约翰福音

1 最初就有一位叫做“话语*”，“话语”同上帝喺一齐，“话语”系一个神*。 2 佢最初就同上帝喺一齐。 3 所有嘢都系通过佢而有㗎，如果唔系通过佢，就冇任何一样嘢存在。

4 生命系通过佢而有㗎，佢嘅生命系人类嘅光。 5 光喺黑暗入面照耀，但系黑暗唔能够战胜光。

6 有一个人叫做约翰，佢奉派嚟代表上帝。 7 佢嚟系要为光作见证，令各种各样嘅人都因为佢嘅见证而相信。 8 佢唔系光，而系为光作见证嘅。

9 当时，照亮各种各样嘅人嘅真光，就快嚟到世人当中嘞。 10 世人系通过佢而有嘅，不过佢喺世上嘅时候，世人唔承认*佢。 11 佢嚟到自己嘅地方，自己人竟然唔接纳佢。 12 但系，所有接纳佢嘅人，因为信从佢，佢都令佢哋有权成为上帝嘅儿女。 13 佢哋系从上帝而生，唔系从人*而生嘅，唔系因为父母*嘅意思而生，亦唔系因为任何人嘅意思而生嘅。

14 “话语”成为咗肉身，住喺我哋当中，我哋都见过佢嘅荣耀，呢种荣耀系从爸爸嗰度嚟嘅独生子嘅荣耀。佢充满上帝嘅恩典*同埋真理。 15 （约翰为佢作见证，甚至大声话：“佢就系我讲嘅嗰个人，我讲过：‘喺我后面嚟嘅，超越咗我，去到我前面，因为喺我存在之前，佢就存在嘞。’”） 16 因为佢充满恩典，我哋人人都从佢嗰度领受咗分外恩典，而且系源源不绝嘅。 17 法典系通过摩西赐下嘅，而分外恩典同真理就系通过耶稣基督而嚟嘅。 18 从来冇人见过上帝，只有喺天父身边*独生嘅神，先至清楚说明咗佢系点样嘅。

19 以下系约翰作嘅见证。当时犹太人由耶路撒冷派祭司同利未族人嚟见佢，问佢：“你到底系边个？” 20 佢冇回避问题，反而坦白噉话：“我唔系基督。” 21 佢哋问约翰：“噉你究竟系边个？系咪以利亚？”佢话：“我唔系。”“你系咪嗰个先知呀？”佢答：“唔系！” 22 佢哋继续问：“你到底系边个？讲啦，噉我哋就可以汇报俾派我哋嚟嘅人听。你话你自己系边个吖？” 23 佢话：“先知以赛亚讲过，喺旷野有人大声话：‘要喺耶和华*前面为佢开路。’我就系嗰个人。” 24 呢啲人系法利赛派嘅人派嚟嘅。 25 佢哋问约翰：“既然你唔系基督，唔系以利亚，亦都唔系嗰位先知，噉点解你帮人施浸呀？” 26 约翰回答佢哋：“我系用水为人施浸嘅。但系有一个人喺你哋当中，系你哋唔认识㗎， 27 佢系喺我后面嚟嘅，我连帮佢解开鞋带都唔配。” 28 呢啲事喺约旦河对岸嘅伯大尼发生，约翰就系喺嗰度为人施浸嘅。

29 第二日，约翰见到耶稣向佢行过嚟，就话：“睇吓，系上帝嘅绵羊羔呀，系除去世人嘅罪㗎！ 30 佢就系我讲嘅嗰位，我讲过：‘有一个人喺我后面嚟，佢超越咗我，去到我前面，因为喺我存在之前，佢就存在嘞。’ 31 我以前唔认识佢，但系我嚟用水为人施浸，就系要令以色列知道佢系边个。” 32 约翰又作见证话：“我见到神圣力量好似只鸽噉从天而降，留喺佢身上。 33 我以前唔认识佢，但系派我嚟用水施浸嘅嗰位同我讲：‘你见到神圣力量降下，留喺边个身上，边个就系用神圣力量为人施浸㗎嘞。’ 34 我已经见到，又作咗见证，呢位就系上帝嘅仔。”

35 之后嗰日，约翰再企喺嗰度，同两个门徒一齐， 36 佢见到耶稣经过，就话：“睇吓，系上帝嘅绵羊羔呀！” 37 两个门徒听到佢噉样讲，就跟喺耶稣后面。 38 耶稣拧转身见到佢哋跟喺后面，就问佢哋：“有咩事呢？”佢哋话：“拉比（翻译出嚟，意思就系‘老师’），你住喺边呀？” 39 耶稣话：“嚟吖，一齐去睇吓！”于是佢哋去睇耶稣住嘅地方，当日就留喺佢嗰度。嗰阵大约系下昼4点*。 40 听到约翰嘅说话而跟随耶稣嘅嗰两个人，其中一个系西门·彼得嘅兄弟安得烈。 41 安得烈首先去揾自己兄弟西门，同佢讲：“我哋揾到弥赛亚喇。”（“弥赛亚”翻译出嚟就系“基督*”。） 42 安得烈带佢去见耶稣。耶稣望住佢话：“你系约翰嘅仔西门，你要叫做矶法。”（“矶法”翻译成希腊语就系“彼得”。）

43 之后嗰日，耶稣想去加利利。耶稣见到腓力，同佢讲：“嚟做我嘅门徒吖。” 44 腓力嚟自伯赛大城，嗰度系安得烈同彼得嘅家乡。 45 腓力揾到拿但业，同佢讲：“我哋揾到摩西法典同埋先知书提到嘅嗰位嘞，就系约瑟嘅仔，拿撒勒人耶稣。” 46 不过拿但业同腓力讲：“拿撒勒出到啲咩好嘢呀？”腓力同佢讲：“嚟睇吓啦。” 47 耶稣见拿但业向住佢行过嚟，就话：“睇吓，呢个系真正嘅以色列人，心入面冇诡诈。” 48 拿但业同耶稣讲：“你点会识我嘅？”耶稣回答话：“当你喺无花果树下面，腓力都仲未叫你嚟，我已经见到你嘞。” 49 拿但业就话：“老师*，你系上帝嘅仔，你系以色列嘅王。” 50 耶稣就话：“系咪因为我话，我见到你喺无花果树下面，你就信呢？你会见到更奇妙嘅事。” 51 耶稣又同佢讲：“我可以好肯定噉同你哋讲，你哋会见到天打开，上帝嘅天使升上降下，嚟到人子*呢度。”

2 第三日，喺加利利嘅迦拿有人举行婚宴，耶稣嘅妈妈喺嗰度。 2 耶稣同门徒都受到邀请去参加婚宴。

3 后嚟啲酒唔够，耶稣嘅妈妈同佢讲：“佢哋冇晒酒嘞。” 4 耶稣就话：“呢件事同我哋有乜嘢关系呢？*我嘅时候仲未到。” 5 佢嘅妈妈就同仆人讲：“佢叫你哋做咩就照做啦。” 6 嗰度有六个石造嘅水缸，系按照犹太人对洁净嘅规定摆喺嗰度嘅，每个可以装两三桶水*。 7 耶稣同仆人讲：“将啲水缸装满水吖。”佢哋就装满啲水缸，满到缸口。 8 之后，耶稣同佢哋讲：“而家𢳂一啲上嚟，拎去俾宴席主管吖。”佢哋就攞去嘞。 9 宴席主管试一试用水变成嘅酒，不过佢唔知道啲酒系喺边度嚟嘅，而𢳂水上嚟嘅仆人当然知道。宴席主管就去揾新郎， 10 同佢讲：“人人都系拎啲靓嘅酒出嚟先，到大家醉醉哋嘞，先至拎啲冇咁靓嘅酒出嚟。但系你就反而将啲靓酒留到而家。” 11 耶稣喺加利利嘅迦拿做嘅呢件事，系佢施行嘅第一个神迹，显示咗佢嘅力量*。佢嘅门徒就信从咗佢。

12 呢件事之后，耶稣同佢嘅妈妈、细佬，仲有门徒，落到去迦百农，但系佢哋喺嗰度唔系住咗好耐。

13 犹太人嘅逾越节就到嘞，耶稣就上耶路撒冷。 14 佢发现圣殿入面有啲人喺度卖牛羊同埋鸽，仲有啲换钱商人坐喺度。 15 佢就拎绳索做鞭，将牛羊同嗰啲贩卖牛羊嘅人由圣殿赶出去，仲令兑钱商啲钱币散落一地，又推冧佢哋啲台。 16 佢对卖鸽嘅人话：“将呢啲嘢攞走！唔好再将我爸爸嘅圣殿当成做买卖嘅地方*！” 17 佢啲门徒就谂起圣经讲过：“我为你嘅殿宇大发热心，好似内心有火燃烧。”

18 于是犹太人同佢讲：“你可以显咩神迹俾我哋睇，证明你有权做呢啲事呀？” 19 耶稣答佢哋：“你哋拆毁呢座圣殿，我会喺三日之内起返佢。” 20 犹太人就话：“呢座圣殿用咗46年先起好，你三日之内就可以起返佢咩？” 21 佢讲嘅圣殿，其实系指佢嘅身体。 22 耶稣死而复生之后，佢嘅门徒谂起佢曾经噉样讲过，就相信圣经同埋耶稣讲嘅说话。

23 耶稣喺耶路撒冷过逾越节嗰阵，好多人睇见佢施行嘅神迹，就开始相信佢*。 24 但系耶稣冇完全信任佢哋，因为佢了解佢哋所有人， 25 亦都因为佢唔需要任何人话俾佢知其他人嘅谂法。佢本来就洞悉人心。

3 有一个人叫尼哥德慕，属于法利赛派，系犹太人嘅一个首领。 2 呢个人夜晚嚟见耶稣，同佢讲：“老师*，我哋知道你系上帝派嚟嘅导师，因为人冇上帝嘅帮助*，就唔能够施行你嗰啲神迹。” 3 耶稣就话：“我可以好肯定噉同你讲，边个唔再次出生*，就唔能够见到上帝嘅王国。” 4 尼哥德慕同佢讲：“一个人长大成人嘞*，点可能再次出世呢？唔通佢可以返去妈妈个肚度再出世咩？” 5 耶稣就话：“我好肯定噉同你讲，边个唔系从水同神圣力量而生，就唔能够进入上帝嘅王国。 6 由人*所生嘅就系人嘅仔女*，从神圣力量*而生嘅就系上帝嘅仔女*。 7 唔好因为我同你讲‘你哋一定要再次出生’，就觉得惊讶。 8 风想吹去边，就去边。你听到风嘅声音，不过就唔知道风喺边度嚟，会去边度。所有从神圣力量而生嘅，都系噉样。”

9 尼哥德慕问：“点可能有噉样嘅事呢？” 10 耶稣就话：“你系以色列人嘅导师，点解唔知道呢啲事呢？ 11 我好肯定噉同你讲：我哋所讲嘅，系我哋知道嘅；我哋作见证嘅，系我哋睇到嘅。但系你哋就唔接受我哋嘅见证。 12 如果我同你哋讲地上嘅事，你哋都唔信，噉我同你哋讲天上嘅事，你哋又点会信呢？ 13 除咗从天而降嘅人子，冇人升过天。 14 正如摩西喺旷野将蛇举起，同样人子都一定会被举起*， 15 等所有相信佢嘅人都有永远嘅生命。

16 “上帝好爱世上嘅人，甚至将自己嘅独生子赐俾人，等所有信从*佢嘅人都唔会灭亡，反而得到永远嘅生命*。 17 因为上帝派自己个仔嚟到世人当中，唔系要佢审判世人，而系要世人通过佢得救。 18 信从佢嘅，就唔会被定罪。唔信从嘅，就已经被定罪，因为佢唔信从上帝嘅独生子*。 19 光嚟到世人当中，但系人因为自己做嘅事邪恶，就爱黑暗而唔爱光，呢个就系佢哋被审判嘅理由。 20 作恶嘅人憎恨光，唔嚟光呢度，因为佢哋怕自己做嘅事被揭露出嚟*， 21 而实践真理嘅，就会嚟光呢度，噉就表明佢系按照上帝嘅旨意去做。”

22 之后，耶稣同门徒去咗犹地亚嘅乡村地区。喺嗰度，佢花咗啲时间同门徒一齐，亦都为人施浸*。 23 约翰都喺撒琳附近嘅艾嫩为人施浸，因为嗰度水量充足。民众都去佢嗰度受浸。 24 当时约翰仲未俾人韫入监。

25 约翰嘅门徒同一个犹太人争论点样做先算系洁净。 26 于是，佢哋嚟同约翰讲：“老师*，以前同你一齐喺约旦河对岸嗰个人，即系你为佢作见证嗰个，你睇，而家佢都施浸，所有人都去晒佢嗰度喇。” 27 约翰就话：“如果唔系天上赐下嘅，人就咩都得唔到。 28 你哋可以作证，我讲过：‘我唔系基督，不过上帝派我喺佢之前嚟到。’ 29 娶新娘嘅系新郎。但系新郎嘅朋友企喺旁边，听到新郎讲嘅嘢，就好开心。所以，我已经开心到不得了*。 30 佢一定会越嚟越昌盛，而我就越嚟越衰微。”

31 嗰位从上面嚟嘅，喺所有人之上。从地上嚟嘅，只不过系从地上嚟嘅，讲嘅都只系地上嘅事。嗰位从天上嚟嘅，喺所有人之上。 32 佢为睇到听到嘅事作见证，只系冇人相信佢嘅见证。 33 相信佢见证嘅人，就好似扱咗印*去确认上帝讲嘅都系真理。 34 上帝派嚟嘅嗰位讲嘅系上帝嘅说话，因为上帝毫无保留噉赐下神圣力量。 35 天父爱呢个仔，已经将一切都交喺佢嘅手。 36 信从上帝嘅仔，就有永远嘅生命；唔服从上帝嘅仔，就唔会得到生命，上帝嘅愤怒会一直喺佢身上。

