¿Bix u yantal upʼéeliliʼ tuukul tiʼe kristiaanoʼoboʼ?
1 ¿Baʼax ju beetik u yantal upʼéeliliʼ tuukul tiʼ maas tiʼ seeis miyoonesi máakoʼob tiʼ 234 luʼumiloʼob, ich tresieentos ocheenta jejeláas tʼaaniloʼobeʼ? Letiʼe u áadorarkoʼob Dioos Jéeobaoʼ (Miq. 2:12; 4:1-3). Teʼ kʼiinoʼobaʼ, u j-jaajkunajoʼon Jéeobaeʼ k-ojel jach tu jaajil yaan upʼéeliliʼ tuukul ichiloʼon. Beyoʼon tamanoʼob u múuchʼ yaniloʼob yáanal u nuʼuktaj juntúuliliʼ j-kanan tamaneʼ, le oʼolal k-ilik maʼ u táabskoʼon u tuukulil le yóokʼol kaabaʼ (Juan 10:16; Efe. 2:2).
2 Diooseʼ u kʼáat ka múuchʼ áadorartaʼak tumen tuláakal máak (Apo. 5:13). Jesuseʼ u yojel jach kʼaʼanan lelaʼ, le oʼolal payalchiʼinaj utiaʼal ka jumpʼéeliliʼchajak u tuukul u j-tsaypachoʼob (Juan 17:20, 21). Kaada utúul tiʼ toʼoneʼ, ¿baʼax ju beetik utiaʼal ka yanak upʼéeliliʼ tuukul ichiloʼoneʼ?
3 Baʼax beetik yantal upʼéeliliʼ tuukul. Yantoʼon upʼéeliliʼ tuukul chéen yoʼolal le áantaj ku tsʼáaiktoʼon Dioos yéetel le Biibliaoʼ bey xan yéetel u espiiritu. Wa k-beetik baʼax kiaʼalik le Biibliaoʼ, u espiiritu Diooseʼ yaan u maas áantkoʼon, tumen le beetik u yantaltoʼon upʼéeliliʼ tuukul yéetel ka yanaktoʼon jetsʼ óolal (Efe. 4:3). Ku yáantkoʼon xan utiaʼal ka k-paklan saʼas k-siʼipileʼex yéetel yaabilaj (Col. 3:13, 14; 1 Ped. 4:8). Ken k-xok le Biibliaoʼ, ¿k-tuukul wa sáamsamal tiʼ baʼax kiaʼalik utiaʼal k-maʼalob bisikba yéetel tuláakal máak?
4 Le meeyjil kaʼansaj k-beetikoʼ ku yáantkoʼon utiaʼal ka yanaktoʼon upʼéeliliʼ tuukul. Ken jóoʼkoʼon kʼaʼaytaj yéetel u maasileʼ, k-eʼesik táan k-múuchʼ «pʼislanmuukʼeʼex tioʼolal u yoksaj óolalil le maʼalob péektsil[oʼ]», yéetel táan k-táakpajal «tiʼ u meeyjul le jaaj[oʼ]» (Fili. 1:27; 3 Juan 8, Le Tumben Nuptʼan). Bey túunoʼ, le yaabilaj yaan ichiloʼonoʼ yaan u maas muʼukʼaʼantal. Wa yaan máax tsʼoʼok u yúuchtal kʼaʼaytnakech yéeteleʼ, ¿baʼaxten maʼ ta waʼaliktiʼ ka jóokʼok ta wéetel teʼ semaanaaʼ?
5 ¡Jach ku taasiktoʼon kiʼimak óolal k-antal ichil u kaajal Dioos, tuʼux jach tu jaajil tuláakloʼon sukuʼuntsiloʼon! (1 Ped. 5:9.) Maʼ jach úucheʼ, yaʼabach máakoʼob tu yiloʼob tu jaajil yaan le múuchʼ bisbai ichil u j-jaajkunajoʼob Jéeoba teʼ muchʼtáambal tiʼ luʼumiloʼob tu kʼaabaʼtaj «Koʼoneʼex nojbeʼenkúuntik Dioos». Le oʼolaleʼ, koʼoneʼex eʼesik yantoʼon upʼéeliliʼ tuukul ikil k-xokik sáamsamal le Biibliaoʼ, ikil k-utskíintik yéetel yaabilaj le talamil kiantaltoʼon yéetel u maasiloʼ bey xan ikil k-kʼaʼaytik le maʼalob péektsil yéetel upʼéeliliʼ tuukuloʼ (Rom. 15:6).