2 Corintios

10 Teen Pabloeʼ, kin kʼáatikteʼex ka a wuʼuyeʼex le baʼax ken in waʼalteʼexaʼ. Teneʼ táan in tʼankeʼex jeʼex u beetik Cristoeʼ,+ letiʼeʼ maʼatech u taaskuba nojbaʼalil yéetel jach uts. Chéen baʼaleʼ jujuntúul tiʼ teʼexeʼ ku yaʼalikeʼ teneʼ bey minaʼan in wóol wa tiaʼanen ta wiknaleʼexeʼ,+ pero wa minaʼanen ta wiknaleʼexeʼ jach maʼ saajken tʼaaniʼ.+ 2 Kexiʼ wa kéen kʼuchkeneʼ maʼ u kʼaʼabéettal in weʼesik maʼ saajken in beet wa baʼax tu contra le máaxoʼob ku tuklikoʼob táan k-kuxtal chéen jeʼex le u maasil máakoʼoboʼ, kex u jaajileʼ kin tuklikeʼ yaniliʼ in beetkeʼ. 3 Tumen kex luʼumkabil wíinikoʼoneʼ* maʼatech k-baʼateʼel jeʼex u beetik u maasil máakoʼobeʼ. 4 Tumen u nuʼukuliloʼob k-baʼateleʼ maʼ luʼumkabiloʼobiʼ.+ Baʼaxeʼ le nuʼukuloʼobaʼ tsʼaʼan páajtalil tiʼob tumen Dios+ utiaʼal u nikikoʼob baʼaloʼob bey nukuch pakʼoʼobeʼ. 5 Toʼoneʼ táan k-nikik jejeláas tuukuloʼob yéetel jejeláas nukuch baʼaloʼob maʼ tu chaʼikoʼob u kʼaj óoltaʼal Dios tumen le máakoʼoboʼ,+ táan k-kʼexik* tuláakal u tuukul le máakoʼoboʼ utiaʼal ka u yuʼuboʼob u tʼaan Cristo. 6 Tsʼoʼoleʼ k-líiʼsmakba utiaʼal k-castigartik jeʼel máaxak maʼ tu yuʼubik tʼaaneʼ,+ chéen baʼaleʼ lelaʼ yaan k-beetik chéen pʼelak a weʼeskeʼex jach tu jaajil ka wuʼuyikeʼex tʼaan.

7 Teʼexeʼ ka juzgarkeʼex wa baʼax chéen yoʼolal bix u yilaʼal. Wa yaan máax ku tuklik u discípulo Cristoeʼ, tuukulnak tiʼ lelaʼ: jeʼex letiʼ u discípulo Cristoeʼ, toʼon xaneʼ u discípuloʼon Cristo. 8 Teneʼ kex ka in nojbaʼalkúuntinba junpʼíit maas tu yoʼolal le páajtalil tu tsʼáajten Yuumtsiloʼ, maʼ tin suʼlaktal, tumen le páajtalil tsʼaʼabtenaʼ utiaʼal in líiʼsik a wóoleʼex,+ maʼ utiaʼal in beetik u lúubul a wóoleʼexiʼ. 9 Lelaʼ kin waʼalik tumen maʼ in kʼáat ka a tukleʼex wa táan in beetik a sajaktaleʼex yéetel le baʼaxoʼob tin tsʼíibtajteʼex teʼ cartaʼoboʼ. 10 Tumen yaneʼ ku yaʼalik: «Teʼ cartaʼob ku tsʼíibtikoʼ maʼ sajak u yaʼal juntaatsʼ le baʼaloʼoboʼ, chéen baʼaleʼ teʼ kʼiinoʼob way yanoʼ, le bix u yilaʼaloʼ maʼ tu beetik u jaʼakʼal k-óol yéetel mix máak ku taaktal u yuʼubik le baʼax ku yaʼalikoʼ». 11 Le máax ku tuukul beyaʼ, ka u yojéelteʼ le baʼax k-aʼalik teʼ cartaʼob le minaʼanoʼon ta wiknaleʼexoʼ, láayliʼ letiʼe baʼax ken k-beet le kéen yanakoʼon ta wiknaleʼexoʼ.+ 12 Toʼoneʼ maʼ t-táabal k-aʼal wa beyoʼon jeʼex le máaxoʼob ku nojbaʼalkúuntkubaʼob tu juunaloʼoboʼ.+ Letiʼobeʼ ku juzgarkubaʼob tu juunaloʼob chéen yéetel le baʼaxoʼob ku tuklikoʼob maʼaloboʼ. Yéetel le baʼax ku beetkoʼobaʼ ku yeʼeskoʼob minaʼan u naʼatoʼob.+

13 Toʼoneʼ yaan k-nojbaʼalkúuntikba, pero chéen le bukaʼaj unajoʼ. Toʼoneʼ yaan k-nojbaʼalkúuntikba chéen tiʼ le bukaʼaj jeʼel u páajtal k-beetik tiʼ le meyaj u kʼubéentmajtoʼon Diosoʼ. Teʼex xaneʼ táakaʼaneʼex ichil le meyaj u kʼubéentmajtoʼon Diosoʼ.+ 14 Le ka kʼuchoʼon ta wiknaleʼexeʼ maʼ t-beetaj uláakʼ baʼaliʼ, baʼaxeʼ chéen le baʼax u kʼubéentmajtoʼon Diosoʼ. Toʼon yáax tsikbaltteʼex le baʼaloʼob maʼalobtak yaan yil yéetel Cristooʼ.+ 15 Toʼoneʼ maʼ táan k-nojbaʼalkúuntikba maas tiʼ le bukaʼaj unajoʼ tumen maʼ táan k-nojbaʼalkúuntikba yoʼolal u meyaj uláakʼ máakiʼ. Toʼoneʼ k-páaʼtik ka maas nojochchajak a fejeʼex. Beyoʼ le meyaj tsʼoʼok k-beetik ichileʼexoʼ ka seguernak u maas yaʼabtal. Le kéen tsʼoʼokok túuneʼ yaan u páajtal k-maas meyaj 16 utiaʼal k-bin tsikbalt u tʼaan Dios teʼ luʼumoʼob yanoʼob maas náach tiʼ teʼexoʼ, utiaʼal beyoʼ maʼ k-aʼalik toʼon beet le meyaj beetaʼab tumen yaanal máakoʼ. 17 «Chéen baʼaleʼ le máax ku nojbaʼalkúuntkubaeʼ, u nojbaʼalkúuntuba tu yoʼolal Jéeoba».+ 18 Tumen le máax ku kʼaʼamloʼ, maʼ letiʼe máax ku yaʼalikuba noʼojaʼanoʼ,+ baʼaxeʼ letiʼe máax ku yaʼalaʼal tumen Jéeoba noʼojaʼanoʼ.+