DISOLO DI NDONGOKOLO 26
NKUNGA 123 Tótosaka ebongiseli ya Teokrasi
Mu kukikulula koso kikinina mambu momo wisi zaba ko
“Tulendi ko sudika kadi fifioti mambu moso momo matedi Nkua Ngolo Yoso.”—YOBI 37:23.
MU BUKHUFI
Disolo diadi dieka kutusadisa tunuanisa kambu ku sikididi mu thangu tulembo kikinina mu kukikulula koso mambu momo tuisi zaba ko, mu thangu tulembo luti tudi mayindu meto mu mambu momo tuzebi ayi mu thangu tulembo tudila Yehova ntima.
1. Diluaku mbi Yehova katuvana, ayi bila mbi?
YEHOVA wutuvanga na diluaku di yindula, dibaka nzayilu, diyonzula phisulu ayi dimonisa nduenga. Bila mbi katuvangila mu phila beni yoyi? Tidi ti tubaka “nzayilu yi Nzambi” ayi tidi ti tunsadila mu ngolo zieto ziyindudila.—Zin. 2:1-5; Loma 12:1.
2. a) Zindilu mbi tuidi? (Yobi 37:23, 24) (Tala phe foto.) b) Mambu mbi tueta baka beto kikinina mu kukikulula koso zindilu ziozi tuidi?
2 Buba ti tuidi na maluaku malongukila, vayi tuidi na zindilu mu mambu momo tuzebi. (Tanga Yobi 37:23, 24.) Tutadila kifuani ki Yobi. Yehova wunyuvula biuvu biwombo biobi bimonisa ti kuba na mambu mawombo momo kakondo zaba. Mambu momo kadengana mansadisa kaba kukikulula ayi mansadisa kabongisa mayindu mandi. (Yobi 42:3-6) Beto phe tueta baka mamboti mu phila yoyi tueta kikinina mu kukikulula koso mambu momo ka tuisi zaba ko. Kukikulula ku phila yoyi kueta tutuma tuwilukila ti Yehova wela kutukamba mambu momo bukiedika tuidi phuila yizaba muingi tubaka zinzengolo zinduenga.—Zin. 2:6.
Kikinina mambu momo ka tuisi zaba ko kulenda tuvana mamboti banga phila bubela kuidi Yobi (Tala paragrafi 2)
3. Mbi tueka ntubila mu disolo diadi?
3 Mu disolo diadi, tueka ntubila mambu mankaka momo tukondolo zaba ayi zinzomono ziozi tulenda dengana mu bila kioki tukondolo kumazabila. Matu longuka phe bila mbi yididi mboti mu kondo zaba mambu mankaka. Mu thangu tueka ntubila mambu beni momo, tueka yonzula sikididi kieto mu zaba ti Yehova “Nioni widi wuduka mu nzayilu,” weta kutukamba bukiedika mambu momo madi mfunu kuidi beto mu zaba.—Yobi 37:16.
TUISI ZABA KO THANGU MBI TSUKA YELA KUIZILA
4. Mu tadila Matayi 24:36, diambu mbi ka tuisi zaba ko?
4 Tanga Matayi 24:36. Tuisi zaba ko thangu mbi tsuka yi mambu ma tangu yayi yela salimina. Buba Yesu mu thangu kaba va mbata ntoto kasi zaba ko “thangu voti lumbu.”a Kuntuala wukamba kuidi mimvuala miandi ti Yehova, nioni widi Pfumu Yinneni yi thangu, widi na thangu yi mambu mankaka momo mela salama “mu lulendo luandi” voti mu luve luandi luyadila. (Mav. 1:6, 7) Yehova wukubika thangu yi tsuka yi mambu ma thangu yayi, vayi tulendi ko zaba bukiedika thangu yoyi mambu beni mela salimina.
