Lucas

10 Le ka tsʼoʼokeʼ Yuumtsil Jesúseʼ tu tʼanaj uláakʼ 70 discípuloʼobeʼ ka tu túuxtoʼob a kaʼakaʼatúulil+ teʼ kaajoʼob yéetel teʼ lugaroʼob tuʼux kun bin xan letiʼoʼ. 2 Ka túun tu yaʼalajtiʼob: «U jaajileʼ jach yaʼab le baʼax kun cosecharbiloʼ, chéen baʼaleʼ le máaxoʼob ku cosecharoʼoboʼ junpʼíitoʼob. Le oʼolaleʼ kʼáat óolteʼex tiʼ u Yuumil le baʼax pakʼaʼan ka u túuxt uláakʼ máakoʼob utiaʼal le cosechaoʼ.+ 3 Xeeneʼex yéetel kanáantabaʼex tumen táan in túuxtikeʼex bey tamanoʼob ichil loboʼobeʼ.+ 4 Maʼ a biskeʼex mejen bolsaʼob,* mix sáabukaan, mix xanab,+ yéetel maʼ a waʼataleʼex a saludarteʼex mix máak teʼ bejoʼ. 5 Jeʼel tuʼuxak ka ookkeʼex ichil junpʼéel najeʼ yáax aʼaleʼex: ‹Yanak jeetsʼelil tiʼ le najaʼ›.+ 6 Teʼ túunoʼ wa yaan juntúul máak u yaabiltmaj le jeetsʼeliloʼ yaan u yantaltiʼ jeetsʼelil jeʼex le yaanteʼexoʼ. Chéen baʼaleʼ wa minaʼaneʼ le jeetsʼeliloʼ yaan u pʼáatalteʼex. 7 Wa ka kʼaʼamleʼexeʼ pʼáateneʼex teʼ najoʼ,+ jaanteʼex yéetel ukʼeʼex le baʼaxoʼob kun tsʼaabilteʼexoʼ,+ tumen máax ku meyajeʼ ku náajaltik u boʼotaʼal.+ Maʼ a lukʼleʼex tiʼ junpʼéel naj utiaʼal ka xiʼikeʼex táanxel najil.

8 Jeʼel tuʼuxak xan ka ookkeʼex tiʼ junpʼéel kaaj yéetel ka kʼaʼamleʼexeʼ jaanteʼex le baʼaxoʼob kun tsʼaabilteʼexoʼ, 9 tsʼakeʼex le kʼojaʼanoʼoboʼ yéetel aʼaleʼextiʼob: ‹U Reino Dioseʼ tsʼoʼok u náatsʼal›.+ 10 Chéen baʼaleʼ jeʼel tuʼuxak ka ookkeʼex tiʼ junpʼéel kaaj yéetel maʼ ta kʼaʼamleʼexeʼ xeeneʼex teʼ noj bejoʼoboʼ ka a waʼaleʼex: 11 ‹Tak u luʼumil a kaajaleʼex tsʼoʼok u páakʼal t-ookoʼobeʼ tsʼoʼok k-púustik ta táaneʼex.+ Chéen baʼaleʼ maʼ u tuʼubulteʼexeʼ u Reino Dioseʼ tsʼoʼok u náatsʼal›. 12 Kin waʼalikteʼexeʼ teʼ kʼiin jeʼeloʼ maas jeʼel u chʼaʼabal óotsilil tiʼ u kaajil Sodoma ke tiʼ le kaaj jeʼeloʼ.+

13 ¡Yaj baʼax kun úuchultech, Corazín! ¡Yaj baʼax kun úuchultech, Betsaida!, tumen wa tu kaajiloʼob Tiro yéetel Sidón ka beetaʼak kaʼach le milagroʼob beetaʼab ichileʼexaʼ bejlaʼa úuch u yeʼesoʼob tsʼoʼok u kʼexik u tuukuloʼobeʼ, bejlaʼa úuch kulakoʼob ich taʼan u búukintmoʼob toʼotoch nookʼeʼ.*+ 14 Le oʼolal kin waʼalikteʼexeʼ tu kʼiinil le juiciooʼ maas jeʼel u chʼaʼabal óotsilil tiʼ u kaajil Tiro yéetel tiʼ Sidón ke tiʼ teʼexeʼ. 15 Kux túun teech Capernaúm, ¿yaan wa a nojbaʼalkúuntaʼal tak teʼ kaʼanoʼ? Maʼ, baʼaxeʼ tak teʼ Muknal* kan éemeloʼ.

