Hechos

19 Le tiaʼan Apolos+ tu kaajil Corintooʼ Pabloeʼ bin teʼ kaajoʼob yaan náach tiʼ le kʼáaʼnáaboʼ, ka tsʼoʼokeʼ bin tu kaajil Éfeso.+ Teʼeloʼ tu yilaj wa jaytúul discípuloʼobiʼ, 2 ka tu yaʼalajtiʼob: «¿Ta kʼameʼex wa espíritu santo le ka ta beetabaʼex discípuloil tiʼ Jesúsoʼ?».+ Letiʼobeʼ tu núukoʼob: «¡Si mix juntéen k-uʼuy u yaʼalaʼal wa yaan espíritu santo!». 3 Letiʼeʼ tu yaʼalaj: «¿Baʼax okjaʼil túun tsʼaʼabteʼex?». Letiʼobeʼ tu núukoʼob: «Le okjaʼ ku tsʼáaik Juanoʼ».+ 4 Pabloeʼ tu yaʼalaj: «Le okjaʼ tu tsʼáaj Juanoʼ ku yeʼesik tsʼoʼok u kʼexik u tuukul máak,+ letiʼeʼ tu yaʼalaj tiʼ le kaaj ka u creertoʼob le máax kun taal paachil tiʼ letiʼoʼ,+ lelaʼ Jesús». 5 Le ka tu yuʼuboʼob lelaʼ le discípuloʼoboʼ okjaʼanajoʼob tu kʼaabaʼ Yuumtsil Jesús. 6 Le ka túun tu tsʼáaj u kʼab Pablo tu yóokʼoloʼobeʼ taal le espíritu santo tu yóokʼoloʼoboʼ+ ka joʼopʼ u tʼaanoʼob ich jejeláas idiomaʼob bey xan u profetizaroʼob.+ 7 Tuláakloʼobeʼ kex 12 xiiboʼob.

8 Pabloeʼ tres meses ook teʼ sinagoga+ utiaʼal u kaʼansaj yéetel x-maʼ saajkiloʼ, letiʼeʼ tu tsolajtiʼob yéetel tu yilaj u yoksik tu tuukuloʼob baʼax ken u beet u Reino Dios.+ 9 Chéen baʼaleʼ jujuntúul tiʼ letiʼobeʼ maʼ tu yóotaj u creertoʼobiʼ, yéetel maʼ xuʼul u tʼaanoʼob kʼaas yoʼolal Le Bej*+ tu táan le máakoʼob u muchʼmubaʼoboʼ, le oʼolal Pabloeʼ lukʼ tu yiknaloʼobeʼ+ ka tu luʼsaj xan le discípuloʼob ichiloʼoboʼ. Letiʼeʼ sáamsamal kaʼach ku kaʼansik u tʼaan Dios teʼ tuʼux ku muchʼkuba máak tu escuelail Tiranooʼ. 10 Pabloeʼ dos años kaʼansajnaj teʼ escuelaaʼ. Tuláakal túun le judíoʼob yéetel le griegoʼob kajaʼanoʼob tu luʼumil Asiaoʼ tu yuʼuboʼob u tsikbaltaʼal u tʼaan Dios.

