Proverbios
5 In paal, chʼenxikint baʼax ku yaʼaliktech juntúul máax yaan u naʼat,
chʼenxikinten utiaʼal a kanik a yéey baʼax ken a beete,+
2 beyoʼ yaan u páajtal a kanáantik le maʼalob tuukul yaantechoʼ,
yéetel mantatsʼ yaan u páajtal a waʼalik u jaajil.+
3 Tumen le baʼaxoʼob ku yaʼalik le x-kʼasaʼan koʼoleloʼ chʼujuk jeʼex kaabeʼ,+
le baʼaxoʼob ku yaʼalikoʼ ku yáalal bey aceiteeʼ.+
4 Pero kéen tsʼoʼokkeʼ ku pʼáatal maas kʼáaj tak tiʼ altaniza,+
yéetel maas ku beetik loob ke junpʼéel espada tu kaʼatséelil yaan u yej.+
5 U yookoʼob le koʼolel chéen bey u máanoʼ ku yéemel tak teʼ kíimiloʼ,
kéen xíimbalnakeʼ juntaatsʼ u bin teʼ Muknaloʼ.*
6 Maʼatech u tuukul tiʼ u bejil le kuxtaloʼ,
letiʼeʼ saatal bej tiʼ, maʼ u yojel tuʼux ku biniʼ.
7 In paal, beoraaʼ uʼuyeniʼ,
maʼ a náachtal tiʼ baʼax kin waʼalik.
8 Maʼ a náatsʼal tu yiknal le koʼoleloʼ,
maʼ a náatsʼal tu jool u yotoch+
9 utiaʼal maʼ u yantal baʼax oʼolal u yaʼalaʼaltech baʼal,+
yéetel utiaʼal maʼ a muʼyaj tuláakal u kʼiiniloʼob a kuxtal,+
10 bey xan utiaʼal maʼ u chʼaʼabal tumen yaanal máakoʼob le baʼaxoʼob yaantechoʼ,*+
yéetel utiaʼal maʼ u bin tu yotoch yaanal máak le baʼaxoʼob ta kíimsaba a náajaltoʼ.
11 Tumen wa maʼeʼ yaan a muʼyaj tu yalab u kʼiiniloʼob a kuxtal
le kéen xuʼupuk a muukʼ yéetel a wíinklil.+
12 Yéetel yaan a waʼalik: «¿Baʼaxten maʼ tin kʼamaj le nuʼuktaj tsʼaʼabtenoʼ?
¿Baʼaxten in puksiʼikʼaleʼ maʼ tu kʼamaj le baʼax aʼalaʼabtiʼoʼ?
13 Maʼ tin wóotaj in wuʼuy baʼax ku yaʼalik le máaxoʼob tsolikten u nuʼukoʼ,
mix tin chʼenxikintaj le máaxoʼob kaʼansikenoʼ.
14 Tin wuʼuyaj jach óolak xuʼulukteneʼ,
yéetel suʼlaken tu táan le máaxoʼob muchʼukbaloʼoboʼ».+
16 Le jaʼ yaantechoʼ maʼ unaj a wéekchʼintik yaanal tuʼuxiʼ,
u sayabil le jaʼ yaantechoʼ maʼ unaj a wéekchʼintik teʼ kʼíiwikoʼoboʼ.+
17 U jaʼil a chʼeʼeneʼ chéen a tiaʼal,
maʼ utiaʼal yaanal máakoʼobiʼ.+
18 Bendecirtaʼak u sayabil le jaʼ a tiaʼaloʼ,
kiʼimakkúunt a wóol yéetel le koʼolel tsʼoʼok a beel tu yéetel ta táankelmiloʼ.+
19 Letiʼeʼ bey juntúul chan x-yuuk jach jatsʼutseʼ, bey juntúul x-lóoʼbayan kéejeʼ,+
mantatsʼ ka a kiʼimakkúunt a wóol yéetel u wíinklil,*
mantatsʼ ka saʼatak a wóol yéetel u yaabilaj.+
20 Le oʼolaleʼ, in paal, ¿yaan wa baʼax oʼolal ka u sat a wóol juntúul x-kʼasaʼan koʼolel
wa ka xiʼikech a méemekʼ juntúul koʼolel minaʼan u suʼtal?*+
21 Le bejoʼob tuʼux ku bin máakoʼ táan u yilaʼal tumen Jéeoba,
letiʼeʼ ku jach ilik tuláakal le bejoʼob tuʼux ku máan máakoʼ.+
22 Le baʼaxoʼob ku beetik le kʼasaʼan máakoʼ yaan u pʼáatal bey junpʼéel trampa utiaʼaleʼ.
U kʼebaneʼ yaan u pʼáatal bey junpʼéel suum kʼaʼakʼaxmileʼ.+
23 Letiʼeʼ yaan u kíimil tumen maʼ tu kʼamaj le nuʼuktaj tsʼaʼabtiʼoʼ,
yaan u bin kʼaasil tiʼ tumen jach táaj minaʼan u naʼat.