使徒行传

1 提阿非罗啊，我喺第一卷书记录咗耶稣做过同教过嘅所有嘢， 2 由开始直到佢被接到天上嗰一日为止嘅事，我都记录咗。佢喺升天之前，通过神圣力量俾咗一啲指示佢拣选嘅使徒*。 3 佢受难之后，用好多令人信服嘅证据，向佢哋证明自己真系有返生命。喺40日期间，佢哋都见到佢，亦都听到佢讲关于上帝王国嘅事。 4 耶稣同佢哋见面嗰阵吩咐佢哋：“唔好离开耶路撒冷，要等我爸爸承诺嘅事实现，呢件事系我同你哋讲过㗎。 5 约翰用水为人施浸，但系再过几日，我就会用神圣力量为你哋施浸。”

6 佢哋聚集嗰阵，有人问耶稣：“主啊，你系咪会喺呢个时候复兴以色列嘅王国呀？” 7 耶稣同佢哋讲：“呢啲事会喺乜嘢时候、乜嘢时期发生，只有我爸爸先有权决定，你哋系唔需要知道嘅。 8 不过，神圣力量*会降临喺你哋身上，到时你哋就会得到力量，喺耶路撒冷、全犹地亚、撒马利亚，一直到地上最遥远嘅地方，做我嘅见证人。” 9 佢讲完呢啲说话，就喺佢哋面前升起，有云遮住佢，佢哋就睇唔到佢嘞。 10 佢哋一直望住耶稣升上天，突然有两个着白色衫嘅人企喺佢哋侧边， 11 同佢哋讲：“加利利人啊，你哋点解企喺度望住个天呢？呢位曾经同你哋一齐嘅耶稣，被接咗上天嘞。你哋见到佢点样去到天上，佢亦都会点样嚟。”

12 之后，佢哋由橄榄山落返耶路撒冷，路程唔系好远，只系1公里左右*。 13 到咗之后，佢哋就去住宿嘅地方，上咗楼上嘅一间房。嗰度有彼得、约翰、雅各、安得烈、腓力、多马、巴多罗买、马太、亚勒腓嘅仔雅各、热心人西门，同埋雅各嘅仔犹大。 14 佢哋同几个妇女、耶稣啲细佬同埋佢妈妈马利亚一齐，大家团结一心，坚持不懈噉祷告。

15 喺嗰段时期，有一次大约有120个弟兄*聚集，彼得企起身，开口话： 16 “各位弟兄，关于带人去逮捕耶稣嘅犹大，上帝用神圣力量通过大卫预告过佢嘅事，呢啲经文都一定要应验。 17 佢本来系我哋嘅一分子，同我哋一齐接受呢个职务。 18 （佢用不义之财买咗块地。后嚟，佢跌咗落去，个肚*爆开，连啲肠都流咗出嚟。 19 呢件事所有耶路撒冷嘅居民都知道，所以佢哋用本地嘅语言将嗰块地叫做亚革大马，意思系‘血地’。） 20 其实诗篇都讲过，‘愿佢嘅住处荒凉，愿嗰度无人居住’，又话，‘愿佢嘅监督职位俾人取代’。 21 所以，我哋一定要拣一个人出嚟取代佢。呢个人一定要喺主耶稣同我哋一齐生活同工作*期间，都一直同我哋一齐， 22 即系由耶稣去约翰嗰度受浸开始，直到佢被接走离开我哋嘅嗰一日为止。拣出嚟嘅人要同我哋一齐为耶稣嘅复活作证。”

23 于是佢哋推荐咗两个人，一个系称为巴撒巴嘅约瑟，佢又叫犹士都，另一个系马提亚。 24 佢哋祷告话：“耶和华*啊，你了解所有人嘅内心，求你令我哋睇出，你喺呢两个人当中拣选边一个， 25 取代犹大成为使徒，执行使徒嘅职务。因为犹大放弃咗呢一切，踏上歧途。” 26 于是，佢哋抽签决定喺呢两个人当中拣边个，抽到嘅系马提亚。佢就同嗰11个人一样，被公认为使徒。

