¡Taʼaytak u xuʼulul le muʼyajiloʼ!

JUNPʼÉEL MAʼALOB GOBIERNO

«U [Diosil] kaʼaneʼ bíin u líiʼs junpʼéel [reino] mix bikʼin bíin xuʼulsaʼakiʼ, bíin pʼáatak utiaʼal minaʼan u xuul, mix bíin tʼonkintaʼak tumen mix junpʼéel múuchʼ kaaj, baʼaleʼ yaan u xuʼulsik junpuliʼ tuláakal le uláakʼ [reinoʼoboʼ].» (Daniel 2:44.)

U Reino Dioseʼ junpʼéel gobierno yaan teʼ kaʼanoʼ. Jesús, le máax yéeyaʼan utiaʼal u beetik u reyiloʼ, yaan u jeelintik tuláakal u gobiernoʼob wíinik yéetel yaan u yilik ka beetaʼak baʼax u kʼáat Dios teʼ kaʼanoʼ bey xan way Luʼumeʼ (Mateo 6:9, 10). Le gobiernoaʼ mix bikʼin kun jeelintbil tumen u gobierno wíinik. «U Reino k-Yuumtsil yéetel k-Salvador Jesucristo[eʼ]», jeʼex u yaʼalik le Bibliaoʼ, «minaʼan xuʼulul tiʼ». Mix bikʼin kun xuʼulul le jeetsʼeliloʼ (2 Pedro 1:11).

U XUʼULSAʼAL LE RELIGIONOʼOB KU TUUSOʼOBOʼ

«Satanaseʼ maʼ tu xuʼulul u yeʼeskuba bey juntúul u angelil sáasileʼ. Le oʼolaleʼ maʼ jelaʼan u yilaʼal u yeʼeskuba le máaxoʼob meyajtik Satanás bey máaxoʼob ku beetkoʼob baʼax tojoʼ. Baʼaleʼ yaan u xuʼulsaʼaloʼob jeʼex u náajmatkoʼob yoʼolal le baʼaxoʼob ku beetkoʼoboʼ.» (2 Corintoiloʼob 11:14, 15.)

Le religionoʼob ku tuusoʼoboʼ yaan u chíikpajal tiʼ Kʼaasilbaʼal u taaloʼoboʼ yéetel yaan u xuʼulsaʼaloʼob. Mix máak kun baʼateʼel mix kun kíimsaj yoʼolal religión. Le máaxoʼob yaabiltik «u jaajil Dios kuxaʼanoʼ» yaan u páajtal u adorartikoʼob yéetel «junpʼéeliliʼ fe», «yéetel kiliʼich muukʼ bey xan yéetel jaaj». Letiʼ túun ken yanak jeetsʼelil yéetel maʼalob bisbail (1 Tesalonicailoʼob 1:9; Efesoiloʼob 4:5; Juan 4:23).

U LUʼSAʼAL U KʼEBAN MÁAK

«Dios kun yantal tu yéeteloʼob. Letiʼeʼ yaan xan u choʼik tuláakal u jaʼil u yichoʼob, maʼ tun yantal kíimil, mix okʼol, mix yaj óolal, mix kʼiʼinamil. Le baʼaxoʼob yanoʼob kaʼachoʼ tsʼoʼok u máanoʼob.» (Apocalipsis 21:3, 4.)

Utiaʼal u béeykuntik lelaʼ Jéeobaeʼ tu kʼubaj Jesús, u Paal, utiaʼal u kíimil t-oʼolal (Juan 3:16). Yáanal u nuʼuktaj Jesuseʼ yaan u luʼsaʼal le kʼebanoʼ. Mix máak kun muʼyaj, tumen «Dios kun yantal tu yéeteloʼob» yéetel yaan «u choʼik tuláakal u jaʼil u yichoʼob». Le kʼeban yéetel le muʼyajiloʼ yaan u máan; «le utsil máakoʼoboʼ bíin u tiaʼalintoʼob le luʼumaʼ; tiʼ bíin kajlakoʼob utiaʼal jaʼaboʼob minaʼan u xuul[iʼ]» (Salmo 37:29).

MAʼ KUN ANTAL KʼASAʼAN ANGELOʼOB

«[Jesucristoeʼ] tu machaj le nojoch kaanoʼ, le úuchben kaanoʼ, le ku yaʼalaʼal Kʼaasilbaʼal yéetel Satanás tiʼoʼ, ka tu kʼaxaj tu yáamil mil jaʼaboʼob. Tsʼoʼoleʼ tu píikchʼintaj teʼ taamkach chʼeʼenoʼ, ka tu makaj u jool yéetel tu sellartaj, utiaʼal beyoʼ maʼ u seguer u tusik u kajnáaliloʼob Luʼum.» (Apocalipsis 20:2, 3.)

Satanás yéetel u demonioʼobeʼ yaan u xuʼulul u tuskoʼob máak tumen yaan u kʼaʼaxloʼob yéetel yaan u píikchʼintaʼaloʼob «teʼ taamkach chʼeʼen» tuʼux mix baʼal kun páajtal u beetkoʼoboʼ. Mix bikʼin ken u kaʼa oksubaʼob ichil u kuxtal máak. ¡Bukaʼaj maʼalobil ken kuxlak máak beyoʼ!