4 主知道法利赛派听到佢*嘅门徒比约翰多，亦都为更多人施浸。 2 （其实唔系耶稣亲自施浸，而系佢嘅门徒施浸。） 3 主知道呢件事，就离开犹地亚，再次去加利利。 4 不过佢一定要经过撒马利亚， 5 于是嚟到撒马利亚嘅一座城。呢座城叫叙加，近住雅各俾佢个仔约瑟嘅嗰块地， 6 雅各井*就喺嗰度。耶稣因为旅途而好攰，就坐喺个井侧边。当时大约系中午12点*。

7 有一个撒马利亚女人嚟打水。耶稣同佢讲：“请俾啲水我饮吖。” 8 （佢嘅门徒入咗城买嘢食。） 9 撒马利亚女人同耶稣讲：“你系犹太人，做咩问我呢个撒马利亚女人攞水饮呢？”（原来犹太人同撒马利亚人之间冇来往。） 10 耶稣答佢：“如果你知道上帝俾人嘅恩赐*系乜嘢，又知道同你讲‘请俾啲水我饮’嘅系边个，你就会求佢，佢都会俾活水你。” 11 个女人话：“你连打水嘅桶都冇*，个井又深，你喺边度攞到呢种活水呀？ 12 呢口井系我哋嘅祖先雅各留俾我哋嘅，佢自己同啲仔、家畜都饮呢口井嘅水，唔通你仲大过佢咩？” 13 耶稣回答话：“饮呢啲水嘅人，之后仲系会口渴嘅。 14 但系边个饮咗我俾嘅水，就永远都唔会口渴。我俾嘅水会喺人里面成为泉源，不断有水涌出嚟，令人得到永远嘅生命。” 15 嗰个女人话：“请你俾呢种水我*，噉我就唔会再口渴，亦都唔使成日嚟呢度打水喇。”

16 耶稣同佢讲：“去揾你嘅老公，带埋佢嚟呢度吖。” 17 佢就话：“我冇老公㗎。”耶稣话：“你话你冇老公，讲得啱。 18 因为你同过五个男人结婚，而家同你一齐住嘅人唔系你嘅老公。所以你头先讲嘅系真嘅。” 19 佢话：“我睇出你系个先知*。 20 我哋嘅祖先喺呢座山上面崇拜上帝，但系你哋就话，崇拜嘅地方应该喺耶路撒冷。” 21 耶稣同佢讲：“相信我*，时候就快到嘞，你哋崇拜天父，唔会喺呢座山，亦都唔会喺耶路撒冷。 22 你哋崇拜嘅，你哋唔认识；我哋崇拜嘅，我哋认识，因为拯救系从犹太人开始嘅*。 23 不过，时候就快到嘞，其实而家就系，真正崇拜天父嘅人会喺神圣力量嘅引导下*，按照真理崇拜佢，因为天父揾紧噉样嘅人崇拜佢。 24 上帝系个灵体*，崇拜佢嘅人必须喺神圣力量嘅引导下*，按照真理崇拜佢。” 25 佢话：“我知道弥赛亚就快嚟到，佢又叫做基督。佢嚟到，就会同我哋讲解一切。” 26 耶稣同佢讲：“我就系嗰个人，而家同你讲紧嘢。”

27 呢个时候门徒返嚟，见到耶稣同一个女人讲嘢，就好惊讶。当然，冇人问：“点解你同个女人讲嘢嘅？”或者问：“你想要啲乜嘢？” 28 嗰个女人留低装水嘅容器，返入城同人讲： 29 “你哋去睇吓，有个人讲得出我做过嘅所有嘢呀。佢会唔会就系基督呢？” 30 嗰啲人就出城去见耶稣。

31 嗰时，门徒劝耶稣：“老师*，食啲嘢吖。” 32 但系耶稣就话：“我有食物，系你哋唔知道嘅。” 33 于是啲门徒话：“唔通有人俾咗啲嘢佢食？” 34 耶稣同佢哋讲：“我嘅食物就系执行派我嚟嗰位嘅旨意，完成佢嘅工作。 35 你哋唔系话，仲有四个月先至到收割嘅时候咩？我话俾你哋知，抬头望吓田地啦，已经成熟*，可以收割嘞。 36 收割嘅人而家已经得到报酬，亦都收集紧得到永生嘅农作物*，噉撒种嘅同收割嘅都可以一齐欢乐。 37 有句说话讲得啱：‘一个人撒种，另一个人收割。’ 38 我派你哋去收割嘅，系你哋冇栽种过嘅*。其他人栽种，你哋得到佢哋劳动嘅成果。”

39 由嗰座城出嚟嘅撒马利亚人，有好多都因为嗰个女人讲嘅嘢而信从咗耶稣，因为佢作见证话：“佢讲得出我做过嘅所有嘢。” 40 撒马利亚人嚟见耶稣，求佢留低。佢就喺嗰度留咗两日。 41 由于听到耶稣嘅教导，结果就有更加多人相信。 42 佢哋同嗰个女人讲：“我哋唔再只系因为你所讲嘅而相信嘞，仲因为我哋亲耳听到佢讲嘅嘢，知道呢个人真系救世主呀。”

43 两日之后，耶稣离开嗰度，去加利利。 44 （耶稣自己曾经作见证话，先知喺自己嘅家乡系唔受尊重嘅。) 45 佢去到加利利嘅时候，加利利人都欢迎佢，因为佢哋之前都有去耶路撒冷过节，见过佢喺节期做嘅一切。

46 耶稣又去到加利利嘅迦拿，即系佢将水变成酒嘅地方。有一个人系王嘅官员，佢住喺迦百农，佢个仔病咗。 47 佢听讲耶稣喺犹地亚嚟到加利利，就去见耶稣，求耶稣落去迦百农医好佢个仔，因为佢个仔就快死嘞。 48 不过耶稣同佢讲：“除非你哋见到神迹奇事，如果唔系，就绝对唔会相信。” 49 呢个官员话：“主啊，求你同我一齐落去啦，噉我个仔就唔使死嘞。” 50 耶稣同佢讲：“返去啦，你个仔好返嘞。”呢个人相信耶稣同佢讲嘅嘢，就离开嗰度。 51 喺佢返去途中，佢啲奴隶嚟同佢讲，佢个仔已经好返。 52 佢就问嗰啲奴隶，佢个仔嘅病系几点开始好转嘅。佢哋就同佢讲：“琴日下昼1点*，佢就退咗烧嘞。” 53 嗰个爸爸睇出，就系喺嗰个时候，耶稣同佢讲：“你个仔好返嘞”。于是佢同全家都成为咗信徒。 54 呢个系耶稣喺犹地亚返到加利利之后，施行嘅第二个神迹。

5 后嚟，犹太人嘅一个节期到嘞，耶稣就上耶路撒冷。 2 喺耶路撒冷嘅羊门附近有一个池，希伯来语叫毕士特，嗰度有五个柱廊。 3 有好多病人，仲有好多盲嘅、跛嘅同埋肢体萎缩*嘅人瞓咗喺柱廊度。 4 －－－ * 5 嗰度有一个人已经病咗38年。 6 耶稣见到呢个人瞓喺度，而且知道佢病咗好耐，就同佢讲：“你想唔想好返呀？” 7 个病人话：“先生，池水郁嘅时候，冇人放我落个池度。到我准备落去嘞，人哋又快过我。” 8 耶稣同佢讲：“起身！拎起你张垫*，行吓。” 9 嗰个人就即刻好返，拎起张垫，开始行路。

嗰一日系安息日。 10 于是犹太人就同嗰个被医好嘅人讲：“今日系安息日，你搬张垫系唔合法㗎。” 11 但系佢话：“医好我嗰个人同我讲：‘拎起你张垫，行吓。’” 12 佢哋问：“系边个叫你拎起张垫行㗎？” 13 不过佢唔知道系边个医好佢，因为耶稣已经走咗，去到人群当中。

14 后嚟耶稣喺圣殿见到佢，就同佢讲：“而家你好返嘞。唔好再犯罪，以免遭遇更加唔好嘅事。” 15 嗰个人走咗之后，就去同犹太人讲，系耶稣医好佢。 16 于是，犹太人迫害耶稣，因为佢喺安息日帮人医病。 17 耶稣回应佢哋话：“我爸爸不断工作直到而家，所以我都不断工作。” 18 犹太人听到就更加想杀死佢，因为佢哋觉得耶稣唔单止违反咗安息日嘅规定，仲话上帝系自己嘅爸爸，自命同上帝平等。

19 耶稣就同佢哋讲：“我好肯定噉话俾你哋听，阿仔*做任何事都唔可以自作主张，佢见到爸爸*做乜嘢，先至会做。无论爸爸做乜嘢，佢都用同样嘅方式去做。 20 爸爸对阿仔嘅感情好深，向佢展示自己所做嘅一切，而且仲要向佢展示比呢啲更伟大嘅事，令你哋惊讶。 21 正如爸爸复活死人，令佢哋有返生命，同样，阿仔想边个复活，就复活边个。 22 爸爸唔审判任何人，反而将审判嘅事全部交俾阿仔， 23 令人人都尊重佢，就好似尊重爸爸噉。边个唔尊重阿仔，就系唔尊重派佢嚟嘅爸爸。 24 我可以好肯定噉同你哋讲，边个听到我嘅说话，又相信派我嚟嘅嗰位，边个就有永远嘅生命，唔会被定罪，反而已经脱离死亡，归入生命嘞。

25 “我好肯定噉同你哋讲，时候就快到嘞，其实而家就系，死人会听到上帝个仔嘅声音，听从嘅人就会有返生命。 26 爸爸自己里面有生命，佢亦都令阿仔里面有生命*。 27 爸爸已经赐咗审判权俾佢，因为佢系人子。 28 唔好为呢件事惊讶，因为时候会到，所有喺坟墓里面嘅人*都会听到佢嘅声音， 29 就出嚟。行善嘅，复活得到生命；作恶嘅，复活接受审判。 30 我做任何事都唔可以自作主张，我会根据爸爸同我讲嘅去审判人。我嘅审判系公正嘅*，因为我唔系要按照自己嘅意思去做，而系要执行派我嚟嗰位嘅旨意。

31 “如果只有我为自己作见证，我嘅见证就冇效*。 32 有另一位*为我作见证，我知道佢为我作嘅见证系有效嘅。 33 你哋曾经派人去见约翰，佢为真理作咗见证。 34 其实我唔需要*嚟自人嘅见证，我系为咗令你哋得救先至讲呢啲说话。 35 呢个人系一盏点着咗嘅明灯。你哋曾经愿意开开心心噉接受佢嘅光照，不过嗰段时间好短。 36 约翰曾经话俾人听我系爸爸派嚟嘅，而我可以提出更有力嘅证据证明呢一点，就系我做紧爸爸派我成就嘅事。 37 派我嚟嘅爸爸都亲自为我作见证。你哋从来冇听过佢嘅声音，亦都冇见过佢嘅形貌。 38 佢嘅话语唔喺你哋嘅心入面，因为你哋唔相信佢派嚟嘅嗰位。

39 “你哋睇圣经，因为你哋认为通过圣经就可以有永远嘅生命。其实为我作见证嘅，就系圣经。 40 但系你哋唔想跟从我而得到生命。 41 我唔接受人俾我嘅荣耀*。 42 至于你哋，我清楚知道，你哋冇爱上帝嘅心。 43 我奉我爸爸嘅名而嚟，但系你哋唔接待我；如果其他人奉自己嘅名而嚟，你哋反而会接待佢。 44 你哋互相接受荣耀*，唔寻求独一嘅上帝所赐嘅荣耀*，又点会相信我呢？ 45 唔好以为我会向爸爸指控你哋。有一位自然会指控你哋，就系你哋信赖嘅摩西。 46 其实，如果你哋相信摩西，就会相信我，因为摩西嘅书写低咗我会做嘅事。 47 如果你哋唔相信摩西写嘅嘢，又点会相信我讲嘅嘢呢？”

6 后嚟，耶稣坐船过加利利海，即系提比里亚海。 2 有一大班人一直跟住佢，因为佢哋见到佢帮人医病嘅神迹。 3 耶稣上咗山，同门徒坐喺嗰度。 4 当时犹太人嘅一个节日逾越节就快到嘞。 5 耶稣抬头见到一大班人向佢行过嚟，就同腓力讲：“我哋去边度买饼俾呢啲人食呢？” 6 佢噉讲系想了解腓力点谂，其实佢知道要点做。 7 腓力就话：“就算攞200银元*去买饼，都唔够佢哋每人食少少啦。” 8 有一个门徒，就系西门·彼得嘅兄弟安得烈，同耶稣讲： 9 “呢度有个男仔，佢有五个大麦饼同埋两条鱼仔，但系点够分俾咁多人呢？”

10 耶稣话：“你哋叫大家坐低先。”大家就坐喺草地。嗰度大约有5000个男人。 11 耶稣拎起饼，感谢上帝，分俾坐喺度嘅人。佢亦都噉样将鱼仔分俾佢哋。大家想食几多，就俾几多佢哋。 12 佢哋食饱之后，耶稣同门徒讲：“将食净嘅收集埋一齐吖，噉就唔会浪费嘞。” 13 门徒将啲人食净嘅饼收集起，呢啲饼系由嗰五个大麦饼分出嚟嘅，足足装满12个篮。

14 大家见到耶稣施行嘅神迹，就话：“佢真系预言提到，会嚟到世上嘅嗰位先知呀！” 15 耶稣知道佢哋想嚟逼佢做王，就再次离开佢哋，自己上山。

16 到咗夜晚，耶稣嘅门徒行落去海边， 17 上咗只船，出发过去迦百农。当时已经天黑，耶稣仲未返到佢哋嗰度。 18 由于狂风大作，海上就波涛汹涌。 19 佢哋撑咗大约五六公里*，见到耶稣喺海上面行，越嚟越近只船，就觉得好惊。 20 耶稣同佢哋讲：“系我，唔使惊！” 21 门徒就俾佢上船，过咗冇几耐，只船就去到佢哋想去嘅地方。

