路加福音

1 尊敬嘅提阿非罗先生：有好多人已经开始将我哋确信不疑嘅事实记录落嚟。 2 呢啲记录同一开始就亲眼见证呢啲事嘅人所讲嘅一致，亦都同宣讲上帝信息嘅人话俾我哋听嘅一致。 3 所以我亦都决定将所有事，有条理噉写落嚟俾你，因为我已经将呢一切由头到尾考证过。 4 噉样你就会清楚知道，以前口头教导你嘅事都系可信㗎。

5 犹地亚王希律*在位期间，有一个祭司属于亚比雅班次，叫做撒迦利亚。佢嘅太太系亚伦嘅后人，叫做伊利莎白。 6 佢哋两个喺上帝眼中都系正义嘅人，按照耶和华*嘅一切诫命律例处世为人*，无可指责。 7 不过，佢哋冇仔女，因为伊利莎白不育，而佢哋两个都上咗年纪嘞。

8 有一次，撒迦利亚当值，喺上帝面前担任祭司嘅工作。 9 按照祭司服务嘅惯例，呢次轮到佢入去耶和华*嘅圣殿献香。 10 献香嘅时候，民众都喺外面祷告。 11 耶和华*嘅天使出现喺佢面前，企喺香坛右边。 12 撒迦利亚见到，就惶恐不安。 13 天使同佢讲：“撒迦利亚，唔使惊，上帝已经听到你嘅恳切祈求嘞。你嘅太太伊利莎白会为你生一个仔，你要帮佢改名叫约翰。 14 你会欢欣快乐，好多人都会因为佢嘅出世而喜乐。 15 佢喺耶和华*眼中会系个伟大嘅人。佢任何酒*都唔可以饮。佢喺妈妈个肚里面就已经充满神圣力量。 16 佢会帮助好多以色列人悔改，再次服从佢哋嘅上帝耶和华*。 17 佢会有以利亚嘅精神同埋能力，行喺上帝*前面，令啲爸爸嘅心改变，好似小朋友嘅心一样*，令叛逆嘅人好似正义嘅人噉样处事明智，佢噉样做就可以为耶和华*召集一班做好准备嘅人。”

18 撒迦利亚同天使讲：“我点知道你讲嘅真系会发生呀？我老嘞，我老婆年纪都唔细嘞。” 19 天使回答话：“我系加百列，经常喺上帝面前服务。系上帝派我嚟揾你，将呢啲好消息讲俾你知。 20 但系，既然你唔相信我讲嘅嘢，喺呢一切发生之前，你都会讲唔到嘢。到咗指定嘅时候，我嘅说话就会实现。” 21 呢个时候，民众仲喺出面等紧撒迦利亚，见佢喺圣所入面咁耐都唔出嚟，就觉得好奇怪。 22 佢出嚟之后，想讲嘢但系讲唔到。大家就知道佢喺圣所入面睇到异象*。佢不断打手势，始终讲唔到嘢。 23 履行神圣职务*嘅日子结束之后，佢就返屋企嘞。

24 一段时间之后，佢嘅太太伊利莎白有咗身孕。伊利莎白有五个月冇出门。 佢话： 25 “耶和华*而家眷顾我，恩待我，佢令我喺其他人面前嘅耻辱都冇咗嘞。”

26 佢怀孕嘅第六个月，上帝派天使加百列去到加利利一座叫拿撒勒嘅城， 27 见一个处女。嗰个处女叫做马利亚，已经同大卫家族一个叫约瑟嘅人订咗婚。 28 天使去到佢嗰度，同佢讲：“你好！上帝特别赐福嘅人啊，耶和华*与你同在！” 29 马利亚听到天使讲嘅嘢就好惊，好不安，想知道天使点解噉讲。 30 天使同佢讲：“马利亚，唔使惊，你系得到上帝赐福嘅人。 31 你会怀孕，生一个仔。你要帮佢改名叫做耶稣。 32 佢会成为伟大嘅人物，称为至高者嘅仔。耶和华*上帝会将佢祖先大卫嘅宝座赐俾佢， 33 佢会成为君王，永远统治雅各嘅子孙，佢嘅王国无穷无尽。”

34 马利亚同天使讲：“点可能呢？我从来都冇同男人发生过关系。” 35 天使回答话：“至高者会赐神圣力量*俾你，佢嘅力量会保护你，所以，你将会生嘅仔，会称为圣者，上帝嘅仔。 36 你嘅亲戚伊利莎白虽然年纪好大，又一向俾人称为不育嘅女人，但系佢有咗，而家已经有六个月身己嘞，佢都会生一个仔。 37 上帝所讲嘅，一定会实现*。” 38 马利亚就话：“我系耶和华*嘅仆人！愿你讲嘅事喺我身上实现。”跟住天使就走咗嘞。

39 之后，马利亚出发，赶去犹大山区嘅一座城。 40 佢入咗撒迦利亚嘅屋企，向伊利莎白问好。 41 伊利莎白一听到马利亚嘅问候，腹中嘅胎就跳动，伊利莎白亦都充满神圣力量， 42 佢大声话：“你喺妇女当中真系有福，你肚里面嘅胎都系有福㗎！ 43 我主嘅妈妈嚟探我，呢个真系我嘅荣幸呀！ 44 我一听到你同我打招呼，我肚里面嘅胎就开心到跳起。 45 你有福*亦都系由于你有信心，因为耶和华*话俾你知嘅事，一定会完全实现。”

46 马利亚话：“我衷心赞美耶和华*嘅伟大， 47 我嘅心因为上帝我嘅救主而非常喜乐， 48 因为佢眷顾我呢个卑微嘅仆人。从今以后，世世代代嘅人都会话我系有福㗎， 49 噉系因为大能嘅上帝为我做咗伟大嘅事。佢嘅名系神圣㗎。 50 佢怜悯敬畏佢嘅人，直到永远。 51 佢伸出手臂施展大能，驱散心高气傲嘅人。 52 佢令身居高位嘅人失去权位，但系令卑微嘅人受到显扬； 53 佢令饥饿嘅人得到饱足，但系就令富有嘅人空手而回。 54 佢冇忘记会怜悯人呢个承诺，帮助自己嘅仆人以色列， 55 就好似佢同我哋嘅祖先讲过嘅一样，要永远怜悯亚伯拉罕同埋佢嘅后代*。” 56 马利亚同伊利莎白一齐住咗大概三个月先至返屋企。

57 伊利莎白嘅产期到咗嘞。佢生咗个仔。 58 佢啲邻居同亲戚听讲耶和华*大大怜悯佢，就同佢一齐欢乐。 59 第八日，即系帮个小朋友施行割礼*嘅嗰日，啲邻居同亲戚嚟到，想跟佢爸爸嘅名，叫佢做撒迦利亚， 60 佢妈妈就话：“唔系，佢要叫做约翰呀。” 61 佢哋同伊利莎白讲：“你啲亲戚都冇人叫呢个名。” 62 佢哋就向小朋友嘅爸爸做手势，睇吓佢想叫个仔做咩名。 63 撒迦利亚问人攞咗块写字板，佢噉写：“佢个名要叫做约翰。”大家都觉得好惊讶。 64 突然间，撒迦利亚开到口讲嘢，舌头松开咗，恢复返讲说话嘅能力，佢就赞美上帝。 65 所有邻居都非常之惊讶。成个犹地亚山区嘅人都喺度讲紧呢啲事。 66 所有听到呢啲事嘅人都喺度谂：“呢个小朋友大个咗会成为点样嘅人呢？”因为耶和华*真系同佢同在*。

67 佢嘅爸爸撒迦利亚充满神圣力量，开口讲预言话： 68 “愿以色列嘅上帝耶和华*受到赞美，因为佢眷顾佢嘅子民，拯救佢哋。 69 佢为咗我哋，使一位大能嘅救主*喺佢仆人大卫嘅家族出现， 70 就好似佢通过古代忠心先知嘅口承诺嘅一样。 71 佢话过会救我哋脱离敌人，摆脱所有憎恨我哋嘅人嘅毒手。 72 佢会因为我哋嘅祖先而怜悯我哋，亦都会记得佢嘅圣约， 73 即系佢向我哋祖先亚伯拉罕发过嘅誓。 74 佢将我哋从敌人手里面救出嚟之后，等我哋可以勇敢无惧噉敬奉佢， 75 一生喺佢面前尽忠行义。 76 至于你，我嘅仔啊，你会被称为至高者嘅先知。耶和华*会派你行喺佢前面，为佢准备道路， 77 等佢嘅子民知道，佢会宽恕佢哋嘅罪，使佢哋得到拯救， 78 因为我哋嘅上帝充满温情。由于佢嘅温情，曙光会从高天照耀我哋， 79 照耀坐喺黑暗同埋死亡阴影之下嘅人，引领我哋行走平安之路。”

80 呢个小朋友不断成长，信心亦都越嚟越坚强。佢一直住喺旷野，直到佢向以色列人公开传道。

2 喺嗰段时期，凯撒奥古斯都颁布法令，要喺全个帝国*进行户籍登记。 2 呢次系第一次登记，系喺居里纽做叙利亚总督嗰阵进行㗎。 3 人人都返番去自己出世嘅城登记。 4 于是约瑟就喺加利利嘅拿撒勒城出嚟，上犹地亚，去大卫嘅故乡伯利恒城，因为佢系大卫家族嘅人。 5 佢带住马利亚一齐去登记户籍。当时马利亚已经按照婚约嫁咗俾约瑟，而且就快生得嘞。 6 佢哋去到嗰度之后，马利亚嘅产期到嘞。 7 佢生咗一个仔，就系佢嘅长子。由于住宿嘅地方满晒，冇地方俾佢哋住。马利亚就用布包住个仔，放喺饲槽入面。

8 嗰一带有啲牧人喺野外露宿，成晚喺嗰度守护羊群。 9 突然之间，耶和华*嘅天使企喺佢哋面前，嚟自耶和华*嘅亮光四面照住佢哋，佢哋就非常之惊。 10 天使同佢哋讲：“你哋唔使惊，我有好消息话俾你哋知。呢个好消息会令所有人非常之喜乐。 11 你哋嘅救主今日喺大卫嘅故乡诞生嘞，佢就系主基督。 12 你哋会揾到一个婴儿，用布包住，瞓喺饲槽入面，凭住呢个特征你哋就可以认到佢嘞。” 13 突然之间，有一大队天军，同嗰个天使一齐赞美上帝，佢哋话： 14 “喺天上，荣耀归于上帝；喺地上，平安*降临喺佢认可嘅人身上。”

15 嗰啲天使离开佢哋返番去天上，牧人互相话：“耶和华*话咗俾我哋知伯利恒发生咗咩事，我哋一定要去嗰度睇吓。” 16 佢哋即刻赶路，果然揾到马利亚、约瑟同埋瞓喺饲槽入面嘅婴儿。 17 佢哋见到之后，就将天使宣讲，关于呢个小朋友嘅信息话俾所有人知。 18 听到牧人讲嘅嘢，大家都好惊讶。 19 而马利亚就记住呢一切，喺心入面反复沉思。 20 牧人返番去，由于佢哋听到、睇到嘅同天使讲嘅完全一样，就尊崇*同赞美上帝。

21 喺第八日，亦即系个小朋友接受割礼嘅嗰日，呢个小朋友改咗个名，叫做耶稣。呢个名就系马利亚怀孕之前，天使俾㗎。

22 后嚟，按照摩西法典行洁净仪式嘅时候到嘞，佢哋带住个仔上去耶路撒冷，将佢呈献俾耶和华*， 23 因为耶和华*嘅法典话：“所有头生嘅，无论系男仔，定系雄性牲畜，都要成圣*，归耶和华*所有。” 24 佢哋仲献上祭物，就系耶和华*嘅法典所讲嘅“一对斑鸠或者两只雏鸽”。

25 喺耶路撒冷，有一个人叫做西缅。呢个人又正义又虔诚，一直期待上帝令以色列得到安慰，而佢身上亦都有神圣力量。 26 唔单止噉，上帝通过神圣力量令佢知道，喺佢死之前会见到耶和华*拣选嘅基督。 27 神圣力量引领佢入咗圣殿。耶稣嘅父母都入咗圣殿，佢哋抱住年幼嘅耶稣，要为佢履行法典规定嘅事， 28 西缅就将个小朋友抱过嚟，赞美上帝话： 29 “至高嘅主宰啊，而家照你讲过嘅说话，俾你嘅奴隶安然离世啦， 30 因为我已经亲眼见到你任用嘅救主， 31 你将佢赐下，令万族都睇得见。 32 佢系启蒙外族人嘅光，亦都系你子民以色列人嘅荣耀。” 33 小朋友嘅父母听到佢噉样讲，就觉得好惊讶。 34 西缅祝福佢哋，但系亦都同小朋友嘅妈妈马利亚讲：“喺以色列，有好多人会因为呢个小朋友被任用而跌倒，亦都有好多人会因为佢而起嚟；佢亦会成为被诋毁嘅对象， 35 佢会将好多人心底嘅谂法显露出嚟。你会好痛苦，好似俾利剑刺穿一样。”

36 有一个女先知安娜，系亚设部族法内勒嘅女。佢已经上咗年纪。喺佢结婚之后*同丈夫一齐生活咗七年， 37 就做咗寡妇，而家84岁嘞。佢从来都冇唔去圣殿，日夜都敬奉上帝，又禁食又恳切祈求。 38 就喺嗰个时候，佢行上前感谢上帝，又将呢个小朋友嘅事话俾所有期待耶路撒冷得救嘅人知。

39 耶稣嘅父母做好耶和华*嘅法典规定嘅一切之后，就返番加利利，去到佢哋嘅家乡拿撒勒。 40 呢个小朋友慢慢长大，越嚟越强壮，充满智慧，佢一直得到上帝嘅认可。

41 耶稣嘅父母每年都按照惯例去耶路撒冷守逾越节。 42 耶稣12岁嗰年，佢哋亦都按照惯例，如常上去守节期。 43 节期结束嘞，大家返去嘅时候，年轻嘅耶稣留咗喺耶路撒冷，不过佢嘅爸爸妈妈冇为意。 44 佢哋一直以为耶稣喺同行嘅人群当中，所以行咗一日嘅路程，先至开始喺亲戚同埋认识嘅人当中揾佢， 45 但系揾唔到。佢哋就返番去耶路撒冷仔细噉揾。 46 过咗三日，佢哋发现耶稣喺圣殿入面，坐咗喺啲老师中间，一路听一路问。 47 所有听到佢讲嘢嘅人，都对佢嘅理解力同对答非常之惊叹。 48 佢父母见到佢喺度，就好惊讶。佢妈妈同佢讲：“仔啊，点解你噉样对我哋呀？我同你爸爸好心急，周围去揾你呀！” 49 佢回答话：“点解你哋要周围揾我呢？你哋唔知我一定喺我爸爸屋企咩？” 50 但系佢哋唔理解耶稣讲嘅系咩意思。

51 耶稣同父母一齐落去，返到拿撒勒。佢继续顺服父母。佢妈妈将呢一切都谨记在心。 52 耶稣逐渐长大，越嚟越有智慧，更加得到上帝同埋人嘅喜爱。

3 凯撒提比略在位第十五年，本丢·彼拉多系犹地亚嘅总督，希律*系加利利嘅分封侯，佢哥哥腓力系以土利亚同特拉可尼地区嘅分封侯，吕撒尼亚系亚比利尼嘅分封侯， 2 而亚那同埋该亚法都系祭司长，嗰时撒迦利亚嘅仔约翰喺旷野得到嚟自上帝嘅信息。

3 于是约翰去匀约旦河一带，向人传讲话，要接受象征悔改嘅浸礼，噉罪就能够得到宽恕。 4 就好似以赛亚先知嘅书所记载：“喺旷野有人大声话：‘要为耶和华*预备道路，要为佢开路！ 5 所有山谷都要填满，山岳冈陵都要移平；弯曲嘅道路要修直，崎岖嘅路径要铲平。 6 噉所有人都会见到上帝任用嘅救主。’”

7 约翰对嗰啲嚟揾佢施浸嘅人话：“毒蛇嘅子孙啊，边个话你哋可以逃避到就快降临嘅愤怒㗎？ 8 你哋要用行动嚟表明自己已经悔改*。你哋唔好揾借口同自己讲：‘亚伯拉罕系我哋嘅祖先。’我话俾你哋知，上帝可以令呢啲石头为亚伯拉罕生子孙呀。 9 斧头已经放咗喺树脚。所有冇结好果实嘅树都要斩落嚟，揼去火嗰度。”

10 啲人都嚟问佢：“噉我哋应该做啲咩呢？” 11 佢就话：“边个有两件衫*，就要分一件俾冇嘅人；边个有嘢食，都要分俾冇嘢食嘅人。” 12 连收税人都嚟受浸，同埋问佢：“老师，我哋应该做啲咩呢？” 13 佢话：“除咗规定要收嘅税，唔好收多人哋呀。” 14 嗰啲当兵嘅人都嚟问佢：“我哋应该做啲咩呢？”佢就同佢哋讲：“唔好勒索*人，亦都唔好诬告人，有粮饷，就应该知足。”

15 当时民众好期待基督嚟到。人人都喺心里面谂：“究竟约翰系咪基督呢？” 16 于是约翰同大家讲：“我用水为你哋施浸，但系有一位能力比我大嘅会嚟，我连帮佢解开鞋带都唔配呀。佢会用神圣力量同埋火为你哋施浸。 17 佢拎住扬谷铲，要将佢嘅脱谷场清理干净，将小麦收入佢嘅谷仓，而谷糠就会俾永远都唔会熄灭嘅火烧干烧净。”

18 约翰仲讲咗好多其他说话去劝勉民众，又不断宣扬好消息。 19 而分封侯希律因为佢哥哥嘅太太希罗底嘅事，又因为佢自己作恶多端，就受到约翰批评。 20 于是，希律做咗另一件坏事，就系将约翰韫入监。

