2 Corintios

12 Yaan in nojbaʼalkúuntkinba. In wojel maʼ ken u taas mix junpʼéel utsil, chéen baʼaleʼ nikaʼaj tʼaan tiʼ wayakʼoʼob*+ yéetel tiʼ baʼaloʼob tsʼoʼok u tsʼaʼabal kʼaj óoltbil tumen Yuumtsil.+ 2 In kʼaj óol juntúul máak, letiʼeʼ u discípulo Cristo. Le máakaʼ walajki 14 añosaʼ téek bisaʼab tak tu yóoxpʼéel kaʼan, maʼ in wojel wa yéetel u luʼumkabil wíinklil bisaʼabiʼ wa maʼ tu yéeteliʼ, lelaʼ Dios u yojel. 3 Jach tu jaajil in kʼaj óol le máakaʼ, maʼ in wojel wa yéetel u luʼumkabil wíinklil bisaʼabiʼ wa maʼ tu yéeteliʼ, lelaʼ Dios u yojel. 4 Letiʼeʼ téek bisaʼab teʼ paraísooʼ ka tu yuʼubaj tʼaanoʼob maʼ tu páajtal u yaʼalaʼaloʼob yéetel maʼ uts u yaʼalaʼal tumen wíinikiʼ. 5 Teneʼ yaan in nojbaʼalkúuntkinba tu yoʼolal le máakaʼ, chéen baʼaleʼ maʼ ken in nojbaʼalkúuntinba tin woʼolal, baʼaxeʼ chéen yoʼolal le baʼaxoʼob ku yeʼesik lubaʼan in muukʼoʼ. 6 Tumen kex ka taakak in nojbaʼalkúuntkinbaeʼ maʼ u kʼáat u yaʼal wa minaʼan in naʼatiʼ, tumen yaan in waʼalik u jaajil. Chéen baʼaleʼ maʼ ken in nojbaʼalkúuntinba, beyoʼ mix máak kun tuklik u maasil tin woʼolal yoʼolal le baʼax ku yilik in beetik wa tu yoʼolal baʼax ku yuʼubik in waʼalikoʼ. 7 Mix máak ka u tukult u maasil tin woʼolal chéen tu yoʼolal le nukuch baʼaloʼob tsʼoʼok u tsʼaʼabal in wojéeltoʼ.

Utiaʼal túun maʼ in sen wuʼuyikinba nojbaʼalileʼ, beetaʼab u chʼíikil junpʼéel kʼiʼix tin bakʼel,+ bey juntúul u ángel Satanás maʼ tu xuʼulul u laʼalajken* utiaʼal maʼ u píitmáan in nojbaʼalkúuntkinbaeʼ. 8 Teneʼ óoxtéen tin kʼáat óoltaj tiʼ Yuumtsil ka u luʼsten le kʼiʼixoʼ. 9 Chéen baʼaleʼ letiʼeʼ tu yaʼalajten: «Yaan yéetel le in nojoch utsil kin weʼesiktechoʼ, tumen in podereʼ ku maas chíikpajal le kéen pʼáatak minaʼan a muukʼ».+ Le oʼolaleʼ maas maʼalob in wilik in nojbaʼalkúuntkinba tu yoʼolal le baʼaxoʼob beetik u pʼáatal minaʼan in muukʼoʼ, utiaʼal beyoʼ ka pʼáatak u páajtalil Cristo bey junpʼéel naj de nookʼ tsʼaʼan tin wóokʼoleʼ. 10 Le beetik ku kiʼimaktal in wóol ikil u pʼáatal minaʼan in muukʼ, ikil in poʼochʼol, ikil in máansik óotsilil, ikil in chʼaʼpachtaʼal yéetel ikil in muʼyajtik baʼaloʼob tu yoʼolal Cristo. Tumen kéen pʼáatak minaʼan in muukʼeʼ maas muʼukʼaʼan in wuʼuyikinba.+

11 Tsʼoʼok in beetkinba j-maʼ naʼatil. Teʼex túulchʼinten in beetinba beyoʼ, tumen teʼex unaj kaʼach a tʼaaneʼex maʼalob tin woʼolal. Tumen kex teen mix baʼaleneʼ, mix baʼal eʼes wa maas chichnen tiʼ le máaxoʼob ku taaskubaʼob nukuch apóstoloʼob ichileʼexoʼ.+ 12 U jaajileʼ, teʼexeʼ tsʼoʼok a wilkeʼex jach tu jaajil juntúul apóstolen; lelaʼ chíikpaj úuchik in weʼesik chúukaʼan óolal,+ úuchik in beetik señaloʼob, milagroʼob bey xan uláakʼ baʼaloʼob ku beetik u jaʼakʼal u yóol máak.+ 13 Teneʼ maʼ tin beetinba junpʼéel kuuch tiʼ teʼexiʼ, le beetik maʼ beyeʼex jeʼex u maasil múuchʼuliloʼoboʼ. ¿Kʼaas wa túun le baʼax tin beetoʼ?+ Wa kʼaaseʼ beeteʼex uts a perdonarkeneʼex.