22 第二日，一直留喺海嘅东岸嘅民众，发现原本喺嗰度嘅船仔唔见咗。因为门徒上咗嗰只船走咗，不过耶稣冇同佢哋一齐。 23 后嚟，有啲嚟自提比里亚嘅船嚟到，停咗喺之前主感谢上帝之后，分饼俾民众食嘅地方附近。 24 民众喺嗰度见唔到耶稣同佢嘅门徒，就上咗呢啲船，去迦百农揾耶稣。

25 民众喺对岸揾到耶稣，就同佢讲：“老师*，你几时嚟到呢度㗎？” 26 耶稣答佢哋：“我好肯定噉话俾你哋知，你哋嚟揾我，系因为之前我俾饼你哋食，食饱咗，而唔系因为见到神迹。 27 你哋唔好为咗会腐坏嘅食物工作，反而要为唔会腐坏，能够带嚟永远生命嘅食物工作。呢种食物系人子会赐俾你哋㗎。天父已经喺佢身上扱印，表明认可佢嘞。”

28 民众同耶稣讲：“做上帝嘅工作，即系要做啲咩呀？” 29 耶稣答佢哋：“你哋相信同埋服从上帝派嚟嘅嗰位，就系做上帝嘅工作嘞。” 30 佢哋同耶稣讲：“你会俾咩神迹我哋睇，等我哋相信你呢？你会做啲乜嘢呢？ 31 我哋嘅祖先喺旷野食过吗哪，圣经都话：‘佢将天上嚟嘅食物赐俾佢哋。’” 32 耶稣就同佢哋讲：“我可以好肯定噉话俾你哋知，摩西冇将天上嚟嘅食物赐俾你哋，我爸爸先至有将天上嚟嘅真食物赐俾你哋。 33 上帝赐俾人嘅食物就系从天上面嚟嘅嗰位，佢会俾生命人。” 34 佢哋同耶稣讲：“主啊，求你一直赐呢种食物俾我哋吖。”

35 耶稣同佢哋讲：“我就系令人得到生命嘅食物。边个跟随我，就唔会再肚饿；边个信从我，就永远唔会口渴。 36 不过，就好似我讲过嘅噉，你哋已经见到我，但系就唔相信。 37 天父赐俾我嘅人，全部都会跟随我。跟随我嘅人，我绝对唔会赶走。 38 我由天上嚟到地上，唔系为咗做自己想做嘅嘢，而系要执行派我嚟嗰位嘅旨意。 39 派我嚟嗰位赐俾我嘅人，我一个都唔会失去，反而会喺最后嘅日子复活佢哋，呢个就系佢嘅旨意。 40 承认阿仔同埋信从阿仔嘅人会有永远嘅生命，我都会喺最后嘅日子复活佢，呢个就系我爸爸嘅旨意。”

41 犹太人因为耶稣话“我系从天而降嘅食物”，就细细声喺度议论。 42 佢哋话：“佢唔系约瑟嘅仔耶稣咩？我哋都识佢爸爸妈妈㗎。点解佢话自己系天上嚟嘅呢？” 43 耶稣就同佢哋讲：“你哋唔使再议论嘞。 44 如果唔系派我嚟嘅天父吸引人，就冇人能够跟随我。跟随我嘅人，我会喺最后嘅日子复活佢。 45 先知书都话：‘佢哋全部都会受耶和华*教导。’所有听到天父嘅说话又学习嘅，就会跟随我。 46 噉唔系话有人见过天父，只有从上帝嗰度嚟嘅嗰位，先至见过佢。 47 我可以好肯定噉同你哋讲，相信嘅人会有永远嘅生命。

48 “我就系令人得到生命嘅食物。 49 你哋嘅祖先喺旷野食过吗哪，最后都死咗。 50 但系边个食咗喺天上嚟嘅呢种食物，就唔会死。 51 我就系喺天上嚟、令人得到生命嘅食物。边个食咗呢种食物，就会得到永远嘅生命。呢种食物就系我嘅肉，我赐俾人系为咗令人得到生命。”

52 之后啲犹太人就喺度争拗，话：“呢个人点可能俾自己啲肉我哋食呀？” 53 耶稣就话：“我好肯定噉同你哋讲，如果你哋唔食人子嘅肉，唔饮佢嘅血，就唔会有生命。 54 边个食我嘅肉，饮我嘅血，就会有永远嘅生命。我亦都会喺最后嘅日子复活佢。 55 我嘅肉系真正嘅食物，我嘅血系真正嘅饮品。 56 边个食我嘅肉，饮我嘅血，边个就一直同我联合埋一齐，我亦都一直同佢联合。 57 永活嘅爸爸派我嚟，所以我有生命；同样，边个食我嘅肉，就会有生命。 58 呢种食物系喺天上嚟嘅，同你哋祖先食嘅唔同。佢哋嗰时食完，后嚟都死咗。但系边个食我呢种食物，就会得到永远嘅生命。” 59 呢啲说话系耶稣喺迦百农嘅会堂*教导人嗰阵讲嘅。

60 佢哋听到之后，好多门徒就话：“佢讲嘅嘢咁得人惊，边个听得入耳呀？” 61 耶稣知道啲门徒细细声喺度议论，就同佢哋讲：“我讲嘅嘢系咪令你哋反感*呀？ 62 如果你哋见到人子升返去佢原本嘅地方，又会点呢？ 63 神圣力量先至能够俾生命人，而血肉之躯就唔可以。我同你哋讲嘅说话系受神圣力量指引嘅，能够令人得到生命。 64 但系你哋有啲人唔相信。”耶稣一开始就知道边啲人唔相信，同埋边个会出卖佢。 65 佢又话：“所以我同你哋讲过，如果唔系天父恩准，冇人能够跟随我。”

66 由于耶稣嘅说话，好多门徒就返去做自己原本做嘅嘢，唔再跟随耶稣。 67 耶稣同十二使徒*讲：“你哋系咪都想走呀？” 68 西门·彼得就话：“主啊，我哋仲可以跟随边个呀？你讲嘅说话能够带俾人永生㖞！ 69 我哋相信，亦都知道你系上帝嘅圣者呀。” 70 耶稣同佢哋讲：“我唔系拣咗你哋12个人咩？但系你哋当中有一个人好似魔鬼一样*。” 71 其实佢讲紧加略人西门嘅仔犹大。犹大虽然系十二使徒之一，但系后嚟出卖咗耶稣。

7 后嚟，耶稣喺加利利继续佢嘅活动。佢唔想去犹地亚一带，因为犹太人*想杀佢。 2 当时犹太人嘅住棚节就到嘞。 3 耶稣啲细佬就同佢讲：“唔好留喺度，去犹地亚，噉你嘅门徒咪睇到你做嘅嘢啰。 4 一个人想出名，冇理由收收埋埋嘅。既然你都做紧呢啲嘢，就应该俾所有人*睇到你。” 5 佢啲细佬当时仲未信从佢。 6 耶稣就同佢哋讲：“我嘅时候仲未到，但系你哋就几时去都得。 7 人冇理由憎你哋，反而系憎我，因为我指证人所做嘅事系邪恶㗎。 8 你哋上去过节啦。我就唔上去住嘞，因为我嘅时候仲未到。” 9 耶稣同细佬讲完呢啲嘢之后，继续留喺加利利。

10 不过，佢啲细佬上去过节之后，佢亦都暗中上去。 11 过节嗰阵，犹太人四围揾佢，佢哋问：“嗰个人喺边呀？” 12 民众就细细声喺度讨论，有啲话：“佢系个好人。”有啲话：“唔系，佢误导民众㗎。” 13 当然，冇人够胆公开噉讲佢，因为大家都惊犹太人。

14 节期过咗一半，耶稣先至上圣殿教导人。 15 犹太人觉得好惊讶，话：“呢个人冇去过学府*读书，点解会咁熟圣经嘅？” 16 耶稣就答佢哋：“我教嘅唔系我自己嘅道理，而系嚟自派我嚟嘅嗰位。 17 边个想按照上帝嘅旨意去做，就会知道我教嘅道理到底系嚟自上帝，定系嚟自我自己。 18 边个照住自己嘅意思讲说话，就系想荣耀自己；边个想荣耀派佢嚟嘅嗰一位，佢讲嘅就系真话，佢嘅心冇虚假*。 19 摩西唔系将法典传咗俾你哋咩？但系你哋冇一个人遵守㖞。点解你哋想杀我呢？” 20 民众就话：“你被邪灵附身呀。边有人想杀你呀？” 21 耶稣答佢哋：“我只系喺安息日施行咗一个奇迹，你哋就咁惊讶。 22 你哋谂吓，摩西吩咐你哋行割礼*，其实割礼唔系嚟自摩西，而系祖先传落嚟嘅，而你哋喺安息日都为人施行割礼。 23 你哋喺安息日帮人施行割礼，系因为唔想违反摩西法典。噉点解我喺安息日医好一个人，令佢好返晒，你哋又咁嬲呢？ 24 唔好再根据表面去判断人，反而要根据正义嘅标准去判断。”

25 有啲住喺耶路撒冷嘅人就话：“呢个唔系佢哋想杀嗰个人咩？ 26 你睇！而家佢公开讲说话，佢哋都冇同佢讲啲乜嘢。唔通连嗰啲首领都真系觉得呢个人系基督？ 27 我哋好清楚知道呢个人喺边度嚟，但系基督嚟嘅时候，唔会有人知道佢喺边度嚟㗎㖞。” 28 当时耶稣喺圣殿教导人，佢大声话：“你哋识得我，亦都知道我喺边度嚟。我唔系自作主张要嚟㗎，而系有一位派我嚟，佢系真实嘅，但系你哋唔认识佢。 29 我认识佢，因为我系佢嘅代表，系佢派我嚟嘅。” 30 佢哋就想捉耶稣，不过冇人落手，因为佢嘅时候仲未到。 31 但系，民众当中有好多人都信从耶稣，佢哋话：“基督嚟嘅时候，会施行好多神迹，呢个人咪就系噉做啰？”

32 法利赛派听到民众细细声讨论耶稣嘅事，祭司长同法利赛派就派差役去拘捕耶稣。 33 耶稣话：“我会喺你哋呢度留多一阵，然后就会返番去派我嚟嗰位嗰度嘞。 34 你哋会揾我；但系唔会揾到，我要去嘅地方，你哋系去唔到㗎。” 35 犹太人就讨论：“呢个人谂住去边度，等我哋揾唔到佢呢？唔通佢谂住去散居喺希腊人当中嘅犹太人嗰度，教埋希腊人？ 36 佢话：‘你哋会揾我；但系唔会揾到，我要去嘅地方，你哋系去唔到㗎。’佢噉讲系咩意思呢？”

37 最后一日，亦即系呢个节期嘅大日子，耶稣企起身，大声话：“边个口渴，就应该嚟我呢度饮水。 38 信从我嘅人，就好似圣经话：‘佢内心嘅深处会有活水嘅江河流出嚟。’” 39 耶稣讲嘅呢番说话同神圣力量有关，系信从佢嘅人将会领受嘅。当时佢哋仲未得到神圣力量，因为耶稣仲未得到荣耀。 40 民众听到佢噉讲，就有人话：“佢真系嗰个先知呀。” 41 仲有人话：“佢系基督呀。”另一啲就话：“基督点会嚟自加利利呀？ 42 圣经唔系话基督系大卫嘅子孙，而且嚟自大卫家乡嗰条村伯利恒咩？” 43 民众就因为耶稣而分裂。 44 有啲人想捉耶稣，但系冇人落手。

45 差役返去见祭司长同法利赛派嘅人。佢哋同差役讲：“点解你哋冇带到佢返嚟？” 46 差役话：“从来冇人好似佢噉讲嘢㗎。” 47 法利赛派嘅人就话：“你哋唔系都俾佢误导咗呀？ 48 我哋嘅首领同法利赛派嘅人，边有人信佢㗎？ 49 至于嗰啲连法典都唔识嘅民众，佢哋系被咀咒㗎。” 50 佢哋当中有一个人，就系之前嚟见过耶稣嘅尼哥德慕，同佢哋讲： 51 “根据我哋嘅法典，未听过一个人点讲，冇查明佢做过嘅事，就唔可以定佢有罪，唔系咩？” 52 佢哋话：“唔通你都系嚟自加利利嘅咩？你去查吓，就知道唔会有先知嚟自加利利㗎。”*

8 12 耶稣又同佢哋讲：“我系世界嘅光。边个跟随我，就绝对唔会喺黑暗之中行走，反而会拥有生命嘅光。” 13 法利赛派嘅人就同佢讲：“你为自己作见证，你嘅见证系冇效嘅*。” 14 耶稣就答佢哋：“就算我为自己作见证，我嘅见证都系有效嘅*，因为我知道我喺边度嚟，会去边度，而你哋就唔知道我喺边度嚟，会去边度。 15 你哋根据人嘅标准定人有罪，但系我就唔会定任何人嘅罪。 16 就算我定人有罪，我嘅判决都系公正嘅，因为我唔系自己一个人噉样做，派我嚟嘅爸爸都一齐。 17 你哋自己嘅法典都话：‘两个人嘅见证先至有效*。’ 18 我为自己作见证，派我嚟嘅爸爸亦都为我作见证。” 19 佢哋问耶稣：“你爸爸喺边度呀？”耶稣就话：“你哋唔认识我，亦都唔认识我爸爸。如果你哋真系认识我，就会认识我爸爸。” 20 呢啲说话系耶稣喺圣殿教导人嗰阵，喺宝库嘅钱箱附近讲嘅。当时冇人拘捕佢，因为佢嘅时候仲未到。

