Salmos
Junpʼéel kʼaay beetaʼab ka tsʼoʼoksaʼab le najoʼ. Le kʼaayaʼ David tsʼíibte.
30 Jéeoba Dios, yaan in alabarkech tumen tsʼoʼok a salvarken,
maʼ ta chaʼaj u kiʼimaktal u yóol in enemigoʼob yoʼolal baʼax ku yúuchulteniʼ.+
2 Yuum Jéeoba, in Dios, ka tin kʼáatajtech ka a tsʼakeneʼ ta tsʼaken.+
3 Jéeoba Dios, ta jóoʼsen tiʼ le Muknaloʼ.*+
Maʼ ta chaʼaj in kíimiliʼ, ta salvarten utiaʼal maʼ in bin yáanal luʼum.+
4 Teʼex mantatsʼ tiaʼaneʼex naatsʼ tiʼ Jéeobaeʼ,+ kʼaayneneʼex* utiaʼal a alabarkeʼex,
alabarteʼex u kʼaabaʼ tumen jach santo.+
5 Letiʼeʼ maʼatech u xáantal pʼujaʼan tu contra máak,+
pero kéen u yeʼes u yutsileʼ utiaʼal tuláakal u kʼiiniloʼob u kuxtal máak.+
Maʼ xaaneʼ le kéen káajak u yáakʼabtaleʼ yaan baʼax beetik u yokʼol máak, pero kéen u yaʼal u sáastaleʼ yaan baʼax beetik u kiʼimaktal u yóol.+
6 Le kaʼach maʼalob yanilenoʼ, kin waʼalik:
«Mix bikʼin kin péeksbil tuʼux yanen».
7 Jéeoba Dios, teʼ kʼiinoʼob maʼalob yanilen ta táanoʼ ta tsʼáaj in muukʼ, beyen kaʼach junpʼéel montañaeʼ.+
Pero ka xuʼul a weʼesikten a wutsileʼ, jach táaj sajakchajen.+
8 Jéeoba Dios, tiʼ teech seguernaj in kʼáatik áantaj.+
Tiʼ Jéeoba seguernaj in kʼáatik ka u yeʼesten u yutsil.
9 ¿Baʼax utsil jeʼel u taasik wa ka kíimkeneʼ? ¿Baʼax utsil jeʼel u taasik wa ka xiʼiken yáanal luʼumeʼ?+
¿Jeʼel wa u páajtal u alabarkech le luʼumoʼ?+ ¿Jeʼel wa u páajtal u yaʼalik chúukaʼan a wóoleʼ?+
10 Jéeoba Dios, chʼenxikinteniʼ, eʼesten a wutsil.+
Jéeoba Dios, áanteniʼ.+
11 Tsʼoʼok a beetik in wóokʼot tu lugar u yaatal in wóol.
Ta luʼsaj in toʼotoch nookʼeʼ* ka ta búukbesen yéetel kiʼimak óolal,
12 yaan in kʼaay utiaʼal in alabarkech, maʼ ken in mak in chiʼ.
Yuum Jéeoba, in Dios, mantatsʼ ken in alabartech.