11 Dioseʼ yéetel u kʼab Pabloeʼ seguernaj u beetik nukuch baʼaloʼob ku beetik u jaʼakʼal u yóol máak.+ 12 Tak le pañueloʼob yéetel le nookʼoʼob yaan tiʼ Pablooʼ ku bisaʼal kaʼach tiʼ le máaxoʼob kʼojaʼanoʼoboʼ,+ letiʼob túuneʼ ku yutstaloʼob yéetel ku jóokʼol xan le demonioʼob okaʼantiʼoboʼ.+ 13 Chéen baʼaleʼ jujuntúul tiʼ le judíoʼob ku máanoʼob kajalkaaj ku jóoʼskoʼob demonioʼoboʼ, tu yóotoʼob xan u chʼaʼchiʼitoʼob u kʼaabaʼ Yuumtsil Jesús utiaʼal ka u jóoʼsoʼob le demonioʼoboʼ, utiaʼal u beetkoʼob lelaʼ ku yaʼalikoʼob: «Tu kʼaabaʼ Jesús le máax tiʼ ku tʼaan Pablooʼ k-aʼalikteʼex ka jóokʼkeʼex».+ 14 Yaan kaʼach siete máakoʼob beetik lelaʼ, leloʼobaʼ u paalal Esceva, juntúul tiʼ u nuuktakil u sacerdoteil le judíoʼoboʼ. 15 Chéen baʼaleʼ juntéenjeakeʼ juntúul demonioeʼ tu yaʼalajtiʼob: «In kʼaj óol Jesús+ yéetel in wojel xan máax Pablo,+ chéen baʼaleʼ teʼexeʼ, ¿máaxeʼexiʼ?». 16 Le máak túun okaʼan demonio tiʼoʼ tu puluba tu yóokʼoloʼobeʼ ka tu pʼuʼupʼuchoʼob, letiʼob túuneʼ jóokʼoʼob áalkabil tiʼ le najoʼ, le ka binoʼobeʼ loobiltaʼanoʼob yéetel minaʼan u nookʼoʼob. 17 Lelaʼ kʼuch ojéeltbil tumen tuláakal le judíoʼob yéetel le griegoʼob kajaʼanoʼob Éfesooʼ, ka túun jach sajakchajoʼob. U kʼaabaʼ túun Yuumtsil Jesúseʼ seguernaj u alabartaʼal. 18 Yaʼab túun tiʼ le máaxoʼob tu beetubaʼob u discípuloʼob Jesúsoʼ taaloʼobeʼ ka tu tsikbaltoʼob tu táan u maasil le baʼaxoʼob ku beetkoʼob kaʼachoʼ. 19 Tsʼoʼoleʼ yaʼab tiʼ le máaxoʼob ku beetik kaʼach u j-meeniloʼoboʼ tu muchʼkíintaj u libroʼobeʼ ka tu tóokoʼob tu táan tuláakal.+ Ka joʼopʼ u jóoʼskoʼob u cuentail bajux u tojol tuláakaleʼ tu yiloʼobeʼ 50,000 u taakʼinil plata. 20 Bey túunoʼ u tʼaan Jéeobaeʼ tumen jach nojoch u páajtalileʼ seguernaj u tsikbaltaʼal jejeláas tuʼux, yéetel yaʼab máakoʼob kʼame.+

21 Ka tsʼoʼok túun u yúuchul tuláakal le baʼaloʼobaʼ Pabloeʼ tu chʼaʼtuklaj u bin Jerusalén+ kéen tsʼoʼokok u máan tu luʼumil Macedonia+ yéetel tu luʼumil Acaya. Letiʼeʼ tu yaʼalaj: «Kéen kʼuchken teʼeloʼ yaan xan in bin Roma».+ 22 Ka túun tu túuxtaj tu kaajil Macedonia kaʼatúul tiʼ le máaxoʼob áantkoʼ, Timoteo+ yéetel Erasto,+ chéen baʼaleʼ letiʼeʼ pʼáat wa jaypʼéel kʼiinoʼob tu luʼumil Asia.

23 Teʼ kʼiinoʼob xan jeʼeloʼ yaʼab máakoʼob líikʼoʼob+ tu contra Le Bejoʼ.+ 24 Juntúul tiʼ letiʼobeʼ Demetrio, juntúul máak ku meyajtik plata. Letiʼeʼ ku beetik mejen temploʼob de plata chíikaʼanoʼob tiʼ u templo le diosa Ártemisoʼ. Le oʼolal Demetrio yéetel uláakʼ máakoʼob meyajtik plataoʼ jach yaʼab taakʼin ku náajaltikoʼob.+ 25 Demetrio túuneʼ tu muchʼaj le máakoʼobaʼ bey xan le uláakʼ máaxoʼob ku meyajtikoʼob plataoʼ ka tu yaʼalajtiʼob: «Xiibeʼex, teʼexeʼ a wojleʼexeʼ k-ayikʼalileʼ tiʼ le meyaj u taalaʼ. 26 Teʼex xaneʼ tsʼoʼok a wilkeʼex yéetel tsʼoʼok a wuʼuyikeʼexeʼ, maʼ chéen Éfesoiʼ,+ baʼaxeʼ óoliʼ tiʼ tuláakal u luʼumil Asiaeʼ, le Pabloaʼ tsʼoʼok u kʼexik baʼax ku creertik yaʼabkach máakoʼob yéetel tsʼoʼok u yoksik tu tuukuloʼobeʼ le diosoʼob beetaʼan yéetel u kʼab máakoʼ maʼ bin jach diosoʼobiʼ.+ 27 Tsʼoʼoleʼ saajken, maʼ chéen ka joʼopʼok u yúuchul tʼaan kʼaas tiʼ le meyaj k-beetkoʼ, baʼaxeʼ ka mixbaʼalkúuntaʼak u templo le nojoch diosa Ártemisoʼ, bey xan ka xuʼuluk u adorartaʼal u kiʼichpanil tiʼ tuláakal u luʼumil Asia bey xan tiʼ tuláakal yóokʼol kaab». 28 Le ka tu yuʼuboʼob lelaʼ le máakoʼoboʼ sen pʼuʼujoʼobeʼ ka joʼopʼ u yawtikoʼob: «¡Sen nojoch Ártemis, u diosa le éfesoiloʼoboʼ!».