21 佢又同佢哋讲：“我要走嘞，你哋会揾我，但系你哋会死喺自己嘅罪里面。我要去嘅地方，你哋系去唔到嘅。” 22 犹太人话：“佢话：‘我要去嘅地方，你哋系去唔到嘅。’佢唔系谂住自杀呀嘛？” 23 耶稣同佢哋讲：“你哋嚟自地上*，我嚟自天上*。你哋嚟自呢个世界，我唔系嚟自呢个世界。 24 所以我先至话，你哋会死喺自己嘅罪里面。如果你哋唔相信我就系嗰一位，就会死喺自己嘅罪里面。” 25 佢哋就问：“你到底系边个？”耶稣话：“我点解仲要同你哋讲嘢呢？ 26 我有好多关于你哋嘅事要讲，亦都有好多事要审判。派我嚟嘅嗰位讲嘅都系真理，我喺佢嗰度听到嘅，就喺世人当中讲出嚟。” 27 佢哋唔明耶稣讲紧嘅系天父。 28 于是耶稣话：“你哋举起人子*之后，就会知道我就系嗰一位，知道我做乜嘢都唔系自作主张嘅。我讲嘅同爸爸教我嘅一致。 29 派我嚟嘅嗰位同我一齐。佢冇揼低我一个，因为我时时都做佢钟意嘅嘢。” 30 耶稣讲呢啲说话嘅时候，好多人就开始相信佢。

31 耶稣同相信佢嘅犹太人讲：“如果你哋时时刻刻都按照我嘅说话去做，就真系我嘅门徒嘞， 32 你哋会认识真理，真理会令你哋自由。” 33 有啲人话：“我哋系亚伯拉罕嘅子孙，从来冇做过任何人嘅奴隶。点解你话我哋会自由呀？” 34 耶稣答佢哋：“我好肯定噉同你哋讲，所有犯罪嘅人，都系罪嘅奴隶。 35 奴隶唔能够永远留喺主人嘅屋企，而主人嘅仔就可以永远留喺度。 36 所以，如果上帝嘅仔令你哋自由，你哋就真系自由嘞。 37 我知道你哋系亚伯拉罕嘅子孙。不过，你哋想杀我，因为你哋唔接受我嘅教导。 38 我喺我爸爸嗰度见到乜嘢，就讲出嚟；你哋喺你哋嘅爸爸嗰度听到乜嘢，就做出嚟。” 39 佢哋就同耶稣讲：“我哋嘅祖先*系亚伯拉罕。”耶稣同佢哋讲：“如果你哋真系亚伯拉罕嘅子孙，就会效法亚伯拉罕。 40 我将喺上帝嗰度听到嘅真理话俾你哋知，但系而家你哋竟然想杀我。亚伯拉罕冇做过噉嘅事。 41 你哋做紧嘅，就系你哋爸爸所做嘅。”佢哋同耶稣讲：“我哋只系得一个爸爸，就系上帝。我哋唔系私生子*呀。”

42 耶稣同佢哋讲：“如果上帝系你哋嘅爸爸，你哋就会爱我，因为我系喺上帝嗰度嚟嘅。我唔系自作主张要嚟呢度，而系佢派我嚟嘅。 43 点解你哋唔明白我讲嘅嘢呢？因为我讲嘅说话你哋听唔入耳*。 44 你哋系喺你哋嘅爸爸魔鬼嗰度嚟嘅，想按照你哋爸爸嘅欲望去做。佢一开始*就系杀人凶手，冇坚持真理，因为佢心里面冇真理。佢讲大话，系出于自己嘅性情，因为佢系说谎者，亦都系谎话之父。 45 另一方面，由于我将真理话俾你哋知，你哋就唔信我。 46 你哋边个能够证明我有罪呢？既然我讲嘅系真理，点解你哋唔信我呢？ 47 喺上帝嗰度嚟嘅，就会听上帝嘅说话。你哋唔听，系因为你哋唔系由上帝嗰度嚟嘅。”

48 犹太人就同耶稣讲：“都话咗你系撒马利亚人，仲俾邪灵附身㗎啦。我哋有讲错咩？” 49 耶稣答佢哋：“我冇俾邪灵附身。我尊重我爸爸，但系你哋就侮辱我。 50 不过，我唔系荣耀紧自己。有一位想我得到荣耀，佢先至系审判者。 51 我好肯定噉同你哋讲，边个按照我讲嘅说话去做，就永远唔会死。” 52 犹太人同佢讲：“你实系俾邪灵附身呀。亚伯拉罕死咗，啲先知亦都死咗嘞，你竟然话，边个按照你讲嘅说话去做，就永远唔会死。 53 唔通你仲大过我哋嘅祖先*亚伯拉罕？佢已经死咗，啲先知亦都死咗嘞。你以为自己系边个呀？” 54 耶稣答佢哋：“如果我荣耀自己，我嘅荣耀就一啲价值都冇。荣耀我嘅，系我爸爸，亦即系你哋话系你哋上帝嘅嗰一位。 55 不过，你哋唔认识佢，而我就认识佢。如果我话唔识佢，就同你哋一样，系讲大话嘞。我唔单止认识佢，亦都按照佢嘅说话去做。 56 你哋嘅祖先*亚伯拉罕开开心心噉期待睇见我嘅日子，佢睇到*嘞，就好开心。” 57 犹太人就同佢讲：“你50岁都未够，点会见过亚伯拉罕呀？” 58 耶稣话：“我好肯定噉同你哋讲，未有亚伯拉罕之前，就有我嘞。” 59 于是佢哋拎起石头想掟佢。但系耶稣就匿埋，离开咗圣殿。

9 耶稣喺路上，见到一个天生就失明嘅男人。 2 门徒就问：“老师*，呢个人一出世就睇唔到嘢，系边个犯咗罪呀？系呢个人，定系佢父母呀？” 3 耶稣话：“唔系呢个人，亦都唔系佢父母犯咗罪，而系要令人睇出，上帝可以喺佢身上成就嘅事。 4 趁住日头，我哋就要做派我嚟嗰位嘅工作；夜晚一到，就冇人可以工作嘞。 5 只要我仲喺世上，我就系世界嘅光。” 6 佢讲完之后，就吐口水喺地下，捞埋啲泥，将泥搽喺嗰个人对眼上面， 7 然后同佢讲：“去西罗亚池洗吓对眼啦。”（西罗亚翻译出嚟就系“奉派出去”。）佢洗完之后，返嚟已经睇到嘢嘞。

8 啲邻居同嗰啲见过佢乞食嘅人就话：“呢个人咪系平时坐喺度乞食嗰个人？” 9 有啲人话：“系吖。”另一啲人话：“唔系，不过都有啲似。”个男人就不停话：“系我嚟㗎。” 10 佢哋就问：“你系点睇得返嘢㗎？” 11 佢话：“嗰个叫耶稣嘅人捞咗啲泥，搽喺我对眼上面，同我讲：‘去西罗亚池洗吓对眼吖。’我去洗完，就睇到嘢嘞。” 12 佢哋问：“嗰个人喺边呀？”佢话：“我唔知㖞。”

13 佢哋将呢个曾经失明嘅人带去法利赛派嘅人嗰度。 14 耶稣捞咗啲泥，搽喺佢对眼嘅嗰一日，咁啱系安息日。 15 于是法利赛派就问佢系点样睇得返嘢嘅。个男人同佢哋讲：“佢将啲泥搽喺我对眼度，我洗完就睇到嘢喇。” 16 法利赛派有啲人话：“呢个人唔系上帝派嚟嘅，因为佢都唔守安息日。”另一啲人就话：“如果呢个人系有罪嘅，佢点会施行到呢啲神迹呢？”佢哋之间就出现咗分裂。 17 佢哋又问嗰个盲人：“既然系佢令你睇得返嘢嘅，噉你觉得佢系咩人吖？”个盲人话：“佢系个先知。”

18 犹太人本身唔信呢个人曾经系盲嘅，而家睇到嘢，于是佢哋叫呢个人嘅父母过嚟， 19 问佢哋：“呢个系咪你哋个仔呀？佢系咪天生盲㗎？点解佢而家又睇到嘢呢？” 20 佢父母就话：“冇错，佢系我哋个仔，佢天生就系盲嘅。 21 至于点解佢而家睇到嘢，我哋就唔知嘞。边个令佢睇到嘢，我哋都唔知。你哋问佢啦。佢系成年人，应该自己答返。” 22 佢父母噉讲，系因为怕咗啲犹太人*。原来犹太人倾好咗，边个承认耶稣系基督，就会俾会堂开除*。 23 所以佢父母先至话：“佢系成年人，你哋问佢啦。”

24 于是佢哋又叫返嗰个曾经失明嘅人嚟，同佢讲：“你要喺上帝面前讲真话*。我哋知道嗰个人系罪人。” 25 佢话：“佢系咪罪人，我就唔知嘞。但系有样嘢我好肯定，就系我以前睇唔到嘢，而家睇到。” 26 佢哋就问：“佢做咗啲咩？点令你睇到嘢㗎？” 27 个男人答：“我已经讲咗啦，你哋又唔听。点解而家又要我讲多次呢？唔通你哋都想做佢嘅门徒？” 28 佢哋就用轻蔑嘅口吻同佢讲：“你先系嗰个人嘅门徒呀，我哋系摩西嘅门徒。 29 我哋知道上帝将佢嘅诫命话俾摩西听。至于呢个人，我哋就唔知佢喺边度嚟嘞。” 30 嗰个男人就话：“噉就奇怪嘞，佢令我睇到嘢，但系你哋竟然唔知道佢喺边度嚟呀。 31 我哋知道上帝唔会听罪人嘅祈求。边个敬畏上帝，按照佢嘅旨意去做，上帝先会听。 32 从来冇听人讲过，有人可以令天生盲嘅人睇到嘢。 33 如果呢个人唔系上帝派嚟嘅，根本乜都做唔到。” 34 佢哋话：“你一出世就充满罪，居然想教训我哋？”佢哋就将个男人赶咗出去*。

35 耶稣听到佢哋将个男人赶走咗。后嚟耶稣见到佢，就话：“你对人子有冇信心呀？” 36 佢就话：“先生，边个系人子呀？请你话俾我知，噉我就可以对佢有信心嘞。” 37 耶稣话：“你已经见到佢，其实而家同你讲紧嘢嘅就系佢。” 38 嗰个男人话：“主啊，我信从你。”于是佢向耶稣下拜。 39 耶稣话：“我嚟到世人当中，就系为咗令佢哋受到审判，令睇唔到嘅睇得到，而睇得到嘅就失明。” 40 当时有啲法利赛派嘅人同耶稣一齐，佢哋听到，就同耶稣讲：“唔通我哋都系盲嘅咩？” 41 耶稣同佢哋讲：“如果你哋系盲嘅，就冇罪嘞。但系而家你哋话，你哋睇到嘢，所以你哋仍然有罪。”

10 “我好肯定噉同你哋讲，边个唔经门口入去羊圈，反而喺其他地方爬入去，边个就系贼，系强盗。 2 喺门口入去嘅，先至系绵羊嘅牧人。 3 看门嘅人开门俾牧人，绵羊会听牧人嘅声音，佢会嗌自己啲绵羊嘅名，带领佢哋出嚟。 4 佢将自己啲绵羊全部带晒出嚟之后，就行喺前面，啲绵羊都跟住佢，因为认得佢把声。 5 绵羊绝对唔会跟住陌生人，反而会即刻走开，因为唔认得陌生人嘅声音。” 6 耶稣同佢哋讲咗呢个比喻，但系佢哋唔知系乜嘢意思。

7 于是耶稣又话：“我可以好肯定噉同你哋讲，我就系绵羊嘅门。 8 以前冒充我嚟嘅，全部都系贼，都系强盗。绵羊唔会听佢哋话。 9 我就系门。边个经我呢度入去，边个就会得救，可以出入，亦都可以揾到牧场。 10 贼嚟到，无非系想偷窃、杀害、毁灭。我嚟到，系要令绵羊得到生命，而且系丰盛嘅生命。 11 我系好牧人，好牧人愿意为绵羊牺牲生命。 12 请返嚟看羊嘅唔系牧人，啲绵羊都唔系佢嘅。当佢见到狼嚟嘅时候，就会揼低绵羊，走咗去。狼就捉走绵羊，令羊群四散。 13 嗰个看羊嘅人唔关心绵羊，因为佢系请返嚟嘅。 14 我系好牧人，我认识我嘅绵羊，我嘅绵羊都认识我， 15 就好似我爸爸认识我，我都认识爸爸噉。我为绵羊牺牲生命。

16 “我仲有另外嘅绵羊，唔喺呢个羊圈里面，我一定要将佢哋带嚟。绵羊会听我嘅声音，而且合为一群，跟随同一个牧人。 17 爸爸爱我，因为我牺牲生命，为咗再有返生命。 18 我嘅生命唔系俾人夺去嘅，而系我自愿牺牲嘅。我有权牺牲生命，亦都有权再次得到生命。呢个系爸爸俾我嘅命令。”

19 因为呢番说话，犹太人之间又出现咗分裂。 20 好多人都话：“佢俾邪灵附身，癫咗呀。点解你哋仲听佢讲嘢呀？” 21 另一啲人就话：“俾邪灵附身嘅人唔会讲呢啲嘢。邪灵都唔可以令盲人睇到嘢㗎。”

22 嗰时系耶路撒冷庆祝献殿节嘅时候。当时系冬天， 23 耶稣喺圣殿里面嘅所罗门柱廊行紧。 24 犹太人围住佢，同佢讲：“你要令我哋困惑到几时呀？如果你系基督，就直接讲出嚟啦。” 25 耶稣话：“我已经话咗俾你哋知，但系你哋唔信。我奉我爸爸嘅名做嘅事，就表明我系边个。 26 不过你哋唔信，因为你哋唔系我嘅绵羊。 27 我嘅绵羊听我嘅声音，我认识佢哋，佢哋都跟随我。 28 我将永远嘅生命赐俾佢哋，佢哋永远唔会灭亡，冇人可以喺我手上抢走佢哋。 29 我爸爸赐俾我嘅绵羊，比任何嘢更加珍贵，冇人可以喺我爸爸手上抢走佢哋。 30 我同爸爸系合一嘅*。”