5. Bo tuisi zaba ko thangu yoyi tsuka yi mambu ma thangu yayi yela bela, diambu beni mbi dilenda kututula?
5 Mu tadila mambu momo Yesu katuba, tuisi zaba ko thangu zikua tufueti vingidila tii tsuka yinkuiza. Yawu yilenda tula ti tubika ba mvibudulu voti tulebakana, nduka nduka ti thama tutona vingila lumbu ki Yehova. Voti tulenda mona phasi mu kimba moyo mimvuezolo mi bakhomba zieto ba dikanda voti mi batu bankaka. (2 Pi. 3:3, 4) Yilenda kambu ba phasi mu monisa mvibudulu ayi mu kimba moyo mu mimvuezolo enati tuzebi thangu yikiedika yoyi tsuka yi mambu ma thangu yayi yela salimina.
6. Bila mbi dididi diambu dimboti tubika zaba thangu yoyi lumbu kitsuka kiela kuizila?
6 Bukiedika, Yehova bo kasi tubila ko lumbu ki tsuka ki mambu ma thangu yayi, wutuvana diluaku dimonisa ti tueta kunsadila bila tueta kun’zola ayi tueta kuntudila ntima. Tusadilanga ko Yehova na lumbu kioki kiela mana kisalu beni mu mayindu meto, bila beto kubutudila mayi ba banga minu kieto kisimbimini mu lumbu beni kina. Va buangu kiluta tula mayindu meto mu thangu yoyi “lumbu ki Yehova” kiela kuizila, matu vanga diambu dimboti mu luta tula mayindu meto mu mambu momo mela lungana mu lumbu beni. Beto kubutudila, buawu matu luta kukivanina kuidi Nzambi ayi matu vanga mamoso momo tulenda vanga muingi tunyangidika.—2 Pi. 3:11, 12.
7. Diambu mbi tuzebi?
7 Matu vanga diambu dimboti beto luta tula mayindu meto mu mambu momo tuzebi ti: Bilumbu bitsuka bitona mu 1914. Mu Bibila, Yehova wutuvana zimbikudulu ziozi zilembo monisa ti 1914 yawu yiba thonono yi bilumbu bitsuka. Wutukembi diaka phe mambu mawombo mu phila yoyi luzingu luyiza bela kumanima ma mvu beni wina. Diawu tuididi na sikididi ti “lumbu kinneni ki Yehova kime fikama.” (Sef. 1:14) Tuzebi diaka phe kisalu kioki Yehova katidi tusala, kisalu beni kidi ki samunina batu bawombo “nsamu mboti wu Kipfumu.” (Mat. 24:14) Nsamu beni weta samununu mu nduka nduka 240 ki zitsi ayi viokila mu 1 000 ki zimbembo. Muingi tuluta sala mu kipfuzi kisalu beni kioki kilembo vukisa batu bawombo, tuisi ko phuila yitomba zaba “lumbu ayi thangu” yi mbanunu yi mambu ma thangu yayi.
TUISI ZABA KO BUE YEHOVA KALENDA VANGILA MAMBU
8. Ziphova “kisalu ki Nzambi yikiedika” mbi zieta monisa? (Mpovi 11:5)
8 Tuisi thumbu zaba ko “kisalu ki Nzambi yikiedika.” (Tanga Mpovi 11:5.) Ziphova beni ziozi zilembo monisa mambu momo Yehova keta totula voti mambu momo keta bikila nzila masalama mu diambu di luzolo luandi lulungana. Tulendi ko zaba mu sikididi kioso bila kioki kalenda bikila nzila ti diambu dimosi disalama mu diambu di mamboti meto voti bibila biobi kela vangila mambu mu diambu di katusadisa. (Nku. 37:5) Bibila kidedikisidi kondu ku zaba kisalu ki Nzambi banga phila yoyi muana keta yonzukila mu khati vumu ki ngudi’andi, bila buba basi siansi bazabanga ko phila yoyi diambu beni dieta salimina, buawu phe beto tuisi thumbu zaba ko phila yoyi Yehova kela vangila mambu.
9. Bo tuisi zaba ko phila yoyi Yehova kela vangila mambu, mambu mbi maphasi tulenda dengana?
9 Kondo ku zaba phila yoyi Yehova kela vangila mambu mu diambu di mamboti meto, kulenda kututula tuba ziduti. Bulendakana tulenda ba ziduti mu kukiyimina mambu mankaka mu diambu di tuluta sala buwombo mu kisalu ki tsamununu, mu kifuani mu tula luzingu lueto luba yaki yaki voti mu kue zingila kuma koko kuidi phuila yi minsamuni mi Kipfumu. Voti tulenda kukiyuvula keni Nzambi weta kutuyangalala kuandi enati tukadi dukisa zikhanu zieto zi kipheve, enati tukadi mona mim’butu mu kisalu kieto kingolo ki tsamununu voti enati tulembo dengana mambu maphasi mu kisalu kimosi mu ziproje zi teokrasi.
