Isaías
33 ¡Teech* ka xuʼulsajeʼ maʼ xuʼulsaʼakechiʼ,+
teech ka traicionareʼ maʼ traicionartaʼakechiʼ, chéen baʼaleʼ yaj bix kan tsʼoʼokol!
Le kéen tsʼoʼokok a xuʼulsajeʼ yaan xan a xuʼulsaʼal.+
Le kéen tsʼoʼokok a traicionareʼ yaan xan a traicionartaʼal.
2 Jéeoba Dios, eʼes a wutsil tiʼ toʼon.+
Tiʼ teech k-kʼubmaj k-óol.
Sáamsamal ka a tsʼáatoʼon muukʼ.+
Salvartoʼon tu kʼiinil yaayaj kʼiinoʼob.+
3 Le kéen kíilbalnak a tʼaaneʼ, ku jóokʼol u yáalkab le kaajoʼoboʼ.
Le kéen líiʼkecheʼ, ku kʼiʼitpajal u kajnáaliloʼob le luʼumoʼoboʼ.+
4 Jeʼex le sáakʼoʼob* ku míistikoʼob tuláakal baʼax yaan tu beeloʼoboʼ bey kun míistbil tuláakal le baʼaxoʼob yaantechoʼ.
Jeʼex u beetik le sáakʼoʼoboʼ, le máakoʼoboʼ tu séebaʼanil kun taal u chʼaʼob tuláakal le baʼaxoʼob yaantechoʼ.
5 Jéeobaeʼ yaan u alabartaʼal,
letiʼeʼ tiaʼan tiʼ junpʼéel kaʼanal lugareʼ.
Letiʼeʼ yaan u beetik u chuʼupul Sión yéetel justicia bey xan yéetel baʼax toj.
6 Letiʼ kanáantkeʼex.
Letiʼeʼ ku beetik nukuch baʼaloʼob utiaʼal u salvarkeʼex,+ ku tsʼáaikteʼex naʼat, ku kaʼanskeʼex yéetel ku yeʼesikteʼex bix jeʼel a respetarkeʼex Jéeobaeʼ,+
tuláakal le baʼaloʼobaʼ jach maʼalobtak.
7 ¡Ilawileʼex! Le xiixib máakoʼoboʼ táan u yawat okʼoloʼob teʼ bejoʼoboʼ.
Le máaxoʼob túuxtaʼanoʼob u kaxtoʼob jeetsʼeliloʼ táan u sen okʼoloʼob.
8 Mix máak ku yilaʼal teʼ bejoʼoboʼ.
Mix máak ku máan teʼ bejoʼoboʼ.
Le enemigooʼ tsʼoʼok u jubik le acuerdooʼ,
tsʼoʼok u mixbaʼalkúuntik le kaajoʼoboʼ
yéetel maʼ tu chʼaʼik en cuentail mix máak.+
9 Le luʼumoʼ jach yaachajaʼan u yóol* yéetel táan u kíimil.
Le Líbanooʼ suʼlakchajaʼan,+ lubaʼan u yóol.
Saróneʼ tsʼoʼok u pʼáatal bey desiertoeʼ,
Basán yéetel le Carmelooʼ táan u jutik u leʼob.+
10 Jéeobaeʼ ku yaʼalik: «Beoraaʼ nikaʼaj líikʼil,
beoraaʼ yaan in weʼesik minaʼan uláakʼ jeʼex teneʼ,
beoraaʼ yaan in weʼesik bukaʼaj in poder.+
11 Kʼasaʼan máakeʼex, le baʼax ka chʼaʼtuklikeʼex bey xan le baʼax ka beetkeʼexoʼ mix baʼal u biilal, beyoʼob tikin suʼuk yéetel sojoleʼ.
Le kʼasaʼanil ku síijil ta puksiʼikʼaleʼexoʼ bey kʼáakʼeʼ, yaan u tóokikeʼex.+
12 Le kaajoʼoboʼ yaan u pʼáatloʼob jeʼex u taʼanil kʼáakʼeʼ.
Yaan u tóokaʼaloʼob jeʼex u beetaʼal tiʼ le kʼiʼixoʼob le kéen tsʼoʼokok u chʼaʼakloʼoboʼ.+
13 ¡Teʼex náach yanileʼexeʼ, uʼuy a wuʼuyeʼex baʼax ken in beete!
¡Teʼex naatsʼ yanileʼexeʼ, ilawileʼex bukaʼaj in poder!
