Beet u tuukul le máakoʼob yéetel le baʼax ku yaʼalik le Bibliaoʼ
1. ¿Baʼax unaj k-beetik utiaʼal u meyajtoʼon tubeel le Biblia teʼ kʼaʼaytajoʼ?
1 Le máaxoʼob jach u yojloʼob kʼaʼaytaj jeʼex le apóstol Pablooʼ, o yojloʼobeʼ utiaʼal u tsolik máak «maʼalob u tʼaaniloʼob le jaajoʼ», maʼ chéen unaj u chʼaʼachiʼitikoʼob wa baʼax tekstoiliʼ (2 Tim. 2:15). Ken kaʼansajnakoʼoneʼ, ¿bix jeʼel k-oksik tu tuukul le máakoʼob le baʼax ku yaʼalik le Bibliaoʼ? (Hch. 28:23).
2. ¿Baʼax jeʼel u páajtal k-beetik utiaʼal ka eʼesaʼak tsiikil tiʼ le Biblia tumen le máax uʼuykoʼonoʼ?
2 Xok le Biblia tiʼ le máakoʼoboʼ. Yáaxeʼ unaj k-eʼesiktiʼob tiaʼan teʼ Biblia le baʼaxoʼob k-kaʼansikoʼ, beyoʼ yaan u yeʼeskoʼob tsiikil tiʼ le baʼax ku yaʼalikoʼ. Wa k-eʼesik tiʼ le máakoʼob jach k-creertik le baʼaxoʼob ku yaʼalik le Bibliaoʼ, yaan k-beetik u yuʼubikoʼob le teksto ken k-xokoʼ (Heb. 4:12). Maʼ xaaneʼ jeʼel u páajtal k-aʼalik beyaʼ: «Teneʼ jach tsʼoʼok u yáantken in wojéeltik le baʼax ku tuklik Dios yoʼolal lelaʼ. Ilawil le baʼax ku yaʼalik le Bibliaaʼ». Unaj k-ilik xokik le Biblia ken kaʼansajnakoʼonoʼ.
3. Ken tsʼoʼokok k-xokik upʼéel tekstoeʼ, ¿baʼax jeʼel k-beetik utiaʼal ka naʼataʼakeʼ?
3 U kaʼapʼéel baʼax unaj k-beetkeʼ, letiʼe k-tsolik baʼax ku yaʼalik le tekstooʼ. Yaʼab máakeʼ maʼ tu jáan naʼatik le baʼax ku yaʼalik le teksto le yáax ken xoʼokok tiʼoboʼ. U suukaʼanileʼ unaj k-tsoliktiʼob baʼax yaan yil le teksto yéetel le baʼax k-kaʼansikoʼ (Luc. 24:26, 27). Unaj k-eʼesiktiʼob le baʼaxoʼob maas kʼaʼanantak tiʼ le tekstooʼ. Maʼalob xan ka k-beet upʼéel kʼáatchiʼ utiaʼal k-ilik wa tu naʼataj le baʼax k-kaʼansikoʼ (Pro. 20:5; Hch. 8:30).
4. ¿Máakalmáak le u yóoxpʼéel baʼal unaj k-beetik utiaʼal ka k-beet u tuukul le máakoʼob tiʼ le baʼax k-kaʼansikoʼ?
4 Unaj k-beetik u tuukuloʼob tiʼ le baʼax ku yaʼalik le Bibliaoʼ. U yóoxpʼéeleʼ unaj k-beetik u tuukuloʼob yéetel u kʼuchul tu puksiʼikʼaloʼob. Unaj k-áantik u yiloʼob bix jeʼel u yáantaʼaloʼob ichil u kuxtaloʼob tumen le baʼax ku yaʼalik le Bibliaoʼ. Wa k-eʼesiktiʼob tiaʼan teʼ Biblia le baʼaxoʼob k-kaʼansikoʼ, jeʼel k-beetik u kʼexik u tuukuloʼobeʼ (Hch. 17:2-4; 19:8). Jeʼex ken tsʼoʼokok k-xokik Salmo 83:18, tiʼ le Traducción del Nuevo Mundooʼ, jeʼel u páajtal k-aʼaliktiʼeʼ utiaʼal k-bisikba tubeel yéetel utúul máakeʼ kʼaʼabéet k-ojéeltik u kʼaabaʼ. Ken tsʼoʼokkeʼ jeʼel u páajtal k-aʼalikeʼ: «A tuklikeʼ, ¿jeʼel wa u maas uʼuyaʼal a payalchiʼob wa ka meyajnaktech u kʼaabaʼ Dioseʼ?». Wa k-eʼesik tiʼ le máakoʼob bix jeʼel u meyaj ichil u kuxtaloʼob le baʼax ku yaʼalik le tekstoaʼ, maas jeʼel u yilkoʼob bey upʼéel baʼal kʼaʼananeʼ. Wa k-beetik u tuukul le máakoʼob tiʼ le baʼax ku yaʼalik le Bibliaoʼ, yaan u taaktal u meyajtkoʼob Dios (Jer. 10:10).