31 犹太人又拎起石头，想掟佢。 32 耶稣就话：“爸爸吩咐我做嘅好多好事，我都做咗，而你哋都睇到嘞。你哋系为咗边一件事而要拎石头掟我呢？” 33 犹太人答：“我哋拎石头掟你，唔系因为你做咗好事，而系因为你讲咗亵渎嘅说话。你只不过系人，竟然话自己系神。” 34 耶稣就话：“你哋嘅法典唔系写住，‘我讲过，“你哋系神*”’咩？ 35 圣经系唔能够作废嘅。既然上帝嘅话语指责嘅人，上帝都叫佢哋做‘神’， 36 噉何况系我呢！爸爸令我成圣*，派我嚟到世人当中，我话我系上帝嘅仔，但系你哋竟然话，我讲亵渎嘅说话？ 37 如果我唔做我爸爸吩咐嘅事，你哋就唔好信我。 38 不过，既然我做爸爸吩咐嘅事，你哋就算唔相信我，都应该相信呢啲事，噉样你哋就会知道，而且更加清楚明白，爸爸同我联合，我都同爸爸联合。” 39 于是佢哋又想捉耶稣，不过佢走甩咗，冇落入佢哋嘅手。

40 耶稣又去约旦河对岸，到咗约翰最初施浸嘅地方，住喺嗰度。 41 有好多人去到耶稣嗰度，佢哋话：“约翰一个神迹都冇施行过，但系约翰提到同呢个人有关嘅说话，句句都系真㗎。” 42 嗰度就有好多人信从咗耶稣。

11 有个叫拉撒路嘅人病咗，佢住喺伯大尼，马利亚同佢家姐*马大都住喺嗰条村。 2 呢个马利亚就系将馨香油倒喺主身上，然后用自己嘅头发抹干主对脚嘅嗰个人，而病咗嘅拉撒路系佢嘅兄弟。 3 佢两个姊妹派人去通知耶稣：“主啊，你所爱嘅朋友病咗。” 4 耶稣听到就话：“呢个病最终唔系要带嚟死亡，而系要荣耀上帝，而上帝嘅仔都可以通过呢件事得到荣耀。”

5 耶稣爱马大同佢妹妹，亦都爱拉撒路。 6 不过佢听到拉撒路病咗之后，仲喺原来嘅地方留多两日， 7 先至同门徒讲：“我哋再去犹地亚啦。” 8 门徒同佢讲：“老师*，冇几耐之前，犹地亚人先想用石头掟你，你仲要返去嗰度呀？” 9 耶稣答：“日头唔系有12个钟咩？人喺日头行路，唔会棘亲，因为见到呢个世界嘅光。 10 人喺夜晚行路，就会棘亲，因为佢冇光。”

11 耶稣讲完呢啲说话，就同佢哋讲：“我哋嘅朋友拉撒路瞓着咗，而家我要去叫醒佢。” 12 门徒就同耶稣讲：“主啊，如果佢系瞓紧觉，佢个病就会好返喇。” 13 其实耶稣嘅意思系拉撒路已经死咗，但系佢哋以为耶稣讲嘅系佢真系瞓紧觉。 14 耶稣就坦白同佢哋讲：“拉撒路死咗。 15 我之前唔喺嗰度对你哋嚟讲系好嘅，因为我将会做嘅事会加强你哋嘅信心。而家我哋去佢嗰度啦。” 16 叫做“双胞胎”嘅多马，就同其他门徒讲：“我哋都要去，同耶稣一齐死。”

17 耶稣去到嗰阵，拉撒路已经喺坟墓四日嘞。 18 伯大尼就喺耶路撒冷附近大约3公里*嘅地方。 19 有好多犹太人都嚟安慰马大同马利亚，因为佢哋嘅兄弟死咗。 20 马大听到耶稣就快嚟到，就出去迎接佢，而马利亚就留喺屋企。 21 马大同耶稣讲：“主啊，如果你当时喺度，我嘅兄弟就唔会死嘞。 22 不过，我仍然相信，无论你向上帝求乜嘢，佢都会赐俾你。” 23 耶稣同佢讲：“你嘅兄弟一定会复活。” 24 马大同佢讲：“我知道喺最后嘅日子复活嘅时候，佢一定会复活。” 25 耶稣同佢讲：“我就系复活，就系生命。信从我嘅人就算死咗，都会有返生命。 26 活着嘅人信从我，就永远唔会死。你相唔相信呢件事呢？” 27 佢同耶稣讲：“主啊，我信。我信你系基督，系上帝嘅仔，即系要嚟到世人当中嘅嗰位。” 28 佢讲完呢句话，就返去叫妹妹马利亚，私下同佢讲：“老师到咗，佢揾你呀。” 29 马利亚一听到，就即刻去揾耶稣。

30 当时耶稣仍然喺马大迎接佢嘅地方，仲未入村。 31 嗰啲喺马利亚屋企安慰佢嘅犹太人，见到佢好匆忙噉出咗去，就跟住佢，以为佢要去墓穴嗰度喊。 32 马利亚去到耶稣嗰度，一见到佢，就跪喺佢脚前话：“主啊，如果你当时喺呢度，我嘅兄弟就唔会死嘞。” 33 耶稣见到佢喊，又见到同佢一齐嚟嘅犹太人都喊，就心中悲叹，非常难过， 34 话：“你哋将佢放喺边度呀？”佢哋话：“主啊，你嚟睇吓吖。” 35 耶稣忍唔住流眼泪。 36 于是有啲犹太人话：“睇吓，佢几咁爱呢个人！” 37 仲有啲人话：“既然佢可以令盲人睇到嘢，噉唔系都有能力令呢个人唔死咩？”

38 耶稣再次心中悲叹。之后，佢去到坟墓，呢个墓系个洞穴，有一块石头挡住。 39 耶稣话：“将嚿石头移开。”死者嘅姐姐马大同佢讲：“主啊，佢已经死咗四日，而家一定发臭嘞。” 40 耶稣同佢讲：“我唔系讲过，只要你相信，就会见到上帝嘅荣耀咩？” 41 啲人就将石头移开。耶稣抬头望向天空，话：“爸爸，多谢你听我嘅祷告。 42 我知道你时刻听我讲嘅说话；不过为咗企喺周围嘅民众，我先讲呢啲说话，噉样佢哋就会相信系你派我嚟嘅。” 43 佢讲完呢番说话，就大声话：“拉撒路，出嚟！” 44 嗰个死咗嘅人就出嚟，佢嘅手脚俾布包住，块面都俾一块布包住。耶稣同民众讲：“解开佢，俾佢行吖。”

45 好多嚟探马利亚嘅犹太人，见到耶稣做嘅事，就信从咗耶稣。 46 不过有啲人去见法利赛派嘅人，将耶稣做嘅事话俾佢哋知。 47 于是祭司长同法利赛派召开公议会，话：“呢个人施行咗咁多神迹，我哋点做好呢？ 48 如果由得佢继续噉样，个个都会信从佢，罗马人就会嚟抢走我哋嘅圣地*同民族嘅控制权嘞。” 49 佢哋当中有个人叫该亚法，系当年嘅大祭司，同佢哋讲：“你哋乜嘢都唔识， 50 亦都唔谂吓，一个人为众人而死，噉样成个民族都唔使灭亡，呢个对你哋有好处。” 51 佢噉样讲，其实唔系佢自己嘅意思，而系因为佢系当年嘅大祭司，所以预言耶稣会为呢个民族而死。 52 但系耶稣唔单止为呢个民族而死，仲要将上帝四散嘅儿女聚集起嚟，合成一群。 53 由嗰一日起，佢哋就密谋杀死耶稣。

54 所以，耶稣冇再公开噉喺犹太人当中活动。佢离开嗰度，去旷野附近嘅地方，到咗一座叫以法莲嘅城，同门徒一齐住喺嗰度。 55 犹太人嘅逾越节就快到嘞，逾越节之前有好多人从乡郊地区上去耶路撒冷，要喺嗰度按照法典规定令自己洁净。 56 佢哋都喺度揾紧耶稣。企喺圣殿唔同地方嘅人讨论话：“你哋点睇呀？佢唔嚟过节咩？” 57 当时祭司长同法利赛派落咗命令，任何人如果知道耶稣喺边，都要报告，噉佢哋就可以拘捕佢。

12 逾越节前六日，耶稣去到伯大尼，亦即系拉撒路住嘅地方。耶稣曾经喺嗰度复活拉撒路。 2 有人喺嗰度请耶稣食晚餐。马大帮手招呼大家，而拉撒路同其他人就同耶稣一齐食饭*。 3 呢个时候，马利亚拎住一樽*馨香油，系纯正嘅甘松油，非常之贵重。佢将油倒落耶稣对脚，仲用自己嘅头发抹干佢对脚。屋入面充满馨香油嘅香味。 4 耶稣有个门徒叫加略人犹大，就系将会出卖佢嗰个，佢话： 5 “呢樽馨香油值300银元*㗎㖞，点解唔拎去卖，将啲钱分俾穷人呀？” 6 佢噉讲唔系因为关心穷人，而系因为佢系个贼，又负责管钱盒，成日偷入面啲钱。 7 于是耶稣话：“由佢啦，佢而家做嘅，就系为我安葬嘅日子做准备。 8 你哋身边几时都有穷人，但系我就唔会一直喺你哋身边。”

9 一大班犹太人知道耶稣喺嗰度，就嚟到，唔单止想见到佢，亦都想见吓俾耶稣复活嘅拉撒路。 10 啲祭司长就密谋杀死埋拉撒路， 11 因为有好多犹太人去咗伯大尼，见到发生喺拉撒路身上嘅事，就信从咗耶稣。

12 第二日，一大班嚟过节嘅人听讲耶稣就快到耶路撒冷， 13 就拎住棕榈树嘅树枝出去迎接佢。佢哋大声话：“上帝啊，求你施行拯救！奉耶和华*嘅名而嚟嘅以色列王系有福嘅！” 14 耶稣揾到一只驴仔，就骑上去，好似圣经讲嘅噉。圣经话： 15 “锡安城啊，唔使惊。睇吓！你嘅王嚟咗，佢骑喺一只驴仔上面。” 16 门徒起初唔明白呢啲说话，直到后嚟耶稣得到荣耀，先至谂起呢啲说话同耶稣有关，而民众真系向佢做咗呢啲事。

17 耶稣复活咗拉撒路，叫佢喺墓穴出嚟，当日在场嘅人后嚟不断为呢件事作见证。 18 所以民众都出嚟迎接耶稣，因为听讲佢施行咗呢个神迹。 19 于是法利赛派嘅人就话：“你哋睇，我哋做嘅都白费心机。个个都跟随佢嘞。”

20 喺节期嚟崇拜嘅人当中，有啲系希腊人。 21 佢哋去揾嚟自加利利嘅伯赛大人腓力，提出一个请求，话：“先生，我哋想见耶稣呀。” 22 于是，腓力去话俾安得烈知。安得烈同腓力就去话俾耶稣知。

23 耶稣就同佢哋讲：“人子得到荣耀嘅时候到嘞。 24 我好肯定噉同你哋讲：一粒小麦如果唔系跌落土地死咗，都只系一粒啫；但系如果死咗，就会长出好多麦穗嘞。 25 边个爱惜自己嘅生命*，就会丧失生命；边个喺呢个世界愿意牺牲*自己嘅生命，就会保全生命，得到永生。 26 边个为我服务，就应该跟随我。我喺边度，为我服务嘅人就喺边度。边个为我服务，我爸爸就会尊重佢。 27 而家我好痛苦，我讲乜嘢好呢？爸爸啊，求你救我脱离呢个痛苦嘅时候。不过，我就系为咗呢个时候嚟㗎。 28 爸爸，愿你荣耀你嘅名。”于是天上有声音话：“我已经荣耀咗我嘅名嘞，而且会再噉样做。”

29 企喺嗰度嘅民众听到，就话系行雷。另一啲人话：“有天使同佢讲嘢呀。” 30 耶稣话：“呢个声音唔系为我发出嘅，而系为你哋发出嘅。 31 呢个世界而家要受审判。统治全世界嘅王会被赶出去。 32 如果我喺地上被举起*，就会吸引各种各样嘅人嚟到我呢度。” 33 佢讲呢句说话，其实系想讲自己会点样死。 34 民众就同佢讲：“我哋听过法典话，基督系永远长存嘅。你点解话，人子一定会被举起呢？呢个人子系边个呀？” 35 耶稣同佢哋讲：“光仲会有少少时间留喺你哋当中。你哋要趁仲有光嘅时候行路，噉就唔会俾黑暗战胜你哋。喺黑暗之中行嘅，唔知道自己要去边度。 36 你哋要趁仲有光，就信从光，噉你哋就会成为光明之子。”

耶稣讲完呢番话，就离开佢哋，匿埋咗。 37 虽然耶稣喺佢哋面前施行过咁多神迹，佢哋仲系唔肯信从佢。 38 先知以赛亚嘅说话就系噉样应验咗嘞。佢话：“耶和华*啊，啲人听到我哋传讲嘅信息，但系有边个信从呢？耶和华*嘅臂膀向边个显露过呢？” 39 以赛亚又指出点解佢哋唔信，佢话： 40 “佢容许佢哋眼盲心硬，噉佢哋就唔会因为对眼睇到，心入面明白，回头改过，就俾我医返好。” 41 以赛亚噉讲，系因为佢见到基督嘅荣耀，所以谈论关于佢嘅事。 42 虽然系噉，好多民间首领都信从咗耶稣，不过由于佢哋惊法利赛派，就唔敢公开承认，怕俾会堂开除*； 43 因为佢哋钟意得到人嘅荣耀，多过得到嚟自上帝嘅荣耀*。

44 耶稣大声话：“信从我嘅，唔单止信从我，亦都信从派我嚟嗰位。 45 见到我嘅，亦都见到派我嚟嗰位。 46 我系光，我嚟到世人当中，令信从我嘅人都唔再留喺黑暗里面。 47 边个听到我嘅说话但系唔遵守，我唔会定佢嘅罪，因为我嚟唔系要定世人嘅罪，而系要拯救世人。 48 漠视我、唔接受我说话嘅人，自然有定佢罪嘅。喺最后嘅日子，我讲嘅说话会定佢嘅罪。 49 我冇照自己嘅意思讲说话，而系派我嚟嘅爸爸亲自俾命令我，叫我讲乜嘢，教乜嘢。 50 我亦都知道，佢嘅命令能够令人得到永远嘅生命。所以，我讲嘅，其实就系爸爸叫我讲嘅。”

