使徒行传

21 我哋依依不舍噉同佢哋道别之后，就顺风航行，直接去到科斯，第二日抵达罗得斯，再由嗰度去咗帕大拉。 2 我哋揾到一艘开去腓尼基嘅船，就上船出发， 3 望到塞浦路斯岛之后，就喺岛嘅南边驶过，向住叙利亚航行，喺泰尔上岸，因为艘船要喺嗰度卸货。 4 我哋去揾当地嘅门徒，揾到之后，就喺嗰度住咗七日。佢哋知道神圣力量透露嘅事，就一再劝保罗唔好去耶路撒冷。 5 探访完佢哋之后，我哋就出发继续上路，佢哋所有人连同妇女、小朋友一齐送我哋去城外，大家喺海滩跪低祷告， 6 然后互相道别。之后我哋上咗船，佢哋亦都返屋企。

7 我哋由泰尔启航，到咗托勒密，去问候嗰度啲弟兄，同佢哋一齐住咗一日。 8 第二日，我哋出发，到咗凯撒里亚，去咗传福音者腓力屋企，喺嗰度留宿。腓力系嗰七个人之一， 9 有四个女，都系未婚嘅*，佢哋都喺上帝启示下讲预言*。 10 我哋住咗一段时间之后，有个叫亚迦布嘅先知喺犹地亚落嚟。 11 佢嚟见我哋嗰阵，拎起保罗嘅腰带绑住自己嘅手脚，佢话：“上帝通过神圣力量噉样讲：‘呢条腰带系边个嘅，边个就会噉样喺耶路撒冷俾犹太人绑住，交喺外族人嘅手。’” 12 我哋听到佢噉讲，就同其他在场嘅人一齐恳求保罗唔好上耶路撒冷。 13 保罗话：“你哋点解要喊，动摇我嘅决心*呢？为咗主耶稣嘅名，我唔单止准备好会俾人囚禁，就算死喺耶路撒冷都心甘情愿。” 14 我哋说服唔到保罗，就冇再坚持嘞*，只系话：“愿耶和华*嘅旨意实现。”

15 后嚟我哋收拾好行李，出发去耶路撒冷。 16 凯撒里亚有啲门徒都同我哋一齐去，带我哋去塞浦路斯人拿孙屋企留宿*。拿孙喺好耐之前已经系门徒。 17 我哋去到耶路撒冷，啲弟兄好开心噉欢迎我哋。 18 第二日，保罗同我哋一齐去见雅各，当时所有长老都喺嗰度。 19 保罗问候完佢哋，就详细讲述上帝通过佢嘅传道工作，喺列国嘅人当中所做嘅事。

20 佢哋听完之后，赞美*上帝，但系就同保罗讲：“弟兄，你睇，有成千上万嘅犹太人成为信徒，佢哋都热心维护摩西法典。 21 不过佢哋听到谣言，话你教导所有住喺列国当中嘅犹太人背弃摩西法典，叫佢哋唔好为自己嘅仔施行割礼，唔使遵守惯例。 22 而家应该点做好呢？佢哋迟早都会知道你嚟咗。 23 噉啦，你按照我哋讲嘅去做。我哋呢度有四个曾经许下誓愿嘅人。 24 你带佢哋去，同佢哋一齐举行仪式令自己洁净*，帮佢哋交钱，等佢哋可以剃头*。噉大家就会知道，之前关于你嘅谣言都系冇根据嘅，知道你一直循规蹈矩，遵守法典。 25 至于外族信徒，我哋已经写信将我哋嘅决定话咗俾佢哋知，就系佢哋要禁戒献俾偶像嘅祭牲，禁戒血，禁戒勒死*嘅动物，禁戒淫乱*。”

26 第二日，保罗带嗰几个人去，一齐举行洁净嘅仪式，然后入圣殿话俾人知洁净嘅仪式喺边日结束，等祭司到时为佢哋每个人献祭。

27 嗰七日就快结束嗰阵，由亚细亚行省嚟嘅犹太人见到保罗喺圣殿入面，就煽动民众，引起骚乱。佢哋捉住保罗， 28 大嗌：“各位以色列人，快啲嚟帮手！就系呢个人四围教唆人藐视我哋嘅族人、我哋嘅法典同埋呢个地方，佢仲带希腊人入圣殿，玷污呢个神圣嘅地方。” 29 佢哋噉讲，系因为之前见到以弗所人特罗非摩喺城入面同保罗一齐，就以为保罗带咗佢入圣殿。 30 全城陷入骚乱，民众一齐跑去圣殿，捉住保罗，拖佢出去，圣殿嘅门就即刻闩埋。 31 佢哋准备杀死保罗嘅时候，有人向部队嘅将军报告，话耶路撒冷陷入一片混乱。 32 将军即刻带住士兵同军官跑落去。大家一见到将军带住士兵嚟到，就冇再打保罗嘞。

33 将军上前逮捕保罗，下令用两条锁链锁住佢，然后问佢系边个，做咗乜嘢事。 34 当时有啲群众嗌呢样，有啲嗌嗰样。将军见场面咁混乱，查唔到真相，就吩咐人带保罗去军营。 35 保罗啱啱行上楼梯，啲人就涌埋嚟想伤害佢，士兵唯有将保罗掅起带走。 36 有一班人一直跟喺后面大嗌：“杀死佢！”

37 保罗就快俾人带入军营嘅时候，同将军讲：“我可唔可以同你讲啲嘢呀？”将军话：“你识讲希腊语？ 38 早排有个埃及人煽动叛乱、带领4000个匕首党徒去旷野，嗰个人系咪你呀？” 39 保罗话：“我系犹太人，喺西利西亚著名嘅大数城出世，系嗰度嘅公民。求你俾我向民众讲几句。” 40 将军应承咗，保罗企喺楼梯上面，向民众做咗个手势，大家就安静落嚟。于是保罗用希伯来语同佢哋讲：