21 民众同耶稣都受咗浸。耶稣祷告嘅时候，天打开咗， 22 神圣力量以鸽子嘅形态降临喺佢身上。跟住天上有一把声音话：“你系我嘅仔，我深爱你，我已经认可*你嘞。”

4 耶稣充满神圣力量，离开咗约旦河，喺旷野入面受神圣力量引领， 2 一共40日，期间受到魔鬼引诱。喺旷野嗰段时间，佢咩都冇食，所以嗰段日子结束之后，就觉得肚饿嘞。 3 魔鬼同佢讲：“如果你系上帝嘅仔，就令呢块石头变成食物啦。” 4 但系耶稣就答佢：“圣经话：‘人生存唔可以净系靠食物。’”

5 魔鬼带佢去一个好高嘅地方，一瞬间就将世上所有国家都展示俾佢睇。 6 魔鬼同佢讲：“呢啲国家嘅权力同荣耀，我都会俾晒你，因为呢一切已经交咗比我，我想俾边个就俾边个。 7 只要你拜一拜我，一次啫，呢一切就系属于你㗎喇。” 8 耶稣就答佢：“圣经系噉讲嘅：‘要崇拜耶和华*你嘅上帝，净系可以敬奉佢。’”

9 魔鬼带佢去耶路撒冷，令佢企喺圣殿嘅外墙上面*，同佢讲：“如果你系上帝嘅仔，就喺呢度跳落去啦， 10 因为圣经话：‘佢会命令天使保护你。’ 11 又话：‘佢哋会用手托住你，唔会俾你嘅脚撞落石头度。’” 12 耶稣回答佢：“圣经话：‘唔可以试探*耶和华*你嘅上帝。’” 13 魔鬼用尽各种方法引诱耶稣之后，就离开，等候其他机会。

14 神圣力量令耶稣大有能力，佢返番去加利利。佢嘅名声传遍嗰一带。 15 佢喺会堂入面教导人，得到大家嘅尊重。

16 耶稣去到佢长大嘅地方拿撒勒。佢按照惯例喺安息日入咗会堂，企起身，宣读圣经。 17 有人递咗以赛亚先知嘅书卷俾佢，佢打开书卷，揾到记载呢段经文嘅地方，上面噉样写： 18 “耶和华*嘅神圣力量喺我身上，因为佢任命*咗我，要我向穷人宣扬好消息，派我去宣告被俘掳嘅得到释放、失明嘅能够睇到嘢，令嗰啲受压迫嘅得到自由， 19 亦都传讲耶和华*嘅施恩之年。” 20 耶稣卷好书卷，交返俾会堂助理，就坐低。会堂入面所有人都望住佢。 21 耶稣同佢哋讲：“你哋啱啱听到嘅经文，今日应验嘞。”

22 大家都赞赏佢，亦都因为佢讲嘅说话好吸引而非常惊叹。佢哋话：“呢个唔系约瑟嘅仔嚟嘅咩？” 23 耶稣就同佢哋讲：“我知道你哋一定会用呢句俗语嚟同我讲：‘医生，医好自己先啦。我哋听到你喺迦百农做嘅事，你都应该喺家乡噉样做。’” 24 佢又话：“我好肯定噉同你哋讲，先知喺自己嘅家乡一向都系唔受欢迎㗎。 25 坦白讲，例如喺以利亚嘅日子，有三年零六个月冇落雨，所有地方都有大饥荒，虽然以色列有好多寡妇， 26 但系上帝冇派以利亚去揾佢哋任何一个，净系派佢去揾西顿境内撒勒法嘅一个寡妇。 27 又例如，喺先知以利沙嘅日子，虽然以色列有好多麻风病人，但系佢哋冇一个被医好*，净系得叙利亚人乃缦先至被医好。” 28 会堂入面嘅人听到呢啲说话，就怒火中烧， 29 起身赶佢出城。呢座城起喺山上面，佢哋将佢带到山崖，想推佢落去。 30 不过耶稣喺佢哋中间走出嚟，去咗其他地方。

31 耶稣落到去加利利嘅迦百农城，喺安息日教导人。 32 佢嘅教导方式令民众觉得好惊讶，因为佢嘅教导系嚟自上帝嘅。 33 会堂入面有个人，俾不洁嘅邪灵附身，大嗌： 34 “哼！拿撒勒人耶稣，你嚟呢度做咩呀？*你嚟系咪想消灭我哋呀？我清楚知道你系边个，你系上帝嘅圣者吖嘛。” 35 耶稣斥责邪灵话：“收声，从呢个人身上出嚟。”邪灵就喺众人面前，令嗰个人挞低，然后先至喺嗰个人身上出嚟，冇伤害佢。 36 大家都好惊讶，讨论话：“呢个人讲嘢咁有力量，咁有权威嘅！连邪灵*都听佢嘅吩咐，喺人嘅身上出嚟呀。” 37 于是耶稣嘅名声传遍嗰一带每个角落。

38 耶稣离开会堂，入咗西门屋企。西门嘅外母发紧高烧，有人请耶稣帮佢。 39 耶稣企喺佢身边，医好*佢嘅热病，佢就退咗烧，跟住佢即刻起身，为佢哋准备食物。

40 日落嘅时候，啲人将患咗各种疾病嘅人带去耶稣嗰度。耶稣逐一将手放喺佢哋身上，医好佢哋。 41 耶稣亦都将邪灵喺好多人身上驱逐出嚟，啲邪灵大嗌话：“你系上帝嘅仔。”耶稣斥责佢哋，唔准佢哋讲嘢，因为邪灵知道佢系基督。

42 天一光，耶稣就离开，去咗一个偏僻嘅地方。民众四围去揾佢，揾到之后，就挽留佢，求佢唔好走。 43 但系耶稣同佢哋讲：“我亦都要去其他城，宣扬上帝王国嘅好消息，因为我系为咗呢件事被派嚟㗎。” 44 于是耶稣去犹地亚各个地方嘅会堂传道。

5 有一次，耶稣企喺革尼撒勒湖*岸边，民众逼埋去佢身边，想听上帝嘅话语。 2 佢见到有两只船停咗喺湖边，渔夫落咗船去咗洗渔网。 3 耶稣就上咗其中一只船，系西门嘅船，又请佢撑出去，离岸边远少少嘅地方。然后，耶稣坐低，喺船上面教导民众。 4 耶稣同民众讲完，就同西门讲：“撑去水深嘅地方吖。你哋要撒网捉鱼。” 5 西门回答话：“老师，我哋忙咗成晚，咩都捉唔到。不过既然你噉吩咐，我就撒网啦。” 6 佢哋照住做，竟然捉到*好多鱼，几乎将渔网挣烂。 7 佢哋即刻打手势叫另一只船嘅同伴过嚟帮手。佢哋嚟到，将两只船都装满晒鱼，两只船都差啲沉。 8 西门·彼得见到呢个情景，就跪喺耶稣面前话：“主呀，离开我啦，我系个罪人。” 9 因为捉到咁多鱼，西门仲有同佢一齐嘅人都好惊讶。 10 西门嘅伙伴，西庇太嘅仔雅各同埋约翰，都觉得好惊讶。耶稣同西门讲：“唔使惊，从今以后，你得到*嘅收获唔再系鱼，而系人呀。” 11 佢哋将船靠岸之后，就揼低所有嘢，跟随咗耶稣。

12 有一次，耶稣喺一座城入面，嗰度有个成身生满麻风嘅人。佢一见到耶稣，就跪低下拜，恳求佢话：“主呀，只要你愿意，就可以令我好返*㗎喇。” 13 耶稣伸手摸佢，话：“我好愿意！你好返啦。”佢身上嘅麻风就即刻消失嘞。 14 耶稣吩咐佢唔好讲俾任何人知，但系就话：“去俾祭司检查，而且要献上摩西规定嘅祭物，向佢哋证明*你已经洁净。” 15 不过，耶稣嘅名声越传越远。虽然经常有一大班人聚集起嚟，想听耶稣讲说话，又希望佢医好佢哋嘅病， 16 耶稣仍然经常去冇人嘅地方祷告。

17 有一日，耶稣教导人嘅时候，法利赛派嘅人同埋法典嘅导师都坐喺嗰度。佢哋系由加利利、犹地亚各个村庄同埋耶路撒冷嚟嘅。耶和华*赐力量俾耶稣，令佢有能力医病。 18 有几个人用担架抬住一个瘫痪嘅人，想送佢入屋，放喺耶稣面前。 19 但系因为人太多，佢哋冇办法将瘫痪嘅人抬入去，就爬上屋顶，揭开瓦片，将佢连担架一齐放落下面嘅人群当中，放喺耶稣面前。 20 耶稣见到佢哋咁有信心，就话：“朋友，你嘅罪赦免嘞。” 21 抄经士同法利赛派嘅人喺度讨论话*：“呢个人系边个呀，竟然够胆讲亵渎嘅说话？除咗上帝一位，边个能够赦罪呀？” 22 耶稣睇出佢哋谂紧*啲乜嘢，就话：“点解你哋要噉样谂呢？ 23 边一样容易啲呢？系讲‘你嘅罪赦免嘞’？定系讲‘起身，行啦’？ 24 但系为咗令你哋知道人子*喺地上有权赦罪——”耶稣同瘫痪嘅人讲：“我吩咐你，起身，拎起你嘅担架，返屋企啦。” 25 嗰个人即刻喺大家面前起身，拎起佢瞓过嘅担架，喺返屋企嘅路上一直赞美*上帝。 26 人人都非常惊叹，赞美*上帝，满心敬畏噉话：“我哋今日见到嘅事太神奇嘞！”

27 之后，耶稣出去，见到一个叫做利未嘅收税人，坐喺收税嘅地方，就同佢讲：“嚟跟随我吖。” 28 利未就揼低所有嘢，起身跟随耶稣。 29 后嚟，利未喺屋企摆设盛宴，款待耶稣，有一大班收税人同埋其他人同佢哋一齐食饭。 30 法利赛派嘅人同佢哋嘅抄经士向耶稣嘅门徒埋怨：“你哋点解同收税人仲有罪人一齐饮饮食食呀？” 31 耶稣回答佢哋：“健康嘅人唔需要医生，病咗嘅人就需要嘞。 32 我嚟唔系要呼召正义嘅人，而系要呼召罪人悔改。”

33 有人同耶稣讲：“约翰啲门徒经常禁食，恳切祈求，法利赛派啲门徒都系噉样做吖，但系你啲门徒就又饮又食嘅。” 34 耶稣同佢哋讲：“新郎同朋友一齐嘅时候，你哋点会叫佢啲朋友禁食呢？ 35 但系时候会到，新郎会俾人带走，离开佢哋。到嗰段时期，佢哋就会禁食嘞。”

36 耶稣仲用比喻同佢哋讲：“冇人会喺新嘅外衣撕一块布落嚟，补喺旧嘅外衣上面。如果噉做，新嘅就会扯烂旧嘅，而且喺新衫上面撕落嚟嘅布，同件旧衫亦都唔衬； 37 亦都冇人会将新酒装喺旧嘅皮袋入面。如果噉做，皮袋就会俾新酒挣穿，唔单止酒会漏出嚟，皮袋都会烂埋。 38 新酒一定要装喺新嘅皮袋入面。 39 冇人饮完陈年老酒，仲会想饮新酒㗎，佢哋实会话：‘陈酒好啲。’”

6 有一个安息日，耶稣经过麦田，佢啲门徒摘咗啲麦穗，用手搓吓，然后攞嚟食。 2 有几个法利赛派嘅人就话：“喺安息日做呢啲事唔合法㗎㖞。你哋点解噉做呀？” 3 耶稣回答佢哋：“有一次大卫同跟随佢嘅人肚饿，当时佢所做嘅嘢，你哋冇读过咩？ 4 佢入咗上帝嘅居所*，接过呈献嘅饼*。佢食咗，亦都分俾佢啲手下。按照法律，呢种饼除咗祭司之外，边个都唔可以食。” 5 然后，耶稣同佢哋讲：“人子就系安息日嘅主。”

6 喺另一个安息日，耶稣入去会堂教导人。嗰度有一个人，右手萎缩*咗。 7 抄经士同法利赛派嘅人望实耶稣，睇吓佢喺安息日会唔会医病，目的系要揾把柄指控佢。 8 不过，耶稣知道佢哋谂紧啲乜嘢，于是同嗰个右手萎缩*嘅人讲：“起身，企喺中间。”嗰个人就起身企喺嗰度。 9 耶稣同嗰啲人讲：“我问你哋，喺安息日做边种事系合法嘅呢？系行善吖，定系作恶呢？系拯救生命吖，定系杀人害命呢？” 10 耶稣望吓周围嘅人，然后同嗰个人讲：“伸只手出嚟吖。”佢一伸手，手就好返嘞。 11 但系嗰啲人就怒火中烧，商量点样对付耶稣。

12 喺嗰段时期，有一次耶稣上山祷告。佢向上帝祷告咗成晚。 13 天一光，佢就召集门徒去佢嗰度，喺佢哋当中拣咗12个人，称为“使徒*”。 14 佢哋分别系西门（耶稣亦都帮佢改名叫彼得）、西门嘅兄弟安得烈、雅各、约翰、腓力、巴多罗买、 15 马太、多马、亚勒腓嘅仔雅各、绰号“热心人”嘅西门、 16 雅各嘅仔犹大，同埋后嚟成为叛徒嘅加略人犹大。

17 耶稣同佢哋一齐落嚟，企咗喺平地。嗰度有佢嘅一大班门徒，亦都有一大班民众，由全犹地亚、耶路撒冷，仲有泰尔同埋西顿一带嘅沿海地区过嚟，想听佢讲说话，又希望佢哋嘅病得到医治。 18 就连嗰啲受邪灵*骚扰嘅人都被耶稣医好。 19 民众个个都想摸吓佢，因为有力量喺佢身上发出，医好佢哋所有人。

20 耶稣望住门徒，话：

“你哋贫穷嘅人有福*嘞，因为上帝嘅王国系你哋嘅。

21 “你哋而家饥饿嘅人有福嘞，因为你哋将会饱足。

“你哋而家哭泣嘅人有福嘞，因为你哋将会欢笑。

22 “你哋因为人子而俾人憎恨、排斥、侮辱，俾人诋毁名声*，你哋就有福嘞。 23 嗰个时候，你哋要欢欣雀跃，因为你哋喺天上有丰厚嘅奖赏。其实，嗰啲人嘅祖先都系噉样对待先知㗎。

24 “你哋富有嘅人有祸嘞，因为你哋已经得到全部安慰。

25 “你哋而家饱足嘅人有祸嘞，因为你哋将会饥饿。

“你哋而家欢笑嘅人有祸嘞，因为你哋将会哀痛哭泣。

26 “人人都赞美你哋嘅时候，你哋就有祸嘞，因为佢哋嘅祖先都系噉样对待假先知嘅。

27 “听紧我讲说话嘅人，我话俾你哋听：要爱*你哋嘅敌人，善待憎恨你哋嘅人。 28 要祝福嗰啲咀咒你哋嘅人，为侮辱你哋嘅人祷告。 29 有人打你一边面，你就俾埋另一边佢打；有人拎走你嘅外袍，你就连内袍都俾佢拎走。 30 有人向你求啲乜嘢，你都要俾佢；有人攞走你嘅嘢，你唔好问佢攞返。

31 “你哋希望人点样对待你哋，你哋就要点样对待人。

32 “你哋净系爱嗰啲爱你哋嘅人，有乜嘢值得称赞呢？就连罪人都爱嗰啲爱佢哋嘅人。 33 你哋净系善待嗰啲善待你哋嘅人，又有乜嘢值得称赞呢？连罪人都系噉样做嘅。 34 如果你哋借钱*俾人，而期望佢哋偿还，噉有乜嘢值得称赞呢？就连罪人都会借钱俾罪人，期望全数收返。 35 相反，几时都要爱你哋嘅敌人，善待人，借钱俾人都唔好期望收返。噉样你哋就会得到丰厚嘅奖赏，亦都会成为至高者嘅仔，因为忘恩负义嘅恶人，佢都恩待。 36 要怜悯人，就好似你哋嘅天父怜悯人一样。

37 “唔好再妄自审判人*，你哋就唔会被审判；唔好再谴责人，你哋就唔会被谴责。要宽恕*人，你哋就会得到宽恕。 38 要经常施与，其他人就会向你哋施与。佢哋会将充足嘅分量倒入你哋嘅衣袋*，又摇又压，都仲系会多到满泻。你哋用乜嘢量器量俾人，对方亦都会用乜嘢量器量俾你哋。”

39 耶稣又同佢哋讲咗个比喻：“盲人点能够引导盲人呢？噉嘅话，唔系两个都会跌落坑咩？ 40 学生*唔会超越老师，但系受过全面教导嘅都会同老师一样。 41 你点解望实弟兄眼入面嘅刺，但系留意唔到自己眼里面嘅梁木*呢？ 42 你连自己眼里面嘅梁木都睇唔到，又点可以同弟兄讲，‘弟兄，等我攞走你眼入面嘅刺’吖。虚伪嘅人！你要攞走自己眼入面嘅梁木先，然后至可以睇清楚点样攞走弟兄眼入面嘅刺。

43 “好树唔会结坏果实，坏树亦都唔会结好果实。 44 凭住果实就知道棵树系点样㗎嘞。例如，冇人会喺荆棘度采摘无花果，亦都冇人会喺荆棘丛入面收割葡萄。 45 良善嘅人心里面积存良善，就表现良善；邪恶嘅人积存邪恶，就显出邪恶。因为人心里面充满啲乜嘢，佢嘅口就会讲啲乜嘢。

46 “你哋点解称呼我‘主啊！主啊！’，但系又唔照住我嘅说话去做呢？ 47 我要话俾你哋知，如果一个人跟从我，听我讲嘅嘢，然后照住去做，就好似一个点样嘅人。 48 佢就好似一个人起屋，将笪地挖到好深，深到去岩石嗰度，然后喺嗰度打好地基。结果洪水嚟到嗰阵，间屋俾河水冲击都冇动摇，因为起得好稳阵。 49 而嗰啲听咗我嘅说话，但系唔去做嘅人，就好似一个人喺地面起屋，但系冇打地基。河水一冲击，间屋就即刻冧咗，完全被摧毁。”

