XOOK 05
Dioseʼ ku tʼankoʼon yéetel le Bibliaoʼ
Le Bibliaoʼ junpʼéel jatsʼuts regalo tsʼoʼok u tsʼáaiktoʼon Jéeoba, ichileʼ yaan 66 mejen libroʼobiʼ. Maʼ xaaneʼ techeʼ taak a wojéeltik tuʼux u taal le Bibliaoʼ yéetel máax beet u tsʼíibtaʼal. Utiaʼal k-ojéeltik u núukileʼ koʼox ilik bix úuchik u kʼuchultoʼon tak teʼ kʼiinoʼobaʼ.
1. Wa wíinik tsʼíibt le Bibliaoʼ, ¿baʼaxten túun ku yaʼalaʼaltiʼ u Tʼaan Dios?
Kex 40 máakoʼob tsʼíibt le Bibliaoʼ. Letiʼobeʼ jejeláas bix kuxlikoʼob kaʼachi yéetel jejeláas meyaj ku beetkoʼob. Káaj u tsʼíibtaʼal teʼ año 1513 t.t.J., yéetel tsʼoʼok u tsʼíibtaʼal teʼ año 98 tsʼ.t.J. Leloʼ u kʼáat u yaʼaleʼ tu bisaj 1,600 años u tsʼíibtaʼal. ¿Baʼaxten túun maʼ tu xaʼakʼpajal baʼax ku yaʼalik? Tumen Dios beet u tsʼíibtaʼal (xok 1 Tesalonicenses 2:13). Le máakoʼobaʼ maʼ chéen u tuukuloʼob tu tsʼíibtoʼobiʼ, baʼaxeʼ «tʼaanajoʼob tu kʼaabaʼ Dios le ka nuʼuktaʼaboʼob tumen le espíritu santooʼ» (2 Pedro 1:21).a Jeʼex k-ilkoʼ u espíritu santo Dios nuʼuktoʼob utiaʼal u yojéeltikoʼob baʼax ken u tsʼíibtoʼob (2 Timoteo 3:16).
2. ¿Tiʼ máaxoʼob jeʼel u páajtal u yantaltiʼob le Bibliaoʼ?
Máakoʼob «tiʼ tuláakal luʼumoʼob, tribuʼob, idiomaʼob yéetel kaajoʼob» jeʼel u páajtal u kankoʼob le jatsʼuts baʼaloʼob ku yaʼalik le Bibliaoʼ (xok Apocalipsis 14:6). Dioseʼ tsʼoʼok u beetik u traducirtaʼal ich yaʼab idiomaʼob, tsʼoʼoleʼ letiʼe libro tsʼoʼok u maas traducirtaʼaloʼ. Óoliʼ tiʼ tuláakal máak jeʼel u páajtal u yantaleʼ, kex jeʼel baʼaxak idiomail ka u tʼaneʼ yéetel kex jeʼel tuʼuxak kajaʼaneʼ.
3. ¿Bix kanáantaʼabik le Biblia tumen Jéeobaoʼ?
Le Bibliaoʼ tsʼíibtaʼab tiʼ baʼaloʼob séeb u kʼastal jeʼex u kʼéewelil baʼalcheʼ bey xan tiʼ papiro, junpʼéel clase xíiw. Chéen baʼaleʼ yaʼab máakoʼob jach u yaabiltmoʼob u Tʼaan Dioseʼ tu beetoʼob u copiasil le Bibliaoʼ yéetel jach tu kanáantoʼob bix úuchik u beetkoʼob. Yaʼab máakoʼobeʼ hasta tu tsʼáajoʼob u kuxtaloʼob tu chiʼ kíimil utiaʼal maʼ u xuʼulsaʼal le Biblia tumen le máaxoʼob pʼekmiloʼ. Jeʼex k-ilkoʼ mix baʼal jeʼel u beetik maʼ u tʼankoʼon Jéeoba yéetel le Bibliaoʼ. Le Bibliaoʼ ku yaʼalik: «U tʼaan k-Dioseʼ ku pʼáatal utiaʼal mantatsʼ» (Isaías 40:8).
UTIAʼAL A MAAS NAʼATIK
Koʼox kanik u maasil tiʼ bix tu nuʼuktil Jéeoba le máaxoʼob tsʼíibt le Bibliaoʼ. Yaan xan k-kanik bix úuchik u kanáantik utiaʼal u kʼuchul tak tiʼ toʼon teʼ kʼiinoʼobaʼ.
4. Le Bibliaoʼ ku yaʼalik máax beet u tsʼíibtaʼal
Chaʼanteʼex le VIDEOOʼ. Tsʼoʼoleʼ xokeʼex 2 Timoteo 3:16, kéen tsʼoʼokkeʼ ka tsikbaltikeʼex lelaʼ:
Wa chéen wíinikoʼob tsʼíibt le Bibliaoʼ, ¿baʼaxten túun ku yaʼalaʼaleʼ u Tʼaan Dios?
¿Jach wa tu jaajil Dios tsʼáa tu tuukul le máakoʼob le baʼax ku yaʼalik le Bibliaoʼ?