16 Le máax chʼenxikintikeʼexeʼ ku chʼenxikintiken xan.+ Le máax maʼ tu kʼamkeʼexeʼ maʼ tu kʼamken xan. Tsʼoʼoleʼ le máax maʼ tu kʼamkeneʼ maʼ tu kʼamik xan le Máax túuxtenoʼ».+

17 Le 70 discípuloʼoboʼ suunajoʼob yéetel kiʼimak óolal ka tu yaʼaloʼob tiʼ Jesús: «Yuumtsil, tak le demonioʼob beetik baʼax k-aʼalik kéen meyajnaktoʼon a kʼaabaʼoʼ».+ 18 Yoʼolal leloʼ Jesúseʼ tu yaʼalajtiʼob: «Teneʼ tin wilaj u lúubul Satanás+ bey jeʼex u léembal le cháak ku yéemel desde teʼ kaʼanoʼ. 19 ¡Ilawileʼex! Teneʼ tsʼoʼok in tsʼáaikteʼex autoridad utiaʼal a pepeʼchaʼatikeʼex kaanoʼob yéetel síinaʼanoʼob, yéetel tsʼoʼok in tsʼáaikteʼex u muukʼil utiaʼal a luʼskeʼex le páajtalil yaan tiʼ le enemigooʼ,+ tiʼ teʼexeʼ mix baʼal ken u beet loob. 20 Chéen baʼaleʼ maʼ u kiʼimaktal a wóoleʼex ikil u beetaʼal baʼax ka waʼalikeʼex tumen le demonioʼoboʼ, baʼaxeʼ kiʼimakchajak a wóoleʼex tumen tsʼoʼok u tsʼíibtaʼal a kʼaabaʼex teʼ kaʼanoʼ».+ 21 Jach teʼ súutuk jeʼeloʼ Jesúseʼ jach kiʼimakchaj u yóol yéetel chuʼup yéetel espíritu santoeʼ ka tu yaʼalaj: «In Yuum, teech u Yuumil kaʼan yéetel luʼum. Kin alabarkech tu táan le máakoʼoboʼ tumen tiʼ le mejen paalaloʼoboʼ ta weʼesaj le kaʼansajoʼob ta taʼakaj tubeel tiʼ le máaxoʼob jach kaanbalnajaʼanoʼob yéetel yaan u naʼatoʼoboʼ.+ In Yuum, leloʼ bey ta wóotilak ka úuchkoʼ.+ 22 Tuláakal le baʼaloʼobaʼ tsʼoʼok u tsʼaʼabal in wojéelt tumen in Taata. Chéen le Taata kʼaj óoltmil máax le Paaloʼ yéetel chéen le Paal kʼaj óoltmil máax le Taataoʼ.+ Le máakoʼoboʼ chéen jeʼel u kʼaj óoltikoʼob le Taata wa ku kaʼansaʼaloʼob tumen le Paaloʼ».+

23 Le ka pʼáat Jesús tu juunal yéetel u discípuloʼobeʼ tu yaʼalajtiʼob: «Kiʼimak u yóol le máaxoʼob ku yilkoʼob le baʼaxoʼob ka wilkeʼexoʼ.+ 24 Tumen kin waʼalikteʼexeʼ yaʼab profetaʼob yéetel reyoʼobeʼ tu tsʼíiboltaj u yilkoʼob le baʼaxoʼob ka wilkeʼexoʼ, chéen baʼaleʼ maʼ tu yiloʼobiʼ.+ Letiʼobeʼ tu tsʼíiboltaj xan u yuʼubikoʼob le baʼaxoʼob ka wuʼuyikeʼexoʼ, chéen baʼaleʼ maʼ tu yuʼuboʼobiʼ».

25 Ka tsʼoʼokeʼ juntúul máak jach u yojel baʼax ku yaʼalik le Leyoʼ líikʼeʼ ka tu yaʼalajtiʼ utiaʼal u probartik: «J-Kaʼansaj, ¿baʼax kʼaʼabéet in beetik utiaʼal ka yanakten kuxtal minaʼan u xuul?».+ 26 Letiʼeʼ tu yaʼalajtiʼ: «¿Baʼax tsʼíibtaʼan teʼ Leyoʼ? ¿Bix u yaʼalik?». 27 Le máak túunoʼ tu yaʼalaj: «‹Kʼaʼabéet a yaabiltik Jéeoba a Dios yéetel tuláakal a puksiʼikʼal, yéetel tuláakal a kuxtal, yéetel tuláakal a muukʼ bey xan yéetel tuláakal a tuukul›,+ yéetel ‹kʼaʼabéet a yaabiltik a wéet máakil jeʼex a yaabiltikabaeʼ›».+ 28 Letiʼeʼ tu yaʼalajtiʼ: «Jach maʼalob úuchik a núukik, seguernak a beetik utiaʼal ka yanaktech le kuxtaloʼ».+