7 耶稣讲完想同民众讲嘅嘢之后，去咗迦百农。 2 有一个军官，佢器重嘅奴隶患咗重病，就快死嘞。 3 佢听到关于耶稣嘅事，就请犹太人嘅几个长老去见耶稣，求耶稣嚟医好佢嘅奴隶。 4 佢哋嚟到耶稣嗰度，恳求话：“佢真系好值得你为佢噉样做㗎， 5 因为佢爱我哋嘅同胞，又为我哋起会堂。” 6 耶稣就同佢哋一齐过去。就快到军官屋企嘅时候，军官托几个朋友嚟，同耶稣讲：“先生，唔好麻烦你嘞。我真系唔配请你嚟我屋企。 7 我自己都觉得唔配嚟见你。其实你只要讲一句话，我嘅仆人就可以好返。 8 我都系要听人指挥嘅，自己手下都有士兵。我同呢个讲：‘去！’佢就去；同嗰个讲：‘过嚟！’佢就过嚟；同我嘅奴隶讲：‘做呢件事！’佢就去做。” 9 耶稣听到呢番说话，就好惊讶，拧转身同跟随佢嘅民众讲：“我话俾你哋知，咁有信心嘅人，连喺以色列我都未见过。” 10 受军官所托嘅朋友返到去佢屋企，见到嗰个奴隶已经好返嘞。

11 过咗冇耐，耶稣去咗一座叫做拿因嘅城，有一大班人同埋门徒同佢一齐去。 12 耶稣行近城门嘅时候，有一个死人被抬出嚟，呢个人系一个独生子，而佢嘅妈妈系个寡妇。城入面有一大班人陪住嗰个女人。 13 主一见到佢，就好同情佢，同佢讲：“唔好喊嘞。” 14 耶稣上前将手放喺担架*上面，抬嘅人就停低，企喺度。耶稣话：“年轻人，我吩咐你起身！” 15 嗰个死咗嘅人就坐起身，开口讲说话，耶稣将佢交俾佢嘅妈妈。 16 人人都充满敬畏嘅心，赞美*上帝话：“一位伟大嘅先知喺我哋当中出现呀。”又话：“上帝关注佢嘅子民呀。” 17 关于耶稣嘅呢个消息就传遍咗犹地亚同埋附近一带。

18 约翰嘅门徒将呢一切讲咗俾约翰听。 19 约翰就叫两个门徒嚟，派佢哋去问主：“你系咪我哋等待嘅嗰位*呀？定系我哋要期待另一位呢？” 20 于是佢哋嚟见耶稣，话：“施浸者约翰派我哋嚟问你：‘你系咪我哋等待嘅嗰位呀？定系我哋要期待另一位呢？’” 21 嗰时，耶稣医好好多病人，无论佢哋嘅病系重定系轻，耶稣都医返好。佢仲医好俾邪灵附身嘅人，又向盲人施恩，令好多人睇返嘢。 22 于是耶稣回答佢哋：“你哋返去将自己睇到听到嘅事，讲俾约翰知啦：盲嘅睇到嘢，跛嘅行到路，有麻风病嘅好返*，聋嘅听到嘢，死人复活，穷人听到好消息。 23 冇因为我而失足跌倒嘅人*系有福*嘅。”

24 约翰派嚟嘅人走咗之后，耶稣就同民众讲到约翰，话：“你哋以前喺旷野见到嘅嗰个人系点样嘅呢？佢系咪好似随风摇摆嘅芦苇噉呀？唔系呀！ 25 噉你哋见到嘅嗰个人系点样嘅呢？佢系咪着得好奢华*嘅呢？都唔系呀！服装华丽、生活奢侈嘅人系住喺王宫入面㗎。 26 噉佢到底系边个呢？系咪一个先知？冇错！我话俾你哋听，佢系先知，但系唔止先知咁简单。 27 圣经话：‘睇吓！我要派我嘅使者行喺你前面*，佢会喺你前面为你准备道路。’呢句话讲嘅就系佢嘞。 28 我话俾你哋知，喺世人当中*，冇一个比约翰大，但系喺上帝嘅王国入面，再渺小嘅都比佢大。” 29 （由于民众同埋收税人都接受过约翰嘅浸礼，当佢哋听到耶稣噉样讲，就宣告上帝系正义嘅。 30 但系法利赛派同精通摩西法典嘅人冇接受约翰嘅浸礼，就漠视上帝俾佢哋嘅指引*。）

31 “噉我应该将呢一代人比喻做乜嘢人呢？佢哋好似边啲人呢？ 32 佢哋好似一班小朋友坐喺市集广场度，大声同同伴讲：‘我哋为你哋吹笛伴奏，但系你哋唔跳舞；我哋唱哀歌，你哋又唔喊。’ 33 类似㗎，施浸者约翰嚟到，唔食饭唔饮酒，你哋就话：‘佢俾邪灵附身。’ 34 但系人子嚟到，有食嘢有饮酒，你哋就话：‘睇吓！呢个人贪食好酒，同收税人仲有罪人做朋友！’ 35 不过，一个人系咪有智慧，睇佢嘅行为*就可以证实*嘞。”

36 有一个法利赛派嘅人再三邀请耶稣食饭，耶稣就去咗佢屋企嘞。 37 有一个女人，系城里面公认嘅罪人，佢知道耶稣喺呢个法利赛派嘅人屋企食饭*，就带咗馨香油嚟，系用雪花石造嘅樽装住嘅。 38 佢行到耶稣后面，喺耶稣嘅脚边喊。佢用眼泪滴湿耶稣嘅脚，然后用头发抹干，又温柔噉亲吻耶稣嘅脚，仲倒啲馨香油落去。 39 嗰个邀请耶稣嘅法利赛派嘅人见到，心谂：“呢个人如果真系先知，就应该知道摸佢嘅系边个，系个点样嘅女人，知道佢系个罪人嚟㗎噃。” 40 耶稣就同佢讲：“西门，我有啲嘢想同你讲呀。”佢话：“老师，请讲！”

41 “有两个人争一个债主嘅钱，一个争咗500银元*，一个争咗50银元。 42 佢哋都冇能力还钱，债主就心甘情愿免咗佢哋嘅债。噉你话佢哋边个会爱佢多啲？” 43 西门回答话：“我谂系欠债多啲嗰个。”耶稣话：“你答得啱。” 44 于是佢拧转身望向嗰个女人，同西门讲：“你睇吓呢个女人，我入嚟你屋企，你冇俾水我洗脚，而呢个女人就用眼泪滴湿我嘅脚，用头发抹干。 45 你冇亲吻我，而呢个女人由我入嚟之后，就不断温柔噉亲吻我嘅脚。 46 你冇将啲油倒喺我嘅头度，而呢个女人就将馨香油倒落我嘅脚度。 47 所以我话俾你知，就算佢犯过好多罪*，都被赦免嘞，因为*佢爱得多。而嗰个被赦免得比较少嘅人，爱得亦都少。” 48 然后耶稣同嗰个女人讲：“你嘅罪都赦免嘞。” 49 同耶稣一齐食饭嘅人就私下议论话：“呢个人系边个嚟㗎？竟然赦免人嘅罪！” 50 而耶稣就同嗰个女人讲：“你嘅信心救咗你。唔使担心，你平安噉返去啦。”

8 过咗冇耐，耶稣逐城逐村传道，宣扬上帝王国嘅好消息。同佢一齐嘅有十二使徒， 2 仲有一啲妇女。呢啲妇女曾经受邪灵控制或者患病，而家都已经医返好嘞。佢哋当中有称为末大拉人嘅马利亚（曾经有七个邪灵喺佢身上被赶出嚟）， 3 有希律嘅管家古撒嘅太太约亚拿，亦都有苏珊娜同好多其他妇女。呢啲妇女都拎自己嘅财物出嚟，为耶稣同啲使徒服务。

4 有一大班人聚集起嚟，仲有人喺唔同嘅城去到耶稣嗰度，耶稣就讲咗个比喻： 5 “有一个农夫出去撒种，撒嘅时候，有啲种子跌喺路边，俾人践踏，后嚟俾雀仔食咗。 6 有啲跌喺岩石上面，因为冇水分，发芽之后就枯干咗嘞。 7 有啲跌咗喺荆棘度，荆棘都一齐长高，就阻碍幼苗生长。 8 有啲种子撒咗喺好嘅土壤上面，发芽之后，就结出100倍嘅果实。”佢讲完呢番话，就大声讲：“有耳仔嘅，就应该留心听。”

9 门徒嚟问佢呢个比喻嘅意思。 10 佢话：“上帝王国嘅神圣秘密，净系你哋先可以明白，而其他人只系知道个比喻。噉样，佢哋睇咗都等于冇睇，听咗都唔理解。 11 个比喻嘅意思就系：种子代表上帝嘅话语。 12 跌咗喺路边嘅，系指人听到上帝嘅话语，之后撒但就嚟，将佢哋心入面嘅话语攞走，唔俾佢哋相信而得救。 13 跌喺岩石上面嘅，就系人听咗上帝嘅话语，就开心噉接受，不过冇生到根。佢哋净系信咗一段时间，遇到考验嘅时候就离开。 14 跌喺荆棘里面嘅，系指人听咗上帝嘅话语，但系俾人生嘅享乐、忧虑、财富俘掳咗，于是话语完全生长唔到，就结唔出成熟嘅果实。 15 种子撒喺好嘅土壤上面，就系指人有美好良善嘅心，听咗上帝嘅话语之后，就紧紧持守，一边忍耐一边结出果实。

16 “冇人点咗灯之后，会用嘢*冚住，或者放喺床下面，而系会放喺灯台上面，等入嚟嘅人见到光。 17 隐藏嘅事一定会显露出嚟，小心掩盖嘅事始终都会公开，会俾人知道。 18 所以你哋要留心听。边个有嘅，就要俾多啲佢；边个冇嘅，就连佢自以为有嘅，都要攞走埋。”

19 耶稣嘅妈妈同埋啲细佬嚟揾佢，不过嗰度太多人，佢哋行唔到去耶稣度。 20 有人就同耶稣讲：“你妈妈同埋细佬企咗喺出面想揾你呀。” 21 耶稣同佢哋讲：“我嘅妈妈、我嘅兄弟就系呢啲听到上帝嘅话语，然后遵守嘅人。”

22 有一日，耶稣同门徒上咗船。耶稣同佢哋讲：“我哋去湖嘅对面岸吖。”佢哋就撑只船过去。 23 只船航行嘅时候，耶稣瞓着咗。湖上刮起一股强劲嘅暴风，只船几乎入满晒水，情况非常危急。 24 佢哋去叫醒耶稣，话：“老师，老师，我哋就快冇命嘞！”耶稣就起身，斥责狂风巨浪，风浪就停咗，周围就即刻平静返嘞。 25 耶稣同佢哋讲：“你哋嘅信心去咗边呢？”佢哋又恐惧又震惊，互相话：“呢个人到底系边个嚟㗎？佢竟然可以命令风浪，而风浪又听佢话嘅！”

26 佢哋将只船停咗喺加利利对面格拉森人地区嘅岸边。 27 耶稣落咗船，一上岸就有一个由城里面出嚟嘅人，去到佢面前。呢个人俾邪灵附身，已经好长时间唔着衫，唔住喺屋企，净系住喺墓地。 28 佢一见到耶稣就大嗌，跪喺耶稣面前，大声话：“至高上帝嘅仔耶稣，你嚟呢度做咩呀？*求吓你唔好令我受苦呀！” 29 佢之所以噉讲，系因为耶稣之前吩咐邪灵*喺呢个人身上出嚟。邪灵曾经多次*捉住呢个人，佢亦都一再俾人用锁链同埋脚镣锁住，俾人看管。但系佢整断锁链，俾邪灵赶去偏僻嘅地方。 30 耶稣问佢：“你叫乜嘢名？”佢话：“叫军团。”原来有好多邪灵附喺佢身上。 31 佢哋不断恳求耶稣唔好吩咐佢哋去到无底深渊。 32 当时有一大班猪喺山上面食嘢，佢哋就恳求耶稣准佢哋附喺猪身上。耶稣俾佢哋噉样做。 33 邪灵就喺嗰个人身上出嚟，附喺猪身上。啲猪就冲落悬崖*，跌入湖浸死晒。 34 放猪嘅人见到呢件事就逃跑，喺城嘅附近同埋城入面话俾人知。

35 于是啲人出嚟睇吓发生咗咩事。佢哋去到耶稣嗰度，见到嗰个唔再受邪灵操纵嘅人着返衫，神志清醒，坐喺耶稣脚前，佢哋就好惊。 36 亲眼见到嘅人就话俾佢哋知，受邪灵操纵嘅人好返嘅经过。 37 格拉森人地区有好多人都非常恐慌，求耶稣离开佢哋。耶稣就上船离开。 38 但系摆脱咗邪灵嗰个人好想跟随耶稣，就不断恳求佢。不过，耶稣就叫佢离开，话： 39 “你返屋企啦，要将上帝为你做嘅事宣扬出去。”佢就去匀全城，宣扬耶稣为佢做嘅事。

40 耶稣返嚟嘅时候，民众欢迎佢，因为大家都好期待佢返嚟。 41 忽然，有个叫做崖鲁嘅人嚟到，佢系会堂嘅主管。佢跪喺耶稣面前，恳求耶稣去佢屋企， 42 因为佢嗰个大约12岁嘅独生女就快死嘞。

耶稣去嘅时候，民众喺佢周围逼住佢。 43 有一个女人，患咗流血病症*12年都冇人医得好佢。 44 佢由后面行近耶稣，摸一摸佢外衣嘅穗边，就即刻冇再流血嘞。 45 耶稣话：“边个摸我呀？”大家都话冇，彼得就话：“老师，你前后左右都系人，民众都逼住你！” 46 耶稣话：“一定有人摸我，因为我觉得身上有力量发咗出去。” 47 呢个女人见隐瞒唔到，就战战兢兢噉行过去，跪喺耶稣面前，当众讲出点解要摸耶稣，同埋即刻好返呢件事。 48 耶稣同佢讲：“阿女，你嘅信心令你好返嘞。唔使担心，你平安噉返去啦。”

49 耶稣仲讲紧嘢嘅时候，有人由会堂主管嘅屋企嚟到，话：“你个女死咗嘞。唔使麻烦老师嘞。” 50 耶稣听到呢句话，就同会堂主管讲：“唔使惊，即管表现信心啦。佢会得救㗎。” 51 耶稣去到佢屋企，除咗彼得、约翰、雅各同埋个女仔嘅父母，就唔俾其他人跟埋一齐入去。 52 个个都为个女仔喊，悲伤噉揼心口*。耶稣话：“唔使喊，佢冇死到，只系瞓着咗啫。” 53 佢哋都嘲笑耶稣，因为佢哋知道个女仔已经死咗嘞。 54 耶稣拉住个女仔只手，大声同佢讲：“细路女，起身啦！” 55 佢就有返生命*，即刻起身。耶稣吩咐人拎啲嘢食俾佢。 56 佢嘅父母非常之惊喜。不过，耶稣吩咐佢哋，唔好将头先发生嘅事讲俾任何人知。

9 耶稣召集十二使徒，赐力量同埋权力俾佢哋，能够制伏所有邪灵，又能够医治各种疾病。 2 佢派佢哋去传讲上帝嘅王国，医治病人。 3 耶稣同佢哋讲：“唔好带啲咩上路，唔好带手杖，唔好带粮袋，唔好带食物，唔好带钱*，亦都唔好额外带多件衫*。 4 无论你哋入去边个屋企，都要住喺嗰度，直到离开。 5 边座城嘅人唔接待你哋，你哋离开嗰阵，就要扽走脚上面嘅尘土，表明佢哋已经受到警告*。” 6 佢哋就起程，去匀境内嘅每个村镇，四围去宣扬好消息，帮人医病。

7 分封侯希律*听到呢啲事，就好疑惑，因为有人话约翰死而复生嘞， 8 又有人话以利亚出现嘞，仲有人话古代嘅一个先知复活咗。 9 希律话：“约翰已经俾我斩咗头啦，噉呢个人系边个嚟㗎？我听到好多关于佢嘅事。”于是，佢就好想见吓耶稣。

10 使徒返嚟之后，将做过嘅事都报告俾耶稣听。耶稣就带住佢哋离开人群，去一座叫做伯赛大嘅城。 11 民众知道咗，就跟住佢。耶稣欢迎佢哋，向佢哋传讲上帝嘅王国，医好病咗嘅人。 12 就快日落嘞，十二使徒嚟同耶稣讲：“不如叫啲民众走啦，等佢哋去附近嘅乡村揾地方住同埋揾嘢食，因为呢度好偏僻呀。” 13 耶稣同佢哋讲：“你哋拎啲嘢俾佢哋食吖。”佢哋话：“我哋净系得五个饼、两条鱼，冇其他嘢嘞㖞，除非我哋帮呢度所有人买嘢食啦。” 14 当时大约有5000个男人。耶稣同门徒讲：“叫佢哋一组一组噉坐低，每组大概50人。” 15 佢哋就噉样做，叫所有人坐低先。 16 然后耶稣拎起五个饼、两条鱼，抬头望天，祷完告，将饼搣开，又将饼同鱼交俾门徒，门徒就摆喺民众面前。 17 人人都食，而且食饱。佢哋将食净嘅收拾好，装咗12个篮。

18 耶稣一个人祷告嘅时候，门徒嚟见佢，佢问门徒：“民众话我系边个呢？” 19 佢哋回答：“有啲话系施浸者约翰，有啲话系以利亚，仲有啲话系古代一个先知复活咗。” 20 耶稣问佢哋：“你哋呢？你哋话我系边个？”彼得回答话：“你系上帝拣选嘅基督。” 21 耶稣就郑重噉吩咐佢哋，唔好将呢件事讲俾人知， 22 又话：“人子一定会受好多苦，俾长老、祭司长、抄经士弃绝，俾人杀死，第三日复活。”