10. Bikadulu mbi bimfunu tufueti yonzula bo tuisi zaba ko phila yoyi Yehova kela vangila mambu?
10 Kondo ku zaba phila yoyi Yehova kela vangila mambu, kulenda kutusadisa tuyonzula bikadulu bimfunu banga kukikulula ayi zaba vovo vasukidi maluaku meto. Buawu tueta kuiza kikinina ti mayindu ayi zinzila zi Yehova bilutidi phila yoyi tueta tadila mambu. (Yes. 55:8, 9) Tueta longuka phe luta tudila Yehova ntima mu tula diana dieto mu niandi muingi tununga. Mu thangu kisalu kieto ki tsamununu voti kisalu kioki tulembo sadi mu ziproje zi teokrasi kilembo totula mim’butu mimboti, tueta kuiza zitisa Yehova. (Nku. 127:1; 1 Ko. 3:7) Enati mambu makadi viokila mu phila yoyi tunyindudila, tufueti bambuka moyo ti Yehova niandi kaka wulembo diatisa mambu. (Yes. 26:12) Beto tuvanga momo tufueti vanga ayi tufueti ba sikididi ti Yehova phe wela vanga momo mantadidi. Tuidi na sikididi ti wela tuvana lutuadusu lolo tuidi phuila, buba ti kela sie kumavangila ko mu mangitukulu banga phila yoyi kabutudila thangu zinkaka mu thama.—Mav. 16:6-10.
11. Mambu mbi tuzebi momo malenda kutusadisa?
11 Tuzebi ti Yehova widi kaka Nzambi yi luzolo, yisonga ayi yinduenga. Tuzaba ti weta yangalala buwombo mambu momo tueta vanga mu diambu di niandi ayi mu diambu di bakhomba zieto Bakristu. Ayi tuzebi ti Yehova weta sakumuna batu bobo bakala bakuikama kuidi niandi.—Ebe. 11:6.
TUISI ZABA KO MAMBU MOMO MELA SALAMA MBAZI
12. Mu tadila Zaki 4:13, 14, mambu mbi ka tuisi zaba ko?
12 Tanga Zaki 4:13, 14. Diambu dimfunu didi ti tuisi zaba ko phila yoyi luzingu lueto luela bela mbazi. Mu khubukulu yi mambu ma thangu yayi, tueta zingila mu mona mambu momo meta ‘salimina mu kondo ku kana.’ (Mpo. 9:11) Mu diawu, tulendi ko zaba ti keni mambu momo tunkana mela simba voti buba ti keni tuela ba mu luzingu mu diambu di dukisa mambu beni.
13. Bo tuisi zaba ko mambu momo mela salama mbazi, mbi malenda kututula?
13 Bo tuisi zaba ko mambu momo mela salama mbazi, tulenda mona phasi mu monisa mvibudulu. Mu phila mbi? Tulenda kukitatikisa mu mambu momo malenda kutubuilukila, ayi malenda kutubotula zikhini. Mambu maphasi momo meta kutubuilukila mu kinzimbukila ayi mambu momo meta kubuilukila mu kondo ku kana, malenda kutumonisa kiadi ayi malenda kutufuemisa. Ayi enati mambu momo tunkana vanga makadi lungana, tulenda nionga ayi tulenda vonga nitu.—Zin. 13:12.
