Jéeobaeʼ ku «tsʼáaik u muukʼ máax kaʼanaʼan»
1 Tuláakloʼoneʼ yaan kʼiineʼ k-kaʼanal yoʼolal le meyajoʼob k-beetkoʼ, bey xan yoʼolal le chiʼichnakiloʼob k-aktáantik teʼ «talam kʼiinoʼob» kuxlikoʼonaʼ (2 Tim. 3:1). Baʼaleʼ, ¿baʼax jeʼel u yáantkoʼon utiaʼal maʼ u xuʼulul k-tsʼáaik óol teʼ meeyjil kʼaʼaytajoʼ? Unaj k-kʼubik óol tiʼ Jéeoba, le máax «sen nojoch u páajtalil, bey xan u muukʼ[oʼ]» (Isa. 40:26). Letiʼeʼ jach u yojel baʼax kʼaʼabéettoʼon yéetel jach u kʼáat u yáantoʼon (1 Ped. 5:7).
2 Le baʼaxoʼob ku tsʼáaik Jéeobaoʼ. Jéeobaeʼ ku yáantkoʼon yéetel u kiliʼich muukʼ, le baʼax meyajnaj tiʼ utiaʼal u beetik tuláakal baʼaloʼ. U kiliʼich muukʼ Dioseʼ ku yáantkoʼon utiaʼal ka yanak k-muukʼ tu kaʼatéen ken k-uʼuy kaʼanaʼanoʼon (Isa. 40:31). Le oʼolal maʼalob ka k-tukle: «¿Cada wa kin kʼáatik tiʼ Jéeoba ka u tsʼáaten u kiliʼich muukʼ utiaʼal in beetik le meyajoʼob ku tsʼaʼabalten teʼ múuchʼuliloʼ?» (Luc. 11:11-13).
3 Wa sáamsamal k-xokik le Biblia, le libroʼob, le revistaʼob yéetel le uláakʼ jóoʼsaʼaniloʼob bey xan wa k-tuukul tiʼ le baʼaxoʼob k-xokikoʼ, yaan k-pʼáatal «bey junkúul cheʼ pakʼaʼan tu jáal tuʼux ku yáalkab jaʼ ku tsʼáaik u yich tu kʼiinil, [yéetel] maʼatech xan [u] kʼankʼantal u leʼob[eʼ]» (Sal. 1:2, 3).
4 Tiʼ Jéeobaeʼ ku meyaj xan u maasil sukuʼunoʼob utiaʼal u líiʼsik k-óol (Col. 4:10, 11). Teʼ muchʼtáambaloʼoboʼ jach ku líikʼil k-óol ken tsikbalnakoʼon yéetel le sukuʼunoʼoboʼ, ken k-uʼuy u núukikoʼob le kʼáatchiʼob ku beetaʼaloʼ bey xan ken k-uʼuy le tsoltʼaanoʼob ku máanskoʼoboʼ (Hch. 15:32). Le máaxoʼob maas yaʼab u tsʼáaikoʼobtoʼon áantaj yéetel ku líiʼskoʼob k-óoleʼ letiʼe ancianoʼoboʼ (Isa. 32:1, 2).
5 Le meeyjil kʼaʼaytajoʼ. Wa ka wuʼuyik tsʼoʼok a sen kaʼanal yoʼolal le talamiloʼoboʼ, maʼ unaj a xulik a kʼaʼaytajiʼ. Le meeyjil kʼaʼaytajoʼ ku kaʼa tsʼáaik k-muukʼ yéetel ku líiʼsik k-óol, maʼ jeʼex uláakʼ meyajoʼobeʼ (Mat. 11:28-30). K-kʼaʼaytik le maʼalob péektsiloʼ ku yáantkoʼon k-tsʼáa táanil u Reino Dios yéetel ku yáantkoʼon utiaʼal maʼ u tuʼubultoʼon táan k-páaʼtik upʼéel kuxtal minaʼan u xuul yéetel yaan k-kʼamik yaʼab utsiloʼob.
6 Táanil tiʼ u xuʼulsaʼal le kʼasaʼan yóokʼol kaabaʼ jach yaʼab meyaj yaan beetbil. Le oʼolaleʼ, utiaʼal maʼ u xuʼulul k-tsʼáaik óol teʼ meeyjil kʼaʼaytajoʼ, jach maʼalob ka meyajnaktoʼon «le muukʼ ku tsʼaʼabal[toʼon] tumen Jajal Diosoʼ» (1 Ped. 4:11). Yéetel u yáantaj Jéeobaeʼ yaan u páajtal k-tsʼoʼoksik le meyaj u tsʼaamajtoʼonoʼ, tumen letiʼeʼ ku «tsʼáaik u muukʼ máax kaʼanaʼan» (Isa. 40:29).