23 耶稣又同所有人讲：“边个想嚟跟从我，就唔好再为自己而活，要每日孭起自己嘅苦刑柱*，一直跟随我。 24 边个想救自己嘅生命，就会失去生命；边个为我失去生命，就可以救自己嘅生命。 25 人就算赚到全世界，但系冇咗生命或者自毁一生，又有乜嘢益处呢？ 26 边个因为我同埋我嘅说话而觉得羞耻，噉人子喺佢自己、佢爸爸同埋圣天使嘅荣耀里面嚟到嘅时候，都会以呢个人为耻。 27 我可以好肯定噉话俾你哋知，呢度在场嘅人当中，有啲仲未试过死亡嘅滋味，就会见到上帝嘅王国。”

28 讲完呢啲说话之后，大约过咗八日，耶稣带住彼得、约翰、雅各上山祷告。 29 佢祷告嘅时候，面貌就改变咗，身上嘅衫都变得光洁雪白。 30 突然之间，有两个人出现咗，同耶稣倾偈。呢两个人就系摩西同埋以利亚。 31 佢哋带住荣耀出现，讲到关于耶稣离世嘅事，即系佢喺耶路撒冷将会成就嘅事。 32 当时彼得同埋啲同伴都昏昏欲睡。佢哋清醒之后，就见到耶稣嘅荣耀同埋企喺佢身边嗰两个人。 33 嗰两个人就快离开耶稣嘞，彼得就同耶稣讲：“老师，我哋喺度真系好呀，等我哋搭三个帐幕，一个俾你，一个俾摩西，一个俾以利亚吖。”其实佢根本唔知道自己讲紧啲乜嘢。 34 彼得仲讲紧嘢嘅时候，有一嚿云出现，笼罩佢哋。喺云里面，佢哋觉得好惊。 35 云里面有声音发出话：“呢个系我嘅仔，系我拣选㗎。你哋要听从佢。” 36 佢哋听到呢个声音嘅时候，净系见到耶稣一个人喺嗰度。喺嗰段时期，佢哋守口如瓶，冇将见到嘅事讲俾人知。

37 第二日，佢哋落山嘅时候，耶稣见到一大班人。 38 突然间，人群当中有个人大嗌话：“老师，求你睇吓我个仔吖，我得呢一个仔㗎咋。 39 邪灵成日捉住佢，令到佢突然间大嗌，又令佢痉挛，呕白泡，伤害完佢之后都唔肯罢休呀。 40 我求过你啲门徒赶邪灵出去，但系佢哋都做唔到。” 41 耶稣回应话：“呢一代又不信又歪邪嘅人啊，我要同你哋一齐到几时呢？要容忍你哋几耐呢？带你个仔嚟呢度啦。” 42 个男仔上前嘅时候，邪灵竟然又将佢挞喺地，令佢痉挛得好犀利。耶稣斥责邪灵*，医好个男仔，交俾佢爸爸。 43 人人都对上帝伟大嘅力量非常之惊讶。

当大家仲因为耶稣所做嘅一切而觉得惊讶嘅时候，耶稣同门徒讲： 44 “你哋要留心听，谨记我嘅说话：人子会俾人出卖，落喺敌人手上。” 45 不过佢哋唔理解耶稣讲嘅嘢，因为呢句说话嘅含意系隐藏起嚟，唔俾佢哋明白嘅，而佢哋亦都唔敢问耶稣呢句话究竟系咩嘢意思。

46 有一次，佢哋争拗边个最大。 47 耶稣知道佢哋心入面谂紧啲乜嘢，就带咗一个小朋友嚟，叫佢企喺自己侧边， 48 同佢哋讲：“边个因为我嘅名接待呢个小朋友，即系接待我；边个接待我，即系接待派我嚟嘅嗰位。喺你哋当中，边个好似最卑微*嘅人噉样为人处事，边个就系最大嘅。”

49 约翰就同耶稣讲：“老师，我哋见到有个人用你嘅名驱逐邪灵，我哋就去阻止佢，因为佢都唔系同我哋一齐跟从你嘅。” 50 耶稣同佢讲：“唔好阻止佢，因为唔反对你哋嘅，即系支持你哋㗎嘞。”

51 耶稣被接上天嘅日子就快到嘞。佢心意坚定，要去耶路撒冷。 52 佢派一啲门徒行先，佢哋就去到撒马利亚人嘅一个村庄，要为佢做准备。 53 嗰度嘅人见佢咁决心要去耶路撒冷，就唔接待佢。 54 门徒雅各同埋约翰见到，就话：“主啊，你使唔使我哋叫啲火从天而降，消灭晒佢哋呀？” 55 耶稣拧转身，斥责佢哋两个。 56 大家就去咗其他村庄嘞。

57 喺路上，有人同耶稣讲：“无论你去边度，我都会跟随你。” 58 耶稣同佢讲：“狐狸有洞穴可以住，天上嘅雀仔有巢可以栖身，但系人子连属于自己，用嚟瞓觉嘅地方都冇*。” 59 耶稣同另一个人讲：“嚟跟随我啦！”嗰个人话：“主啊，请你俾我去埋葬爸爸先啦。” 60 耶稣同佢讲：“等死人埋葬死人啦。你即管去，宣扬上帝嘅王国。” 61 仲有一个人话：“主啊，我会跟随你，但系俾我同屋企人道别先啦。” 62 耶稣同佢讲：“一个人喺田度犁地而又向后望，绝对唔适合进入上帝嘅王国。”

10 呢啲事之后，主另外拣咗70个人，派佢哋两个两个行先，去到佢之后会去嘅各城各地。 2 主同佢哋讲：“要收割嘅农作物*真系好多，但系工人实在太少嘞。所以，你哋要恳求农作物嘅主人，派工人出去收割佢嘅农作物。 3 去啦！我派你哋出去，就好似将羔羊送入狼群入面。 4 唔好带钱袋，唔好带粮袋，唔好带鞋，亦都唔好喺路上面同任何人打招呼*。 5 你哋入去边一个屋企，都要先讲句：‘愿你一家平安。’ 6 如果嗰度有喜爱平安嘅人*，噉佢就会得到你哋求嘅平安。如果唔系，平安就俾返你哋嘞。 7 你哋要住喺嗰间屋，佢哋提供乜嘢饮食，你哋都可以享用，因为工人得到报酬系应该㗎。不过，留咗喺嗰度，就唔好搬嚟搬去嘞。

8 “你哋入去一座城，如果人哋接待你哋，俾乜嘢你哋食，你哋就食乜嘢啦， 9 亦都要医好嗰度嘅病人，话俾人知：‘上帝嘅王国临近嘞。’ 10 你哋入到一座城，如果人哋唔接待你哋，你哋就要去大街嗰度讲： 11 ‘我哋嘅脚黐咗你哋城嘅尘土，连呢啲尘土，我哋都要抹走，以示警告。要记住：上帝嘅王国临近嘞。’ 12 我话俾你哋知，喺嗰一日*，嗰座城遭受嘅惩罚，会比所多玛遭受嘅更加重。

13 “哥拉逊啊，你有祸嘞！伯赛大啊，你有祸嘞！因为我喺你哋嗰度施行嘅奇迹，如果喺泰尔同埋西顿施行嘅话，嗰度嘅人一早就着起粗布，坐喺灰嗰度悔改嘞。 14 所以喺审判嘅时候，你哋遭受嘅惩罚，会比泰尔同埋西顿嘅更加重。 15 迦百农啊，你会被捧上天咩？其实你会被贬到坟墓呀！

16 “听从你哋嘅，即系听从我。漠视你哋嘅，即系漠视我。漠视我嘅，即系漠视派我嚟嘅嗰位。”

17 嗰70个人开开心心噉返嚟，话：“主啊，因为用你嘅名，连邪灵都顺服我哋呀。” 18 耶稣同佢哋讲：“我见到撒但好似闪电一样从天上坠落嘞。 19 我赐咗权力俾你哋，令你哋可以将啲蛇同埋蝎子践踏喺脚下，仲可以战胜能力强大嘅敌人，绝对冇任何嘢能够伤害你哋。 20 不过，唔好因为邪灵顺服你哋而开心，应该因为你哋嘅名已经记录喺天上而开心。” 21 就喺嗰个时候，耶稣充满神圣力量，就非常喜乐，佢话：“爸爸，天地嘅主啊，我公开赞美你，因为你将呢啲事向有智慧、有学问嘅人小心隐藏起嚟，但系就向小朋友揭示出嚟。冇错，爸爸，因为呢个系你钟意*嘅做事方式。 22 我爸爸已经将一切都交俾我嘞。除咗爸爸，冇人知道我系边个；除咗我同埋我愿意启示嘅人，亦都冇人知道爸爸系边个。”

23 耶稣拧转身，私下同门徒讲：“边个睇见你哋而家睇见嘅事，就有福嘞*。 24 我话俾你哋听，好多先知同埋君王，好想睇到你哋而家睇到嘅事，但系都睇唔到，好想听到你哋而家听到嘅事，但系都听唔到。”

25 有一个精通摩西法典嘅人想试探耶稣，企起身话：“老师，我应该做啲乜嘢先可以得到永远嘅生命呀？” 26 耶稣同佢讲：“法典上面点样写呢？你读过嘅，你点样理解呢？” 27 佢回答话：“你要‘全心，全意，全力，用全部生命爱耶和华*你嘅上帝’，亦都要‘爱人如己’。” 28 耶稣同佢讲：“你答得啱。你继续噉样做，就会得到生命。”

29 嗰个人想证明自己系啱嘅，就同耶稣讲：“边啲人系我应该爱嘅呢？” 30 耶稣同佢讲：“有一个人由耶路撒冷落去耶利哥，途中俾人打劫。强盗剥咗佢嘅衫，打到佢半死，揼低佢就走咗嘞。 31 咁啱有一个祭司经嗰条路落去，见到佢，就从另一边走咗。 32 同样，有个利未族人经过嗰度，见到佢，亦都行另一边走咗。 33 但系，有一个撒马利亚人途经嗰度，一见到佢，就好同情佢。 34 呢个人行上前，攞油同埋酒倒喺佢嘅伤口，然后帮佢包扎，又扶佢骑上自己嘅牲畜，带到客店照顾佢。 35 第二日，撒马利亚人拎咗两银元*俾客店老板，同佢讲：‘请照顾佢吖，如果仲有啲乜嘢使费，我返嚟一定会补返俾你。’ 36 你觉得呢三个人当中，边个爱遇劫嗰个人呢？” 37 佢话：“系怜悯佢嘅嗰个人。”耶稣同佢讲：“噉你就照住去做啦。”

38 喺路上，耶稣入咗一条村庄。有一个女人叫做马大，请耶稣去佢屋企食饭。 39 马大有个妹妹*叫马利亚，一直坐喺主嘅脚前听佢嘅教导， 40 而马大就分心，去准备好多嘢。于是，佢嚟同耶稣讲：“主啊，我妹妹*由得我一个人准备晒所有嘢，你觉得冇问题咩？你叫佢嚟帮吓我啦。” 41 主回答话：“马大，马大，你为太多事忧虑不安嘞。 42 其实需要嘅唔多，甚至一样就够嘞。马利亚拣咗最好嘅一份，冇人可以喺佢嗰度攞走。”

11 有一次，耶稣喺一个地方祷告。祷完告，有一个门徒同佢讲：“主啊，求你教我哋祷告，好似约翰教佢嘅门徒祷告噉吖。”

2 耶稣同佢哋讲：“你哋祷告，要话：‘爸爸，祈求你嘅名受到尊重，被视为神圣*。祈求你嘅王国嚟到施行统治。 3 求你按我哋每日嘅需要，每日赐食物俾我哋。 4 求你宽恕我哋嘅罪，因为我哋都宽恕咗得罪我哋嘅人*。面对引诱嗰阵，求你帮助我哋唔好屈服。’”

5 耶稣又同佢哋讲：“假设你有个朋友，你半夜去到佢嗰度，同佢讲：‘朋友，借三个饼俾我吖。 6 我有个朋友啱啱喺其他地方嚟到我呢度，我冇咩可以招呼佢。’ 7 不过，嗰个人喺屋入面回答话：‘唔好烦我嘞。门已经锁咗，我同啲小朋友都上咗床瞓觉嘞，我唔方便起身拎饼俾你呀。’ 8 我话俾你哋听，就算嗰个人系你嘅朋友，佢都唔一定会起身俾啲咩你，但系由于你大胆坚持，佢就会起身将你需要嘅俾你。 9 所以我同你哋讲，要不断恳求，就会俾你哋；不断去揾，就会揾到；不断敲门，就会开门俾你哋。 10 因为边个恳求，都会得到；边个去揾，都会揾到；边个敲门，都会开门俾佢。 11 你哋当中做爸爸嘅，如果你哋嘅仔问你攞条鱼，边个会攞条蛇当鱼俾佢呢？ 12 如果你哋嘅仔问你攞只蛋，边个会攞蝎子俾佢呢？ 13 你哋虽然系罪人*，都识得送好嘅嘢俾仔女，何况天父，唔系更加会将神圣力量赐俾恳求佢嘅人咩？”

14 耶稣驱逐咗一个令人变哑嘅邪灵。邪灵一出嚟，嗰个人就讲到嘢嘞。大家都好惊讶。 15 不过有人话：“佢驱逐邪灵系靠住邪灵嘅首领别西卜*嘅啫。” 16 仲有人想试探佢，要求佢奉上帝嘅名施行一个神迹*。 17 耶稣知道佢哋嘅谂法，就同佢哋讲：“一个国家分裂内讧，就会灭亡；一个家庭分裂内讧，就会破碎。 18 如果撒但都分裂内讧，佢嘅国家点能够继续存在呢？你哋话，我驱逐邪灵靠嘅系别西卜。 19 如果我驱逐邪灵系靠别西卜，噉你哋嘅门徒驱逐邪灵又系靠边个呢？所以，你哋嘅门徒会证明你哋系错㗎*。 20 但系，如果我驱逐邪灵系靠住上帝嘅力量*，噉上帝嘅王国喺你哋冇谂过嘅时候已经嚟到嘞。 21 一个强壮嘅人全副武装，守卫自己间屋，冇人能够攞走佢啲财物。 22 不过，如果有个强壮过佢嘅人嚟攻击佢，打赢咗佢，嗰个人就会将佢倚靠嘅全副武装攞走，仲会将抢返嚟嘅嘢分俾其他人。 23 唔企喺我呢边嘅，即系反对我；唔同我一齐将人聚集到我呢度嘅，就系将人驱散。

24 “有个邪灵*从一个人身上出嚟，去匀干旱嘅地方，想揾个地方休息，但系揾唔到，就话：‘我要搬返去之前嗰间屋。’ 25 佢去到之后，发现入面打扫干净，装饰好晒， 26 就去带埋七个比自己更邪恶嘅灵体入去，住喺里面。嗰个人最终嘅情况就比之前更加差嘞。”

27 耶稣讲呢啲说话嘅时候，人群当中有一个女人大声同佢讲：“怀胎生你同埋乳养你嘅有福嘞！*” 28 耶稣话：“唔系，听见上帝嘅话语又遵守嘅人先至有福呀！”

29 民众聚集嘅时候，耶稣话：“呢一代人系邪恶㗎，佢哋想睇神迹*，但系除咗约拿嘅神迹，佢哋就唔会睇到其他神迹嘞。 30 约拿嘅事成为咗尼尼微人眼中嘅神迹，同样，人子嘅事都会成为呢一代人眼中嘅神迹。 31 审判嘅时候，南方女王会同呢一代人一齐复活，而且会表明呢一代人有罪，因为佢曾经由遥远嘅地方*嚟到，要听所罗门嘅智慧之言。不过你哋睇，呢度有一个比所罗门更加重要嘅人。 32 审判嘅时候，尼尼微人会同呢一代人一齐复活，而且会表明呢一代人有罪，因为尼尼微人听咗约拿传讲嘅信息就悔改。但系你哋睇，呢度有一个比约拿更重要嘅人。 33 人点完灯，唔会收埋盏灯，亦都唔会用篮*冚住，而系会摆喺灯台上面，等入嚟嘅人见到光。 34 眼睛系身体嘅灯。如果你目光专注*喺一样嘢，全身就会光明；但系如果你好贪心*，目光放喺好多样嘢上面，身体就会黑暗。 35 所以你要小心，因为你里面嘅光可能系黑暗嘅。 36 你全身都光明，一啲黑暗都冇，就会光辉灿烂，好似灯光照耀你一样。”

37 耶稣讲完呢啲嘢，有个法利赛派嘅人邀请佢一齐食饭，佢就入去坐低*。 38 呢个法利赛派嘅人见佢食饭之前，冇按照传统去洗手*，就觉得奇怪。 39 主同佢讲：“你哋法利赛派洗干净杯碟嘅外面，但系心里面就充满贪婪同埋邪恶。 40 不明事理嘅人啊！创造身体嘅嗰位，唔系都创造咗内心咩？ 41 要发自内心向穷人施与，你哋噉样做就完全洁净嘞。 42 你哋法利赛派有祸嘞，因为薄荷、芸香同埋其他*用嚟做香料嘅植物*，你哋都奉献十分之一，但系公正*同埋爱上帝嘅心，你哋反而漠视咗！前一类嘅事系你哋应该做嘅，但后一类嘅事你哋更加唔应该漠视。 43 你哋法利赛派有祸嘞，因为你哋钟意坐会堂入面最好嘅座位*，钟意人喺市集广场度恭敬噉同你哋打招呼！ 44 你哋有祸嘞，因为你哋好似唔显眼*嘅坟墓，人喺上面行过都唔知！”

45 有个精通摩西法典嘅人噉样回应耶稣：“老师，你噉讲，连我哋都侮辱埋㖞。” 46 耶稣话：“你哋精通法典嘅人都有祸嘞，因为你哋叫人背负重担，但系呢啲重担，你哋连用一只手指去掂吓都唔肯*！

