TIʼ U YÁAX TÁAN JUʼUNIL | ¿JACH WA YAAN LE ANGELOʼOBOʼ?

U jaajil yoʼolal le angeloʼoboʼ

¿Máax le angeloʼoboʼ? ¿Bix úuchik u yantaloʼob? ¿Baʼax ku beetkoʼob? Le Bibliaoʼ ku yaʼalik u jaajil tu yoʼolal le angeloʼoboʼ (2 Timoteo 3:16). ¿Baʼax ku yaʼalik tu yoʼolaloʼob?

Dioseʼ maʼ tu páajtal k-ilik tumen juntúul espíritu, le angeloʼob xanoʼ maʼ tu páajtal k-ilkoʼob tumen ‹minaʼan u bakʼeloʼob mix u baakeloʼob›. Le angeloʼob chúukaʼan u yóoloʼoboʼ kajakbaloʼob kaʼan yéetel naatsʼ yaniloʼob tiʼ Dios (Lucas 24:39; Mateo 18:10; Juan 4:24).
Úuchjeakileʼ le angeloʼoboʼ tu sutubaʼob bey wíinik utiaʼal u beetkoʼob jujunpʼéel meyaj tsʼaʼabtiʼob tumen Dioseʼ. Chéen pʼel tsʼoʼokikoʼobeʼ kaʼa suunajoʼob kaʼan (Jueces 6:11-23; 13:15-20).
Cada ken u yaʼal le Biblia tu sutuba juntúul ángel bey wíinikeʼ, ku yeʼesikeʼ u wíinklileʼ de xiib. Chéen baʼaleʼ u jaajileʼ le angeloʼoboʼ maʼ xiiboʼobiʼ, mix koʼoleloʼobiʼ tumen maʼ beyoʼob jeʼex toʼoneʼ, maʼatech u tsʼoʼokol u beeloʼob mix tu yantal u paalaloʼob. Maʼ xan letiʼe paalal, chaambaloʼob wa máakoʼob ku creertaʼal ku binoʼob kaʼan ken kíimkoʼoboʼ. Baʼaxeʼ Jéeoba beetoʼob, le oʼolal ku yaʼalaʼaleʼ u paalal Dios (Job 1:6; Salmo 148:2, 5).
Le Bibliaoʼ ku chʼaʼchiʼitik xan «le tʼaan ku beetik le angeloʼoboʼ», lelaʼ ku yeʼesikeʼ ku tʼankoʼob junpʼéel idioma. Tiʼ Dioseʼ meyajnaj le angeloʼob utiaʼal u tʼaan yéetel le máakoʼoboʼ, chéen baʼaleʼ maʼ u kʼáat ka k-adorartoʼobiʼ mix ka orarnakoʼon tiʼ letiʼobiʼ (1 Corintoiloʼob 13:1; Apocalipsis 22:8, 9).
Yaan yaʼab u téenel diez mil por diez mil wa u millonesil angeloʼob (Daniel 7:10; Apocalipsis 5:11).
Le angeloʼoboʼ maas yaan u muukʼoʼob yéetel u naʼatoʼob tiʼ wíinik. Letiʼobeʼ táaj séeb u péekoʼob (Salmo 103:20; Daniel 9:20-23).
Kex jach yaan u naʼatoʼob yéetel u muukʼoʼobeʼ yaan baʼaxoʼob maʼ tu páajtal u beetkoʼob yéetel yaan baʼaxoʼob maʼ u yojloʼobiʼ (Mateo 24:36; 1 Pedro 1:12).
Cada angeleʼ jelaʼan tiʼ u maasil, ku yeʼeskoʼob u jatsʼuts modos Dios yéetel jeʼex wíinikeʼ ku páajtal xan u yéeyikoʼob u beetkoʼob baʼax maʼalob wa baʼax kʼaas. U kʼaasileʼ yanoʼobeʼ tu tsʼáajubaʼob tu contra Dios (Judas 6).

Jejeláas meyaj tsʼaʼantiʼob

Arcángel. Miguel, le arcangeloʼ, letiʼe ángel maas yaan páajtalil yéetel autoridad tiʼoʼ. Le Bibliaoʼ ku yaʼalikeʼ Migueleʼ uláakʼ kʼaabaʼ tsʼaʼan tiʼ Jesucristo (1 Tesalonicailoʼob 4:16; Judas 9).

Serafinoʼob. Yoʼolal le meyaj ku beetkoʼoboʼ le angeloʼobaʼ maas yaan páajtalil tiʼob, tsʼoʼoleʼ tiaʼanoʼob tu baʼpach u trono Dioseʼ (Isaías 6:1-3).

Querubinoʼob. Le angeloʼobaʼ jach especial le meyaj ku beetkoʼoboʼ tumen jeʼel baʼaxak u kʼáat Dios ka beetaʼakeʼ letiʼob ku túuxtaʼaloʼob. Le Bibliaoʼ ku yaʼalikeʼ jejeláas bix u yáantkoʼob Dios (Génesis 3:24; Ezequiel 9:3; 11:22).

U millonesil uláakʼ angeloʼob. Letiʼob bisik u tʼaan Dios yéetel ku yilkoʼob ka beetaʼak baʼax u kʼáat (Hebreoʼob 1:7, 14).a

a Utiaʼal a wojéeltik u maasil yoʼolal le angeloʼoboʼ, ilawil u 10 xookil le libro ¿Baʼax jach tu jaajil ku kaʼansik le Bibliaoʼ? bey xan le tipʼaʼanil «¿Máax le arcángel Migueloʼ?», beetaʼan tumen u j-jaajkunajoʼob Jéeoba. Tiaʼan xan teʼ www.pr418.com/yua.