Le paakʼaloʼoboʼ tsʼoʼok u kʼantaloʼob utiaʼal jochbil
1. ¿Baʼax meyajil ku beetaʼal bejlaʼeʼ?
1 Ka tsʼoʼok u kʼaʼaytaj Jesús tiʼ utúul samaritanaeʼ, tu yaʼalaj tiʼ u disipuloʼob: «Pakteʼex le paakʼaloʼoboʼ, tumen tsʼoʼok u kʼantaloʼob utiaʼal jochbil» (Juan 4:35, 36). Teʼ kʼiinoʼoboʼ táan kaʼach u káajsaʼal u beetaʼal upʼéel nojoch meyaj, yéetel Jesuseʼ u yojel yaan u beetaʼal tuláakal yóokʼol kaab. Kex bejlaʼa tiaʼan Jesús teʼ kaʼanoʼ láayliʼ táan u yilik ka beetaʼak le meyajaʼ (Mat. 28:19, 20). ¿Baʼax eʼesik táan u maas beetaʼal le meyaj teʼ tu tsʼook kʼiinoʼobaʼ?
2. ¿Baʼaxoʼob eʼesik táan u maas yaʼabtal le meeyjil kʼaʼaytajoʼ?
2 Tiʼ tuláakal yóokʼol kaab. Tu jaʼabil meeyjil 2009, 3.2% maas yaʼabchajik le j-kʼaʼaytajoʼob tiʼ tuláakal yóokʼol kaaboʼ. Teʼ tuʼuxoʼob maʼatech u chaʼabal u kʼaʼaytaj le sukuʼunoʼoboʼ 14% maas yaʼabchajik le j-kʼaʼaytajoʼoboʼ. Cada meseʼ tsʼaʼab maas tiʼ 7,619,000 xookoʼob, lelaʼ maas yaʼab tiʼ le bukaʼaj j-kʼaʼaytajoʼob yanoʼ, yéetel óoliʼ medio millón u maas yaʼabil tiʼ le xookoʼob tsʼaʼab le jaʼab máanoʼ. Tumen táan u maas yaʼabtal le meyaj beetbiloʼ, táan u maas kʼaʼabéettal u yáantaj le misioneroʼoboʼ. Le múuchʼuliloʼob yaan ich jejeláas tʼaanoʼob xanoʼ táan u bin u maas yaʼabtaloʼob. Lelaʼ ku yeʼesikeʼ Jéeobaeʼ táan u maas séebkuntik le meeyjil kʼaʼaytaj teʼ tu tsʼook kʼiinoʼobaʼ (Isa. 60:22). ¿Bix a wilik teech le meeyjil kʼaʼaytajoʼ?
3. ¿Baʼax ku tuklik jujuntúul sukuʼunoʼob yoʼolal le kʼaʼaytajoʼ?
3 Le kʼaʼaytaj ku beetaʼal teʼ tuʼux kajaʼanechoʼ. Yaan sukuʼunoʼobeʼ ku yaʼalikoʼob: «Teʼ tuʼux kajaʼanenoʼ mix máak uʼuyikoʼon». Maʼ xaaneʼ le baʼax ku yaʼalikoʼobaʼ jaaj tumen yaan territorioʼobeʼ ku kʼamikoʼob kaʼach le maʼalob péektsiloʼ, baʼaleʼ bejlaʼeʼ maʼ. Le oʼolal ku tuklikoʼobeʼ tsʼoʼok u beetaʼal le jooch teʼ tuʼux kajaʼanoʼoboʼ, yéetel chéen u meentsʼulil pʼaatal. Baʼaleʼ, ¿jaaj wa le baʼax ku tuklikoʼoboʼ?
4. ¿Bix unaj k-ilik le meeyjil kʼaʼaytajoʼ, yéetel baʼaxten?
4 Desde tu káajbal tak tu tsʼoʼokbaleʼ, jach yaʼab meyaj ku beetaʼal utiaʼal le joochoʼ. Lelaʼ bey u yeʼesik le tʼaanoʼob tu yaʼalaj Jesusoʼ: «Tu jaajileʼ le joochoʼ jach yaʼab, baʼaleʼ le j-meyajoʼoboʼ jach jumpʼíitoʼob. Le oʼolaleʼ kʼáat óolteʼex tiʼ u Yuumil le joochoʼ ka u túuxt j-meyajoʼob utiaʼal jochik» (Mat. 9:37, 38). Jéeoba, u Yuumil le kooloʼ, letiʼ kun aʼalik baʼax kʼiin yéetel tuʼux ken u tsʼáa u yich le meyajoʼ (Juan 6:44; 1 Cor. 3:6-8). ¿Bix k-áantaj teʼ meyajaʼ? Le Bibliaoʼ ku yaʼalik: «Pakʼ a wiʼinaj tu jaʼatskabil, pakʼ xan tu yoknaj kʼiin» (Ecl. 11:4-6). Kex kuxaʼanoʼon tu tsʼook u kʼiiniloʼob le joochoʼ, maʼ unaj k-xulik k-tsʼáaik k-óoliʼ.