47 “你哋有祸嘞，因为你哋为先知修建坟墓，其实嗰啲先知系俾你哋祖先杀死㗎！ 48 你哋唔单止清楚你哋祖先嘅所作所为，仲认同佢哋。以前佢哋杀死先知，而家你哋就为先知修建坟墓。 49 所以充满智慧嘅上帝都讲过：‘我会派先知同使徒去佢哋嗰度，有啲会俾佢哋杀死，有啲会俾佢哋迫害。 50 噉从世界奠基以嚟杀害所有先知嘅血债，都要向呢一代追讨， 51 由亚伯嘅血债开始，去到喺祭坛同圣殿之间遇害嘅撒迦利亚嘅血债为止。’我话俾你哋听，佢哋嘅血债要向呢一代追讨。

52 “你哋精通法典嘅人有祸嘞，因为你哋攞走咗知识嘅锁匙，自己唔入去，连入紧去嘅人，你哋都要阻止！”

53 耶稣喺嗰度出嚟之后，抄经士同法利赛派就群情汹涌，不停质问佢， 54 想揾机会由佢口中揾把柄。

12 嗰时，有成千上万嘅民众聚集，佢哋都逼埋一齐，甚至踩到其他人。耶稣同啲门徒讲：“要提防法利赛派嘅酵，即系虚伪。 2 小心掩盖嘅事一定会显露出嚟，秘密亦都一定会俾人知道。 3 所以你哋私下讲嘅，会公开俾人听到；你哋喺自己间房细细声讲嘅，会喺屋顶广传开去。 4 朋友，我话俾你哋听，嗰啲只能够杀死你，但系唔能够再对你做啲咩嘅，唔使惊佢哋。 5 我要话俾你哋知应该畏惧边个，就系有权杀死你之后，仲有权将你揼入欣嫩谷*嘅。我话俾你哋听，应该敬畏佢。 6 五只麻雀唔系卖两个小钱*咋咩？但系上帝连一只都唔会遗忘*。 7 其实佢连你哋嘅头发都全部数过晒。唔使惊，你哋比好多麻雀贵重得多！

8 “我话俾你哋听，边个喺人哋面前承认系我嘅门徒，人子喺上帝嘅天使面前都会认佢。 9 但系边个喺人哋面前唔认我，人子喺上帝嘅天使面前都唔会认佢。 10 边个讲说话冒犯人子，都可以得到宽恕；但系边个亵渎神圣力量，就唔会得到宽恕。 11 人哋带你哋去公开审讯*，或者带你哋去政府官员同掌权嘅人面前嗰阵，唔使担心点样辩护，或者讲啲乜嘢， 12 因为喺嗰个时候，神圣力量会教你哋讲应该讲嘅说话。”

13 人群当中有一个人同耶稣讲：“老师，请你吩咐我嘅兄弟同我分家产啦。” 14 耶稣同佢讲：“朋友，边个委任我做你哋两个人嘅审判官或者仲裁人呢？” 15 然后耶稣同民众讲：“要小心提防各种各样嘅贪婪，因为人就算几咁有钱，佢拥有嘅嘢都唔能够令佢有生命。” 16 耶稣就同佢哋讲咗个比喻：“有个富翁，佢嘅田地出产好丰富， 17 就心谂：‘我啲收成冇地方储存嘞，点算呢？’ 18 佢话：‘噉啦，我拆晒啲仓，起过啲大啲嘅。我要将我啲谷物同埋财物放晒入去。 19 然后我会同自己讲：“我储咗咁多财物，可以享用好多年，即管轻轻松松，饮饮食食，慢慢享受啦！”’ 20 但系上帝同佢讲：‘不明事理嘅人呀，今晚你就会冇咗条命，你储嘅嘢要俾边个呢？’ 21 其实，边个为自己积存财宝，但系喺上帝眼中唔富足嘅，都系一样。”

22 耶稣又同门徒讲：“所以我话俾你哋知，唔好再为生命忧虑食啲乜嘢，为身体忧虑着啲乜嘢。 23 生命比食物更加宝贵，身体亦都比着嘅衫更加宝贵。 24 试谂吓，渡鸦冇撒种亦都冇收割，冇粮仓亦都冇库房，但系上帝都养活佢哋。你哋唔系比飞鸟宝贵得多咩？ 25 边个可以因为忧虑而令寿命延长一啲*呢？ 26 你哋连延长少少*都做唔到，点解仲要忧虑其余嘅事呢？ 27 你哋谂吓百合花点样生长吖。百合花唔使辛苦工作，唔使纺织，但系我话俾你哋听，就算喺所罗门嘅繁荣盛世，佢所着嘅都比唔上呢啲花嘅其中一朵呀！ 28 点解你哋咁冇信心呢？野外嘅花草，今日仲喺度，听日就揼入火炉入面烧嘞，但系上帝都赐咁靓嘅衫俾佢哋，更何况你哋呢？ 29 你哋唔好成日谂住食乜嘢、饮乜嘢，亦都唔好再为呢啲事过度担心。 30 呢一切都系世人*努力追求㗎，你哋需要呢啲嘢，你哋嘅天父系知道嘅。 31 只要你哋一直将上帝嘅王国放喺生活嘅第一位，噉呢啲嘢就会赐俾你哋嘞。

32 “小群羊啊，唔使惊，你哋嘅天父好乐意将王国赐俾你哋。 33 要卖咗你哋嘅财物，去接济穷人。要为自己预备永不破损嘅钱袋，喺天上积存取之不尽嘅财宝。喺嗰度嘅财宝，贼接近唔到，亦都唔会有虫*蛀蚀。 34 你哋嘅财宝喺边度，你哋嘅心亦都喺边度。

35 “你哋要准备好，束紧腰带*，点埋灯， 36 就好似奴隶等主人参加完婚礼返嚟一样。主人嚟到敲门，佢哋就即刻开门俾佢。 37 主人嚟到，见到奴隶警醒守望，嗰啲奴隶就有福嘞*！我好肯定噉同你哋讲，主人会束好腰带*，叫奴隶坐低食饭，仲会喺旁边服侍佢哋。 38 主人如果喺第二更*，甚至第三更*先至嚟到，见到奴隶准备好，噉佢哋就有福嘞！ 39 你哋要记得，一个家主如果一早知道贼几时会嚟，就唔会由得个贼偷偷入屋嘞。 40 你哋都要随时准备好，因为喺你哋认为冇乜可能嘅时刻，人子就嚟嘞。”

41 彼得话：“主啊，你呢个比喻系咪净系同我哋讲㗎？定系都同其他人讲嘅呢？” 42 主话：“边个系忠信睿智嘅管家，受主人委派管理全体家仆，喺适当嘅时候将需要嘅食物分配俾大家呢？ 43 佢嘅主人嚟到，见到奴隶就系噉样做，奴隶就有福嘞！ 44 我可以肯定噉同你哋讲，主人会委派佢管理所有财物。 45 但系如果奴隶心谂，‘主人唔会咁快返嘅’，仲郁手打其他奴仆，而且饮饮食食，仲饮醉酒， 46 奴隶嘅主人就会喺佢冇谂过嘅日子，喺佢唔知道嘅时刻嚟到，对佢施行最严厉嘅惩罚，令佢同不忠嘅人有同样嘅下场。 47 奴隶明白主人嘅意思，但系唔去准备，亦都冇照佢嘅意思去做，受到嘅责打就会多啲嘞。 48 而唔明白主人意思嘅，就算做咗应该受责打嘅事，受到嘅责打都会少啲。所以，俾边个多啲，就向边个攞多啲；交托多啲俾边个，就向边个额外攞多啲*。

49 “我嚟系要喺地上点火。火已经点着嘞，我仲求乜嘢呢？ 50 我将会经历一个浸礼，喺呢个浸礼完成之前，我系好痛苦㗎！ 51 你哋以为我嚟系要为地上带嚟和睦*咩？我话俾你哋知，唔系和睦，而系分裂。 52 从今以后，一家五口要分裂，三个对抗两个，两个对抗三个。 53 佢哋会分裂，阿爸对抗阿仔，阿仔对抗阿爸；阿妈对抗阿女，阿女对抗阿妈；奶奶对抗心抱，心抱对抗奶奶。”

54 耶稣亦都同民众讲：“你哋见到西边有云升起，就会即刻讲‘暴风雨嚟紧嘞’，结果真系噉。 55 你哋见到吹起南风，就讲‘热浪嚟紧嘞’，而结果真系噉。 56 虚伪嘅人，你哋识得观察天地气象，点解唔识得观察呢个时代发生嘅事呢？ 57 点解你哋唔自己判断一下，点样做先至系啱嘅呢？ 58 举个例，你同控告你嘅人一齐去见地方官，就应该趁仲未去到，尽力同佢和解。如果唔系，佢将你带去审判官面前，审判官将你交俾法庭嘅差役，差役就将你韫入监狱嘞。 59 我话俾你知，你唔还清最后一分钱*，就唔使指意放监。”

13 喺嗰个时候，有几个在场嘅人同耶稣讲，有啲加利利人喺献祭嘅时候俾彼拉多杀咗。 2 耶稣就答佢哋：“系咪因为呢啲加利利人被杀害，你哋就觉得佢哋嘅罪比其他加利利人更大呢？ 3 我同你哋讲，错嘞。如果你哋唔悔改，都系会死。 4 西罗亚嘅塔楼倒塌嗰阵，压死咗18个人，你哋系咪就觉得佢哋嘅罪比耶路撒冷其他居民更大呢？ 5 我同你哋讲，错嘞。如果你哋唔悔改，都系会死。”

6 耶稣又讲咗一个比喻：“有个人喺葡萄园入面种咗棵无花果树。佢嚟睇吓有冇果实，但系一个都揾唔到， 7 佢就同葡萄园工人讲：‘我喺呢棵无花果树揾果实，已经三年嘞，但系一个都揾唔到。斩咗佢啦！点解要挜住啲土地呢？’ 8 葡萄园工人答佢：‘主人，留多一年啦，我会挖松棵树周围嘅泥土施肥。 9 如果将来结到果实，噉好好，冇嘅话，先至斩咗佢啦。’”

10 有一个安息日，耶稣喺会堂入面教导人。 11 有个女人18年嚟都俾邪灵附身，身体虚弱*，弯腰驼背，冇办法企直。 12 耶稣见到佢，就同佢讲：“你嘅病已经医好嘞*。你唔再虚弱嘞。” 13 耶稣将双手放喺佢身上，佢即刻企返直，赞美*上帝。 14 但会堂主管见耶稣喺安息日医病，就好嬲，同民众讲：“有六日可以做嘢，你哋大可以喺呢六日嚟睇病，唔应该喺安息日噉做。” 15 主同佢讲：“你哋呢啲虚伪嘅人，唔通你哋喺安息日，就唔会解开棚里面嘅牛驴，带佢哋去饮水咩？ 16 呢个女人系亚伯拉罕嘅子孙，佢俾撒但捆绑咗18年，唔通喺安息日唔应该解开佢嘅枷锁咩？” 17 反对耶稣嘅人因为佢嘅呢番说话而觉得羞愧。不过民众因为佢所做一切奇妙嘅事而觉得好开心。

18 于是耶稣话：“上帝嘅王国好似乜嘢呢？我可以将佢比喻做咩呢？ 19 佢好似一粒芥菜嘅种子，有人拎去种喺自己块田度，就生长成一棵树，天上嘅雀仔都喺树枝上面筑巢。”

20 耶稣又话：“我可以将上帝嘅王国比喻做乜嘢呢？ 21 佢好似酵，有个女人拎去同三大份*面粉混合埋一齐，最终成个面团都发咗酵。”

22 耶稣喺去耶路撒冷嘅途中，逐城逐村教导人。 23 有个人同佢讲：“主啊，系咪得好少人会得救呢？”佢同民众讲： 24 “你哋要竭尽全力，穿过窄门入去。我话俾你哋知，将来有好多人想入去，但系入唔到。 25 因为间屋嘅主人起身锁门之后，你哋会企喺出面敲门话：‘我主，开门俾我哋吖。’不过佢会答：‘我唔知道你哋系边个*。’ 26 到时你哋会话：‘我哋同过你一齐食饭饮酒，你都喺我哋嘅大街教导过人㗎！’ 27 佢会同你哋讲：‘我唔知道你哋系边个*。走开，你哋呢啲作恶*嘅人！’ 28 你哋见到亚伯拉罕、以撒、雅各同埋所有先知都喺上帝嘅王国入面，而自己就被揼咗去出面，你哋就会喺嗰度痛哭流泪，咬牙切齿嘞。 29 将来会有人喺世界各地*嚟到，喺上帝嘅王国入面享用宴席*。 30 有啲人而家系最后嘅，将来系最先嘅；亦都有啲人而家系最先嘅，将来系最后嘅。”

31 就喺嗰个时候，有几个法利赛派嘅人嚟同耶稣讲：“你走啦，离开呢度，希律想杀死你呀。” 32 耶稣同佢哋讲：“你哋去同嗰只狐狸讲：‘今日同听日我都要驱逐邪灵，帮人医病，第三日就会完成我要做嘅。’ 33 虽然系噉，我今日、听日、后日都要继续向前行，因为先知唔应该喺耶路撒冷以外嘅地方被杀。 34 耶路撒冷，耶路撒冷，你经常杀死先知，又用石头打死上帝派嚟你呢度嘅人。我好多次想将你嘅仔女聚集埋一齐，就好似母鸡将鸡仔聚集到佢对翼下面！不过，你哋唔愿意。 35 睇吓！你哋嘅圣殿被抛弃，留返俾你哋自己嘞。我同你哋讲，你哋绝对唔会再见到我，直到你哋讲：‘奉耶和华*嘅名而嚟嘅嗰位有福嘞！’”

14 另一次，耶稣喺安息日去一个法利赛派首领嘅屋企食饭。在场嘅人密切注视佢。 2 咁啱有个患咗水肿嘅病人喺佢面前。 3 耶稣就问精通摩西法典嘅人同埋法利赛派：“喺安息日医病，合唔合法呢？” 4 佢哋唔出声。耶稣就将手放喺嗰个人身上，医好佢，然后请佢离开。 5 耶稣同佢哋讲：“你哋当中有边个喺安息日，见到自己个仔或者公牛跌咗落井，唔即刻拉返佢上嚟呢？” 6 佢哋无言以对。

7 耶稣留意到宾客都拣最好嘅位嚟坐，就同佢哋讲咗个比喻： 8 “你受到邀请去参加婚宴嗰阵，唔好坐喺最好嘅位。如果唔系，到时有比你尊贵嘅人都受邀请， 9 噉邀请你哋两个嘅人就嚟同你讲：‘请让座俾呢一位吖。’到时，你就会好尴尬，唯有起身，坐去最差嘅座位嘞。 10 你受邀请嗰阵，要坐喺最差嘅位，噉邀请你嘅人嚟到，就会同你讲：‘朋友，请坐去好啲嘅座位吖。’到时，你喺所有宾客面前就有面嘞。 11 边个抬高自己，就会被贬低；边个内心谦卑，就会被抬高。”

12 跟住耶稣同邀请佢嘅人讲：“你安排午宴或者晚宴嗰阵，唔好邀请你啲朋友、兄弟、亲戚或者有钱嘅邻居嚟，因为佢哋第日都可能会请返你，你就得到回报。 13 相反，你安排宴席嘅时候，要请穷嘅、跛嘅、盲嘅，同埋其他有残疾嘅人， 14 噉你就有福嘞*，因为佢哋冇咩可以回报你。正义嘅人复活嘅时候，你就会得到回报。”

15 有个宾客听到呢一切，就同耶稣讲：“喺上帝王国入面享用宴席嘅人有福嘞。”

16 耶稣同佢讲：“有个人举办咗一个盛大嘅晚宴，邀请咗好多人。 17 到咗晚宴嘅时候，佢派奴隶去同受邀请嘅人讲：‘嚟啦，所有嘢都准备好嘞。’ 18 但系佢哋都不约而同噉揾理由拒绝。第一个话：‘我买咗块田，要去睇吓。真系唔好意思嘞，我嚟唔到*。’ 19 另一个话：‘我买咗十只牛*，要去检查吓。真系唔好意思嘞，我嚟唔到。’ 20 仲有一个话：‘我啱啱结咗婚，所以嚟唔到呀。’ 21 奴隶返嚟将所有嘢讲俾主人知。主人就好嬲，同奴隶讲：‘快啲去城入面嘅大街小巷，将穷嘅、盲嘅、跛嘅，同埋其他有残疾嘅人都带嚟呢度。’ 22 后嚟，奴隶话：‘主人，我已经照你嘅吩咐去做，不过仲有位㖞。’ 23 主人同奴隶讲：‘你去外面嘅大路同小径，促请啲人入嚟，等我屋企坐满人。 24 我话俾你哋知，原本受到邀请嘅人，冇一个可以享用我嘅晚宴。’”

25 有一大班人同耶稣一齐行。耶稣拧转身同佢哋讲： 26 “跟从我嘅人，如果爱自己嘅爸爸、妈妈、太太、仔女、兄弟、姊妹，甚至自己嘅生命，多过爱我*，就唔能够做我嘅门徒。 27 边个唔孭起自己嘅苦刑柱嚟跟从我，就唔能够做我嘅门徒。 28 例如，你哋想起一座塔，有边个唔会先坐低计算使费，睇吓起唔起得成呢？ 29 如果唔系嘅话，佢可能打咗地基，但系完唔到工，旁观嘅人就笑佢， 30 话：‘呢个人开始咗工程，但系就完成唔到。’ 31 又例如，一个有一万士兵嘅王，要迎战一个率领两万士兵嚟攻打佢嘅王，佢点会唔先坐低商议，睇吓抵唔抵抗得到呢？ 32 如果抵抗唔到，就应该趁敌军仲喺好远，派大使团去求和。 33 同样，你哋边个唔放弃自己嘅所有财物*，就唔能够做我嘅门徒。

34 “盐本身系好嘅，但系如果盐唔再咸嘅话，点样令佢有返咸味呢？ 35 呢啲盐唔适合撒落泥土，亦都唔适合加落肥料度，人就唯有揼咗佢。有耳仔嘅，就应该留心听。”

