu kisalu kioki tunsadila. Beto kukimona ti tuidi na luve lumonusunu ntima kiadi voti lutadulu mu phila mosi yi sipesiali kuidi Yehova, buna mayi monika ti Yesu mu phamba kuandi kafuila.​—Dedikisa Ngalatiya 2:21.

6. Bila mbi Polo kasadila buwombo mu kisalu ki Yehova?

⁶ Polo wuzaba ti kasi fuan’andi ko mu baka nlemvo wu Yehova. Vayi buabu, bila mbi kasadila buwombo mu kisalu ki Yehova? Kasi kubutudila ko mu diambu di kamonisa ti fueni baka nlemvo, vayi mu diambu di kamonisa phutudulu matondo mu nlemvo wunnneni wu Yehova. (Efe. 3:7) Banga Polo, tueta tatamana sala mu kipfuzi bika ti mu diambu di tubaka luve mu nlemvo wu Yehova, vayi mu diambu di tummonisina phutudulu matondo.

7. Phila mbi yinkaka tulenda bakila mamboti mu khudulu mu bilumbu biabi? (Loma 5:1; Zaki 2:23)

⁷ Phila yinkaka yibakila mamboti mu khudulu tona thangu yayi yidi yiba nguizani yi ngeyo veka ayi yingolo kuidi Yehova.a Banga phila tubumuenini mu disolo diodi diviokidi, mu thangu tubutuka tuisi ba ko nguizani ayi Nzambi. Vayi mu bila kikhudulu, tulenda baka mamboti mu ba mu “ndembama ayi Nzambi” ayi tulenda ba pfika pfika kuidi niandi.​—Tanga Loma 5:1; Zaki 2:23.

8. Bila mbi tufueti bela phutudulu matondo kuidi Yehova mu diluaku diodi katuvana di kunsambila?

⁸ Tutadila dimosi mu mambu meta kututula tuba nguizani ayi Yehova: Diluaku di kunsambila. Yehova kasukilanga ko kaka mu wa minsambu miomi mieta salimina va ntuala batu bawombo mu thangu bakutikini, vayi weta wa phe minsambu mi kadika mutu mu thangu tuidi va beto veka. Lusambulu lulenda lembika ntim’eto ayi lulenda kutuvana ndembama mu mayindu, vayi lulutidi phe mbukulu yimboti yi bilongo. Lulenda yonzula phe kikundi kieto ayi Nzambi. (Nku. 65:2; Zaki 4:8; 1 Yow. 5:14) Mu thangu kaba va mbata ntoto, Yesu weba sambilanga mu khumbu ziwombo bila wuzaba ti Yehova weba kunwanga ayi lusambulu lueba tulanga phe ti nguizani’andi yiba yingolo ayi Siandi. (Luka 5:16) Tuidi na phutudulu matondo mawombo mu nkayilu wu Yesu, mu diluaku diodi tuidi diba bakundi ba Yehova ayi buba phe mu diluaku diodi tuidi disolula ayi niandi mu lusambulu!

BUE TULENDA BAKILA MAMBOTI MU KHUDULU MU BILUMBU BINKUIZA

9. Bue khudulu yela vanina mamboti mu bilumbu binkuiza kuidi bisadi bikuikama?

⁹ Bue bisadi bi Yehova bikuikama biela bakila mamboti mu khudulu mu bilumbu binkuiza? Bela baka luzingu lu mvu ka mvu. Batu bawombo beta banzila ti batu balendi ko baka luzingu lu mvu ka mvu bila batu beta fua kaka tona thama. Vayi lukanu lutheti lu Yehova luba ti batu bazinga mvu ka mvu. Enati Adamu kasi sumuka ko, nginu kadi mutu lenda banzila ti zinga mvu ka mvu didi diambu dingitukulu. Ayi enati zinga luzingu lu mvu ka mvu didi diambu dingitukulu mu bilumbu bieto biabi, tulenda wilukila ti tulenda kulubaka bila Yehova wufuta mfutu wowo wulutidi mimfutu mioso​—luzingu lu Muan’andi wumosi kaka.​—Loma 8:32.