13 逾越节之前，耶稣知道自己嘅时候到嘞，佢要离开呢个世界，去爸爸嗰度。佢既然爱世上属于佢嘅人，就爱佢哋到底。 2 到咗晚餐嘅时候，魔鬼已经将出卖耶稣嘅谂法，放咗喺西门嘅仔加略人犹大心里面。 3 由于耶稣知道爸爸已经将一切交喺自己手上，亦都知道自己系喺上帝嗰度嚟嘅，要去上帝嗰度， 4 佢就离开餐台，将外衣摆埋一边，拎条毛巾绑喺腰度。 5 之后，佢将水倒落个盆度，开始帮门徒洗脚，然后用绑喺条腰嘅毛巾抹返干。 6 佢嚟到西门·彼得面前。彼得同佢讲：“主啊，你要帮我洗脚呀？” 7 耶稣话：“我做紧嘅嘢，你而家唔明白，但系你之后就会明白。” 8 彼得话：“你绝对唔可以帮我洗脚㗎。”耶稣话：“我唔洗你对脚，你就同我冇关系嘞。” 9 西门·彼得同佢讲：“主啊，噉就唔好净系洗我对脚，连手同头都洗埋啦。” 10 耶稣同佢讲：“人冲完凉就完全洁净嘞，佢净系需要洗脚。你哋系洁净嘅，不过你哋唔系个个都洁净。” 11 其实耶稣知道边个要出卖佢。所以佢先话：“你哋唔系个个都洁净。”

12 耶稣帮佢哋洗完脚之后，着返外衣，返到台前*，同佢哋讲：“你哋知唔知点解我帮你哋洗脚呀？ 13 你哋称呼我做‘老师’，称呼我做‘主’，你哋讲得啱，我本来就系。 14 我身为主，身为老师，都帮你哋洗脚，你哋都应该互相洗脚。 15 我为你哋树立典范，我对你哋点做，你哋都应该照住做。 16 我可以好肯定噉同你哋讲，奴隶唔会大过主人，被派嘅都唔会大过派佢去嘅。 17 你哋既然知道呢啲事，如果照住去做，就有福嘞*。 18 我讲紧嘅唔系你哋所有人。我认识我拣选嘅人。不过，噉系要应验圣经嘅说话：‘一向同我一齐食饭*嘅人，而家竟然用脚踢我*。’ 19 由而家开始，我将未来会发生嘅事话俾你哋知，噉当事情发生嗰阵，你哋就可以相信圣经讲嘅就系我。 20 我好肯定噉同你哋讲，边个接待我派嚟嘅人，就即系接待我。边个接待我，就即系接待派我嚟嘅嗰位。”

21 耶稣讲完呢啲说话，就非常难过，明确噉同佢哋讲：“我好肯定噉话俾你哋知，你哋当中有一个人会出卖我。” 22 门徒你眼望我眼，完全唔知佢讲紧边个。 23 耶稣所爱嘅一个门徒，当时坐喺最接近耶稣嘅座位*。 24 于是西门·彼得向呢个门徒点一点头，问佢：“佢讲紧边个呀？” 25 嗰个门徒就向后挨喺耶稣胸前，同佢讲：“主啊，系边个呀？” 26 耶稣答：“我蘸块饼俾边个，就系边个。”耶稣就蘸咗一块饼，递俾加略人西门嘅仔犹大。 27 犹大接过块饼之后，撒但入咗佢嘅心。于是耶稣同佢讲：“你要做嘅事，快啲去做啦。” 28 在场冇人知道*点解耶稣噉样同佢讲。 29 由于犹大负责管钱盒，有啲人以为耶稣系叫佢去买过节要用嘅嘢，或者叫佢送啲嘢俾穷人。 30 犹大接过块饼，就即刻出去嘞。当时已经天黑。

31 佢出去之后，耶稣就话：“而家人子得到荣耀，上帝都因为佢而得到荣耀。 32 上帝会亲自令佢得到荣耀，而且好快就会噉样做。 33 仔啊*，我喺你哋呢度嘅时间唔多嘞。你哋会揾我，但系好似我同犹太人讲过嘅噉，‘我去嘅地方，你哋系去唔到㗎’，而家我都噉样同你哋讲。 34 我俾一条新诫命你哋，就系你哋要彼此相爱。我点样爱你哋，你哋都要点样彼此相爱。 35 如果你哋彼此相爱，所有人就会知道你哋系我嘅门徒嘞。”

36 西门·彼得同佢讲：“主啊，你要去边度呢？”耶稣答：“我去嘅地方，你而家唔可以跟我去，将来先可以。” 37 彼得同佢讲：“主啊，点解我而家唔可以跟你去呢？为咗你，我愿意牺牲生命呀。” 38 耶稣答：“你真系愿意为我牺牲生命？我好肯定噉话俾你知，鸡叫之前，你会三次唔认我。”

14 “你哋唔好忧虑不安。要对上帝有信心，亦都要对我有信心。 2 我爸爸嘅家有好多住嘅地方，如果唔系，我就唔会噉讲嘞。而家我要去为你哋准备地方。 3 既然我去为你哋准备地方，就会返嚟，接你哋去我嘅家，噉样我喺边度，你哋都会喺边度。 4 你哋知道边条路可以去到我去嘅地方。”

5 多马同佢讲：“主啊，我哋都唔知道你要去边，又点知道系边条路呢？”

6 耶稣话：“我就系道路、真理、生命。如果唔系通过我，冇人可以去到爸爸嗰度。 7 如果你哋认识我，都会认识我嘅爸爸。由而家开始，你哋认识佢，亦都见到佢嘞。”

8 腓力同佢讲：“主啊，求你俾我哋见吓天父吖，噉我哋就满足㗎嘞。”

9 耶稣话：“腓力，我同你哋一齐咁耐嘞，你仲唔认识我咩？边个见到我，就系见到爸爸。点解你话，‘求你俾我哋见吓天父’呢？ 10 你唔相信我同爸爸联合，而爸爸亦都同我联合咩？我冇按照自己嘅意思同你哋讲说话，时刻同我联合嘅爸爸就系通过我去达成佢嘅旨意。 11 你哋要相信我，我同爸爸联合，爸爸亦都同我联合。就算你哋唔相信我讲嘅，都应该因为我按照爸爸嘅旨意所做嘅嘢而相信。 12 我可以好肯定噉同你哋讲，我做嘅工作，信从我嘅人将来都会做，而且会做得更大，因为而家我要去爸爸嗰度嘞。 13 你哋奉我嘅名，无论求乜嘢，我都一定会成全，噉我爸爸就会因为佢嘅仔而得到荣耀。 14 无论你哋奉我嘅名求乜嘢，我都一定会成全。

15 “你哋爱我，就会遵守我嘅诫命。 16 我请求爸爸，佢就会赐另一个帮助者*俾你哋，永远同你哋同在。 17 帮助者就系显示真理嘅神圣力量，系世人唔能够领受嘅，因为世人见唔到佢，亦都唔认识佢。你哋认识佢，因为佢时刻同你哋同在，亦都喺你哋里面。 18 我唔会揼低你哋，令你哋好似孤儿噉。我会返嚟你哋呢度。 19 冇几耐之后，世人就唔会见到我嘞，但系你哋会见到我，因为我活着，你哋亦都会活着。 20 到咗嗰日你哋就会知道，我同我爸爸联合，你哋同我联合，我都同你哋联合。 21 接受我嘅诫命又遵守嘅人，就系爱我嘞。爱我嘅，我爸爸就爱佢，我都爱佢，而且我会令佢清楚认识我。”

22 另一个犹大，唔系加略人犹大，佢问耶稣：“主啊，点解你想净系俾我哋清楚认识你，而世人又唔得呢？”

23 耶稣答佢：“边个爱我，就会照我嘅说话去做，我爸爸都会爱佢，而且我同爸爸会去到佢嗰度，同佢一齐住。 24 唔爱我嘅，就唔会照我嘅说话去做。你哋听到嘅说话，唔系嚟自我，而系嚟自派我嚟嘅爸爸。

25 “我仲同你哋一齐嘅时候，就已经将呢啲事话俾你哋知嘞。 26 不过帮助者*，即系爸爸因为我嘅名而派嚟嘅神圣力量，佢会将一切都教导你哋，令你哋记起我同你哋讲过嘅所有嘢。 27 我留低安宁俾你哋；我将我嘅安宁赐俾你哋。我赐俾你哋嘅呢种安宁，同世界俾人嘅唔同。你哋唔使忧虑不安，亦都唔好退缩。 28 我同你哋讲过：‘我会离开，亦都会返嚟你哋呢度。’如果你哋爱我，就会因为我要去爸爸嗰度而开心，因为爸爸系比我大嘅。 29 而家我就事先话俾你哋知，噉当事情发生嗰阵，你哋就可以相信。 30 以后我唔会再同你哋讲咁多说话，统治全世界嘅王就快嚟到。不过佢对我系无能为力嘅。 31 但系，为咗令世人知道我爱爸爸，我而家照住爸爸俾我嘅命令去做。行喇，我哋离开呢度啦。”

15 “我系真葡萄树，我爸爸系培植嘅人。 2 喺我呢棵树上面，所有唔结果实嘅树枝，佢都会清除；所有结果实嘅，佢都会修剪干净*，噉就结到更多果实。 3 你哋已经洁净嘞，因为你哋听从我嘅说话。 4 你哋要时刻同我联合，我都时刻同你哋联合。正如树枝离开咗葡萄树，就唔能够自己结果实。同样，你哋唔时刻同我联合，都结唔到果实。 5 我系葡萄树，你哋系树枝。时刻同我联合嘅，我都时刻同佢联合，佢就会多结果实。如果离开咗我，你哋就乜嘢都做唔到。 6 边个冇时刻同我联合，就会好似揼咗喺外面嘅树枝，变得枯干。啲人会收集呢啲树枝，揼入火里面烧。 7 如果你哋时刻同我联合，我嘅说话又时刻喺你哋心入面，噉你哋想要嘅，就即管去求啦，都会实现。 8 你哋不断多结果实，表明自己系我嘅门徒，我嘅爸爸就会因为噉而得到荣耀。 9 正如爸爸爱我，我都爱你哋；你哋要时刻留喺我嘅爱里面。 10 如果你哋遵守我嘅诫命，就会时刻留喺我嘅爱里面，就好似我遵守爸爸嘅诫命，就时刻留喺佢嘅爱里面一样。

11 “我将呢啲事讲俾你哋知，系想你哋心里面有我嘅喜乐，而且可以完全感受到呢份喜乐。 12 我俾你哋嘅诫命就系：要彼此相爱，就好似我爱你哋一样。 13 人为朋友牺牲生命，冇任何爱比呢种爱更加大。 14 如果你哋照我嘅吩咐去做，就系我嘅朋友嘞。 15 我唔再将你哋叫做奴隶，因为奴隶唔清楚主人做嘅事。我将你哋叫做朋友，因为我喺爸爸嗰度听到嘅，都话晒俾你哋知。 16 唔系你哋拣咗我，而系我拣咗你哋，委派你哋去不断结出果实，等你哋嘅果实可以永远长存。噉样，你哋奉我嘅名，无论向爸爸求乜嘢，佢都会赐俾你哋。

17 “我俾呢啲吩咐你哋，系想你哋彼此相爱。 18 如果世人憎恨你哋，要记得，世人憎恨你哋之前已经憎恨我嘞。 19 如果你哋属于世界，世人自然会钟意你哋*。但系由于你哋唔属于世界，而系我喺世界当中拣你哋出嚟，所以世人就憎恨你哋。 20 要记得我同你哋讲过，奴隶唔会大过主人。如果佢哋迫害我，都会迫害你哋；如果佢哋按照我嘅说话去做，都会按照你哋嘅说话去做。 21 但系，佢哋会因为你哋系我嘅门徒而噉样对付你哋*，因为佢哋唔认识派我嚟嗰位。 22 如果我冇嚟，冇同佢哋讲过嘢，佢哋就冇罪嘞。不过而家佢哋嘅罪系冇办法开脱嘅。 23 边个憎恨我，即系憎恨我嘅爸爸。 24 我喺佢哋当中，如果冇施行过其他人从未做过嘅奇迹，佢哋就冇罪嘞。不过，而家佢哋见到我*，都仲系憎恨我，亦都憎恨我嘅爸爸。 25 噉系要应验写喺佢哋法典嘅说话：‘佢哋无缘无故憎恨我。’ 26 我会将爸爸所赐嘅帮助者*派去你哋嗰度，帮助者即系显示真理嘅神圣力量，佢系由爸爸嗰度嚟嘅，佢到咗就会为我作见证。 27 你哋都要作见证，因为由我一开始传道，你哋就同我一齐。”

16 “我将呢啲事话俾你哋知，系唔想你哋失去信心*。 2 你哋会被会堂开除*。其实，时候要到，有人会杀害你哋，而佢哋都以为噉样做系敬奉紧上帝。 3 佢哋做呢啲事，系因为从来唔认识我爸爸，亦都唔认识我。 4 不过，我事先将呢啲事话俾你哋知，噉到事情发生嗰阵，你哋就会记返起。

“但系，我起初冇讲呢啲事俾你哋知，因为嗰时我同你哋一齐。 5 而家我要去派我嚟嗰位嗰度，你哋竟然冇一个问我：‘你要去边度？’ 6 反而因为我将呢啲事话俾你哋知，就非常忧愁。 7 不过，相信我，我系为你哋好先至离开。我唔离开，帮助者*就唔会嚟你哋呢度；我离开咗，就会派佢嚟你哋呢度。 8 佢嚟到，就会向世人提出确凿嘅证据，令人清楚睇出边个有罪，边个正义，边个受审判： 9 首先佢会令人清楚睇出世人嘅罪，因为佢哋唔信从我； 10 其次佢会令人清楚睇出我做嘅事系正义嘅，因为我就嚟要去爸爸嗰度，你哋唔会再见到我； 11 然后佢会令人清楚睇出边个受上帝审判，因为统治全世界嘅王已经受到审判嘞。

