Proverbios
16 Juntúul máakeʼ ku chʼaʼtuklik tu puksiʼikʼal baʼax ken u yaʼale,
2 Juntúul máakeʼ maʼalob u yilik le bej tuʼux ku binoʼ,+
pero Jéeobaeʼ ku jach ilik baʼax péeksik máak u beet junpʼéel baʼal.+
3 Pʼat tu kʼab Jéeoba tuláakal baʼax ka beetik,+
beyoʼ le baʼaxoʼob ka chʼaʼtuklik a beetkoʼ yaan u jóokʼol utsil.
4 Jéeobaeʼ ku meyajtiʼ tuláakal baʼax yaan utiaʼal u béeykuntik baʼax u tukultmaj,
tak le kʼasaʼan máakoʼ u pʼatmaj utiaʼal u kʼiinil le xuʼulsajiloʼ.+
5 Tuláakal máak* nojbaʼal u taaskubaeʼ jach táaj pʼektaʼan tumen Jéeoba.+
Juntúul máak beyoʼ junpuliʼ maʼ ken u jech u castigartaʼal.
6 Tu yoʼolal nojoch yaabilaj yéetel chúukaʼan óolaleʼ ku perdonartaʼal baʼax u beetmaj máak,+
le máax ku respetartik Jéeobaoʼ ku náachtal tiʼ baʼax maʼ maʼalobiʼ.+
7 Wa Jéeoba uts tu tʼaan le bej ku bisik máakoʼ
ku beetik u yantaltiʼ jeetsʼelil tak yéetel u enemigoʼob.+
8 Maas maʼalob yanil juntúul máak óotsil pero toj baʼax ku beetik+
ke juntúul máak ayikʼal pero maʼ toj baʼax ku beetkiʼ.+
9 Juntúul máakeʼ jeʼel u páajtal u chʼaʼtuklik tu puksiʼikʼal baʼax bejil ken u biseʼ,
pero Jéeoba nuʼuktik u xíimbal.+
10 Le baʼax uts tu tʼaan Diosoʼ letiʼe baʼax unaj u jóokʼol tu chiʼ juntúul reyoʼ,+
letiʼeʼ mix juntéen unaj u sutik u paach tiʼ le justiciaoʼ.+
11 Le balanza yéetel le báscula maʼatech u yookoloʼoboʼ u tiaʼal Jéeoba,
letiʼ beetmil tuláakal le u nuʼukuliloʼob pʼiis ku tsʼaʼabal tiʼ bolsaoʼ.+
12 Le reyoʼoboʼ jach táaj u pʼekmoʼob u beetaʼal baʼaloʼob kʼaastak,+
tumen junpʼéel tronoeʼ ku chʼaʼik u muukʼ tiʼ le justiciaoʼ.+
13 Le reyoʼoboʼ jach uts tu tʼaan u yuʼubikoʼob u yaʼalaʼal baʼax toj,
letiʼobeʼ u yaabiltmoʼob le máax aʼalik u jaajiloʼ.+
14 U pʼujaʼanil juntúul reyeʼ bey juntúul mensajero ku taasik kíimileʼ,+
pero le máax yaan u naʼatoʼ ku beetik u xuʼulul u pʼujaʼanil.+
15 Wa juntúul rey ku yeʼesik u yutsil tiʼ máakeʼ ku bin utsil tiʼ le máak ichil u kuxtaloʼ,
u yutsileʼ bey jeʼex le múuyal ku beetik u kʼáaxal jaʼ jach tu kʼiiniloʼ.+
16 ¡Maas maʼalob u yantal naʼat tiʼ máak ke u yantal oro tiʼ!+
Maas unaj u yéeyik máak u yantal u naʼat ke u yantal plata tiʼ.+
17 Le máaxoʼob toj u kuxtaloʼoboʼ maʼatech u binoʼob teʼ bej maʼ maʼaloboʼ,
jeʼel máaxak ku kanáantik u beeleʼ ku kanáantik u kuxtal.+
18 Le máax ku taaskuba nojbaʼalileʼ ku bin tiʼ xuʼulsajil,
juntúul máax kaʼanal u yicheʼ yaan u tʼóochpajal.+
19 Maas maʼalob kabal u yóol máak yéetel tiaʼan ichil le utsul máakoʼoboʼ+
ke ka tocarnak tiʼ máak le baʼax u yokoltmaj le máaxoʼob nojbaʼal u taaskubaʼoboʼ.
20 Le máax ku yeʼesik yaan u naʼat tiʼ wa baʼaxeʼ yaan u bin utsil tiʼ,
kiʼimak u yóol le máax ku kʼubik u yóol tiʼ Jéeobaoʼ.
21 Le máax yiijchajaʼan u tuukuloʼ yaan u yaʼalaʼal yaan u naʼat,+
le máax chʼujuk u tʼaanoʼ ku convencertik máak.+
22 Le naʼatoʼ bey u sayabil kuxtal utiaʼal le máaxoʼob tiaʼalintikoʼ,
pero le castigo ken u kʼam le máaxoʼob minaʼan u naʼatoʼoboʼ letiʼe j-maʼ naʼatiloʼ.
23 U puksiʼikʼal juntúul máax yaan u naʼateʼ ku tʼaan yéetel naʼatil+
yéetel ku chʼujukkíintik u tʼaan.
24 Le utsul tʼaanoʼoboʼ beyoʼob kaab ku tuuleʼ,
chʼujuk u yuʼubaʼaloʼob yéetel beyoʼob tsʼaak utiaʼal u baakeloʼob máakeʼ.+
25 Yaan junpʼéel bej maʼalob u yilik máak,
pero tu xuuleʼ ku bisik máak tiʼ kíimil.+
27 Juntúul máak mix baʼal u biilaleʼ ku chʼaʼtuklik u beetik kʼaas,+
u tʼaaneʼ bey junpʼéel kʼáakʼ ku tóochʼbaleʼ.+
28 Juntúul kʼasaʼan máakeʼ ku beetik u yantal baʼateʼel,+
juntúul máax ku líiʼsaj tʼaaneʼ ku náachkuntik tak le jach amigoʼoboʼ.+
29 Juntúul loolob máakeʼ ku tusik u yéet máakil
yéetel ku bisik tiʼ junpʼéel bej maʼ maʼalobiʼ.
30 Letiʼeʼ ku chakʼik u yich mientras táan u tuklik bix jeʼel u beetik loobeʼ,
ku kʼúuycheʼej le táan u beetik u kʼasaʼaniloʼ.