1 Corintios

5 Teneʼ tsʼoʼok in wuʼuyik u yaʼalaʼaleʼ yaan juntúul máax ichileʼexeʼ ku yantal baʼal u yil* yéetel u yatan u taata,+ le núupkʼeban*+ beyaʼ maas kʼaas tiʼ le ku beetaʼal tumen u kajnáaliloʼob le kaajoʼoboʼ. 2 ¿Táan wa túun a nojbaʼalkúuntkabaʼex tu yoʼolal lelaʼ? ¿Maʼ wa maas maʼalob ka yaachajak a wóoleʼex+ yéetel ka a wileʼex u jóoʼsaʼal ichileʼex le máax beet le baʼal kʼaasaʼ?+ 3 Kex minaʼanen ta wiknaleʼexeʼ in puksiʼikʼaleʼ tiʼ yaan ta wéeteleʼexeʼ. Teneʼ bey tiaʼanen taʼ wiknaleʼexeʼ yéetel tsʼoʼok in juzgartik le máax beetik le baʼal beyoʼ. 4 Le kéen a muchʼabaʼexeʼ, in puksiʼikʼal bey xan le páajtalil yaan tiʼ k-Yuumtsil Jesúsoʼ yaan u yantal ta wéeteleʼex. Bey túunoʼ tu kʼaabaʼ Yuumtsil Jesúseʼ, 5 unaj a kʼubkeʼex le máak tu kʼab Satanásoʼ,+ utiaʼal ka xuʼuluk u beetik u kʼebantal le múuchʼuliloʼ, utiaʼal beyoʼ ka kanáantaʼak le maʼalob tuukul yaan tiʼ le múuchʼulil tu kʼiinil Yuumtsiloʼ.+

6 Junpuliʼ maʼ maʼalob le baʼax oʼolal ka nojbaʼalkúuntkabaʼexoʼ. ¿Maʼ wa a wojleʼexeʼ junpʼíit levaduraeʼ ku beetik u líikʼil tuláakal le harinaoʼ?+ 7 Le oʼolaleʼ luʼseʼex le levaduraoʼ utiaʼal ka pʼáatkeʼex bey túumben harinaeʼ, tumen teʼexeʼ beyeʼex harina x-maʼ levaduraileʼ. Lelaʼ ku béeytal tumen Cristo, le taman ku kʼuʼubul utiaʼal le Pascuaoʼ,+ tsʼoʼok u kíimsaʼal.+ 8 Le oʼolaleʼ koʼoneʼex beetik le kʼiinbesajoʼ,+ maʼ yéetel úuchben levaduraiʼ mix xan yéetel u levadurail kʼasaʼaniliʼ, baʼaxeʼ yéetel waajoʼob x-maʼ levadurail ku chíikbeskoʼob toj kuxtal bey xan x-maʼ kaʼapʼéel ichil.

9 Teʼ carta tin tsʼíibtajteʼexoʼ tin waʼalajteʼex ka xuʼuluk a biskabaʼex yéetel le máaxoʼob ku núupkʼebantaloʼoboʼ. 10 Chéen baʼaleʼ maʼ táan in waʼalikteʼex jach junpuliʼ maʼ unaj a tʼaaneʼex yéetel le máaxoʼob yanoʼob teʼ yóokʼol kaab ku núupkʼebantaloʼoboʼ,+ wa yéetel le máaxoʼob ku píitmáan u tsʼíiboltkoʼob wa baʼaxoʼ, wa yéetel le máaxoʼob ku yookoloʼoboʼ, wa yéetel le máaxoʼob ku adorarkoʼob imagenoʼoboʼ. Tumen wa beyoʼ yaan u kʼaʼabéettal a jóokʼleʼex tiʼ le yóokʼol kaabaʼ.+ 11 Chéen baʼaleʼ beoraaʼ kin tsʼíibtikteʼex ka xuʼuluk a biskabaʼex+ yéetel jeʼel máaxak ku yaʼalikuba sukuʼun, chéen baʼaleʼ ku núupkʼebantal, ku píitmáan u tsʼíiboltik wa baʼax,+ ku adorartik imagenoʼob, ku poochʼil,* ku káaltal+ wa ku yookol.+ Mix a janaleʼex yéetel juntúul máak beyoʼ. 12 Tumen ¿baʼax yanen in wil yéetel u juzgartaʼal le máaxoʼob minaʼanoʼob ichil le múuchʼuliloʼ? ¿Maʼ wa le máaxoʼob yanoʼob ichil le múuchʼuliloʼ teʼex juzgarkoʼob, 13 yéetel le máaxoʼob minaʼanoʼob ichiloʼ Dios juzgarkoʼob?+ «Jóoʼseʼex le kʼasaʼan máak ichileʼexoʼ».+