U «TSʼOOK KʼIINOʼOBEʼ» YAAN U MÁAN

U «tsʼook kʼiinoʼobeʼ» yaan u máan ken káajak le «nojoch muʼyajil» tu yaʼalaj Jesusoʼ: «Yaan u yantal junpʼéel nojoch muʼyajil mix juntéen ilaʼak desde ka káaj yóokʼol kaab tak bejlaʼeʼ, yéetel mix bikʼin kun kaʼa ilbil» (Mateo 24:21).

Le muʼyajil kun antaloʼ nojoch tumen yaan u yúuchul yaayaj baʼaloʼob mix juntéen ilaʼakoʼob. Le baʼaloʼobaʼ yaan u tsʼoʼokol yéetel «u baʼatelil u noj kʼiinil le Dios yaan tuláakal páajtalil tiʼoʼ», le ku yaʼalaʼal «Armagedón» tiʼoʼ (Apocalipsis 16:14, 16, tsolajil).

Tuláakal máax u yaabiltmaj baʼax tojeʼ yéetel kiʼimak óolal táan u páaʼtik u tsʼoʼokol tiʼ le kʼasaʼan yóokʼol kaabaʼ. Ilawil baʼax utsiloʼob ken u kʼamoʼob yáanal u Reino Dios.

DIOSEʼ YAAN U TAASIK ULÁAKʼ UTSILOʼOB

«Junmúuchʼ yaʼabkach máakoʼob[eʼ]» yaan u kuxtaloʼob ich jeetsʼelil tiʼ junpʼéel túumben Luʼum: Le Bibliaoʼ ku yaʼalikeʼ le «junmúuchʼ yaʼabkach máakoʼob mix máak ku páajtal u xokik jaytúuloʼob[oʼ]» yaan u «jóokʼloʼob tiʼ le nojoch yaayaj óolaloʼ» yéetel yaan u kuxtaloʼob ich jeetsʼelil tiʼ junpʼéel túumben Luʼum (Apocalipsis 7:9, 10, 14; 2 Pedro 3:13). Yaan u yaʼalikoʼob salvartaʼaboʼob tumen Jesucristo, «u Taman Dios, le máax ku luʼsik u kʼeban le yóokʼol kaaboʼ» (Juan 1:29).

Yaʼab utsiloʼob ken u taas u kaʼansaj Diosoʼ: Teʼ túumben Luʼumoʼ «bíin chuʼupuk le múuchʼ kaajoʼob yéetel u kʼaj óolal Yuumtsil» Jéeobaoʼ (Isaías 11:9). Yaan u kaʼansaʼal tiʼ máak kuxtal ich jeetsʼelil yéetel u kanáantik le yóokʼol kaaboʼ. Dioseʼ ku yaʼalik: «Teen Yuumtsil a [Dios]; teen kaʼanbesik tiʼ teech baʼax unaj a beetik utiaʼal a wutsil, teen eʼesik tiʼ teech, tuʼux bejil unaj a bin» (Isaías 48:17).

Yaan u kaʼa kuxkíintaʼal máaxoʼob k-yaabiltmaj: Le ka taal Jesús way Luʼumeʼ tu kaʼa kuxkíintaj Lázaro, u amigo (Juan 11:1, 5, 38-44). Beyoʼ tu yeʼesaj baʼax ken u beet tu yoʼolal u millonesil máakoʼob yáanal u Reino Dios (Juan 5:28, 29).

Jeetsʼelil yéetel justicia utiaʼal mantatsʼ: Yáanal u gobierno Cristoeʼ maʼ kun beetbil baʼax maʼ tu nuʼukiʼ. ¿Bix túun k-ojéeltik? Tumen Jesuseʼ ku páajtal u yilik baʼax yaan tu puksiʼikʼal máak, le oʼolaleʼ yaan u yojéeltik máax uts yéetel máax kʼasaʼan. Le máax maʼ u kʼáat u kʼex u kuxtaleʼ maʼ kun chaʼabil u yantal teʼ túumben Luʼumoʼ (Salmo 37:9, 10; Isaías 11:3, 4; 65:20; Mateo 9:4).

Le baʼaxoʼob tsʼoʼok k-ilkoʼ chéen jujunpʼéel tiʼ le yaʼabkach profecíaʼob ku tʼaanoʼob tiʼ le jatsʼuts kʼiinoʼob ku taaloʼoboʼ. Ken gobernarnak u Reino Dios yóokʼol le Luʼumaʼ yaan u yantal junpʼéel «nojoch jéetsʼel óolal» mix bikʼin kun xuʼulul (Salmo 37:11, 29). Tuláakal le baʼaxoʼob beetik u muʼyaj máakoʼ yaan u xuʼulsaʼaloʼob. Dios aʼalik: «¡Ile!, yaan in túumbenkuntik tuláakal baʼal. [...] Le tʼaanoʼobaʼ jaajtak yéetel jach yaan u béeytaloʼob» (Apocalipsis 21:5).