15 收税人同罪人全部都聚集喺耶稣周围，听佢讲说话。 2 法利赛派同抄经士就细细声噉议论话：“呢个人居然乐意接待罪人，同佢哋一齐食饭。” 3 于是耶稣同佢哋讲咗个比喻： 4 “你哋当中边个有100只绵羊，走失咗一只，唔会将99只留喺旷野，去揾走失嗰只，直到揾到呢？ 5 佢揾到嘞，就将只羊放喺膊头度，非常开心。 6 佢返到屋企，就请朋友同邻居嚟，同佢哋讲：‘同我一齐庆祝吖，因为我已经揾返嗰只走失嘅绵羊。’ 7 我话俾你哋知，同样，一个悔改嘅罪人，会比99个唔使悔改嘅义人，为天上带嚟更大嘅喜乐。

8 “再举个例，一个女人有十个银币*，唔见咗一个，点会唔点灯打扫间屋，细心噉揾，直到揾到呢？ 9 佢揾到之后，就请自己啲朋友*同邻居嚟，话：‘同我一齐庆祝吖，因为我已经揾返嗰个唔见咗嘅银币。’ 10 我话俾你哋知，上帝嘅天使都同样为一个悔改嘅罪人喜乐。”

11 耶稣又话：“有个人有两个仔。 12 细仔同爸爸讲：‘爸爸，请将我应得嘅嗰份财产俾我。’爸爸就将家产分俾佢哋。 13 只系过咗几日，细仔就带晒所有嘢，去咗一个好远嘅国家。佢喺嗰度过住放纵嘅生活*，挥霍晒自己啲财产。 14 使晒啲钱之后，嗰度有大饥荒，佢就咩都冇晒， 15 唯有投靠当地一个居民。嗰个人叫佢去野外嘅一块地度放猪。 16 佢好肚饿，饿到想攞猪食嘅嘢*嚟充饥，不过就冇人愿意俾嘢佢食。

17 “佢醒悟之后，就话：‘我爸爸有咁多工人*，个个都有充足嘅食物，但系我就要喺呢度饿死！ 18 我要起程返去爸爸嗰度，同佢讲：“爸爸，我得罪咗天，亦都得罪咗你。 19 我唔再配称为你个仔嘞。你就当我系一个工人*啦。”’ 20 于是，佢起程返去爸爸嗰度。佢仲未到屋企，爸爸离远见到，就好可怜佢，跑过去揽住佢，亲切噉锡佢。 21 个仔同佢讲：‘爸爸，我得罪咗天，亦都得罪咗你。我唔再配称为你个仔嘞。’ 22 不过爸爸就同奴隶讲：‘快啲拎最靓嗰件袍出嚟，帮佢着，帮佢戴戒指同着鞋。 23 仲要拉嗰只肥美嘅公牛犊嚟㓥咗佢，我哋要食餐好嘅庆祝吓， 24 因为我呢个仔系死而复生、失而复得㗎。’佢哋就开始欢乐庆祝。

25 “大仔当时喺田度。佢返嚟，就到屋企嗰阵，听到音乐同跳舞嘅声音， 26 就叫个仆人嚟，问佢发生紧咩事。 27 仆人同佢讲：‘你细佬返咗嚟。你爸爸见佢平安无事噉返嚟，就㓥咗嗰只肥美嘅公牛犊。’ 28 佢就好嬲，唔肯入去。爸爸就出嚟劝佢。 29 佢同爸爸讲：‘咁多年嚟我一直好似奴隶噉帮你做嘢，从来冇唔听你嘅吩咐，不过你连一只山羊仔都冇俾过我，等我同啲朋友一齐享用。 30 但系你呢个仔同妓女一齐挥霍晒*你啲家产，而家佢一返嚟，你就为咗佢㓥咗嗰只肥美嘅公牛犊。’ 31 爸爸同佢讲：‘阿仔啊，你一直同我一齐，我嘅所有嘢都系你㗎， 32 而你呢个细佬系死而复生、失而复得㗎，我哋好应该开开心心，庆祝佢返嚟。’”

16 耶稣同门徒讲：“有一个富翁，佢有个管家，有人指控呢个管家浪费富翁嘅财物。 2 富翁叫管家嚟，同佢讲：‘我听人讲，你做咗啲唔好嘅事，将你做管家负责嘅帐目交出嚟。你唔使再管理呢个家嘞。’ 3 管家心谂：‘主人唔俾我做管家嘞，点算呢？锄地又唔够力，乞食又怕尴尬。 4 吖！我知可以点做嘞，噉就算我俾人炒咗，冇得做管家，都有人接待我去佢哋屋企。’ 5 管家就逐一叫欠佢主人债嘅人过嚟，同第一个讲：‘你争我主人几多呀？’ 6 佢话：‘100桶*橄榄油。’管家话：‘拎返你嘅借据，坐低，快啲改成50桶。’ 7 管家又同另一个讲：‘你呢？你争咗几多呀？’佢话：‘100袋*小麦。’管家话：‘拎返你嘅借据，改成80袋。’ 8 主人就称赞管家，话佢虽然唔正义，但系有实用嘅智慧*。呢个世界嘅人*喺处理世俗事务方面，比崇拜上帝嘅人*更有实用嘅智慧。

9 “我话俾你哋听，要用呢个不义世界嘅钱财结交朋友。噉样，到钱财冇用嘅时候，佢哋就可以接你哋去永恒嘅居所。 10 人喺最细微嘅事上忠心，喺好多事上都忠心；人喺最细微嘅事上不义，喺好多事上都不义。 11 如果你哋用不义世界嘅钱财嗰阵唔忠心，边个会将真正嘅财富托付俾你哋呢？ 12 如果你哋喺用其他人嘅嘢嗰阵唔忠心，边个仲会将本来要俾你哋嘅嘢交俾你哋呢？ 13 一个仆人唔能够做两个主人嘅奴隶，佢唔系憎恨*呢个，钟意另一个，就系对呢个忠心，睇唔起另一个。你哋唔能够又做上帝嘅奴隶，又做财富嘅奴隶。”

14 法利赛派一向都好贪钱。佢哋听到耶稣噉讲，就嘲笑耶稣。 15 耶稣同佢哋讲：“你哋做嘅嘢系想人觉得你哋好正义，但系上帝知道你哋嘅内心系点。其实受世人尊崇嘅，反而系上帝厌恶嘅*。

16 “法典同先知书一直受到宣扬，直到约翰传道嘅日子。由嗰阵时开始，上帝王国嘅好消息就受到宣扬，各种各样嘅人都向住上帝嘅王国奋力前进。 17 其实，就算天地消逝，法典上嘅一笔一画*都唔会消失，全部都会实现。

18 “边个同太太离婚*，娶另一个女人，就系通奸；边个娶咗同丈夫离婚*嘅女人，亦都系通奸。

19 “有一个富翁，着嘅系紫色衫*同用细麻做嘅衫，佢日日享乐，生活奢侈。 20 有个乞衣叫拉撒路，佢全身皮肉溃烂，经常俾人带去富翁门口。 21 为咗充饥，佢好想食富翁张台上面跌落嚟嘅碎屑。甚至有啲狗会嚟舔佢溃烂嘅皮肉。 22 后嚟个乞衣死咗，天使就带佢去亚伯拉罕身边*。

“富翁亦都死咗，俾人埋葬咗。 23 喺坟墓*入面，佢好痛苦，佢岳高头，离远见到亚伯拉罕同亚伯拉罕身边*嘅拉撒路， 24 就大声话：‘我嘅祖先*亚伯拉罕啊，可怜吓我啦！我喺熊熊烈火入面好痛苦呀。求你派拉撒路用指尖点啲水，滴落我条脷，等条脷凉啲啦。’ 25 亚伯拉罕话：‘仔啊，唔好忘记你一生享福，而拉撒路就受咗唔少苦。佢而家喺呢度得到安慰，而你就好痛苦。 26 再加上喺你我之间隔咗个鸿沟，要由呢度过去你哋嗰度系唔可能嘅，要喺你哋嗰度过嚟呢度都系唔可能嘅。’ 27 富翁话：‘既然系噉，我嘅祖先啊，求你派拉撒路去我爸爸屋企。 28 因为我有五个兄弟，佢可以向佢哋彻底作见证，噉佢哋就唔使嚟到呢个痛苦嘅地方。’ 29 亚伯拉罕话：‘佢哋有摩西同先知写嘅说话可以听从吖。’ 30 富翁话：‘我嘅祖先亚伯拉罕啊，佢哋唔会听㗎。但系如果有死人复活，去到佢哋嗰度，佢哋就会悔改嘞。’ 31 亚伯拉罕同佢讲：‘如果佢哋唔听从摩西同埋先知写嘅说话，就算有死人复活，都说服唔到佢哋㗎。’”

17 耶稣同门徒讲：“绊脚石出现系无可避免㗎，但系将绊脚石带嚟嘅人有祸嘞！ 2 呢种人颈上面挂一块大磨石，俾人揼落海，都好过佢令呢度一个卑微嘅人跌倒呀。 3 你哋要小心。你嘅弟兄犯咗罪，你就要严厉警告佢；如果佢悔改，就要宽恕佢。 4 就算佢一日得罪你七次，每一次都返嚟同你讲，‘我悔改嘞’，你都要宽恕佢。”

5 使徒同主讲：“求你令我哋有更坚强嘅信心*吖。” 6 主就话：“就算你哋嘅信心得芥菜种子咁细，只要你哋同呢棵黑桑树讲，‘连根拔起，种喺海入面啦’，棵树都会服从你哋。

7 “当奴隶喺田度犁完地，或者佢牧羊返嚟之后，你哋有边个会同佢讲‘快啲过嚟坐低食饭吖’？ 8 梗系唔会啦，你会同佢讲‘你着返条围裙，同我准备晚餐，服侍我。等我食完之后，你先可以食’。 9 奴隶做好主人派佢去做嘅嘢，唔通主人要同佢讲多谢咩？ 10 同样，你哋做好主人委派嘅所有嘢，都要讲：‘我哋系冇用嘅奴隶。我哋做嘅，只系尽本分啫。’”

11 耶稣去耶路撒冷嘅途中，经过撒马利亚同加利利交界嘅地方。 12 佢去到一个村庄，有十个麻风病人见到佢，不过佢哋都离远企喺度。 13 佢哋大嗌：“耶稣啊，老师，可怜吓我哋啦！” 14 耶稣见到佢哋，就同佢哋讲：“你哋去俾祭司检查吓。”佢哋就离开，途中已经好返*。 15 其中一个人见自己好返，就返嚟大声赞美*上帝。 16 佢跪喺耶稣脚前下拜，多谢耶稣。呢个人系撒马利亚人。 17 耶稣话：“唔系有十个人医好咗*嘅咩？其余九个喺边呢？ 18 除咗呢个外族人，冇人返嚟赞美*上帝嘞咩？” 19 耶稣同佢讲：“起身，走啦。你嘅信心令你好返嘞。”

20 法利赛派嚟问耶稣，上帝嘅王国会喺几时嚟到。耶稣答佢哋：“上帝嘅王国唔会以万众瞩目嘅方式嚟到。 21 唔会有人话，‘你睇，喺呢度’，亦都唔会有人话，‘喺嗰度’。睇吓！上帝嘅王国就喺你哋当中。”

22 佢同门徒讲：“时候就到嘞！到时你哋会好想见到人子同你哋一齐*，但系你哋系唔会见到嘅。 23 有人会同你哋讲，‘睇吓，佢喺嗰度’，或者话‘睇吓，佢喺呢度’。你哋唔好出去，亦都唔好追随佢哋*。 24 闪电点样由天呢边照射到天嗰边，人子喺嗰一日*都会噉样。 25 不过佢一定要先受好多苦，俾呢一代人弃绝。 26 挪亚嘅时代系点样，人子嘅时代都会系点样。 27 当时啲人挂住吃喝嫁娶，直到挪亚入方舟嘅嗰一日，大洪水嚟到，将佢哋全部毁灭。 28 罗得嘅时代都系噉样。人挂住吃喝买卖，栽种建造， 29 到咗罗得离开所多玛嗰一日，有火同硫磺从天而降，将佢哋全部毁灭。 30 人子显现嗰一日，都会系噉。

31 “嗰一日，喺屋顶嘅，唔好落嚟返入屋，拎入面嘅财物；同样，喺田嗰度嘅，都唔好返去攞返啲嘢。 32 要记住罗得太太嘅遭遇。 33 边个想保住自己嘅生命，就会失去生命；边个失去生命，反而保得住自己嘅生命。 34 我同你哋讲，喺嗰一晚，两个人喺一张床上面休息，一个会被接走，一个会被舍弃。 35 两个女人推住同一个磨，一个会被接走，一个会被舍弃。” 36 －－－* 37 门徒就话：“主啊，呢啲事会喺边度发生呢？”耶稣同佢哋讲：“尸体喺边度，鹰就聚集喺边度。”

18 耶稣又讲咗个比喻，教导门徒要时刻祷告，唔好灰心放弃。 2 佢话：“有座城，里面有一个审判官，佢唔敬畏上帝，亦都唔尊重人。 3 嗰座城有个寡妇，成日去见佢，同佢讲：‘我同嗰个人之间嘅案件，你一定要帮我主持公道呀。’ 4 审判官一直都冇理佢，不过后嚟心谂：‘虽然我唔敬畏上帝，亦都唔尊重人， 5 但系呢个寡妇成日嚟烦住我，我就为佢主持公道啦，费事佢一路缠住我，烦死我。’” 6 主话：“呢个审判官系唔正义嘅，但系你哋留意吓佢点样讲吖！ 7 上帝又点呢？虽然上帝一直表现耐心，但系佢拣选嘅人日夜向佢呼求，唔通佢唔会为佢哋主持公道咩？ 8 我话俾你哋知，上帝会迅速为佢哋主持公道。但系人子嚟到嘅时候，喺世上揾唔揾到有呢种信心嘅人呢？”

9 耶稣亦都对一啲人讲咗个比喻，嗰啲人认为自己好正义，又睇唔起其他人。佢话： 10 “有两个人上圣殿祷告，一个系法利赛派嘅人，一个系收税人。 11 嗰个法利赛派嘅人企喺度，喺心入面祷告话：‘上帝啊，我感谢你，我唔似得其他人噉，又敲诈、又不义、又通奸，更加唔似呢个收税人。 12 我一星期禁食两次，将得到嘅所有嘢都奉献十分之一。’ 13 而嗰个收税人就离远企喺度，连抬头望天都唔敢，佢揼住心口话：‘上帝啊，我系个罪人，求你开恩*。’ 14 我话俾你哋知，呢个人离开圣殿返去嘅时候，喺上帝眼中，佢比嗰个法利赛派嘅人更加正义。因为边个抬高自己，就会被贬低；边个内心谦卑，就会被抬高。”

15 有人带埋小朋友*去耶稣嗰度，请佢将手放喺佢哋身上*。门徒见到，就闹嗰啲人。 16 不过耶稣就叫人带啲小朋友*过嚟，佢话：“俾啲小朋友嚟我呢度，唔好阻止佢哋，因为上帝嘅王国系属于好似小朋友嘅人。 17 我可以好肯定噉同你哋讲，边个唔系好似小朋友一样接受上帝嘅王国，就绝对唔能够进入呢个王国。”

18 有个民间嘅首领问耶稣：“良善嘅老师，我要做啲乜嘢先可以得到永远嘅生命呢？” 19 耶稣同佢讲：“点解你要话我系良善嘅呢？除咗上帝一位，冇人称得上系良善嘅。 20 你都知道呢啲诫命，就系：唔可以通奸，唔可以杀人，唔可以偷窃，唔可以作伪证，要孝敬父母。” 21 佢话：“呢啲诫命我自细就有遵守㗎啦。” 22 耶稣听到之后，就同佢讲：“你仲有一样嘢要做，就系卖晒自己拥有嘅嘢，将得到嘅钱分俾穷人，噉样你就有财宝喺天上；你亦都要做我嘅门徒。” 23 佢听到耶稣噉讲，就好唔开心，因为佢好有钱。

24 耶稣望住佢，就话：“有钱人要进入上帝嘅王国，系几咁难呢！ 25 其实，骆驼穿过针眼，仲容易过有钱嘅人进入上帝嘅王国呀！” 26 听到佢噉讲嘅人就话：“噉仲有冇人可以得救呀？” 27 耶稣话：“对人嚟讲冇可能嘅事，上帝都能够做到。” 28 彼得话：“你睇，我哋已经揼低晒所有嘢嚟跟随你嘞。” 29 耶稣同佢哋讲：“我好肯定噉同你哋讲，如果人为咗上帝嘅王国，舍弃咗房屋、太太、兄弟、父母或者仔女， 30 喺而家一定会得到更多，喺将来嘅制度*亦都会得到永远嘅生命。”

31 耶稣同十二使徒行埋一边，同佢哋讲：“睇吓！而家我哋上去耶路撒冷，以前啲先知写低关于人子嘅事，都会实现。 32 例如佢会俾人交俾外族人，俾人戏弄、侮辱同埋吐口水。 33 嗰啲人会鞭打佢，杀害佢，不过第三日佢会复活。” 34 但系使徒完全听唔明。因为呢啲说话嘅意思对佢哋嚟讲系隐藏嘅，佢哋唔理解耶稣讲紧乜嘢。

35 耶稣行近耶利哥嘅时候，有个盲人坐喺路边乞食。 36 嗰个盲人听到有一班人经过，就问发生咩事。 37 有人话佢知：“系拿撒勒人耶稣经过呀！” 38 佢就大嗌：“大卫嘅子孙耶稣，可怜吓我啦！” 39 行喺前面嘅人就闹佢，叫佢唔好出声，点知佢就嗌得更加大声：“大卫嘅子孙，可怜吓我啦！” 40 耶稣就停低，叫人将盲人带到佢面前。个盲人行近，耶稣就问佢： 41 “你想我为你做啲乜嘢呢？”佢话：“主啊，求你令我睇到嘢啦。” 42 耶稣同佢讲：“你恢复视力啦。你嘅信心令你好返嘞。” 43 佢即刻恢复返视力，就跟随耶稣，荣耀*上帝。见到嘅人全部都赞美上帝。