14 ¡Ilawileʼex! Beoraaʼ u yóoxtéen in líiʼskinba utiaʼal in bin ta wiknaleʼex, kex beyoʼ láayliʼ maʼ tin chʼuytal tiʼ teʼexeʼ. Tumen maʼ táan in taal in kaxt le baʼaxoʼob yaanteʼexoʼ,+ baʼaxeʼ teʼex kin taal in kaxteʼex. Tumen letiʼe taatatsiloʼob ku páaʼtaʼal ka u líiʼsoʼob taakʼin utiaʼal u paalaloʼoboʼ,+ maʼ le paalaloʼob ka u líiʼsoʼob taakʼin utiaʼal u taataʼoboʼ. 15 Teneʼ yéetel kiʼimak óolal ken in xup ta woʼolaleʼex le baʼaxoʼob yaantenoʼ yéetel yaan xan in jach xupkinba ta woʼolaleʼex.+ Wa teen in jach yaabiltmeʼexeʼ, ¿baʼaxten túun chéen junpʼíit yaabilaj ka weʼeskeʼexten? 16 Jeʼel bixakeʼ mix juntéen tin tsʼáaj a kuucheʼex.+ Chéen baʼaleʼ teʼexeʼ ka waʼalikeʼexeʼ «jach yaan in naʼat» yéetel tsʼoʼok bin in táabskeʼex «yéetel tuusoʼob». 17 ¿Meyajnajten wa juntúul tiʼ le máaxoʼob tin túuxtaj ta wiknaleʼex utiaʼal in aprovecharkinba tiʼ teʼexoʼ? 18 Teneʼ tin sen aʼalaj tiʼ Tito ka xiʼik ta wiknaleʼex, tsʼoʼoleʼ tin túuxtaj xan juntúul sukuʼun utiaʼal ka xiʼik tu yéetel. ¿Máasaʼ Titoeʼ maʼ tu aprovechartuba tiʼ teʼexiʼ?+ ¿Máasaʼ máanoʼon yéetel junpʼéeliliʼ tuukul? ¿Máasaʼ junpʼéeliliʼ baʼax t-beetaj?

19 ¿Ka tuklikeʼex wa le baʼaxoʼob kin tsʼíibtikteʼexaʼ táan in tsʼíibtik utiaʼal k-defendertikba ta táaneʼex? Toʼoneʼ táan k-aʼalik u jaajil tu táan Dios tu kʼaabaʼ Cristo. Chéen baʼaleʼ in yaabilaj sukuʼuneʼex, tuláakal baʼax k-beetkeʼ k-beetik utiaʼal k-muʼukʼaʼankúuntik a wóoleʼex. 20 Tumen saajken wa kéen kʼuchkeneʼ maʼ in wilkeʼex jeʼex in kʼáat in wileʼexoʼ yéetel maʼ a wilkeneʼex jeʼex a kʼáateʼexoʼ. Saajken ka yanak ichileʼex baʼatelil, pʼekbail,* kʼuuxilil, baʼateltʼaan, líiʼsaj tʼaan, chismes, máaxoʼob nojbaʼal u taaskubaʼob, yéetel saajken xan wa maʼ tu tsoolol yanil le baʼaloʼoboʼ. 21 Le kéen kaʼa xiʼiken ta wiknaleʼexeʼ, maʼ xaaneʼ in Dioseʼ yaan u beetik in chʼaʼik suʼtal, yéetel yaan u yaatal in wóol yoʼolal le máaxoʼob kʼebanchajoʼob yéetel maʼ arrepentirnajoʼob tiʼ le baʼaloʼob kʼaastak ku beetkoʼoboʼ, tiʼ le núupkʼebanoʼ* mix tiʼ le kuxtal ich x-maʼ suʼtalil* ku biskoʼoboʼ.