10. Mu phuila yoso Bakristu bobo batulu mafuta mu kipheve ayi mamemi mankaka mbi balembo vingila?

¹⁰ Kadiambu ko luzingu lu mvu ka mvu luidi mamboti momo tuela baka mu bilumbu binkuiza, Yehova katidi ti tuluyindudilanga tona thangu yayi. Bakristu bobo batulu mafuta mu kipheve, balembo vingila mu phuila yoso luzingu lumfunu ku diyilu mu thangu bela yadila ntoto ayi Kristu. (Tso. 20:6) Mamemi mankaka beta yindula zinga ku paladiso va mbata ntoto mu kondo bue mona ziphasi ayi kiadi. (Tso. 21:3, 4) Widi wumosi mu mamemi momo madi vuvu ki zinga mu luzingu lu mvu ka mvu va mbata ntoto? Mamboti beni momo masi ko kaka mfutu wufioti wumbombolo! Diawu batu bavangulu muingi bazinga mvu ka mvu. Luzingu va mbata ntoto luela kututula tuba mu zikhini ziwombo.

11-12. Mamboti mbi mela ba ku paladiso momo tulenda kukiyindudilanga? (Tala phe foto.)

¹¹ Yindulanga phila yoyi luzingu luela bela va mbata ntoto mu diambu di ngeyo. Wela sie bue kitatikisanga ko mu bimbevo voti mu diambu ditedi lufua. (Yes. 25:8; 33:24) Yehova wela mana dukisa ziphuila zieto zioso. Diambu mbi diodi wulembo luti vingila? Wela tomba longuka mambu matedi bibulu? Voti wela tomba zaba bula sadulu kimosi ki miziki? Voti wela longuka zaba fikula? Mu kondu finda phaka, tuela ba phuila yi batu bobo bela vanga ziplan zithungulu, mintungi mi zinzo ayi minkuni mi zitsola. Bukiedika tuela ba phuila yi bisadulu banga bilambila, bivangila bima, bikunina ayi bibongisila ntoto. (Yes. 35:1; 65:21) Mu thangu wela zinga mvu ka mvu, wela baka thangu yimana vangila mambu moso momo; kutu viokila phe momo.

¹² Diela ba diambu di zikhini ziwombo mu yamba batu bobo bela fuluka! (Mav. 24:15) Yindula diaka phila yoyi wela luta bela mu zikhini ziluta bue zaba Yehova mu tadila bima biobi kavanga. (Nku. 104:24; Yes. 11:9) Dilutidi diaka, tuela sambila Yehova mu kondo kukitatikisa kadi fifioti mu mayindu! Wulenda dedikisa lusakumunu beni lolo tuela baka ayi ‘makhini makhufi ma disumu’? (Ebe. 11:25) Kadi fifioti! Mamboti momo tuela baka malutidi ayi mambu momo tulenda kukiyimina lumbu kiaki. Kadi zimbakana ti paladiso yela kue banga ko kaka diambu diodi tuela kue vingilanga. Tsuka tsuka yela kuiza kaka. Nginu mambu moso momo malendi salama ko ti Yehova kasi kutuzola ko mu kutuvana Muan’andi!

MONISA PHUTUDULU MATONDO MU LUZOLO LU YEHOVA

13. Bue tulenda monisina phutudulu matondo mu luzolo lu Yehova? (2 Kolinto 6:1)

¹³ Bue tulenda monisina phutudulu matondo kuidi Yehova bo kavana khudulu? Mu tula kisalu kiandi va buangu kitheti mu luzingu lueto. (Mat. 6:33) Mu diawu, Yesu wufua mu diambu di “batu bobo ban’zinga babika zingila mu diambu di bawu veka vayi mu diambu di mutu wowo wubafuila ayi wufuluka.” (2 Ko. 5:15) Mu kondo finda phaka, tuedi tomba ko kambu mona mamboti ma nlemvo wunneni wu Yehova.​—Tanga 2 Kolinto 6:1.

14. Bue tulenda monisina minu mu lutuadusu lu Yehova?

¹⁴ Tulenda monisa phe phutudulu matondo mu luzolo lu Yehova mu monisa minu mu lutuadusu luandi. Mu phila mbi? Mu thangu tuidi na zinzengolo zibaka, banga longa zinzo nkanda voti ntindu wukisalu kioki tutidi baka, tufueti yindula mambu momo Yehova kantomba tuvanga. (1 Ko. 10:31; 2 Ko. 5:7) Mu thangu tulembo monisa minu kieto mu mavanga, kuidi na diambu di kitoko diodi dieta salama​—minu kieto kuidi Yehova kieta kuiza ba kingolo buba phe kikundi kieto ayi niandi. Minu kieto kieta luta bue kinda.​—Loma 5:3-5; Zaki 2:21, 22.