14 Le máaxoʼob ku beetkoʼob baʼaloʼob kʼaastak yanoʼob Siónoʼ sen saajkoʼob.+
Le máaxoʼob tsʼoʼok u pʼatkoʼob Diosoʼ táan u kikilankiloʼob tumen saajkoʼob, letiʼobeʼ ku yaʼalikoʼob:
‹¿Máax tiʼ toʼon jeʼel u páajtal u kajtal tuʼux ku tóochʼbal junpʼéel kʼáakʼ ku xuʼulsajeʼ?+
¿Máax tiʼ toʼon jeʼel u kuxtal tuʼux yaan junpʼéel kʼáakʼ maʼatech u tuʼupuleʼ?›.
15 Le máax mantatsʼ ku beetik baʼax toj,+
ku yaʼalik baʼaloʼob maʼalobtak,+
u kʼabeʼ maʼatech u chʼaʼik taakʼin maʼ maʼalob náajaltaʼaniliʼ, maʼatech u yookol,
maʼatech u chaʼik u maʼanal,+
ku pixik u xikin utiaʼal maʼ u yuʼubik baʼax ku tsikbaltik le j-kiimsaj máakoʼoboʼ
yéetel ku mutsʼik u yich utiaʼal maʼ u yilik baʼaloʼob kʼaastakeʼ,
16 le máak jeʼeloʼ letiʼ kun kajtal teʼ kaʼanal lugaroʼoboʼ,
yaan u taʼakikuba tu paach nukuch tuunichoʼob,
yaan u tsʼaʼabal baʼal u jaante
yéetel mantatsʼ kun antal jaʼ utiaʼal u yukʼe».+
17 A wichoʼobeʼ yaan u yilkoʼob u kiʼichkelmil juntúul rey.
Letiʼobeʼ yaan u yilkoʼob junpʼéel náanach luʼum.
18 A puksiʼikʼaleʼ yaan u kʼaʼajsik* le yaayaj baʼaloʼob tsʼoʼok u yúuchloʼ yéetel yaan a waʼalik:
«¿Tuʼux yaan le máax ku beetik u secretarioil kaʼachoʼ?
¿Tuʼux yaan le máax pesartik kaʼach le baʼaloʼob ku bisaʼal utiaʼal u yúuchul boʼoloʼ?+
¿Tuʼux yaan le máax xokik kaʼach le nukuch kaʼanal lugaroʼoboʼ?».
19 Maʼ ken a wil tu kaʼatéen le kaaj minaʼan u suʼtaloʼ,
le kaaj jach istikyaj u naʼataʼal le idioma ku tʼankoʼ,
tumen kʼalkʼalak u tʼaaneʼ maʼ ken a naʼat baʼax ku yaʼalik.+
20 ¡Ilawil Sión, le kaaj tuʼux k-beetik fiestaʼoboʼ!+
Le kéen a wil Jerusaléneʼ yaan a wilik bey junpʼéel maʼalob lugar utiaʼal u jeʼelel máakeʼ,
bey junpʼéel naj de nookʼ maʼ kun péeksbil tuʼux yaneʼ,+
mix bikʼin kun jotsʼbil le estacaʼob tuʼux kʼaxaʼanoʼ,
yéetel maʼ kun tʼokbil mix junpʼéel u suumil.
21 Teʼeloʼ Jéeoba, le Kiʼichkelem Diosoʼ,
yaan u kanáantkoʼon jeʼex u kanáantaʼal junpʼéel kaaj tumen le ríoʼob wa le nukuch canaloʼob chuup yéetel jaʼoʼ.
Teʼeloʼ maʼ kun máan u barcoiloʼob baʼateliʼ
mix kun máan xan le nukuch barcoʼoboʼ.
22 Tumen Jéeobaeʼ letiʼ k-Juez,+
Jéeobaeʼ letiʼ tsʼáaiktoʼon leyoʼob,+
Jéeobaeʼ letiʼ k-Rey,+
letiʼ kun salvarkoʼon.+
23 U suumil le barcoʼob yaan tiʼ le enemigoʼoboʼ yaan u chojtaloʼob,
maʼ kun páajtal u sinikoʼob u nookʼil le barcooʼ mix u waʼakúuntikoʼob le cheʼ ku bin chúumukoʼ.
Teʼ kʼiin jeʼeloʼ tuláakal le baʼaloʼob u chʼaʼamoʼoboʼ yaan u tʼoʼoxol,
tak le máaxoʼob móochtakoʼ yaan u chʼaʼikoʼob yaʼab baʼaloʼob.+
24 Mix juntúul u kajnáalil le luʼum ken u yaʼal: «Kʼojaʼanen».+
Le máaxoʼob kajaʼanoʼob teʼ luʼumoʼ yaan u perdonartaʼal u kʼebanoʼob.+