29 Le máakaʼ tumen u kʼáat u yeʼes jach toj u kuxtaleʼ+ tu yaʼalaj tiʼ Jesús: «¿Tiʼ máax túun kʼaʼabéet in weʼesik yaabilaj?». 30 Jesús túuneʼ tu yaʼalajtiʼ: «Juntúul máakeʼ lukʼ tu kaajil Jerusalén, le táan u yéemel tu kaajil Jericóeʼ lúub tu kʼab j-ookoloʼob. Letiʼobeʼ tu láaj chʼaʼajoʼob baʼax yaantiʼ, tu sen loʼoloxoʼob, ka túun tu pʼatoʼob sat kimen. 31 Maʼ sáam tiʼ leloʼ juntúul sacerdote táan u taal u yéemel teʼ bejoʼ tu yilaj le máakoʼ, chéen baʼaleʼ máan tuláakʼ u tséel le bejoʼ. 32 Ka tsʼoʼokeʼ juntúul levita táan xan u taal u yéemel teʼeloʼ tu yilaj le máakoʼ ka máan xan tuláakʼ u tséel le bejoʼ. 33 Chéen baʼaleʼ juntúul samaritano+ táan xan u máan teʼ bejoʼ kʼuch teʼ tuʼux yaan le máakoʼ, le ka tu yileʼ tu chʼaʼaj óotsilil tiʼ. 34 Náatsʼ tu yiknal le máakoʼ ka tu tsʼáaj aceite yéetel vino tu yajiloʼob, tsʼoʼoleʼ ka tu báaʼkʼaxtaj le tuʼux uchaʼan loob tiʼoʼ. Ka tsʼoʼok túuneʼ tu naʼaksaj yóokʼol u yalakʼ baʼalcheʼeʼ ka tu bisaj tiʼ junpʼéel naj* utiaʼal ka u kanáante. 35 Tuláakʼ kʼiineʼ tu chʼaʼaj kaʼapʼéel denarioeʼ ka tu tsʼáaj tiʼ u yuumil le najoʼ ka tu yaʼalaj: ‹Kanáant le máakaʼ, wa ka xupik u maasileʼ yaan in boʼotiktech le kéen suunaken›. 36 Tiʼ le óoxtúul máakoʼobaʼ, ¿máax a tuklik tu yeʼesaj yaabilaj tiʼ le máak+ lúub tu kʼab le j-ookoloʼoboʼ?». 37 Le máakoʼ tu núukaj: «Letiʼe máax tu chʼaʼaj óotsilil tiʼ le máakoʼ».+ Jesús túuneʼ tu yaʼalajtiʼ: «Xeen ka a beet xan beyoʼ».+

38 Le táan túun u binoʼoboʼ Jesúseʼ ook tiʼ junpʼéel chan kajtalil. Teʼelaʼ juntúul koʼolel u kʼaabaʼ Martaeʼ+ tu kʼamaj tu yotoch. 39 Le koʼolelaʼ yaan juntúul u yíitsʼin, u kʼaabaʼeʼ María, letiʼeʼ kulaj yiknal Yuumtsil Jesúseʼ ka pʼáat u yuʼub u tsikbal. 40 Chéen baʼaleʼ Martaeʼ jach chʼiikil kaʼach u beet yaʼabkach baʼaloʼob. Le oʼolal náatsʼ yiknal Jesúseʼ ka tu yaʼalajtiʼ: «Yuumtsil, ¿baʼaxten techeʼ mix baʼal ka waʼalik tiʼ in wíitsʼin kex tsʼoʼok u pʼatken in beet tin juunal tuláakal le baʼaloʼobaʼ? Much aʼaltiʼ ka taalak u yáanten». 41 Jesúseʼ tu núukajtiʼ: «Marta, Marta, ¿baʼaxten jach chiʼichnakech yéetel jach chʼiikilech a beet yaʼab baʼaloʼob? 42 U jaajileʼ maʼ yaʼab baʼaxoʼob kʼaʼabéetiʼ, maʼ xaaneʼ tak chéen junpʼéel. Chéen baʼaleʼ Maríaeʼ tu yéeyaj u maas maʼalobil+ yéetel maʼ kun luʼsbiltiʼ».