15. Bue tulenda monisina phutudulu matondo mu zisabala ziozi zieta tuama ayi ziozi zieta ba kumanima ma lumbu ki Mbambukulu moyo?

¹⁵ Kuidi diaka na phila yinkaka tulenda monisina phutudulu matondo mu luzolo lu Yehova. Mu tomba baka mamboti mu zisabala ziozi zieta tuama ayi ziozi zieta ba kumanima ma lumbu ki Mbambukulu moyo mu diambu di monisa kuidi Yehova ti tuidi na phutudulu matondo mawombo mu khudulu. Tuisi nsukila ko kaka mu tomba ba mu Mbambukulu moyo, vayi tufueti tedisa phe batu bankaka bawu phe biza kutakana ayi beto. (1 Tim. 2:4) Sudikisa batu bobo wela tedisa phila yoyi mambu meta viokila mu Mbambukulu moyo. Mawu dimona diambu dimfunu mu kubamonisa video Mpo na nini Yesu akufaki? ayi Bambukila lufua lu Yesu moyo mu jw.org. Bakulutu bafueti tedisa phe batu bobo bavola mu kipheve. Yindula zikhini ziozi zilenda ba ku diyilu ayi va mbata ntoto enati mamemi mankaka ma Yehova momo mazimbala mavutukidi mu nkangu’andi mu bila ki Mbambukulu moyo! (Luka 15:4-7) Mu Mbambukulu moyo, tukuiza sukila ko kaka mu vanasana mboti beto na beto vayi matu luta kubutudila kuidi batu bamona voti kuidi bobo bakutakana vame vioka bilumbu biwombo. Tutidi bamona ti tubayembi bumboti!​—Loma 12:13.

16. Bila mbi tufueti tombila sala buwombo kisalu ki tsamununu mu thangu yi Mbambukulu moyo?

¹⁶ Wulenda luta vanga mambu mawombo ma kipheve mu thangu yi Mbambukulu moyo? Yidi phila yimboti yimonisina phutudulu matondo mu mambu moso momo Nzambi ayi Kristu batuvangila. Bobuawu bobo tunluta kukivanina mu kisalu ki Yehova, buawu matu luta bakila lusadusu luandi ayi yawu mayi tula ti sikididi kieto kiluta ba kikinda mu niandi. (1 Ko. 3:9) Ba sikididi ti mawu tulanga phe lutangulu lu Bibila lu Mbambukulu moyo mu landakana phila yoyi beta kulutudila mu Kapu ki lumbu ka lumbu (Tótángaka Makomami mokolo na mokolo) voti mu landakana programi yi lutangulu lu Bibila yoyi yikala mu Nkanda wu luzingu lu Bakristu ayi kisalu ki tsamununu wowo tueta sadila mu lukutukunu lu khati tsika sabala. Wulenda sobula sadila buku kimosi ki Bibila banga diambu dingudi di longuka.

17. Mbi bieta yangidika Yehova? (Tala phe ankadre “Ziphila zimonisina luzolo kuidi Yehova.”)

¹⁷ Bukiedika, bulendakana mambu ma luzingu luaku medi kubikila ko nzila mu sadila mambu moso momo batumonisini mu disolo diadi. Kadi zimbakana ti Yehova kadedikisanga ko mambu momo weta kumvangila ayi momo batu bankaka beta kumvangila, bila weta mona momo madi mu khati ntim’aku. Weta yangalala mu thangu keta mona phutudulu matondo yoyi yibedi mu ntim’aku mu diambu di dikaba diandi dimfunu wombo diodi katuvana, khudulu.​—1 Sa. 16:7; Mlk 12:41-44.

18. Bila mbi tuididi phutudulu matondo kuidi Yehova Nzambi ayi kuidi Yesu Kristu?

¹⁸ Mu nzila yi khudulu kaka tueta bakila nlemvo mu masumu meto, tueta bela kikundi ayi Yehova ayi tukadila vuvu ki zinga luzingu lu mvu ka mvu. Diawu, tumonisanga phutudulu matondo thangu ka thangu mu luzolo lu Yehova, lolo luntuma katuvana lusakumunu beni lolo. (1 Yow. 4:19) Tumonisanga phe phutudulu matondo kuidi Yesu, nioni wutuzola buwombo mu vana luzingu luandi mu diambu di beto!​—Yow. 15:13.