12 “我仲有好多事要讲俾你哋知，但系你哋而家承受唔到。 13 不过，等显示真理嘅神圣力量嚟到，佢*就会引导你哋明白所有真理，因为佢唔系按照自己嘅意思讲说话，而系将听到嘅讲出嚟，向你哋宣讲将来嘅事。 14 佢会令我得到荣耀，因为佢听到嘅系嚟自我嘅，而且会向你哋宣讲出嚟。 15 爸爸将知道嘅一切都话俾我知。所以我话，帮助者听到嘅系嚟自我嘅，而且会向你哋宣讲出嚟。 16 你哋好快就唔会再见到我，但系冇几耐之后，你哋又会见返我。”

17 耶稣有啲门徒就喺度讨论：“佢同我哋讲，‘你哋好快就唔会再见到我，但系冇几耐之后，你哋又会见返我’；又话，‘我就嚟要去爸爸嗰度’。即系咩意思呀？” 18 门徒继续话：“佢话‘好快’即系点呀？我哋都唔知佢讲紧乜。” 19 耶稣知道佢哋有嘢想问，就同佢哋讲：“系咪因为我头先话，‘你哋好快就唔会再见到我，但系冇几耐之后，你哋又会见返我’，你哋就讨论呢句说话嘅意思呢？ 20 我可以好肯定噉同你哋讲，你哋会悲伤痛哭，而世人反而会开心。你哋会忧愁，但系你哋嘅忧愁会化为喜乐。 21 女人生仔嘅时候到咗，佢就会因为好痛而忧愁。不过，到佢生咗嘞，就会因为有个小朋友出世而开心，唔再记得佢嘅痛苦。 22 同样，而家你哋忧愁，但系将来你哋见返我嘅时候，都会好开心，冇人可以攞走你哋嘅喜乐。 23 到时，你哋唔会再问我啲乜嘢。我好肯定噉同你哋讲，无论你哋向我爸爸求乜嘢，佢都会因为我嘅名赐俾你哋。 24 你哋从来冇奉我嘅名求过乜嘢。而家你哋即管求，就会得到，噉你哋就会满心喜乐嘞。

25 “我一直用比喻将呢啲事话俾你哋知。不过时候会到，我唔会再用比喻同你哋讲说话，而系会明明白白噉将爸爸嘅事讲俾你哋知。 26 到时，你哋会奉我嘅名向爸爸祈求。我噉样讲，意思唔系话，你哋需要我去为你哋祈求。 27 爸爸对你哋有好深嘅感情，因为你哋一直对我有好深嘅感情，亦都相信我系上帝派嚟嘅。 28 我代表爸爸嚟到世人当中。而家我就快离开世人，返去爸爸嗰度嘞。”

29 门徒话：“而家你唔用比喻，将呢啲事讲得好白。 30 我哋终于知道，你唔需要人哋主动问你，就已经知道佢谂紧乜嘢。凭住呢一点，我哋相信你系由上帝嗰度嚟㗎。” 31 耶稣回应佢哋：“你哋而家系咪真系相信呀？ 32 我话俾你哋知，时候会到，而且好快就到，你哋会被分散，各自返屋企，留低我一个人。其实我唔系一个人，因为有爸爸同我一齐。 33 我讲呢啲事俾你哋知，系想你哋因为我而得到安宁。你哋喺世上会经历患难，但系要鼓起勇气！我已经战胜世界。”

17 耶稣讲完呢啲说话，就抬头望天，话：“爸爸啊，时候到嘞。求你荣耀你嘅仔，噉你嘅仔都可以荣耀你。 2 你已经将统管全人类嘅权力赐俾佢，噉样，佢就可以令所有你赐俾佢嘅人得到永远嘅生命。 3 佢哋要不断认识*你呢位独一嘅真神，同埋你派嚟嘅耶稣基督，先至能够得到永远嘅生命*。 4 我已经喺地上令你得到荣耀嘞，完成咗你交俾我做嘅事。 5 爸爸啊，喺未有世人之前，我喺你身边享有荣耀。而家，求你都俾我喺你身边得到荣耀。

6 “你喺世人当中赐俾我嘅人，我已经令佢哋清楚认识你嘅名。佢哋本来系你嘅，你将佢哋赐咗俾我，佢哋都遵守你嘅话语。 7 而家佢哋知道，你赐俾我嘅一切都嚟自你， 8 因为你同我讲嘅嘢*，我已经讲咗俾佢哋知，佢哋亦都接受咗，而且确实知道我代表你嚟，又相信系你派我嚟嘅。 9 我唔为世人祈求，而系为佢哋祈求。我为你赐俾我嘅人祈求，因为佢哋系你嘅。 10 我嘅一切都系你嘅，你嘅都系我嘅，我喺佢哋当中都得到荣耀。

11 “而家我要去你嗰度，唔再留喺世人当中，而佢哋就仍然喺世人当中。你已经将你嘅名赐咗俾我嘞。圣洁嘅爸爸啊，为咗你嘅名，求你照顾佢哋，令佢哋合一*，就好似我哋合一噉样。 12 为咗你嘅名，即系你赐俾我嘅名，我同佢哋一齐嗰阵，一直照顾佢哋，保护佢哋。除咗嗰个灭亡之子，佢哋冇一个灭亡，噉就应验咗圣经嘅说话。 13 而家我要去你嗰度，我仲喺世上嘅时候讲呢啲说话，系想令佢哋完全感受到我嘅喜乐。 14 我将你嘅说话讲咗俾佢哋知，不过世人憎恨佢哋，因为佢哋唔属于世界，就好似我唔属于世界一样。

15 “我唔系求你喺世人当中带走佢哋，而系求你保护佢哋，唔好俾撒但*得逞。 16 佢哋唔属于世界，就好似我唔属于世界一样。 17 求你用真理令佢哋成圣*，你嘅话语就系真理。 18 你派我去世人当中，我亦都派佢哋去世人当中。 19 我为咗佢哋而保持圣洁，噉样佢哋都可以通过真理成圣。

20 “我唔单止为呢啲人祈求，亦都为嗰啲因为佢哋嘅教导而信从我嘅人祈求， 21 令佢哋全部合一，就好似爸爸你同我联合，我同你联合，佢哋都同我哋联合一样，噉就可以令世人相信系你派我嚟嘅。 22 我已经将你赐俾我嘅荣耀赐俾佢哋，噉佢哋就可以合一，好似我哋合一噉样。 23 我同佢哋联合，你同我联合，噉佢哋就可以有完美嘅合一*，世人亦都知道系你派我嚟嘅，知道你爱佢哋，就好似你爱我一样。 24 爸爸啊，我好希望我喺边度，你赐俾我嘅人都同我一齐，噉样佢哋就可以见到你赐俾我嘅荣耀，因为喺世界奠基之前，你已经爱我嘞。 25 正义嘅爸爸，世人仲未认识你，我就认识你，呢啲人都知道系你派我嚟嘅。 26 我已经令佢哋认识你嘅名，而且会继续令佢哋认识，噉佢哋就会爱其他人，好似你爱我噉样*，我亦都同佢哋联合。”

18 耶稣讲完呢啲说话，就同门徒一齐过咗汲沦谷，入咗去一个园子。 2 出卖佢嘅犹大都知道呢个地方，因为耶稣同门徒经常去嗰度。 3 犹大就带住一队士兵，仲有祭司长同埋法利赛派嘅差役去到嗰度。佢哋拎住火把、灯同埋武器。 4 耶稣知道将会发生喺自己身上嘅所有事，就上前问佢哋：“你哋揾边个呀？” 5 佢哋话：“拿撒勒人耶稣。”耶稣同佢哋讲：“我就系。”出卖耶稣嘅犹大都企喺佢哋当中。

6 耶稣一讲“我就系”，佢哋就褪后，跌低咗。 7 于是佢又问：“你哋揾边个？”佢哋话：“拿撒勒人耶稣。” 8 耶稣答：“我已经同你哋讲过，我就系。如果你哋揾嘅系我，就放呢啲人走啦。” 9 呢个应验咗佢嘅说话。佢讲过：“你赐俾我嘅人，我一个都冇失去。”

10 当时西门·彼得带住一把剑。彼得掹把剑出嚟，斩向大祭司嘅奴隶，削咗佢只右耳落嚟。呢个奴隶叫做马勒古。 11 但系耶稣同彼得讲：“将把剑收返入鞘。爸爸赐俾我嘅杯*，我唔系应该饮咩？”

12 士兵、将军同犹太人嘅差役就逮捕耶稣，绑住佢对手。 13 佢哋首先押佢去见亚那。亚那系嗰一年嘅大祭司该亚法嘅外父。 14 呢个该亚法曾经同犹太人讲，一个人为众人死，对佢哋有好处。

15 西门·彼得同另一个门徒跟住耶稣。嗰个门徒系大祭司识得嘅，佢同耶稣一齐入咗去大祭司嘅庭院， 16 而彼得就企咗喺门外面。于是另外嗰个门徒，即系大祭司识嘅嗰个人，出嚟同守门人讲一声，就带彼得入去嘞。 17 守门嘅女仆同彼得讲：“你都系嗰个人嘅门徒嚟㗎㖞。”佢话：“我唔系。” 18 奴隶同差役因为天气好冻，就用木炭起咗堆火，企喺周围取暖。彼得都同佢哋一齐企喺度取暖。

19 有个祭司长审问耶稣，查问有关佢门徒嘅事，同埋佢教嘅道理。 20 耶稣答佢：“我一向都系公开向人讲说话。我经常喺会堂同埋圣殿，即系所有犹太人聚集嘅地方教导人。我冇暗中讲过啲乜嘢。 21 点解你要问我呢？去问吓嗰啲听过我讲说话嘅人啦。佢哋知我讲过啲咩㗎。” 22 耶稣讲完，有个企喺隔篱嘅差役掴咗佢一巴，仲话：“你竟然噉样同祭司长讲嘢？” 23 耶稣答佢：“如果我讲错咗，即管话我知我讲错咗啲咩；如果我讲得啱，你点解打我呢？” 24 亚那就将耶稣押去大祭司该亚法嗰度，当时耶稣双手仲系被绑住。

25 西门·彼得企喺火堆隔篱取暖。其他人同佢讲：“你都系嗰个人嘅门徒嚟㗎㖞。”彼得否认，佢话：“我唔系。” 26 大祭司有个奴隶，就系俾彼得削咗只耳仔嗰个人嘅亲戚，佢话：“我明明见到你同佢一齐喺园子入面㗎㖞。” 27 彼得又否认，呢个时候，鸡就叫嘞。

28 后嚟，犹太人将耶稣由该亚法嗰度押去总督府。当时已经系清晨。由于佢哋唔想受到玷污而唔可以食逾越节晚餐，所以自己冇入去总督府。 29 于是彼拉多出嚟见佢哋，佢话：“你哋用咩罪名指控呢个人呀？” 30 佢哋话：“如果呢个人冇犯罪，我哋就唔会将佢交俾你处置啦。” 31 彼拉多同佢哋讲：“你哋带走佢，跟返你哋嘅法律审判佢啦。”犹太人同佢讲：“我哋冇权杀人㗎。” 32 呢个应验咗耶稣嘅说话。佢曾经讲过自己会点样死。

33 彼拉多返入去总督府，召见耶稣，问佢：“你系咪犹太人嘅王呀？” 34 耶稣答佢：“你噉样问，系自己想知，定系听咗人哋讲关于我嘅事呢？” 35 彼拉多就话：“我又唔系犹太人。系你啲同胞同祭司长将你交俾我处置嘅。你到底做咗啲咩呀？” 36 耶稣话：“我嘅王国唔属于呢个世界。如果我嘅王国属于呢个世界，我嘅人民就会为我作战，等我唔会落入犹太人嘅手。不过，我嘅王国唔系源自呢个世界㗎！” 37 彼拉多就同佢讲：“噉你系唔系王呀？”耶稣答佢：“冇错*，我系王。我要为真理作见证，我系为呢件事而生，为呢件事嚟到世上嘅。所有企喺真理呢边嘅人，都会听我嘅声音。” 38 彼拉多就话：“乜嘢系真理呀？”

彼拉多讲完呢句说话，又出去同犹太人讲：“我揾唔到佢有乜嘢罪㖞。 39 你哋有个惯例，要我喺逾越节释放一个人。噉你哋想唔想我释放你哋嘅王呀？” 40 佢哋大嗌：“唔好放呢个人，放巴拉巴！”巴拉巴系个强盗。

19 彼拉多就叫人押耶稣去鞭打。 2 士兵用荆棘整咗个王冠，戴喺佢个头度，仲披咗件紫色嘅袍喺佢身上。 3 啲士兵嚟到佢面前话：“你好呀，犹太人嘅王*！”佢哋仲不断掌掴佢。 4 彼拉多再出去，同佢哋讲：“你哋睇！我带佢出嚟见你哋，系想你哋知道，我查唔出佢有乜嘢罪。” 5 跟住，耶稣就出嚟。佢戴住荆棘王冠，着住紫色袍。彼拉多同佢哋讲：“你哋睇吓呢个人！” 6 祭司长同差役见到佢，就大嗌：“处死佢！喺木柱度处死佢！”彼拉多同佢哋讲：“你哋自己将佢押去处死*啦。我查唔出佢有乜嘢罪。” 7 犹太人话：“我哋有自己嘅法律，根据我哋嘅法律佢犯咗死罪，因为佢话自己系上帝嘅仔。”