2 五旬节嗰一日，佢哋所有人都聚集喺同一个地方。 2 佢哋坐坐吓，突然听到天上传嚟好似刮大风嘅声音，充满成间屋。 3 佢哋见到火苗一样嘅嘢，形状好似舌头，分别停留喺每个人嘅头上。 4 佢哋就充满神圣力量，又喺神圣力量指引下开始讲各种外语*。

5 当时喺耶路撒冷，有嚟自世界各地虔诚嘅犹太人。 6 声音一传出去，民众就聚集起嚟。门徒用民众各自嘅语言讲说话，大家听到都觉得好困惑， 7 非常之惊讶，佢哋话：“你哋睇，讲嘢嘅人明明系加利利人嚟㗎， 8 点解佢哋识得讲我哋呢度唔同人嘅母语嘅？ 9 我哋呢度有帕提亚人、米底亚人、埃兰人，仲有嚟自美索不达米亚、犹地亚、卡帕多西亚、本都、亚细亚行省、 10 弗里吉亚、潘菲利亚、埃及同昔兰尼附近利比亚一带嘅居民，同埋由罗马嚟呢度暂住嘅人，当中有犹太人，亦都有归信犹太教嘅人， 11 另外仲有克里特人同阿拉伯人。我哋竟然听到佢哋用我哋嘅语言，传讲上帝伟大嘅作为*。” 12 大家都好惊讶，觉得困惑，佢哋话：“发生咩事呀？” 13 不过，有啲人就笑啲门徒，话：“佢哋饮甜酒*饮多咗啫。”

14 彼得同11个使徒企起身，然后彼得大声话：“各位犹地亚人同埋耶路撒冷嘅所有居民，请大家留心听我讲。 15 你哋以为呢啲人饮醉咗，其实唔系，而家只系朝早9点*啫。 16 其实呢个应验咗先知约珥嘅预言： 17 ‘上帝话：“喺最后嘅日子*，我会将我嘅神圣力量倾注喺各种各样嘅人身上。你哋嘅仔女会受上帝启示发言*，你哋嘅年轻人会见到异象*，你哋嘅老年人会发奇异嘅梦。 18 喺嗰段时期，我都会将我嘅神圣力量倾注喺我嘅男仆女仆身上，启示佢哋发言。 19 我会喺天上施行奇迹*，喺地上施行神迹：有血，有火，有浓烟。 20 太阳发黑，月亮变成血红色，喺耶和华*辉煌嘅大日子嚟到之前，呢一切都会发生。 21 所有呼求耶和华*圣名嘅人，都会得救。”’

22 “各位以色列人，请听我讲几句。上帝清楚表明，拿撒勒人耶稣系佢派嚟嘅，佢通过耶稣喺你哋当中施行咗各种奇妙嘅神迹*，呢啲事你哋都知道。 23 耶稣被交出嚟系上帝预先知道嘅，亦都系上帝所定嘅旨意。你哋借不法之徒嘅手喺木柱度处决咗佢。 24 不过上帝已经复活咗佢，将佢由死亡嘅痛苦*中拯救出嚟，因为死亡冇能力束缚佢。 25 关于耶稣，大卫话：‘喺我眼中，耶和华*一直喺我面前，由于佢喺我右边，我绝对唔会动摇。 26 所以我嘅心好欢乐，我嘅说话充满欢欣，我*会安然居住，充满希望， 27 因为你唔会将我*遗弃喺坟墓*，唔会俾你嘅忠贞仆人朽坏。 28 你令我认识生命之道，你会令我喺你面前满心欢喜。’

