使徒行传

27 佢哋决定俾我哋坐船去意大利，就将保罗同其他囚犯交俾奥古斯都部队一个叫犹流嘅军官。 2 我哋上咗一艘由亚大米田开去亚细亚行省沿岸一带嘅船，然后就启航嘞。帖撒罗尼迦嘅马其顿人亚里达古亦都同我哋一齐去。 3 第二日，我哋喺西顿上岸。犹流好有人情味，批准保罗去朋友嗰度，等佢哋可以照顾佢。

4 我哋由嗰度开船，因为逆风，就沿住塞浦路斯嘅背风面航行， 5 驶过西利西亚同潘菲利亚一带嘅大海，到咗吕基亚嘅米拉港。 6 军官喺嗰度揾到一艘由亚历山大开去意大利嘅船，就叫我哋上船。 7 连续好多日，船开得好慢，几经辛苦先至嚟到尼多斯。因为逆风，我哋冇办法前行，唯有经撒摩尼，沿住克里特嘅背风面航行。 8 我哋沿住海岸航行，终于嚟到拉西亚城附近一个叫佳港嘅地方。

9 过咗好耐，赎罪日禁食嘅嗰一日都过咗嘞。喺呢个时候航行好危险，所以保罗建议， 10 话：“各位，我认为而家继续航行，唔单止货物同架船会毁坏，损失惨重，就连我哋自己都性命难保。” 11 不过军官宁愿听船长同埋船主讲，都唔肯听保罗讲。 12 加上呢个港口唔适合过冬，大部分人都建议开船出发，尽快赶去菲尼斯过冬。菲尼斯系克里特嘅一个港口，一面向东北，一面向东南。

13 当时有轻轻嘅南风吹过嚟，所以佢哋以为可以照原定计划抵达目的地，就起锚，沿住克里特嘅海岸航行。 14 点知，过咗冇几耐，有股强劲嘅东北风*吹过嚟。 15 我哋架船俾强风吹袭，冇办法逆风前行，唯有任由佢随风漂流。 16 跟住，我哋沿住一个小岛嘅背风面急行，呢个岛叫卡乌达，我哋几经辛苦先至保得住船尾嘅艇仔*。 17 大家将只艇仔拉上嚟之后，就用绳索将船底绑紧，又因为担心喺赛耳底*搁浅，就收起船帆，任由架船漂流。 18 但系风暴令到架船抛得好犀利，所以第二日，船上嘅人为咗减轻重量，就揼咗啲货物。 19 去到第三日，佢哋连船上面嘅用具都揼埋。

20 连续好多日，我哋都睇唔到太阳同星星，仲不断俾狂风吹袭，最后大家都觉得冇生还嘅希望。 21 船上嘅人已经好耐冇食嘢，于是保罗喺佢哋当中企起身，话：“各位，如果你哋听我嘅劝告，冇喺克里特开船，就唔会损失惨重嘞。 22 不过，其实你哋唔使担心*，因为你哋只会损失呢艘船，冇人会丧失生命。 23 我崇拜敬奉*嘅上帝，今晚派咗一个天使嚟，企喺我身边， 24 话：‘保罗，唔使惊。你一定会企喺凯撒面前。上帝会搭救你同埋所有同船嘅人。’ 25 所以，各位唔使担心*，我相信上帝同我讲嘅事都一定会完全实现。 26 不过，我哋艘船将会喺某个岛搁浅。”

27 到咗第十四日嘅夜晚，我哋架船喺阿德里亚海抛嚟抛去。午夜时分，啲水手觉得已经靠近陆地嘞， 28 就度吓水深，大约有36米*，船向前航行咗一阵，又再度一度，大约有27米*。 29 佢哋惊艘船会撞到岩石，就由船尾抛四个锚落海，好期待快啲天光。 30 后嚟啲水手想弃船逃走，就诈谛喺船头放啲锚落去，其实系偷偷哋放只艇仔落去。 31 保罗对军官同埋士兵讲：“呢啲人如果唔留喺船度，你哋就冇可能获救嘞。” 32 于是士兵斩断绳索，只艇仔就跌咗落去。

33 就快天光嘅时候，保罗劝大家食啲嘢，佢话：“今日系第十四日嘞，你哋一直好心急想快啲脱险，乜嘢都冇食。 34 我劝你哋为自己着想，都系食啲嘢啦，因为你哋唔会有人失去一条头发。” 35 讲完之后，保罗就拎起饼，喺大家面前感谢上帝，搣开啲饼开始食。 36 大家就唔再担心，拎啲嘢嚟食嘞。 37 船上面一共有276人。 38 人人都食饱之后，就将船上面嘅小麦揼落海，减轻船嘅重量。

39 天光嘅时候，佢哋认唔出前面系乜嘢地方，净系见到一个有沙滩嘅海湾，就决定尽量将船靠近海滩。 40 于是佢哋将船锚全部斩断，等啲锚跌落海，同时将绑住舵桨*嘅绳索松开，拉起前帆，向住海滩顺风航行。 41 点知佢哋撞到海里面嘅沙洲，船就搁浅嘞，结果船头棘住咗，郁唔到，船尾都俾海浪冲到烂晒。 42 士兵就决定要杀死啲囚犯，唔想有人乘机跳海逃走。 43 但系军官为咗救保罗，就阻止佢哋噉做。佢吩咐嗰啲识游水嘅人跳落海，游上岸先， 44 其余嘅人之后可以借助木板或者船身嘅残骸上岸。就系噉，人人都安全上岸嘞。