14. Mbi tufueti tula ayi tufueti zaba muingi tuba mu mayangi makiedika? (Tala phe zifoto.)
14 Mu thangu tulembo dengana mambu maphasi, tuidi na diluaku dimonisa ti buba moso kuandi mambu makutubuilukila, tueta sadila Sieto di mazulu mu luzolo vayi bika mu diambu di mamboti meto veka. Masolo ma Bibila meta kutumonisa ti tuedi vingila ko ti Yehova katutanina mu mambu moso maphasi ayi kakikubikilanga ko mambu momo tueta dengana mu luzingu lueto. Zebi ti tulenda ba mu mayangi buba ti tuisi thumbu mana zaba ko mambu momo mela salama mu bilumbu binkuiza. Vayi zikhini zieto zisimbimini mu tomba lutuadusu luandi ayi mu kuntumukina. (Yel. 10:23) Ti tuntudidi ntima mu thangu tum’baka zinzengolo, matu tuba ti: “Enati Yehova tidi buna tuela zinga ayi tuela vanga diadi voti dina.”—Zaki 4:15.
Tomba lutuadusu lu Yehova ayi monisa tumamana kueta kutunatina lutanunu lolo lufueni tudulu ntima (Tala paragrafi 14-15)b
15. Diambu mbi tuzebi mu diambu ditedi bilumbu binkuiza?
15 Ka diambu ko tuisi zaba ko mambu momo malenda kutunatina kadika lumbu, tuzebi ti Yehova wutuvana tsila yi luzingu lu mvu ka mvu, buba ku diyilu voti va ntoto. Tuzebi ti kalendi ko vuna ayi kadi kima kilenda kunkakidila mu dukisa zitsila ziandi. (Tito 1:2) Niandi kaka lenda “tuba phila mambu mela sukila, ayi tona thama mambu momo ka masalimini ko.” Buawu phe bubela mu mambu momo masalama mu thama ayi buawu phe buela bela mu mambu momo mela salama mu bilumbu binkuiza. (Yes. 46:10) Tuzebi mu sikididi kioso ti kuisi ko kadi diambu dilenda kakidila Yehova mu kutuzola. (Loma 8:35-39) Weta kutuvana nduenga, mbombolo, ayi zingolo ziozi tuidi phuila mu diambu di tumonisa mvibudulu mu diambu dioso diodi tun’dengana. Tulenda ba sikididi ti Yehova wela kutusadisa ayi wela kutusakumuna.—Yel. 17:7, 8.
TULENDI KO SUDIKA PHILA YOYI YEHOVA KATUZABIDI
16. Banga phila Minkunga 139:1-6 yimonisini diambu beni, Yehova nzayilu mbi kadi yoyi ka tulendi thumbu sudika ko?
16 Tanga Minkunga 139:1-6. Mvangi’eto zebi phila yoyi tuvangulu ayi mambu momo matadidi nitu’eto, phila yoyi tueta kukimuena ayi mayindu meto. Weta kututudila thalu thangu zioso. Zebi mambu momo tueta tuba ayi momo tunkana tuba, zebi phe mambu momo tueta vanga ayi bila kioki tueta kumavangila. Ntinu Davidi wutuba ti Yehova wukala kaka wufuana ayi wukubama mu kutusadisa. Didi diambu dingitukulu ti Pfumu yi luyalanganu loso, Mvangi nkua ngolo yoso wu mazulu ayi wu ntoto katutudila thalu yiphila yoyi! Davidi wutuba ti: “Nzayilu yiphila yoyi yilutidi phisulu’ama. Yilutidi zangama, ndiedi kuyibakidila ko.”—Nku. 139:6, nkp.
17. Bila mbi tulenda muena phasi mu kikinina ti Yehova wutuzebi bumboti mboti?
17 Bulendakana mu bila ki makanda momo tubutukila, mu bila ki kikhulu kieto voti mu bila ki mambu momo tueba wilukilanga mu thama, tulenda mona phasi mu tadila Yehova banga Dise di luzolo diodi dieta kututudila thalu. Voti tulenda banzila ti zinzimbala ziozi tutula mu thama zidi zinneni ngolo ayi zilenda tula ti Yehova kabika tomba kutuzaba ayi tubanzila ti kielo kadi kuidi beto. Buba phe Davidi thangu zinkaka weba kukimuenanga mu phila beni yoyi. (Nku. 38:18, 21) Buba mutu nioni tidi balula mu bukiedika phil’andi yizingila ayi zingila mu landakana minsiku misonga, kalenda kukiyuvula: ‘Enati bukiedika Nzambi weta kutsudika, bila mbi kafueti tombila ti ndibalula phil’ama yi luzingu yoyi yeta monika banga ti yidi kuandi yifuana kuidi minu?’