29 “各位弟兄，等我坦白同你哋讲，你哋都知道族长大卫已经死咗，俾人埋葬咗，而佢嘅墓地到今日仲喺呢度。 30 由于佢系先知，亦都知道上帝向佢发咗誓，要俾佢一个后代继承佢嘅王位， 31 所以佢预先知道同埋提到基督嘅复活。佢话基督唔会被遗弃喺坟墓，身体亦都唔会朽坏*。 32 上帝已经复活咗耶稣。我哋都可以为呢件事作证。 33 佢被提升到上帝右边，领受咗佢爸爸承诺赐俾佢嘅神圣力量，就将神圣力量倾注喺我哋身上，就好似你哋见到听到嘅噉。 34 大卫并冇升到天上，但系佢讲过：‘耶和华*同我主讲：“你坐喺我右边， 35 直到我令你嘅敌人成为你嘅脚凳。”’ 36 所以，愿所有以色列人都确信，你哋喺木柱上处决嘅耶稣，上帝已经委任佢做基督，成为我哋嘅主嘞。”

37 当时，听到呢番说话嘅人都心如刀割，同彼得仲有其余嘅使徒讲：“各位弟兄，我哋应该点做呢？” 38 彼得话：“你哋人人都要悔改，奉耶稣基督嘅名受浸，噉你哋嘅罪就会得到宽恕，上帝亦都会不求回报噉将神圣力量赐俾你哋， 39 因为我哋嘅上帝耶和华*承诺要赐神圣力量俾所有佢呼召嘅人，即系你哋、你哋嘅仔女，同埋所有喺远方嘅人。” 40 彼得仲讲咗好多嘢，作咗彻底嘅见证，亦都再三劝佢哋：“你哋要离开呢一代邪恶嘅人，以免遭受毁灭。” 41 乐意接受佢说话嘅人都受咗浸。嗰一日，信徒大约增加咗3000人。 42 佢哋都继续专心接受使徒嘅教导，彼此交流*，一齐食饭，坚持不懈噉祷告。

43 使徒施行咗好多神迹，做咗好多奇妙嘅事*，人人都因为噉而敬畏上帝。 44 成为信徒嘅人经常聚埋一齐，共享一切。 45 佢哋卖咗家产财物，按照每个人嘅需要将钱分俾大家。 46 佢哋日日都团结一心噉喺圣殿聚集，喺唔同人屋企食饭，真心真意、开开心心噉分享食物， 47 赞美上帝，民众都好钟意佢哋。耶和华*日日都令更多得救嘅人加入佢哋，成为信徒。

3 下昼3点*祷告嘅时候，彼得同约翰上圣殿。 2 有个天生跛脚嘅人，日日都有人将佢抬去叫做美门嘅殿门附近，向入去圣殿嘅人乞求施舍。 3 佢见彼得同约翰准备入圣殿，就求佢哋施舍。 4 彼得同约翰望实佢，然后彼得话：“你望住我哋吖。” 5 佢就眼都唔眨噉望住佢哋，期望佢哋施舍。 6 彼得话：“金银我就冇嘞，不过我有嘅，我可以俾你。我奉拿撒勒人耶稣基督嘅名吩咐你，起身行啦！” 7 于是彼得捉住佢只右手，扶佢起身，佢嘅脚同脚眼*就即刻好返嘞。 8 佢跳起身，开始行路，仲跟住彼得同约翰入圣殿，边行边跳，赞美上帝。 9 所有人都见到佢一路行一路赞美上帝。 10 大家认出佢系日日坐喺圣殿美门前面乞求施舍嘅嗰个人，就非常兴奋，觉得发生喺佢身上嘅事不可思议。