19 耶稣入咗耶利哥，经过呢座城。 2 嗰度有个人叫做撒该，佢系税务长，非常有钱。 3 佢想睇吓耶稣系个点样嘅人，不过由于人多，自己又矮，就望唔到耶稣。 4 于是佢跑去前面，爬上一棵无花果树*想望吓耶稣，因为耶稣就快经过嗰度。 5 耶稣行到去，抬头一望，同佢讲：“撒该，快啲落嚟吖，今日我要去你屋企。” 6 撒该即刻落嚟，好开心噉接待耶稣。 7 大家见到，就细细声议论话：“佢居然喺罪人屋企留宿。” 8 撒该企起身，同主讲：“主啊，我要将我一半嘅财产分俾穷人；我敲诈过边个，就还返四倍俾佢。” 9 耶稣同佢讲：“今日上帝拯救咗呢个人同佢一家*，因为佢都系亚伯拉罕嘅子孙。 10 人子嚟到，系要寻找同拯救迷失嘅人。”

11 门徒听到呢啲说话嘅时候，耶稣又讲咗一个比喻，因为佢就快到耶路撒冷，门徒以为上帝嘅王国即刻就会出现， 12 耶稣话：“有个贵族出身嘅人为咗得到王权*，要去好远嘅地方接受册封，然后返嚟。 13 佢叫10个奴隶嚟，将1000银元*分俾佢哋，同佢哋讲：‘你哋拎去做生意，直到我返嚟。’ 14 不过佢自己国家嘅人好憎佢，派大使团跟住去，同佢讲：‘我哋唔想你做我哋嘅君王。’

15 “佢得到王权返嚟之后，吩咐嗰啲攞咗银元嘅奴隶嚟见佢，想知道佢哋做生意赚咗几多。 16 第一个上前话：‘主啊，我用你嗰100银元赚咗1000。’ 17 主人同佢讲：‘做得好，你真系一个好奴隶！你喺细微嘅事上忠心，我会派你管理10座城。’ 18 第二个奴隶嚟到话：‘主啊，我用你嗰100银元赚咗500。’ 19 主人亦都同呢个奴隶讲：‘我都派你管理5座城啦。’ 20 仲有一个奴隶嚟到话：‘主啊，你嗰100银元喺度，我一直用布包住，收埋咗！ 21 你知，我不嬲都好惊你，因为你系个苛刻嘅人，冇存入银行嘅钱你都要攞，冇种嘢又话要收割。’ 22 主人同呢个奴隶讲：‘你呢个邪恶嘅奴隶，就凭你亲口讲嘅嘢，我要定你罪。你话我系个苛刻嘅人，冇存入银行嘅钱都要攞，冇种嘢又话要收割，系咪？ 23 噉你点解唔将我啲钱存入银行呢？我返到嚟嘅时候就可以连本带利收返嘞。’

24 “主人同企喺侧边嘅人讲：‘拎走佢嗰100银元，俾嗰个有1000嘅。’ 25 佢哋话：‘主啊，佢已经有1000银元喇㖞！’ 26 主人话：‘我话俾你哋知，边个有嘅，仲要俾多啲佢；边个冇嘅，就连佢有嘅，都要攞走埋。 27 至于我嗰啲敌人，即系唔想我做佢哋君王嘅人，将佢哋带过嚟，喺我面前处死！’”

28 耶稣讲完呢一切之后，就继续向前行，上去耶路撒冷。 29 佢到咗伯法其同埋伯大尼附近，呢两个地方位于橄榄山。嗰个时候，佢派咗两个门徒出去， 30 话：“你哋去前面嗰个村庄。入去之后，就会见到一只驴仔绑咗喺嗰度，系从来冇人骑过嘅。你哋要解开佢拉过嚟。 31 如果有人问你哋：‘点解解开佢呀？’你哋就话：‘主需要用佢。’” 32 佢哋就去，见到嘅真系同耶稣讲嘅一样。 33 佢哋就解开只驴仔，驴仔嘅主人就同佢哋讲：“你哋点解解开只驴仔呀？” 34 佢哋话：“主需要用佢。” 35 佢哋将驴仔拉去耶稣嗰度，将外衣铺喺驴背，俾耶稣坐上去。

36 当耶稣向前行嘅时候，好多人将外衣铺喺路上面。 37 佢就快到落橄榄山嘅嗰条路，成班门徒因为曾经见过嘅所有奇迹，就非常之欢乐，大声赞美上帝， 38 佢哋话：“奉耶和华*嘅名而嚟嘅王系有福嘅！愿天上有和平，至高之处有荣耀！” 39 人群当中有几个法利赛派嘅人同耶稣讲：“老师，制止*你啲门徒啦。” 40 耶稣回答：“如果佢哋唔出声，石头就会出声*。”

41 就快到耶路撒冷嘅时候，耶稣望住座城，为呢座城哭泣， 42 佢话：“但愿你今日睇出点样做就能够得到真正嘅平安，不过呢啲事而家系隐藏嘅，系你睇唔见嘅。 43 时候会到，你嘅敌人会用尖柱做围栏包围你，四方八面围困*你。 44 佢哋会消灭你同你境内嘅居民*，唔俾你境内有一块石头留喺石头上面，因为你睇唔出你几时受到审察。”

45 耶稣入咗圣殿，将卖嘢嘅人赶出去， 46 同佢哋讲：“圣经话：‘我嘅殿系祷告嘅殿。’你哋竟然令佢成为强盗嘅巢穴。”

47 耶稣每日都喺圣殿里面教导人。祭司长、抄经士同人民嘅首领都想杀佢， 48 但系揾唔到机会落手，因为民众全部都寸步不离，想听佢讲嘢。

20 有一日，耶稣喺圣殿里面教导民众，宣扬好消息，祭司长、抄经士同长老一齐嚟， 2 同佢讲：“话俾我哋知，你凭乜嘢权力做呢啲事呀？边个叫你噉做㗎？” 3 耶稣答佢哋：“我都问你哋一个问题，话俾我知： 4 边个派约翰嚟施浸呢？系天上嘅上帝，定系人呢？” 5 佢哋就商量话：“如果我哋答系‘天上嘅上帝’，佢就会话：‘既然系噉，你哋点解唔相信约翰呢？’ 6 但系如果我哋答‘系人’，民众就会攞石头打死我哋，因为佢哋深信约翰系先知。” 7 佢哋唯有话唔知边个派约翰嚟。 8 耶稣就同佢哋讲：“噉我都唔话你哋听我凭乜嘢权力做呢啲事。”

9 耶稣又同民众讲咗个比喻：“有人开垦咗一个葡萄园，然后租俾一啲农户，就出咗国，仲去咗好耐。 10 到咗收割葡萄嘅季节，佢派一个奴隶去农户嗰度，收取葡萄园嘅一部分果实。不过，农户竟然殴打个奴隶，令佢空手而回。 11 葡萄园嘅主人又派另一个奴隶去。农户亦都打呢个奴隶，羞辱佢，令奴隶空手而回。 12 主人又派第三个奴隶去。佢哋又打伤呢个奴隶，将佢赶走。 13 主人话：‘我应该点做呢？等我派我深爱嘅仔去，佢哋会尊重佢嘅。’ 14 农户一见到佢个仔，就商量话：‘呢个系继承人。我哋杀咗佢，噉佢本来会继承嘅产业就属于我哋㗎喇。’ 15 于是农户将佢拖出葡萄园杀死。噉葡萄园嘅主人会点样处置佢哋呢？ 16 佢会嚟杀咗呢啲农户，将葡萄园交俾其他人。”

大家听到就话：“噉嘅事千祈唔好发生呀！” 17 耶稣望住佢哋话：“圣经讲过，‘建造嘅人弃绝嘅石头，成为咗首要嘅房角石*’，呢句说话系咩意思呢？ 18 边个因为呢块石头而失足跌倒，就会遍体鳞伤，而边个俾呢块石头击中，就会粉身碎骨。”

19 抄经士同祭司长睇出呢个比喻系针对佢哋讲嘅，就想即刻落手捉耶稣，不过佢哋好惊啲民众。 20 于是，佢哋为咗将耶稣送官，交俾总督处置*，就密切留意住佢，仲暗中收买一啲人，派呢啲人喺耶稣嘅说话揾把柄。呢啲人都扮到好诚恳*。 21 佢哋问耶稣：“老师，我哋知道你讲嘅教嘅都系啱㗎，又唔偏心，你教导人嘅都系关于上帝嘅真理。 22 噉你话，纳税俾凯撒合唔合法呢？” 23 耶稣睇出佢哋嘅奸计，就同佢哋讲： 24 “拎一个第纳流斯*钱币嚟睇吓。呢个系边个嘅头像，边个嘅名号呀？”佢哋话：“系凯撒嘅。” 25 耶稣同佢哋讲：“所以，属于凯撒嘅要俾返凯撒，属于上帝嘅要俾返上帝。” 26 佢哋喺民众面前，唔能够喺佢讲嘅说话度揾到把柄，反而因为佢嘅回答而觉得惊讶，就无话可说。

27 撒都该派一向都话冇复活，佢哋有几个人嚟问耶稣： 28 “老师，摩西话：‘如果一个人未有仔女就死咗，死者嘅兄弟就应该娶咗佢嘅遗孀，帮死咗嘅兄弟传宗接代。’ 29 呢度曾经有七兄弟，第一个结咗婚，未有仔女就已经死咗嘞。 30 第二个、 31 第三个都娶咗个遗孀。七个都系噉，未有仔女就死咗嘞。 32 最后连嗰个女人都死埋。 33 复活嘅时候，佢系边一个人嘅太太呢？七个都娶过佢㖞。”

34 耶稣同佢哋讲：“呢个制度*嘅人又娶又嫁， 35 但系嗰啲配进入未来嘅制度、死而复生嘅人，就唔会娶亦都唔会嫁。 36 佢哋唔能够再死，而且佢哋会好似天使一样。佢哋会成为上帝嘅儿女，因为佢哋会被复活。 37 其实死人复活嘅事，摩西喺荆棘丛嘅记载已经讲过。摩西将耶和华*称为‘亚伯拉罕嘅上帝，以撒嘅上帝，雅各嘅上帝’。 38 佢唔系死人嘅上帝，而系活人嘅上帝，因为喺佢眼中，佢哋都系活着嘅。” 39 有几个抄经士回应话：“老师，你讲得啱。” 40 佢哋就唔敢再问佢问题嘞。

41 耶稣问返嗰啲人：“啲人点解话基督系大卫嘅子孙呢？ 42 大卫曾经喺诗篇讲过：‘耶和华*同我主讲：“你坐喺我嘅右边， 43 直到我令你嘅敌人成为你嘅脚凳。”’ 44 既然大卫称呼基督做‘主’，噉基督又点会系大卫嘅子孙呢？”

45 民众仲听紧嘅时候，耶稣同门徒讲： 46 “要小心，唔好好似啲抄经士噉，佢哋钟意着住件长袍行嚟行去，亦都钟意人哋喺市集广场度恭敬噉同佢哋打招呼，又钟意会堂入面最好嘅座位*同埋晚宴当中贵宾嘅座位。 47 佢哋侵吞寡妇嘅屋*，又为咗引人注目而长篇大论噉祷告。呢啲人会比其他人受到更严厉*嘅判决。”

21 耶稣抬头，见到一啲有钱人将捐款放入宝库嘅钱箱， 2 跟住又见到一个穷寡妇，放咗两文小钱*入去， 3 就话：“我好肯定噉话俾你哋知，呢个穷寡妇放入去嘅，比佢哋所有人放嘅仲多。 4 人人都系喺净低嘅钱当中攞一啲出嚟，作为捐款放入去，而呢个寡妇虽然好穷，但系佢将自己赖以为生嘅一切放晒入去。”

5 后嚟有人讲起圣殿，赞叹圣殿用华美嘅石头同奉献嘅礼物嚟装饰。 6 耶稣话：“时候会到，你哋而家见到嘅，到时唔会有一块石头留喺石头上面，全部都会被拆毁。” 7 佢哋问耶稣：“老师，呢啲事几时会发生呢？到时会有乜嘢征象？” 8 耶稣话：“你哋要小心，唔好俾人误导，因为会有好多人冒我嘅名嚟到，话‘我就系基督’，又话‘指定嘅时候就快到嘞’。但系你哋唔好跟从佢哋。 9 当你哋听到有战争同暴乱发生嘅时候，唔使惊。呢啲事一定会发生咗先，不过末日唔会即刻嚟到。”

10 耶稣又话：“民族会攻打民族，国家*会攻打国家， 11 仲会有大地震，一个接一个地方会有粮食短缺同瘟疫。人会见到恐怖嘅事同埋天上奇异嘅景象。

12 “喺呢一切发生之前，啲人会落手迫害你哋，将你哋交去会堂，韫入监。你哋为咗我嘅名，会俾人带到君王同总督面前。 13 结果，你哋就有机会作见证嘞。 14 所以，你哋要下定决心，唔需要预先练习点样辩护， 15 因为我会赐智慧俾你哋，等你哋知道应该点样讲*，使所有反对你哋嘅人加埋都抵挡唔住，反驳唔到。 16 你哋嘅父母、兄弟、亲戚、朋友都会出卖你哋*，结果你哋有啲人会被杀。 17 你哋会因为我嘅名，俾所有人憎恨。 18 但系你哋连一条头发都唔会受损*。 19 你哋只要忍耐，就能够保全生命。

20 “你哋见到军队喺耶路撒冷周围扎营围城，就知道呢座城就快荒凉嘞。 21 到时，喺犹地亚嘅就应该逃走上山，喺城里面嘅就应该出嚟，喺乡下嘅唔好入城， 22 因为嗰个系伸张正义*嘅时候，噉圣经写嘅说话就会全部应验。 23 喺嗰段时期，怀孕嘅同喂奶嘅有祸嘞！将会有大难降临呢个地方，有烈怒降临呢个民族。 24 佢哋会死喺刀剑之下，或者被俘掳到列国。耶路撒冷会俾列国*践踏，直到列国*嘅既定时期满咗。

25 “太阳、月亮、星辰会显出奇异嘅景象，地上嘅国家都会因为海洋咆哮翻腾，觉得不知所措，非常之痛苦。 26 啲人一谂到世上将会发生嘅事，就会惊到头晕眼花。天上嘅力量都会动摇。 27 到时，人会见到人子喺天云带住力量，充满荣耀噉嚟到。 28 一有呢啲事，你哋就要挺身昂首，因为你哋就快得救嘞。”

29 耶稣同佢哋讲咗个比喻：“你哋睇吓无花果树同其他树。 30 你哋见到树木发芽，就知道夏天就快到嘞。 31 同样，当你哋见到呢啲事发生，就知道上帝嘅王国就快到嘞。 32 我好肯定噉同你哋讲，呢一切会发生咗先，呢一代人先至会消逝。 33 天地都会消逝，但系我嘅说话绝对唔会消逝。

34 “你哋要小心，你哋嘅心千祈唔好俾贪食、纵酒同埋生活嘅忧虑重重压住。噉嗰一日突然嚟到嘅时候，你哋都唔会好震惊， 35 好似突然跌入陷阱一样。住喺地上嘅人冇一个可以逃避到嗰一日。 36 你哋要时刻警醒，经常恳切祈求，噉你哋就能够逃过呢一切要发生嘅事，可以企喺人子面前。”

37 耶稣日头喺圣殿教导人，夜晚出去，喺橄榄山留宿。 38 民众一大朝早就去圣殿揾佢，听佢讲说话。

22 无酵节，亦都称为逾越节，就快到嘞。 2 祭司长同抄经士想杀死耶稣，但系因为惧怕民众，一直想揾个好方法落手。 3 加略人犹大本来系十二使徒之一。佢俾撒但影响*咗内心， 4 佢就去同祭司长仲有守殿官商量点样出卖耶稣。 5 佢哋好开心，应承俾钱*佢。 6 佢同意咗，就开始揾机会出卖耶稣，想等周围冇民众嗰阵将耶稣交俾佢哋。

7 无酵节到嘞，啲人会喺呢一日宰杀逾越节嘅祭牲。 8 耶稣就派彼得同约翰出去，话：“你哋去，为我哋准备逾越节嘅晚餐。” 9 佢哋问：“你想我哋喺边度准备呢？” 10 佢话：“你哋入咗城，就会遇到一个人，佢拎住装水嘅瓦器，你哋要跟住佢，入去佢入嘅嗰间屋。 11 你哋要同屋主讲：‘老师问，佢同门徒一齐食逾越节晚餐嘅客房喺边度呢？’ 12 嗰个人就会带你哋去睇楼上一个阔落嘅房间，里面家具齐全。你哋就喺嗰度准备啦。” 13 佢哋去到，发现情形同耶稣讲嘅一样。佢哋就准备好逾越节嘅晚餐。

14 时候到嘞，耶稣同使徒一齐食晚餐*。 15 耶稣同佢哋讲：“我真系好想喺受苦受难之前，同你哋一齐食呢个逾越节嘅晚餐。 16 我话俾你哋知，我唔会再食呢个晚餐，直到所有同呢个晚餐有关嘅事喺上帝嘅王国实现。” 17 有人递咗杯酒俾耶稣，佢拎过嚟，祷告感谢之后，话：“你哋拎去，大家传嚟饮吖。 18 我话俾你哋知，从今以后，我唔会再饮葡萄酒，直到上帝嘅王国嚟到。”

19 耶稣又拎起饼，感谢上帝，搣开递俾佢哋，话：“呢个指嘅系我嘅身体，系为你哋牺牲嘅。你哋要不断噉样做嚟纪念我。” 20 耶稣亦都喺晚餐之后拎起杯，话：“呢个指嘅系凭我嘅血订立嘅新约。我嘅血系为你哋流出嚟嘅。