29 U kajnáaliloʼob túun le kaajoʼ sen xaʼakʼpaj u tuukuloʼob. Letiʼobeʼ tu jíiltoʼob Gayo yéetel Aristarcoeʼ+ ka téek ookoʼob teʼ teatrooʼ. Le kaʼatúul máakoʼobaʼ u yéet máanoʼob kaʼach Pablo, yéetel Macedonia u taaloʼob. 30 Pabloeʼ u kʼáat kaʼach okol teʼ tuʼux yaan le máakoʼoboʼ, chéen baʼaleʼ le discípuloʼoboʼ maʼ tu chaʼajoʼobtiʼiʼ. 31 Tak jujuntúul tiʼ le máaxoʼob nuʼuktik le fiestaʼob yéetel le báaxaloʼob ku yúuchul teʼeloʼ tu túuxtoʼob aʼalbiltiʼ maʼ u yokol teʼ teatrooʼ tumen jeʼel tak u kíimsaʼaleʼ, le máakoʼobaʼ ku biskubaʼob kaʼach yéetel Pablo. 32 Yaan tiʼ le máakoʼob u muchʼmubaʼoboʼ táan kaʼach u yawtikoʼob junpʼéel baʼal, uláakʼoʼobeʼ yaanal baʼal, tumen láaj xaʼakʼpajaʼan u tuukuloʼob. Tsʼoʼoleʼ u maas yaʼabil tiʼ letiʼobeʼ maʼ u yojloʼob kaʼach baʼax oʼolal u muchʼmubaʼobiʼ. 33 Le máakoʼob túunoʼ tu jóoʼsoʼob Alejandro ichiloʼob. Ka tsʼoʼokeʼ le judíoʼoboʼ tu lelenchʼintoʼob Alejandro utiaʼal ka jóokʼok waʼatal tu táan le kaajoʼ. Alejandro túuneʼ tu beetaj u kʼab tiʼob tumen u kʼáat tʼaan tu táan le kaajoʼ. 34 Chéen baʼaleʼ le ka tu tsʼáajoʼob cuenta judío le máakaʼ tuláakloʼobeʼ kex kaʼapʼéel horaʼob tu kʼaʼam aʼaloʼob lelaʼ: «¡Sen nojoch Ártemis, u diosa le éfesoiloʼoboʼ!».

35 Le máax ku gobernar teʼ kaajoʼ ka tsʼoʼok túun u yilik u jetsʼkúuntik le yaʼabkach máakoʼoboʼ tu yaʼalaj: «Xiibeʼex tiʼ u kaajil Éfeso, ¿yaan wa máax jeʼel u yaʼalik maʼ u kaajil Éfeso kanáantik u templo le nojoch diosa Ártemis, le máax lúub u imagen desde teʼ kaʼanoʼ? 36 Lelaʼ mix máak jeʼel u páajtal u yaʼalik wa maʼ jaajeʼ, le oʼolaleʼ jetsʼkúuntabaʼex, tukleʼex tubeel baʼax ken a beeteʼex. 37 Tumen le máakoʼob tsʼoʼok a taaskeʼex wayeʼ maʼatech u yoklikoʼob le temploʼoboʼ mix tech u tʼaanoʼob kʼaas tu contra le k-diosa Ártemisaʼ. 38 Le oʼolaleʼ wa Demetrio+ bey xan le máaxoʼob u muchʼmubaʼob tu yéetel yaan baʼax u yaʼaloʼob tu contra wa máaxeʼ yaan u kʼiinil u muchʼkuba u jueziloʼob le kaajoʼ, tsʼoʼoleʼ yaan xan gobernadoroʼob,* letiʼobeʼ jeʼel u páajtal u binoʼob u paklan tak u pooloʼobeʼ. 39 Chéen baʼaleʼ wa ka tuklikeʼex yaan uláakʼ baʼax maʼ maʼalob tsʼoʼok u beetaʼaleʼ leloʼ unaj a tsolkeʼex tiʼ junpʼéel muchʼtáambal jeʼex u yaʼalik le leyoʼ. 40 U jaajileʼ yoʼolal le baʼax úuch bejlaʼaʼ jeʼel u taʼakal k-pooleʼ yéetel jeʼel u yaʼalaʼal táan k-líikʼil tu contra le gobiernooʼ, tumen maʼ tu páajtal k-aʼalik baʼaxten líikʼ le kaajaʼ». 41 Ka tsʼoʼok túun u yaʼalik le baʼaloʼobaʼ tu yaʼalaj tiʼ le máakoʼob u muchʼmubaʼob ka lukʼkoʼob teʼeloʼ.