5. ¿Baʼaxten maʼ unaj u xuʼulul k-kʼaʼaytaj kex k-ilik bey mix máak uʼuykoʼoneʼ?
5 Le joochoʼ maʼ tsʼoʼokokiʼ. Kex tsʼoʼok u kʼaʼaytaʼal yaʼab utéenel u territorioi le múuchʼulil yéetel kex bey mix máak kʼamik le maʼalob péektsiloʼ, láayliʼ jach unaj k-tsʼáaik óol kʼaʼaytajeʼ (2 Tim. 4:2). Le baʼaloʼob kʼaastak ku yúuchul teʼ kʼiinoʼobaʼ jeʼel u beetik u kʼexik u tuukul le máakoʼoboʼ yéetel jeʼel u beetik u tuukuloʼob tiʼ le baʼax ku taal u kʼiinoʼ. Le táankelem paalaloʼob xanoʼ jeʼex u bin u nuuktaloʼobeʼ bey u bin u maas jetsʼik u tuukuloʼob yéetel u yilkoʼob baʼax ken u beetoʼob ichil u kuxtaloʼob. Maʼ xaan xaneʼ ikil k-jóokʼol kʼaʼaytaj mantatsʼeʼ, le máakoʼoboʼ jeʼel u yilkoʼob jach chúukaʼan k-óoleʼ yéetel jeʼel u taaktal u yojéeltkoʼob baʼaxten k-beetik le meyajoʼ. Tsʼoʼoleʼ kex wa u yóoliliʼ wa máax maʼ u yuʼubkoʼoneʼ, de por si kʼaʼabéet u yojéelkoʼob baʼax ken u beet Dios (Eze. 2:4, 5; 3:19).
6. ¿Baʼax jeʼel k-beetik wa ku talamtal yéetel ku lúubul k-óol kʼaʼaytaj teʼ territoriooʼ?
6 ¿Baʼax jeʼel k-beetik wa ku talamtal yéetel wa ku lúubul k-óol kʼaʼaytaj teʼ territoriooʼ? Unaj k-kʼaʼaytaj u jejeláas bixi, jeʼex ka kʼaʼaytajnakoʼon tuʼuxoʼob ku yúuchul koonoloʼ wa tiʼ teléfono. Jeʼel xan u páajtal k-kʼexik bix k-kʼaʼaytaj utiaʼal ka maas taakak u yuʼubaʼaleʼ. Maʼ xaaneʼ jeʼel u páajtal xan k-kʼexik u yorai k-jóokʼol kʼaʼaytaj, jeʼex de tarde wa tiʼ uláakʼ súutukiloʼob k-tuklik maas kulaʼan le máakoʼob tu yotochoʼoboʼ. Jeʼel xan u páajtal k-kanik uláakʼ tʼaan utiaʼal k-áantik uláakʼ máakoʼobeʼ. Wa k-beetikba precursor regularileʼ jeʼel u páajtal k-maas táakpajal teʼ kʼaʼaytajoʼ. Uláakʼ baʼax jeʼel u páajtal k-beetikeʼ, letiʼe ka xiʼikoʼon áantaj tuʼux maʼ yaʼab sukuʼunoʼob yanoʼoʼ. Wa k-ilik le kʼaʼaytaj jeʼex u yilik Jéeobaoʼ, yaan k-ilik k-maas táakpajliʼ.
7. ¿Tak baʼax kʼiin ken xuʼuluk k-kʼaʼaytaj?
7 Le j-kolnáaloʼoboʼ chéen tsʼeʼetsʼek kʼiin yaan tiʼob utiaʼal u joochoʼob, le oʼolal maʼatech u chéen jeʼeleloʼob. Le kʼaʼaytajoʼ láayliʼ xan jeʼex le joochoʼ, kʼaʼabéet u séeb beetaʼal. ¿Baʼax kʼiin ken tsʼoʼokok le meyajaʼ? «Tak tu xuul yóokʼol kaab» yéetel tak «ken taalak u xuul» (Mat. 24:14; 28:20). Jeʼex Jesuseʼ, toʼon xaneʼ k-kʼáat tsʼoʼokbes le meyaj u kʼubéentmaj toʼon ka k-beetoʼ (Juan 4:34; 17:4). Bey túunoʼ, koʼoneʼex k-jach tsʼáaik k-óol teʼ kʼaʼaytaj yéetel kiʼimak óolal tak ken taak le xuʼulsajiloʼ (Mat. 24:13). ¡Le joochoʼ maʼ tsʼoʼokokiʼ!
[Epígrafe de la página 2]
Desde tu káajbal tak tu tsʼoʼokbaleʼ, jach yaʼab meyaj ku beetaʼal utiaʼal le joochoʼ