¿Jeʼel wa u kaʼa jóokʼol u kʼuʼukʼ junkúul cheʼ ku chʼaʼakaleʼ?

LE CEDROʼOB yanoʼob teʼ Líbanooʼ jatsʼutstakoʼob yéetel jach ku kaʼantaloʼob. Chéen baʼaleʼ le olivoʼoboʼ maʼ jach jatsʼutstakoʼobiʼ, mix jach kaʼantakoʼobiʼ, pero maas maʼ séebaʼan u kíimiliʼ yéetel yaneʼ ku kuxtal tak mil años. U moots le olivooʼ jach ku taamtal, yéetel maʼ tu séeb kíimil, le oʼolal kex ka kúulchʼaktaʼak tu chuuneʼ jeʼel u kaʼa jóokʼol u kʼuʼukʼeʼ.

Job, juntúul máax meyajt Dios úuchjeakileʼ, u yojel kaʼach kex ka kíimkeʼ jeʼel u kaʼa kuxkíintaʼal tumen Dioseʼ (Job 14:13-15). Letiʼeʼ tʼaanaj tiʼ junkúul cheʼ, maʼ xaaneʼ tiʼ junkúul olivo, utiaʼal u yeʼesik jach ku creertik jeʼel u kaʼa kuxkíintaʼal tumen Dios kex ka kíimkeʼ. Jobeʼ tu yaʼalaj: ‹Le ken chʼaʼakak junkúul cheʼiʼ, ku kaʼa tsʼáaik u kʼuʼukʼ, maʼatech u pʼáatal x-maʼ kʼuʼukʼil›. Le ken kʼáaxak junpʼéel cháak ken tsʼoʼokok yáaxkʼiineʼ, u matail le olivooʼ kex tikineʼ ku kaʼa jóokʼol u kʼuʼukʼ yéetel ku «kaʼa búukpajal bey táankelem cheʼeʼ» (Job 14:7-9).

Jeʼex juntúul campesino u kʼáat u yil bix u kaʼa nojochtal junkúul cheʼ ku chʼaʼakaleʼ, Jéeoba xaneʼ u kʼáat u kaʼa kuxkíint le máaxoʼob meyajtikoʼ, bey xan u maasil máakoʼob tsʼoʼok u kíimloʼoboʼ (Mat. 22:31, 32; Juan 5:28, 29; Bax. 24:15). ¿Máasaʼ jach yaan u kiʼimaktal k-óol ken k-il u kaʼa kuxkíintaʼal le kimenoʼoboʼ?