8 彼拉多听到佢哋噉样讲，就更加惊。 9 佢返入去总督府同耶稣讲：“你究竟系喺边度嚟㗎？”不过耶稣冇答佢。 10 彼拉多就同佢讲：“你唔答我？你唔知我有权释放你，亦都有权处死*你咩？” 11 耶稣答佢：“如果唔系上面准你处置我，你根本冇权噉做。所以，将我交俾你嘅人，罪就更加大嘞。”

12 就系因为噉，彼拉多一直谂办法释放佢。但系犹太人就大嗌：“如果你释放呢个人，就唔系凯撒嘅朋友。边个话自己系王，就系反叛凯撒。” 13 彼拉多听到佢哋噉样讲，就将耶稣带出去，自己坐喺审判座。嗰个地方叫铺石地，希伯来语叫迦巴大。 14 当日系逾越节期间嘅预备日，嗰时大约系中午12点*。彼拉多同犹太人讲：“睇吓！你哋嘅王！” 15 不过佢哋大嗌话：“杀咗佢！杀咗佢！喺木柱度处死佢！”彼拉多同佢哋讲：“我系咪可以处死你哋嘅王呀？”嗰啲祭司长就话：“除咗凯撒，我哋冇王。” 16 彼拉多就叫人押走耶稣，喺木柱上面处决佢。

于是耶稣俾人押走。 17 耶稣自己孭住苦刑柱*出去，到咗一个叫“骷髅头”嘅地方，希伯来语叫各各他。 18 佢哋喺嗰度将耶稣钉喺木柱，侧边仲有两个人，一个喺左边，一个喺右边，耶稣喺中间。 19 彼拉多仲写咗个罪名喺块牌度，安喺苦刑柱上面。上面写住：“拿撒勒人耶稣，犹太人嘅王。” 20 好多犹太人都见到牌上写嘅罪名，因为耶稣被钉喺木柱嘅地方距离座城好近，而罪名系用希伯来语、拉丁语同希腊语写嘅。 21 犹太人嘅祭司长就同彼拉多讲：“唔好写‘犹太人嘅王’，要写‘佢话：我系犹太人嘅王’。” 22 彼拉多话：“我写咗乜嘢，就系乜嘢。”

23 士兵将耶稣钉喺木柱之后，就攞咗佢件外衣，分成四份，每个士兵一份。佢哋又攞咗佢嘅内袍。不过呢件袍冇接缝，系由上到下成件织出嚟嘅。 24 于是佢哋喺度讨论：“我哋唔好撕烂佢，抽签决定俾边个啦。”呢个系要应验圣经所讲嘅：“佢哋分咗我嘅外衣，又为我嘅内袍抽签。”士兵果然噉样做。

25 耶稣嘅妈妈，佢妈妈嘅妹妹，仲有克罗巴嘅太太马利亚同埋末大拉人马利亚，企咗喺苦刑柱附近。 26 耶稣见到妈妈同埋佢所爱嘅嗰个门徒企喺附近，就同妈妈讲：“睇吓，而家佢系你个仔嘞！*” 27 然后佢同嗰个门徒讲：“睇吓，而家佢系你妈妈嘞！”就喺嗰一日，嗰个门徒接耶稣嘅妈妈去自己屋企住。

28 之后，耶稣知道佢爸爸叫佢做嘅一切都完成嘞。佢为咗应验圣经所讲嘅，就话：“我好口渴。” 29 嗰度有个容器，装满酸酒。于是佢哋拎海绵浸满酸酒，绑喺牛膝草*嘅秆上面，递去佢嘴边。 30 耶稣试一试啲酸酒，就话：“完成嘞！”然后垂低头，断咗气*。

31 由于嗰日系预备日，而且嗰个安息日系大安息日，为咗避免尸体到咗安息日仲留喺苦刑柱上面，犹太人就请彼拉多派人打断犯人嘅脚，将尸体攞走。 32 于是士兵嚟到，将第一个同耶稣一齐挂喺木柱嘅人嘅双脚打断，又将第二个人嘅双脚打断。 33 当佢哋去到耶稣嗰度，见佢已经死咗，就冇打断佢对脚。 34 但系有一个士兵用矛插入去佢嘅肋骨旁边，即刻有血同水流出嚟。 35 有个门徒*见到，就为呢件事作见证。呢个人嘅见证系真嘅，佢知道自己讲嘅系真话，噉你哋就可以相信嘞。 36 发生呢啲事，其实系要应验圣经所讲嘅：“佢嘅骨连一条都唔会断。” 37 圣经仲有一句说话噉样讲：“佢哋会注视佢哋用矛插嘅嗰位。”

38 呢啲事之后，亚利马太嘅约瑟请求彼拉多俾佢领取耶稣嘅遗体。约瑟系耶稣嘅门徒，不过佢好怕啲犹太人*，所以系暗中做门徒嘅。彼拉多批准佢嘅请求，佢就去领取耶稣嘅遗体。 39 尼哥德慕都带咗一大袋*用没药同沉香混合嘅香料嚟，呢个人第一次去见耶稣嗰阵系夜晚。 40 佢哋领取咗耶稣嘅遗体之后，按照犹太人安葬死者嘅习俗，用细麻布加上香料将遗体包好。 41 耶稣被处死*嘅地方附近有块园地，入面有一个新嘅墓穴，从来冇安葬过死人。 42 由于嗰日系犹太人嘅预备日，墓穴又喺附近，佢哋就将耶稣安葬喺嗰度。

20 跟住嗰个星期嘅第一日，一朝早，天仲未光，末大拉人马利亚就去到墓穴，见到墓穴入口嘅石头移开咗。 2 于是佢跑去见西门·彼得同另一个门徒，即系耶稣对佢感情特别深嘅嗰个门徒。马利亚同佢哋讲：“主唔喺墓穴里面呀。有人将佢移走咗，我哋唔知佢俾人放咗喺边度。”

3 彼得同嗰个门徒就去墓穴。 4 佢哋两个一齐跑，不过嗰个门徒跑得快过彼得，到咗墓穴先。 5 佢乌低身望入去，见到有啲细麻布喺度，不过佢冇入去。 6 跟住，西门·彼得都到咗，佢入咗墓穴，见到有啲细麻布喺嗰度。 7 原本包住耶稣个头嘅布冇同其他布放埋一齐，而系卷埋放喺一边。 8 到咗墓穴先嘅嗰个门徒都入埋去，佢见到，就相信之前听到嘅消息。 9 但系佢哋当时仲未明圣经嘅意思，就系耶稣一定会死而复生。 10 之后两个门徒就各自返屋企。

11 不过，马利亚一直企喺墓穴外面喊。佢一边喊，一边乌低身望入墓穴， 12 就见到两个着住白色衫嘅天使，坐喺本来安放耶稣遗体嘅地方，一个喺头嗰边，一个喺脚嗰边。 13 佢哋同马利亚讲：“你点解喊呀*？”马利亚同佢哋讲：“有人将我嘅主移走咗，我唔知佢俾人放咗喺边度呀。” 14 佢讲完，拧转身，见到耶稣企喺度，但系就认唔出呢个人系耶稣。 15 耶稣同佢讲：“你点解喊呀？*你揾紧边个呢？”马利亚以为佢系园丁，就同佢讲：“先生，如果系你移走咗佢，请话我知，你将佢放咗喺边吖，我就领佢嘅遗体返去。” 16 耶稣同佢讲：“马利亚！”佢拧转身，用希伯来语同耶稣讲：“拉波尼！”（意思就系“老师！”） 17 耶稣同佢讲：“唔好捉住我。我升上去见爸爸嘅时候仲未到呀！你去揾我嘅弟兄，同佢哋讲：‘我要升上去见我嘅爸爸，亦即系你哋嘅爸爸，见我嘅上帝，亦即系你哋嘅上帝。’” 18 末大拉人马利亚就去将呢个消息同门徒讲，佢话：“我见到主呀！”佢亦都话俾门徒知，主同佢讲咗啲乜嘢。

19 嗰日系嗰个星期嘅第一日。呢一日就快结束嘅时候，门徒聚集埋一齐。佢哋好惊犹太人*，所以就锁埋门。呢个时候，耶稣喺佢哋当中出现，同佢哋讲：“愿你哋平安。” 20 佢讲完呢句说话，就俾佢哋睇佢双手同肋骨旁边嘅伤痕。门徒见到主，就好开心。 21 耶稣再同佢哋讲：“愿你哋平安。爸爸点样派我嚟，而家我都点样派你哋去。” 22 佢讲完呢句说话，就向佢哋吹气，同佢哋讲：“领受神圣力量啦。 23 你哋宽恕边个嘅罪，佢就系已经得到宽恕嘅；你哋唔宽恕边个嘅罪，佢就系冇得到宽恕嘅。”

24 多马又叫做“双胞胎”，佢系十二使徒之一。耶稣出现嘅时候，多马冇同佢哋一齐。 25 其他门徒就同佢讲：“我哋见到主呀！”但系多马就话：“除非我见到佢双手嘅钉痕，用手指掂吓，又用手掂吓佢肋骨旁边嘅伤痕，如果唔系，我绝对唔会信。”

26 八日之后，耶稣嘅门徒又聚集喺一间屋入面，多马都同佢哋一齐。虽然啲门系锁住嘅，但系耶稣喺佢哋当中出现，佢话：“愿你哋平安。” 27 然后佢同多马讲：“摆只手指喺度吖，睇吓我双手嘅钉痕。伸手掂吓我肋骨旁边嘅伤痕。唔好再怀疑嘞，要相信！” 28 多马就同佢讲：“我嘅主，我嘅神！*” 29 耶稣同佢讲：“你系咪因为见到我先至相信呢？嗰啲冇见过就相信嘅人几咁有福*。”

30 其实，耶稣喺门徒面前仲施行咗好多神迹，但系冇写喺呢卷书上面， 31 而写低落嚟嘅事，系想令你哋相信耶稣系基督，系上帝嘅仔，你哋亦都因为呢种信心，可以通过佢嘅名得到生命。

21 后嚟，耶稣喺提比里亚海*再次喺门徒面前出现。事情嘅经过系噉嘅： 2 当时西门·彼得、叫做“双胞胎”嘅多马、加利利嘅迦拿人拿但业、西庇太嘅两个仔，仲有两个门徒都喺嗰度。 3 西门·彼得同佢哋讲：“我去打鱼呀。”佢哋话：“我哋都同你一齐去。”佢哋就上船出海，不过嗰一晚乜嘢都捉唔到。

4 啱啱天光嘅时候，耶稣企喺海滩，但系门徒认唔出佢系耶稣。 5 耶稣就同佢哋讲：“仔呀，你哋系咪冇嘢食呀？*”佢哋答：“冇呀！” 6 耶稣同佢哋讲：“喺船嘅右边撒网，就会捉到鱼嘞。”于是佢哋撒网，真系捉到好多鱼，拉唔到个网上嚟。 7 耶稣所爱嘅嗰个门徒就同彼得讲：“系主啊！”当时西门·彼得冇着衫*，一听到系主，就着返件外衣*，跳落海。 8 其他门徒留喺船上面，将嗰个装满鱼嘅渔网拉过嚟。当时佢哋距离岸边唔系好远，大约只系90米*。

9 佢哋上岸之后，见到一堆炭火，上面有鱼有饼。 10 耶稣同佢哋讲：“攞几条你哋头先捉到嘅鱼过嚟吖。” 11 于是西门·彼得上船，将渔网拖上岸，网入面嘅都系大鱼，一共有153条。虽然有咁多鱼，但系渔网冇烂到。 12 耶稣同佢哋讲：“过嚟食早餐吖。”冇一个门徒敢问佢系边个，因为佢哋都知道呢个人就系主。 13 耶稣行过去，递啲饼俾佢哋，亦都将鱼递俾佢哋。 14 呢个系耶稣死而复生之后，第三次喺一班门徒面前出现。

15 食完早餐之后，耶稣就同西门·彼得讲：“约翰嘅仔西门，你系咪爱我多过爱呢啲嘢呀？”佢同耶稣讲：“主啊，系呀，你知我对你嘅感情好深㗎。”耶稣同佢讲：“你要喂养我嘅羊仔。” 16 第二次耶稣又同佢讲：“约翰嘅仔西门，你爱唔爱我呀？”佢同耶稣讲：“主啊，爱呀，你知我对你嘅感情好深㗎。”耶稣同佢讲：“你要牧养我嘅小绵羊。” 17 耶稣第三次同佢讲：“约翰嘅仔西门，你对我嘅感情深唔深呀？”彼得就好忧愁，因为耶稣第三次问佢：“你对我嘅感情深唔深呀？”于是佢同耶稣讲：“主啊，你咩都知，你知我对你嘅感情好深㗎。”耶稣同佢讲：“你要喂养我嘅小绵羊。 18 我可以好肯定噉同你讲，你年轻嘅时候，自己着衫，想去边就去边。但系到你老嘞，你会伸对手出嚟，有人会同你着衫，带你去你唔愿意去嘅地方。” 19 佢噉样讲，系表示彼得将会点样死，令上帝得到荣耀。佢讲完呢番话，就同彼得讲：“继续跟随我啦。”

20 彼得拧转身，见到耶稣所爱嘅嗰个门徒，喺后面跟住佢哋。嗰个门徒就系喺晚餐嘅时候向后挨喺耶稣胸前，问“主啊，系边个出卖你？”嘅嗰个人。 21 彼得一见到佢，就同耶稣讲：“主啊，呢个人将来会点呀？” 22 耶稣答彼得：“如果我嘅意愿系要佢生存到我嚟嘅时候，又同你有乜嘢关系呢？你继续跟随我啦。” 23 结果，呢句说话喺弟兄之间传开，话嗰个门徒唔会死。其实，耶稣冇话嗰个门徒唔会死，而系话：“如果我嘅意愿系要佢生存到我嚟嘅时候，又同你有乜嘢关系呢？”

24 为呢啲事作见证，又写低落嚟嘅，就系呢个门徒。我哋知道佢作嘅见证系真嘅。

25 其实，耶稣仲做咗好多嘢，如果将所有细节写低，我谂成个世界都唔会有足够嘅空间容纳呢啲书卷。