11 嗰个人仲捉住彼得同约翰嘅手嗰阵，所有人都向佢哋跑过去，聚喺所罗门柱廊。大家都好惊讶。 12 彼得见到，就同佢哋讲：“各位以色列人，点解你哋咁惊讶呢？点解要望实我哋呢？你哋以为我哋系靠自己嘅能力或者特别虔诚，所以能够令呢个人行到路咩？ 13 亚伯拉罕、以撒、雅各嘅上帝，即系我哋祖先嘅上帝，已经令佢嘅仆人耶稣得到荣耀，你哋交咗俾彼拉多嘅就系呢个人。彼拉多本来决定释放佢，但系你哋就当住彼拉多嘅面，拒绝承认佢。 14 你哋竟然要求释放一个杀人犯，但系就拒绝承认呢个圣洁正义嘅人， 15 杀死呢位带领人得到生命嘅领袖。不过上帝已经令佢死而复生，而我哋都可以为呢件事作证。 16 因为耶稣嘅名，亦都因为我哋对佢嘅名有信心，你哋见到同识得嘅呢个人就好返嘞。我哋对耶稣嘅信心，令呢个人喺你哋面前完全康复。 17 各位弟兄，我知道你哋同你哋嘅首领做嗰啲事*，系因为唔知道耶稣嘅真正身份。 18 不过就系因为噉，上帝通过啲先知预告佢委任嘅基督会受难嘅事，就实现嘞。

19 “所以，你哋要悔改，要回头，噉你哋嘅罪就会被抹走，耶和华*会令你哋得到安舒*， 20 佢亦都会派出为你哋委任嘅基督，即系耶稣。 21 耶稣一定要喺天上等候，直到一切都复兴嘅时代，即系上帝通过古代忠心嘅先知提到嘅时代。 22 其实摩西讲过：‘你嘅上帝耶和华*会喺你嘅弟兄当中，为你委任一位好似我噉样嘅先知。佢同你哋讲乜嘢，你哋都一定要听从。 23 边个唔听从呢位先知，就要被铲除。’ 24 由先知撒母耳开始，所有先知都曾经明确提到呢段时期。 25 呢啲先知都提到上帝同你哋祖先订立嘅誓约，你哋都会从呢个约得益*，因为上帝向亚伯拉罕承诺过：‘地上嘅万族都会因为你嘅后代*而得到福分。’ 26 上帝委任佢嘅仆人耶稣之后，派佢嚟你哋呢度先，赐福俾你哋，帮助你哋每一位回头，离弃恶行。”

4 彼得同约翰向民众讲说话嘅时候，祭司、守殿官同撒都该派嘅人走上前， 2 非常之嬲，因为呢两个使徒教导民众，公开宣扬耶稣已经死而复生。 3 于是佢哋将呢两个人逮捕，拘留到第二日，因为当时已经系夜晚嘞。 4 不过，好多人就因为听咗佢哋两个人讲嘅说话而成为信徒，净系男人都有大约5000人。

5 第二日，民间嘅首领、长老同抄经士喺耶路撒冷聚集。 6 祭司长亚那，仲有该亚法、约翰、亚历山大，同埋祭司长嘅所有亲属都在场。 7 佢哋叫彼得、约翰企喺中间，盘问话：“你哋有咩权力，奉边个嘅名做呢件事呀？” 8 当时，彼得充满神圣力量，同佢哋讲：

“各位首领，各位长老， 9 如果我哋今日受审，系因为向呢个跛脚嘅人做咗件好事，而你哋又想查出系边个令佢好返嘅， 10 噉我就话俾你哋所有人，仲有所有以色列人知，企喺你哋面前嘅呢个人系靠住耶稣被医好嘅，佢系因为拿撒勒人耶稣基督嘅名而好返嘅。呢位耶稣俾你哋喺木柱度处死，但系上帝已经令佢死而复生。 11 耶稣‘呢块被你哋建造嘅人轻视嘅石头，成为咗最重要嘅房角石*’。 12 除咗佢，冇人能够带嚟拯救，因为喺全天下，上帝并冇赐下其他名*，系我哋必须依靠，先至可以得救嘅。”

