Salmos
Utiaʼal máax ku nuʼuktaj. Le kʼaayaʼ David tsʼíibte.
19 Le kaʼanoʼ táan u yaʼalik bukaʼaj nojchil u poder Dios,+
táan u tsʼáaik ojéeltbil le baʼaxoʼob u beetmaj yéetel u kʼaboʼ.+
2 Sáamsamal yaan baʼax ku tsʼáaik ojéeltbil,
sáamsamal kéen áakʼabchajkeʼ ku yeʼesik bukaʼaj baʼaxoʼob u yojel Dios.
3 Maʼ tu tʼaan, maʼ tu yaʼalik mix baʼal,
maʼ tu yuʼubaʼal wa yaan baʼax ku yaʼalik.
4 Kex beyoʼ yaan baʼax ku tsʼáaik ojéeltbil tiʼ tuláakal yóokʼol kaab,
ku yojéeltaʼal tak tu xuul yóokʼol kaab.+
Dioseʼ tsʼoʼok u beetik u yotoch le Kʼiinoʼ, tsʼoʼok u tsʼáaik tuʼux u kajtal teʼ kaʼanoʼ,
5 le Kʼiinoʼ bey juntúul íichamtsil ku jóokʼol tuʼux ku wenel yéetel u yataneʼ,
le Kʼiinoʼ bey jeʼex juntúul máak uts tu tʼaan u yáalkab tiʼ junpʼéel bejeʼ.
6 Ku tíipʼil tiʼ juntséel le kaʼanoʼ,
ku yáalkabtik le kaʼanoʼ tak ken kʼuchuk tuláakʼ u tséel,+
mix baʼal ku páajtal u taʼakikuba tiʼ u yooxol le Kʼiinoʼ.
7 U ley Jéeobaeʼ jach táaj maʼalob,+ ku líiʼsik u yóol máak.+
Jéeobaeʼ ku kʼaʼajsik tiʼ máak baʼax unaj u beetik,+ leloʼ jach maʼalob tumen ku beetik u yantal u naʼat le máax maʼ jach yaan u naʼatoʼ.+
8 Le baʼax ku yaʼalik Jéeoba ka beetaʼakoʼ sen maʼalobtak, ku kiʼimakkúuntik u yóol u puksiʼikʼal máak.+
Le baʼax ku kʼubéentik Jéeoba ka beetaʼakoʼ táaj maʼalob, ku beetik u pʼiʼilil u yich máak.+
9 U respetartaʼal Jéeobaeʼ+ jach maʼalob, mix bikʼin u xuʼulul.
Le baʼaxoʼob ku chʼaʼtuklik Jéeobaoʼ jach maʼalob, toj tuláakal baʼax ku beetik.+
10 Maas koʼoj u tojoloʼob ke oro,
ke yaʼab maʼalob oro,+
yéetel maas chʼujkoʼob tiʼ kaab,+ tak tiʼ le maas maʼalob kaaboʼ.
11 Yéetel tuláakal baʼax ka waʼalikeʼ ka weʼesik tiʼ le máax meyajtikech baʼax unaj u beetkoʼ.+
Wa ku beetik máak baʼax ka waʼalikeʼ jach ku bin utsil tiʼ.+
12 Tu juunal máakeʼ maʼ tu tsʼáaik cuenta wa yaan baʼax maʼ maʼalob tsʼoʼok u beetkiʼ,+
le oʼolaleʼ perdonart le baʼaxoʼob tsʼoʼok in beetik maʼ in wóoliliʼ in beetoʼ.