Juntúul secretarioeʼ ku tsʼíibtik baʼax ku yaʼalaʼaltiʼ tumen u jefe, le máaxoʼob tsʼíibt le Bibliaoʼ chéen xan tu tsʼíibtoʼob baʼax tsʼaʼab tu tuukuloʼob tumen Dios
5. Maʼ páajchaj u xuʼulsaʼal le Bibliaoʼ
Le Bibliaoʼ tiʼ Dios u taal, le beetik letiʼ kanáantik maʼ u xuʼulsaʼal. Desde úuchjeakileʼ yaʼab máakoʼob yaantiʼob autoridadeʼ u kʼáat u xuʼulsoʼob le Bibliaoʼ. Chéen baʼaleʼ yaʼab máakoʼobeʼ kex u yojloʼob jeʼel tak u kíimsaʼaloʼobeʼ tu kanáantoʼob. Utiaʼal a kʼaj óoltikeʼex juntúul tiʼ le máakoʼobaʼ chaʼanteʼex le VIDEOOʼ, kéen tsʼoʼokkeʼ ka tsikbaltikeʼex lelaʼ:
Le kéen a wil tuláakal le baʼaloʼob beetaʼab utiaʼal u kanáantaʼal le Bibliaoʼ, ¿baʼaxten ku taaktal a maas xokik?
Xokeʼex Salmo 119:97, kéen tsʼoʼokkeʼ ka tsikbaltikeʼex lelaʼ:
¿Baʼaxten yaʼab máak tsʼoʼok u tsʼáaik u kuxtal tu chiʼ kíimil utiaʼal u traducirtaʼal yéetel utiaʼal u yantal tiʼ tuláakal máak le Bibliaoʼ?
6. Tiʼ tuláakal máak jeʼel u páajtal u yantaleʼ
Le Bibliaoʼ letiʼe libro tsʼoʼok u maas traducirtaʼal ichil yaʼab idiomaʼoboʼ yéetel óoliʼ tiʼ tuláakal máak yaan. Xokeʼex Hechos 10:34, 35, kéen tsʼoʼokkeʼ ka tsikbaltikeʼex lelaʼ:
¿Baʼaxten Dioseʼ u kʼáat ka traducirtaʼak le Biblia ich yaʼab idiomaʼob yéetel ka yanak tiʼ tuláakal máak?
¿Baʼax maas uts ta wich tiʼ le Bibliaoʼ?
Tiʼ tuláakal yóokʼol kaabeʼ óoliʼ
tuláakal máak
ku páajtal u xokik le Biblia
ichil le idioma ku tʼankoʼ
Tsʼoʼok u traducirtaʼal ich maas tiʼ
3,000
idiomaʼob
tu chúukaʼanil wa chéen junjaats
kex 5,000 millones
bibliaʼob tsʼoʼok u imprimirtaʼal,
letiʼe libro tsʼoʼok u maas imprimirtaʼaloʼ
BAʼAX SUUK U YAʼALAʼAL: «Le Bibliaoʼ chéen wíinikoʼob tsʼíibte».
Techeʼ, ¿baʼax ka tuklik tiʼ le baʼax ku yaʼalaʼaloʼ?
¿Baʼaxoʼob eʼesik tiʼ Dios u taal le Bibliaoʼ?
BAʼAX TSOʼOLI
Le Bibliaoʼ tiʼ Dios u taal, le oʼolal tsʼoʼok u yilik ka yanak tiʼ tuláakal máak.
Baʼax ta kanaj
¿Baʼaxten k-aʼalikeʼ maʼ u tuukul wíinik yaan teʼ Bibliaoʼ?
¿Baʼaxten ta tʼaan maʼ páajchajak u xuʼulsaʼal le Bibliaoʼ? ¿Baʼax ka tuklik yoʼolal le bukaʼaj bibliaʼob tsʼoʼok u traducirtaʼal yéetel tsʼoʼok u tʼoʼoxloʼoboʼ?
¿Bix a wuʼuyikaba yoʼolal tuláakal le baʼaxoʼob tsʼoʼok u beetik Dios utiaʼal u páajtal u yantaltech le Bibliaoʼ?
KAN U MAASIL
Ilawil baʼax áantajnaj utiaʼal maʼ u saʼatal le Bibliaoʼ yéetel utiaʼal ka yanaktoʼon tak teʼ kʼiinoʼobaʼ.
«Baʼaxten tak bejlaʼa yaan le Bibliaoʼ» (¡Aajkech!, noviembre tiʼ 2007)
Ilawil baʼaxten maʼ saʼatak le Biblia kex yaʼab baʼaloʼob yaan tu contraoʼ.
«Baʼaxten maʼ saʼat le Bibliaoʼ» (U Pʼíich Tulumil Kanan núm. 4 2016)
Ilawil baʼax anchaj u beetik jujuntúul máakoʼob utiaʼal u traducirkoʼob le Bibliaoʼ.
Kex yaʼab u copiasil le Biblia yanoʼ, ¿bix k-ojéeltik maʼ kʼexpajaʼan baʼax ku yaʼalikiʼ?
«Tsʼoʼok wa u kʼeʼexel le baʼax ku yaʼalik le Bibliaoʼ?» (Xok teʼ jw.org)