Efesios
3 Bey túunoʼ teen Pabloeʼ kʼalaʼanen+ tu yoʼolal Cristo Jesús utiaʼal a wutsileʼex, teʼex j-táanxel luʼumileʼex. 2 In waʼalikeʼ tsʼoʼok a wuʼuyikeʼex u tsikbaltaʼal tsʼaʼaben in beet in j-kanan ayikʼalil+ utiaʼal ka in weʼesteʼex u nojoch utsil Dios. 3 Jach beyoʼ, jeʼex tsʼoʼok in yáax tsʼíibtikteʼexoʼ, Dioseʼ tu tsʼáaj in wojéelt le baʼal u taʼakmaj* kaʼachoʼ. 4 Le oʼolaleʼ le kéen a xokeʼex lelaʼ yaan a wilkeʼex jach in kʼaj óol le baʼal taʼakaʼan+ yaan yil yéetel Cristooʼ. 5 Teʼ kʼiinoʼob tsʼoʼok u máanoʼ le baʼal taʼakaʼanoʼ maʼ tsʼaʼab kʼaj óoltbil tiʼ mix máak jeʼel bix tsʼoʼok u tsʼaʼabal kʼaj óoltbil tiʼ le apóstoloʼob yéetel tiʼ le profetaʼob tu yoʼolal le espíritu santooʼ.+ 6 Le baʼal taʼakaʼanoʼ letiʼe jeʼelaʼ: tu yoʼolal le maʼalob baʼaloʼob ken u beet Dios ku máan tsikbaltbiloʼ, yéetel tumen junmúuchʼ yanikoʼob yéetel Cristoeʼ le j-táanxel luʼumiloʼoboʼ yaan xan u kʼamkoʼob le herencia ken u kʼam Cristooʼ, yéetel yaan u táakpajloʼob tiʼ junpʼéeliliʼ wíinklil.+ Tsʼoʼoleʼ yaan xan u kʼamkoʼob le baʼax u yaʼalmaj Dios u tsʼáaiktoʼonoʼ. 7 Tu yoʼolal u nojoch utsil Dioseʼ kʼuchen in beetinba juntúul máax ku yáantaj utiaʼal ka naʼataʼak le baʼal taʼakaʼanoʼ. Leloʼ letiʼe baʼax tu tsʼáajten Dios utiaʼal u yeʼesik u poderoʼ.+
8 Kex teen u maas chichnil tiʼ le máaxoʼob santoʼoboʼ+ tiʼ teen tsʼaʼab u nojoch utsil+ in tsikbaltik tiʼ le j-táanxel luʼumiloʼob le yaʼabkach baʼaloʼob maʼalobtak ku taal tiʼ Cristooʼ. 9 Bey xan utiaʼal in weʼesik tiʼ tuláakal máak bix unaj u tsʼaʼabal ojéeltbil le baʼal taʼakaʼan+ maʼ páajchajak u yojéeltaʼal desde úuchjeakiloʼ, leloʼ chéen ojéelaʼan kaʼach tumen Dios, le máax beet tuláakal baʼaloʼ. 10 Lelaʼ úuch utiaʼal ka eʼesaʼak u naʼat Dios tiʼ le kaʼanilbeʼen gobiernoʼob yéetel autoridadoʼoboʼ. Tu yoʼolal le múuchʼuliloʼ+ bejlaʼeʼ letiʼobeʼ ku páajtal u yilkoʼob le jejeláas bix u meyaj u naʼat Diosoʼ.+ 11 Lelaʼ táakaʼan ichil le baʼax* u tukultmaj Dios utiaʼal kʼiinoʼob minaʼan u xuuloʼ, utiaʼal u béeykuntikeʼ yaan u meyajtiʼ Cristo+ Jesús k-Yuumtsil. 12 Tu yoʼolal letiʼ bey xan tu yoʼolal le fe k-tsʼaamaj tiʼ letiʼoʼ jeʼel u páajtal k-tʼaan yéetel u jaajil k-óoleʼ yéetel jeʼel u páajtal k-natsʼikba+ tu yiknal Dios yéetel x-maʼ saajkilileʼ. 13 Le oʼolaleʼ kin kʼáatikteʼex maʼ u lúubul a wóoleʼex tu yoʼolal le baʼaxoʼob kin muʼyajtik* ta woʼolaleʼexoʼ, tumen leloʼobaʼ yaan u beetik u yúuchul tʼaan maʼalob ta woʼolaleʼex.+
14 Tu yoʼolal lelaʼ kin xoltal tu táan le Taataoʼ, 15 le máax tiʼ u taal* tuláakal familia teʼ kaʼanoʼ bey xan way luʼumeʼ. 16 Letiʼeʼ juntúul Dios jach yaan u páajtalil, le oʼolal kin kʼáatik ka u muʼukʼaʼankúunt a puksiʼikʼaleʼex+ yéetel le páajtalil ku tsʼáaik u espíritu santooʼ. 17 Teneʼ kin kʼáat óoltik tiʼ Dioseʼ ka yanak Cristo ta puksiʼikʼaleʼex yéetel ka a weʼeseʼex yaabilaj+ tumen teʼexeʼ yaan a fejeʼex. Kin kʼáat óoltik xan ka taamchajak a mootseʼex+ yéetel ka pʼáatkeʼex yóokʼol le chuunpakʼoʼ,+ 18 utiaʼal beyoʼ teʼex junmúuchʼ yéetel tuláakal le máaxoʼob santoʼoboʼ ka páajchajak a naʼatkeʼex tubeel bukaʼaj u kóochil, u chowakil, u kaʼanlil yéetel u taamil le baʼaloʼob yaan yil yéetel Diosoʼ, 19 bey xan ka páajchajak a kʼaj óoltikeʼex u yaabilaj Cristo+ ku píitmáan tiʼ le kʼaj óolaliloʼ, utiaʼal ka chuʼupkeʼex yéetel tuláakal le jatsʼuts modos yaan tiʼ Diosoʼ.
20 Dioseʼ, tu yoʼolal le u páajtalil táan u meyaj ichiloʼonoʼ,+ jeʼel u páajtal u píitmáan u beetik tuláakal le baʼaxoʼob k-kʼáatkoʼ wa tuláakal le baʼaxoʼob ku taal t-tuukuloʼ.+ 21 Letiʼ unaj u alabartaʼal tu yoʼolal le múuchʼuliloʼ bey xan tu yoʼolal Cristo Jesús utiaʼal kʼiinoʼob minaʼan u xuul. Ka béeyak.*