13 佢哋见彼得、约翰放胆发言，又知道呢两个人系冇受过教育*嘅普通人，就好惊讶，睇出呢两个人跟过耶稣。 14 佢哋望住企喺彼得同约翰身边嗰个被医好嘅人，就无话可说， 15 唯有叫佢哋出去公议会大厅外面，然后商量话： 16 “我哋应该点处置佢哋呢？佢哋真系施行咗神迹，耶路撒冷嘅居民全部都知道，我哋冇办法否认。 17 为咗唔好俾呢件事喺民间越传越开，我哋要警告佢哋，唔准佢哋再奉嗰个人嘅名向任何人传讲啲咩。”

18 于是佢哋叫彼得同约翰嚟，唔准佢哋再奉耶稣嘅名传讲或者教导任何嘢。 19 彼得同约翰就话：“喺上帝眼中，听从你哋，唔听从上帝，究竟系啱定错，你哋自己判断啦。 20 但系我哋见到嘅、听到嘅，唔可以唔讲。” 21 之后，佢哋再次恐吓彼得同约翰，就释放咗呢两个人。因为佢哋揾唔到理由惩罚呢两个人。佢哋亦都对民众有所顾忌，因为民众全部都为嗰件事赞美*上帝。 22 嗰个因为神迹*而被医好嘅人，已经超过40岁嘞。

23 彼得同约翰被释放之后，就去其他信徒嗰度，将祭司长同长老嘅说话讲返俾大家听。 24 大家听完之后，就团结一心，向上帝祷告：

“至高嘅主宰，创造天、地、海同其中万物嘅上帝啊， 25 你用神圣力量，通过我哋嘅祖先，你仆人大卫嘅口话：‘万国点解混乱不安？万族点解谂埋啲空虚无益嘅事*呢？ 26 地上嘅君王群起，首领聚集，要对抗耶和华*，对抗佢任命嘅领袖*。’ 27 希律同本丢·彼拉多，列国嘅人同以色列人，果然喺呢座城聚集，同你任命*嘅圣洁仆人耶稣对抗， 28 做出你预告嘅事。你用你嘅力量*，按照你嘅旨意，令呢一切发生。 29 耶和华*啊，求你听吓佢哋点样恐吓我哋，亦都赐十足嘅胆量俾你嘅奴隶，等我哋可以不断传讲你嘅话语。 30 求你伸手医治人，通过你圣洁嘅仆人耶稣嘅名，施行神迹同奇妙嘅事*。”

31 佢哋恳切祈求上帝之后，聚集嘅地方就开始震动，人人都充满神圣力量，勇敢传讲上帝嘅话语。

32 所有信徒都同心一意，大家都唔会话佢嘅财物只系属于自己嘅，人人都共享所有嘢。 33 使徒继续为主耶稣嘅复活作证，好有成效。人人都得到丰富嘅分外恩典。 34 大家一无所缺，因为嗰啲有田地房屋嘅人都变卖咗啲产业，然后将钱拎出嚟， 35 交俾使徒，使徒再按照各人嘅需要作出分配。 36 有个人叫做约瑟，使徒帮佢改咗另一个名，叫巴拿巴，翻译出嚟系“安慰之子”。佢系利未族人，喺塞浦路斯出世。 37 佢卖咗自己块地，然后将钱交俾使徒。

5 有个人叫亚拿尼亚，同佢太太撒非拉一齐卖咗块地， 2 但系佢暗中扣起一啲钱，净系将一部分交俾使徒，佢太太都知道呢件事。 3 彼得同佢讲：“亚拿尼亚，你点解要俾撒但影响你？你竟然明目张胆噉欺骗上帝嘅神圣力量，暗中将卖地得嚟嘅钱扣起一部分！ 4 块地系你嘅，就算卖咗，啲钱点用都系由你话事㗎。点解你谂埋啲咁坏嘅事呢？你噉样做唔系欺骗人，而系欺骗上帝。” 5 亚拿尼亚一听到呢番说话就倒地身亡。听到呢件事嘅人都心生敬畏。 6 有几个年轻人嚟用布包起佢，抬出去埋葬。