21 “你哋睇，出卖我嘅人同我一齐食紧饭。 22 冇错，人子系要按照指定嘅方式离开你哋嘅，不过出卖人子嘅人有祸嘞！” 23 佢哋就开始议论，到底佢哋当中边个做得出噉嘅事。

24 但系，使徒又激烈噉争论佢哋边一个最大。 25 耶稣同佢哋讲：“列国嘅君王辖制人民，掌权管理佢哋嘅有‘恩主’嘅称号。 26 但系你哋唔好噉样。你哋中间最大嘅，应该好似最年轻嘅；带头嘅，应该好似为人服务嘅。 27 用餐嘅同喺旁边服务嘅，边个大啲呢？唔系用餐嗰个咩？但系我喺你哋中间系为你哋服务嘅。

28 “我受考验嘅时候，你哋冇离弃我。 29 我爸爸已经同我立约，将王国赐俾我，而家我都同你哋立约，等你哋都得到王国， 30 噉样你哋就可以喺我嘅王国入面，同我同席用餐，而且坐喺宝座审判以色列12个部族。

31 “西门，西门，撒但一直要好似筛小麦噉筛你哋所有人。 32 不过我已经为你恳切祈求，祈求你唔会失去信心。你悔改回头之后，要帮助你嘅弟兄坚强起嚟。” 33 彼得话：“主啊，我已经准备好同你一齐坐监，同你一齐死㗎喇。” 34 耶稣话：“彼得，我话俾你知，今日鸡叫之前，你会三次唔肯认我。”

35 耶稣又同佢哋讲：“我之前派你哋出去，你哋冇带钱袋、粮袋同鞋，嗰时你哋有冇缺乏啲咩？”佢哋话：“冇！” 36 耶稣话：“而家，有钱袋嘅要带钱袋，有粮袋嘅要带粮袋，冇剑嘅要卖咗外衣去买剑。 37 我话俾你哋知，圣经讲过‘佢俾人当做罪犯*’，呢句说话一定会应验喺我身上。冇错，同我有关嘅事已经应验紧。” 38 佢哋话：“主啊，你睇！呢度有两把剑。”耶稣话：“噉就够嘞。”

39 耶稣照常去橄榄山，门徒都跟住去。 40 到咗嗰度，耶稣同佢哋讲：“你哋要不断祷告，噉就唔会喺引诱下屈服。” 41 耶稣离开佢哋，行远少少*，跪低祷告， 42 话：“爸爸啊，如果你愿意，求你为我拎走呢个杯*。不过唔好照我嘅意思去做，而系照你嘅意思去做。” 43 有一个天使喺天上嚟到，出现喺耶稣面前，为佢加添力量。 44 佢非常痛苦，更加恳切噉祷告。佢嘅汗珠好似血噉，滴喺地上。 45 祷告之后，佢企起身行去门徒嗰度，见到佢哋因为好伤心，攰到眼都掰唔大， 46 就同佢哋讲：“点解你哋喺度瞓觉呢？起身啦，要不断祷告，噉就唔会喺引诱下屈服嘞。”

47 耶稣仲未讲完，十二使徒当中叫做犹大嘅，带住一班人嚟咗。佢行过去亲吻耶稣。 48 耶稣同佢讲：“犹大，你锡人子，系咪为咗出卖佢呀？” 49 耶稣身边嘅人见到噉嘅情势，就话：“主啊，我哋攞剑斩佢哋好唔好呀？” 50 佢哋其中一个人向大祭司嘅奴隶斩落去，削咗佢只右耳落嚟。 51 耶稣就话：“停手！唔好噉样！”佢摸一摸嗰个人嘅耳仔，医返好佢。 52 耶稣同嗰啲嚟捉佢嘅祭司长、守殿官同长老讲：“唔通我系贼，要你哋带埋剑同埋棍嚟捉我咩？ 53 我同你哋一样日日都喺圣殿，你哋都冇落手捉我。而家系你哋嘅时候，黑暗掌权嘞。”

54 佢哋逮捕咗耶稣，带走咗佢，押去大祭司嘅府第。彼得离远跟住。 55 佢哋喺庭院生火，一齐坐低，彼得都坐喺佢哋当中。 56 有个女仆见到彼得面向火光坐喺度，就望实佢，然后话：“呢个人都系同嗰个人一齐㗎噃。” 57 彼得否认话：“我唔识佢㗎。” 58 过咗一阵，又有一个人见到彼得，话：“你都系同佢哋一齐㗎㖞。”彼得话：“我唔系呀，大哥。” 59 大概一个钟之后，又有一个人一口咬定话：“呢个人真系同嗰个人一齐嘅哩，因为佢系个加利利人！” 60 彼得话：“大哥，我都唔知你讲乜。”佢都未讲完，鸡就叫嘞。 61 主拧转身，望住彼得，彼得谂起主同佢讲过嘅说话：“今日鸡叫之前，你会三次唔肯认我。” 62 佢就出去，伤心痛哭。

63 看守耶稣嘅人嘲笑戏弄佢，打佢， 64 仲蒙住佢块面，问佢：“先知你讲吖，系边个打你呀？” 65 佢哋亦都讲咗好多亵渎佢嘅说话。

66 天一光，人民嘅长老议会，包括祭司长同抄经士，就聚集埋一齐，将耶稣带入佢哋嘅公议会大厅，佢哋话： 67 “如果你系基督，就讲出嚟啦。”耶稣同佢哋讲：“就算我话俾你哋知我系，你哋都绝对唔会相信。 68 就算我问你哋问题，你哋都唔会答我。 69 但系从今以后，人子会坐喺大能者上帝嘅右边。” 70 佢哋个个都话：“噉你系唔系上帝嘅仔吖？”耶稣同佢哋讲：“系，我系*。” 71 佢哋话：“我哋仲需要其他证词咩？佢亲口讲嘅，我哋都亲耳听到嘞。”

23 嗰一大班人全部起身，将耶稣押去彼拉多嗰度， 2 开始指控佢话：“我哋发现呢个人煽动我哋啲同胞造反，唔准人纳税俾凯撒，仲话自己系基督，系王。” 3 彼拉多问耶稣：“你系咪犹太人嘅王呀？”耶稣答：“冇错，我系*。” 4 彼拉多同祭司长仲有嗰班人讲：“我查唔出呢个人有咩罪㖞。” 5 但系佢哋坚持话：“佢喺全个犹地亚传道，煽动民众，由加利利开始，仲嚟到呢度添。” 6 彼拉多一听到，就问呢个人系唔系加利利人。 7 佢一知道耶稣嚟自希律管辖嘅地区，就将佢送去希律嗰度。当时希律都喺耶路撒冷。

8 希律见到耶稣，就好开心，因为佢听闻耶稣嘅事，早就想见佢，想睇佢施行神迹。 9 希律盘问咗耶稣好耐，但系耶稣咩都冇答佢。 10 不过祭司长同抄经士不断上前，极力指控佢。 11 希律同佢啲士兵一齐侮辱耶稣，戏弄佢，同佢着上华丽嘅衫，然后将佢押返去彼拉多嗰度。 12 就喺嗰一日，希律同彼拉多做咗朋友，以前佢哋一直互相敌视。

13 彼拉多召集祭司长、民间首领同埋民众嚟， 14 同佢哋讲：“你哋将呢个人带嚟我呢度，话佢煽动民众造反，但系你哋睇，我喺你哋面前审问过佢，你哋告佢嘅罪状，我揾唔到任何根据。 15 希律都揾唔到，就将佢押返嚟呢度，噉即系话佢实在冇犯咩死罪。 16 我会惩戒佢，然后放咗佢。” 17 －－－* 18 但系民众一齐大声嗌：“杀咗佢！释放巴拉巴！” 19 呢个巴拉巴系因为参与城入面嘅叛乱同埋杀人而坐监嘅。 20 彼拉多想释放耶稣，就同佢哋讲多次同样嘅说话。 21 但系佢哋更加大声噉嗌：“处死佢！喺木柱度处死佢！” 22 彼拉多第三次同佢哋讲：“点解呀？呢个人做咗咩坏事呢？我查唔到佢犯咗咩死罪。我会惩戒佢，然后放咗佢。” 23 佢哋就大声催逼彼拉多，坚持要将耶稣处死*，结果佢哋嘅呼喊声占咗上风。 24 彼拉多就决定满足佢哋嘅要求。 25 佢释放咗佢哋要嘅人，就系嗰个因为叛乱同杀人罪而坐监嘅人，又按照佢哋嘅意思将耶稣交出嚟，要将佢处死。

26 佢哋将耶稣押走嘅时候，捉咗一个叫西门嘅昔兰尼人，佢啱啱由城外嚟到。佢哋将苦刑柱放喺佢膊头，要佢孭住，跟喺耶稣后面。 27 有一大班人跟住耶稣，包括一啲妇女，呢啲妇女悲伤噉揼住心口，为佢放声哀哭。 28 耶稣拧转身，同佢哋讲：“耶路撒冷嘅妇女啊，唔好为咗我喊，为你哋同你哋嘅仔女喊啦。 29 时候会到，啲人会话：‘不育嘅、冇生过仔女嘅、冇乳养婴儿嘅妇女有福嘞*！’ 30 到时，佢哋会同高山讲：‘倾倒喺我哋身上啦！’同山丘讲：‘遮住我哋啦！’ 31 而家棵树仲有水分嘅时候已经发生啲噉嘅事，到棵树枯干嘅时候又会点呢？”

32 仲有两个罪犯都同耶稣一齐被带去处决。 33 佢哋到咗一个叫“骷髅头”嘅地方，士兵就喺嗰度将耶稣钉喺木柱，亦都将嗰两个罪犯挂喺佢侧边嘅木柱，一个喺佢右边，一个喺佢左边。 34 耶稣话：“爸爸，求你宽恕佢哋，因为佢哋唔知道自己做紧乜嘢。”士兵抽签分咗耶稣嘅衫。 35 啲人企喺度望住，民间首领嘲笑佢，话：“其他人佢都救到咯，如果佢系上帝拣选嘅基督，就等佢救吓自己啦！” 36 啲士兵都戏弄佢，行上前递酸酒俾佢， 37 仲话：“如果你系犹太人嘅王，救吓你自己啦！” 38 喺佢头上面嘅地方安咗个牌，上面写住：“呢个系犹太人嘅王。”

39 挂喺柱上嘅一个罪犯侮辱耶稣话：“你唔系基督咩？救吓你自己，都救吓我哋啦！” 40 另一个罪犯就斥责佢，话：“你都受到同样嘅判决，唔通你一啲都唔惊上帝嘅咩？ 41 我哋以前做过啲乜嘢，而家就有乜嘢下场，我哋系罪有应得㗎。但系呢个人冇做过乜嘢错事。” 42 佢仲话：“耶稣，你作王之后*，求你记得我。” 43 耶稣同佢讲：“我今日好肯定噉同你讲，你会同我一齐喺乐园里面。”

44 大约中午12点*，黑暗笼罩整个地区*，直到下昼3点*， 45 一丝阳光都冇，圣殿嘅帷幔*都由中间裂开两边。 46 耶稣大声呼喊话：“爸爸，我将我嘅生命*托付喺你嘅手。”佢讲完呢句说话，就断咗气。 47 军官见到发生嘅事，就赞美*上帝，话：“佢真系个正义嘅人呀！” 48 聚集喺旁边嘅民众见到发生嘅事，就好悲伤，揼住心口返屋企。 49 所有同耶稣相识嘅人，包括嗰啲由加利利跟住耶稣嚟到嘅妇女，都离远企喺度，睇住呢啲事发生。

50 有一个人叫约瑟，系公议会嘅成员。佢为人良善正义， 51 冇投票支持公议会啲人嘅计划同埋行动。佢嚟自犹地亚人嘅城亚利马太，一向等待上帝嘅王国。 52 佢去见彼拉多，请求领取耶稣嘅遗体。 53 佢将遗体攞落嚟之后，就用上等细麻布包好，安放喺一个墓穴入面。嗰个墓穴系由岩石凿出嚟嘅，从来都冇埋葬过人。 54 嗰日系预备日，安息日就快开始嘞。 55 嗰啲同耶稣一齐由加利利嚟嘅妇女都去睇吓个墓穴，见到佢哋安放好耶稣嘅遗体， 56 就返去准备香料同馨香油。到咗安息日，佢哋遵照诫命休息。

24 跟住嗰个星期嘅第一日，啲妇女一朝早就带住准备好嘅香料去墓穴。 2 佢哋见到墓穴嘅石头已经移开咗， 3 入到去，竟然见唔到主耶稣嘅遗体。 4 佢哋仲迷惘紧嘅时候，突然有两个人企喺佢哋身边，身上嘅衫闪闪发光。 5 佢哋好惊，一直唔敢岳高头。嗰两个人同佢哋讲：“你哋点解喺坟墓入面*揾嗰个活着嘅人呢？ 6 佢唔喺呢度，已经复活咗嘞。谂返佢喺加利利同你哋讲过啲咩吖。 7 佢话人子一定会交喺罪人嘅手，喺木柱度被处死，第三日复活。” 8 噉佢哋先至谂起耶稣嘅说话， 9 就离开墓穴返去，向嗰11个使徒同其余嘅人报告一切。 10 嗰啲妇女包括末大拉人马利亚、约亚拿，雅各嘅妈妈马利亚，同埋其余嘅妇女，佢哋都将呢啲事话俾使徒知。 11 但系使徒认为呢啲妇女乱咁讲，就唔肯相信。

12 彼得出发，跑去墓穴，乌低身望入去，见到嗰度净系得返啲细麻布，就离开，心里面不断喺度谂发生咗咩事。

13 就喺嗰一日，门徒当中有两个人去一个叫以马乌斯嘅村庄。嗰个村庄距离耶路撒冷大约11公里*。 14 佢哋喺度讨论发生咗嘅所有事。

15 嗰两个人讨论紧嘅时候，耶稣走过去，同佢哋一齐行。 16 佢哋见到耶稣，但系认唔出佢系边个。 17 耶稣同佢哋讲：“你哋两个一路行，一路热烈讨论紧咩呢？”佢哋就停低，满面愁容。 18 叫做革流巴嗰个门徒话：“你系咪喺外地嚟，一个人住喺耶路撒冷㗎？你唔知呢段时间城里面发生咩事咩？*” 19 耶稣问佢哋：“发生咗咩事呀？”佢哋话：“系拿撒勒人耶稣嘅事。佢系先知嚟㗎，喺上帝同所有人面前，讲说话同做事都大有能力。 20 但系我哋嘅祭司长同首领居然将佢送官，判佢死刑，钉喺木柱度， 21 而我哋一直希望佢就系拯救以色列嘅嗰个人。仲有呀，发生呢啲事到而家已经第三日嘞。 22 我哋当中有啲妇女讲嘅嘢都令我哋好惊讶，因为佢哋一早去到墓穴， 23 但系见唔到耶稣嘅遗体，返嚟报告话，佢哋竟然见到天使出现，而天使话耶稣已经复活嘞。 24 我哋有几个人都去咗墓穴，发现情形就同嗰啲妇女讲嘅一样，不过都见唔到耶稣。”

25 耶稣同佢哋讲：“不明事理嘅人啊，点解你哋嘅心仲系迟迟唔肯相信先知所讲嘅一切？ 26 基督唔系一定要经历呢一切苦难先至得到荣耀咩？” 27 佢就由摩西同先知嘅书开始，将圣经入面关于佢嘅说话，都解释清楚俾佢哋听。

28 佢哋就快去到嗰个村庄，耶稣睇嚟仲想继续向前行。 29 佢哋就极力请耶稣留低，话：“时候唔早嘞，就快天黑，同我哋一齐喺呢度留宿啦。”耶稣就入屋，一齐喺嗰度过夜。 30 佢哋食饭嘅时候，耶稣拎起饼，祷完告，搣开，递俾佢哋。 31 嗰一刻，佢哋就完全睇出呢个人系耶稣*，认到佢嘞。不过耶稣就喺佢哋面前消失咗。 32 佢哋都话：“佢喺路上同我哋讲说话，向我哋清楚解释圣经嗰阵，我哋嘅心唔系好似火一样燃烧咩？” 33 佢哋即刻起程，返耶路撒冷。佢哋见到嗰11个使徒同其他门徒聚集埋一齐， 34 听到佢哋话：“主真系复活咗，向西门显现呀！” 35 于是，嗰两个人将路上发生咗嘅事话俾大家知，亦都同大家讲，佢哋见到耶稣搣饼先至认到佢。

36 佢哋仲讲紧呢啲事嘅时候，耶稣企喺佢哋当中，同佢哋讲：“愿你哋平安。” 37 佢哋好惊，以为见到嘅系灵体。 38 于是耶稣话：“点解你哋咁不安？点解要怀疑呢？ 39 睇吓我嘅手同埋脚，系我呀。摸吓，灵体冇肉冇骨，但系你哋睇，我有㗎。” 40 佢一边讲一边俾手脚佢哋睇。 41 佢哋又惊又喜，不过都系唔敢相信。耶稣同佢哋讲：“你哋呢度有冇嘢食呀？” 42 佢哋递咗块烤鱼俾佢。 43 佢就接住，喺佢哋面前食。

44 耶稣同佢哋讲：“我仲同你哋一齐嘅时候，已经同你哋讲过，所有写喺摩西法典、先知书同埋诗篇入面关于我嘅说话，都一定应验。” 45 耶稣就激发佢哋思考*，令佢哋完全明白圣经嘅意思， 46 仲同佢哋讲：“圣经话：基督会经历苦难，第三日死而复生； 47 亦都会有人奉佢嘅名，由耶路撒冷开始，向所有国族传讲信息，叫人悔改，令罪得到宽恕。 48 你哋要做呢啲事嘅见证人。 49 睇吓！我要将我爸爸承诺过嘅降喺你哋身上。你哋要留喺城入面，直到你哋得到从高天嚟嘅力量。”

50 耶稣带佢哋去伯大尼，张开双手祝福佢哋。 51 祝福紧嘅时候，耶稣离开佢哋，被接到天上。 52 佢哋就向耶稣下拜，开开心心噉返耶路撒冷， 53 经常喺圣殿入面赞美上帝。