18. Mamboti mbi tueta baka mu kikinina ti Yehova wutuzebi bumboti mboti viokila beto veka? (Tala phe zifoto.)
18 Tulenda longuka kikinina ti Yehova wutuzebi bumboti mboti viokila beto ayi kalenda mona mambu mamboti kuidi beto momo beto veka tulendi ko mona. Kadiambu ko weta mona zinzimbala zieto ayi weta sudika phila yoyi tueta kukimuena ayi phila yoyi tueta vangila mambu, weta kutuzola kaka. (Loma 7:15) Mu thangu tueta sudika ti Yehova weta mona phila yi bumutu bobo tulenda ba, diambu beni dilenda kutuvana zingolo ziozi tuidi phuila muingi tunsadila mu bukuikama ayi muingi tuba mu zikhini.
Yehova weta kutusadisa tukindisa minu kieto mu diambu di luzingu lu mvu ka mvu lolo katuvanini tsila. Mu phila beni yoyi weta kutusadisa tumonisa mvibudulu mu mambu momo malenda kutubuilukila mu kinzimbukila (Tala paragrafi 18-19)c
19. Diambu mbi tuzebi mu sikididi kioso mu diambu di Yehova?
19 Tuzebi ti Yehova niandi luzolo. Yimonikini bumboti mboti ti diambu beni tuedi kuditudila ko ziphaka. (1 Yow. 4:8) Tuzebi ti zitsikudukusu ziandi zisonga zieta monisa luzolo luandi mu diambu di beto ayi tidi ti tuba mu luzingu lumboti. Tuzebi ti Yehova tidi ti tubaka luzingu lu mvu ka mvu. Wuvana khudulu mu diambu di diambu beni disalama. Dikaba di khudulu dieta kutuvana sikididi ti tulenda kueto nunga ka diambu ko kondo kueto ku lunga. (Loma 7:24, 25) Ayi tuzebi ti “Nzambi lutidi mintima mieto mu bunneni ayi niandi zebi mambu moso.” (1 Yow. 3:19, 20) Yehova weta mona mambu moso momo matutadidi ayi sikididi kadi ti tulenda nunga vanga luzolo luandi.
20. Mbi bieta kutusadisa tumanga kifu kiluta kukitatikisa buwombo?
20 Yehova kasi kutusuekila ko mambu momo bukiedika tufueti zaba. Mu thangu tulembo kikinina mu kukikulula koso diambu beni, diawu dieta kutusadisa tumanga kukitatikisa ku viokakana tezo mu mambu momo ka tulendi ko tomba zaba ayi yawu mayi tusadisa tuluta tula kaka mayindu meto mu mambu momo malutidi mfunu. Beto kubutudila, buawu matu monisina ti tueta luta tula sikididi kieto kuidi “Nioni widi wuduka mu nzayilu.” (Yobi 36:4) Ka diambu ko mu bilumbu bieto biabi phisulu’eto yidi yisuka mu mambu mankaka, tulembo vingila mu phuila yoso luzingu lu mvu ka mvu lolo tuela longukila mambu mamona momo matadidi Nzambi’eto Yinneni.—Mpo. 3:11.
NKUNGA 104 Elimo santu ezali likabo ya Nzambe
a Yesu niandi wela ba va ntuala mu diambu di nuanisa nza yimbimbi yi Satana, yawu yikututuma tukikinina ti Yesu zebi buabu lumbu kioki kiela salama Alimangedoni ayi thangu yoyi kela “nungina tii kutsuka.”—Tso. 6:2, 19:11-16.
b TSUDUKUSULU YI FOTO MU: Tata dimosi ayi muan’andi balembo kupika bima mu sakosi mu diambu di dikanda diawu diba dikubama mu mambu momo meta totuka mu kinzimbukila.
c TSUDUKUSULU YI FOTO: Khomba mosi nioni wulembo dengana mambu maphasi wulembo yindula zikhini ziozi zilembo mvingila mu bilumbu binkuiza mu nza yimona.