Efesios

1 Teen Pablo, apóstolen tiʼ Cristo Jesús tumen bey u kʼáat Diosoʼ, táan in tsʼíib tiʼ le máaxoʼob santoʼob yanoʼob Éfeso+ chúukaʼan u yóol u tsaypachtoʼob Cristo Jesúsoʼ:

2 Ka yanakteʼex le nojoch utsil yéetel le jeetsʼelil ku taal tiʼ Dios k-Taataoʼ bey xan le ku taal tiʼ Yuumtsil Jesucristooʼ.

3 Alabartaʼak u Dios yéetel u Taata k-Yuumtsil Jesucristo tumen teʼ kaʼanilbeʼen lugaroʼoboʼ letiʼeʼ tsʼoʼok u tsʼáaiktoʼon baʼaloʼob maʼalobtak ku taaloʼob tiʼ u espíritu santo* tumen junmúuchʼ yaniloʼon yéetel Cristo.+ 4 Tumen táanil tiʼ u káajal u síijil wíinikeʼ* tu yéeyoʼon utiaʼal ka yanakoʼon junmúuchʼ yéetel Cristo, utiaʼal ka k-eʼes yaabilaj, utiaʼal ka pʼáatkoʼon santoʼon yéetel utiaʼal ka pʼáatkoʼon limpioʼon tu táan.+ 5 Tumen Dioseʼ u yaʼalmiliʼ yaan u máatkoʼon+ bey u paalaloʼon+ tu yoʼolal Jesucristo jeʼex uts tu tʼaan yéetel jeʼex u kʼáateʼ.+ 6 Lelaʼ úuch utiaʼal k-alabartik tu yoʼolal le u nojoch utsil+ tu yeʼesajtoʼon úuchik u tsʼáaiktoʼon le u Paal u yaabiltmoʼ.+ 7 Tumen yaʼab u yeʼesik xan u nojoch utsileʼ tsʼoʼok u boʼotik k-jáalkʼabtaʼal yéetel u kʼiʼikʼel u Paal,+ jach beyoʼ tu yoʼolal xan lelaʼ tsʼoʼok u perdonartaʼal k-kʼebanoʼob.+

8 Dioseʼ tu jach eʼesajtoʼon u nojoch utsil tumen tu tsʼáajtoʼon tuláakal naʼatil yéetel tuláakal maʼalob tuukul. 9 Lelaʼ tu beetaj úuchik u tsʼáaik k-ojéelt le baʼax u tukultmaj u beetkoʼ, junpʼéel baʼax* u taʼakmaj+ kaʼachi. Tumen bey uts tu tʼaanoʼ letiʼeʼ tu chʼaʼtuklaj 10 u nuʼuktik tuláakal baʼal tak ken láaj tsʼoʼokok le kʼiin u yaʼalmoʼ, utiaʼal beyoʼ ka u kaʼa muchʼkíint tuláakal baʼal utiaʼal u nupik tiʼ Cristo, le baʼaloʼob yanoʼob teʼ kaʼanoʼ bey xan le baʼaloʼob yanoʼob way luʼumeʼ.+ Jach beyoʼ, Dioseʼ yaan u nupik tuláakal baʼal tiʼ Cristo, 11 le máax tiʼ nupaʼanoʼon xanoʼ. Le Dios beetik tuláakal baʼal jeʼex u chʼaʼtuklik yéetel jeʼex u kʼáatoʼ letiʼ aʼalmil yaan k-kʼamik le herenciaoʼ,+ 12 utiaʼal beyoʼ ka alabartaʼak yéetel ka nojbaʼalkúuntaʼak t-oʼolal, toʼon máaxoʼon t-yáax tsʼáaj k-fe tiʼ Cristo. 13 Chéen baʼaleʼ tak teʼex ta tsʼáaj a fejeʼex tiʼ letiʼ le ka ta kʼaj óolteʼex le jaajoʼ, le maʼalob baʼaloʼob yaan yil yéetel a salvacióneʼexoʼ. Le ka tsʼoʼok xan a creerkeʼexeʼ, sellartaʼabeʼex+ yéetel le espíritu santo aʼalaʼan u tsʼaʼabal tu yoʼolal Cristooʼ. 14 Lelaʼ junpʼéel garantía* eʼesik jach tu jaajil yaan k-kʼamik le herenciaoʼ,+ yéetel ku tsʼaʼabal utiaʼal u jáalkʼabtaʼal le máaxoʼob u tiaʼaloʼob Diosoʼ.+ Le jeʼeloʼobaʼ ku jáalkʼabtaʼaloʼob yéetel junpʼéel boʼol+ utiaʼal ka alabartaʼak yéetel utiaʼal ka nojbaʼalkúuntaʼak.

15 Le oʼolal xaneʼ le ka tin wuʼuyaj u yaʼalaʼal a tsʼaamaj a fejeʼex tiʼ Yuumtsil Jesús yéetel ka weʼeskeʼex yaabilaj tiʼ tuláakal le máaxoʼob santoʼoboʼ, 16 maʼ tu xuʼulul in tsʼáaik gracias ta woʼolaleʼex. Ichil xan le oraciónoʼob kin beetkoʼ mantatsʼ kin kʼáat óolal ta woʼolaleʼex, 17 utiaʼal beyoʼ le kiʼichkelem Taata, u Dios k-Yuumtsil Jesucristooʼ ka u tsʼáateʼex naʼatil bey xan ka u tsʼáa a wojéelteʼex le baʼaxoʼob kʼaʼabéet utiaʼal a kʼaj óoltikeʼex tubeeloʼ.+ 18 Dioseʼ tsʼoʼok u jeʼekʼabtik a puksiʼikʼaleʼex utiaʼal ka a wileʼex yéetel utiaʼal ka a wojéelteʼex baʼax esperanzail ku tsʼáaikteʼex, le kiʼichkelem baʼaloʼob u yaʼalmaj u tsʼáaik tiʼ le máaxoʼob santoʼoboʼ.+ 19 Orarneneʼex xan utiaʼal ka a wojéelteʼex bukaʼaj u muukʼ le u nojoch páajtalil ku tsʼáaik tiʼ toʼon,+ máaxoʼon yaan k-fe tiʼ letiʼ. Le bukaʼaj páajtalil yaantiʼoʼ ilaʼab 20 le ka tu líiʼsaj Cristo ichil le kimenoʼoboʼ yéetel le ka tu kukíintaj tu x-noʼoj kʼab+ teʼ kaʼanilbeʼen lugaroʼoboʼ. 21 Dioseʼ tu tsʼáaj maas kaʼanal tiʼ tuláakal gobierno, autoridad, páajtalil, rey bey xan tiʼ jeʼel baʼalak kʼaabaʼ jeʼel u páajtal u chʼaʼchiʼitaʼaleʼ,+ maʼ chéen teʼ yóokʼol kaabaʼ, baʼaxeʼ tak teʼ yóokʼol kaab ku taaloʼ. 22 Tu tsʼáaj xan tuláakal baʼal tu yáanal u yook Cristo,+ ka tu tsʼáaj bey u poolil tuláakal baʼal yaan yil yéetel le múuchʼuliloʼ.+ 23 Le múuchʼuliloʼ u wíinklil Cristo+ yéetel ku chúukpajal tu yoʼolal Cristo, le máax ku chúukbesik tuláakal baʼaloʼ.