7 大约三个钟之后，亚拿尼亚嘅太太入嚟，仲未知发生咗咩事。 8 彼得同佢讲：“话我知，你哋两个卖地得到嘅钱就系咁多？”佢答：“系呀，就系咁多。” 9 彼得话：“点解你哋两个夹埋，想欺骗耶和华*嘅神圣力量呢？你睇，埋葬你老公嘅人就喺门口，佢哋都会抬你出去。” 10 就喺嗰一刻，佢喺彼得面前倒地身亡。嗰啲年轻人入嚟，见佢死咗，就将佢抬出去，埋葬喺佢老公隔篱。 11 全会众同所有听到呢件事嘅人，都心生敬畏。

12 使徒继续喺民间施行好多神迹同埋奇妙嘅事*，经常喺所罗门柱廊聚集。 13 虽然其他人都唔敢同佢哋来往，但系民众都赞赏佢哋。 14 唔单止噉，主嘅信徒不断增加，男男女女都有好多。 15 有啲人甚至将病人带去大街，等佢哋瞓喺床或者席上面，希望彼得路过嗰阵，至少佢嘅身影可以落喺一啲人身上，令佢哋好返。 16 耶路撒冷周边城镇嘅人，都带住病人同埋受邪灵*骚扰嘅人蜂拥而嚟。佢哋全部都被医好。

17 大祭司同埋佢嗰啲撒都该派嘅同伙都好嬲，非常之妒忌。 18 佢哋去逮捕使徒，将使徒韫入城里面嘅监狱。 19 嗰晚，耶和华*嘅天使打开监狱嘅门，带佢哋出嚟，天使话： 20 “你哋要去圣殿，继续将关于未来生命嘅好消息话俾民众知。” 21 佢哋听到天使噉讲，天一光就入去圣殿教导人。

嗰时，大祭司同埋嗰啲同佢一齐嘅人召集公议会，仲有以色列长老议会嘅所有成员，然后派人去监狱将使徒带出嚟。 22 差役去到监狱，居然揾唔到佢哋，就返去报告， 23 话：“我哋见到监狱明明锁实咗，每道门都有守卫站岗，但系我哋一开门，里面竟然一个人都冇。” 24 守殿官同祭司长听到差役噉讲，就好困惑，唔知道跟住会有咩事发生。 25 呢个时候，有人嚟报告：“你哋韫喺监狱嘅人，喺圣殿教导紧民众呀！” 26 于是守殿官带住差役去捉使徒，不过冇使用暴力，因为惊民众用石头掟佢哋。

27 佢哋带使徒嚟，叫佢哋企喺公议会面前。大祭司质问佢哋： 28 “我哋明明下令，唔准你哋再奉呢个人*嘅名教导人，但喺你哋就将你哋嘅道理传遍耶路撒冷，一心想我哋承担杀呢个人嘅血债。” 29 彼得同其他使徒回答：“我哋一定要服从上帝嘅统治，而唔系服从人。 30 我哋祖先嘅上帝已经复活咗耶稣，就系你哋喺木柱*度处死嘅嗰位。 31 上帝已经将佢提升到自己右边，委任佢做领袖同救主，等以色列人悔改，令佢哋嘅罪得到宽恕。 32 我哋都为呢啲事作证，神圣力量都一样。上帝已经将呢股力量赐俾所有服从佢统治嘅人嘞。”

33 佢哋听到呢番话就恼羞成怒*，想杀咗啲使徒。 34 公议会有一个法利赛派嘅人叫迦玛列，佢德高望重，系摩西法典嘅导师。佢企起身，吩咐人暂时将使徒带出去， 35 然后同大家讲：“各位以色列人，你哋要谂清楚应该点处置佢哋，唔好轻举妄动。 36 以前就有噉嘅例子，有个叫杜达嘅人自吹自擂，大约有400个男人追随佢。佢被杀之后，呢啲人就四散，销声匿迹。 37 杜达死咗之后，喺登记户籍嘅日子，又有个叫犹大嘅加利利人拉拢民众跟从佢。后嚟呢个人都死咗，追随佢嘅人都四散。 38 所以我同你哋讲，喺而家呢个情况下，唔好理呢班人，由得佢哋啦。佢哋嘅计划同所做嘅事，如果只系出于人，就一定会失败。 39 如果出于上帝，你哋就肯定唔能够破坏佢哋嘅计划。如果你哋一意孤行，可能就系同上帝对抗嘞。” 40 佢哋就接受咗佢嘅建议，叫使徒嚟，打佢哋一餐，命令佢哋唔准再奉耶稣嘅名传道，然后就释放佢哋。

41 使徒离开公议会，佢哋好开心，因为有荣幸为主嘅名受到羞辱。 42 佢哋每日去圣殿，又逐家逐户、持续不懈噉教导人，宣扬关于基督耶稣嘅好消息。

6 喺嗰段时期，门徒嘅数目不断增加。讲希腊语嘅犹太人埋怨嗰啲讲希伯来语嘅犹太人，因为喺分配每日食物嘅呢件事上，佢哋当中嘅寡妇受到忽视。 2 于是，十二使徒叫晒所有门徒嚟，同佢哋讲：“我哋放低教导人认识上帝话语嘅工作去分配食物，系唔啱㗎*。 3 各位弟兄，要喺你哋当中拣七个人出嚟，佢哋要有好名声，而且充满神圣力量同智慧。我哋要委派佢哋管理呢件一定要做嘅事。 4 噉我哋就可以专心祷告，专注喺教导人认识上帝话语嘅呢个职务。” 5 所有门徒都同意呢番说话，于是拣咗信心坚强、充满神圣力量嘅司提反，仲有腓力、伯罗哥罗、尼迦挪、提门、巴米拿，同埋曾经归信犹太教嘅安提阿人尼哥拉， 6 然后带佢哋去使徒嗰度。祷告之后，使徒就将手放喺佢哋身上，委任佢哋。

7 结果，越嚟越多人听到上帝嘅话语，喺耶路撒冷嘅门徒，数目不断增加，好多祭司都接受咗呢个信仰*。

8 司提反深受上帝喜爱，充满上帝所赐嘅能力，喺民间施行令人惊叹嘅神迹同埋奇妙嘅事*。 9 但系有啲人嚟同司提反争论，包括一啲属于“自由民会堂”嘅人、昔兰尼人、亚历山大人，仲有嚟自西利西亚同埋亚细亚行省嘅人。 10 靠住神圣力量嘅帮助，司提反嘅回应充满智慧，令佢哋招架唔住。 11 于是佢哋暗中教唆人噉样讲：“我哋听到佢讲咗啲亵渎摩西同上帝嘅说话。” 12 佢哋煽动民众、长老同抄经士，一齐冲去司提反嗰度，强行将佢捉住，押去公议会。 13 佢哋叫咗啲人作假见证话：“呢个人系噉诋毁圣殿同摩西法典。 14 例如我哋听佢讲过，拿撒勒人耶稣要拆毁圣殿，要改变摩西传俾我哋嘅规矩。”

15 坐喺公议会里面嘅人全部都望实司提反，见到佢个样好平静，面容就好似天使嘅面容一样。

7 大祭司问：“系咪真系有啲噉嘅事？” 2 司提反话：“各位乡亲父老，各位兄弟，请听我讲。我哋嘅祖先亚伯拉罕喺美索不达米亚，仲未移居哈兰嘅时候，充满荣耀嘅上帝向佢显现， 3 同佢讲：‘你要离开家乡同亲戚，去我将会指示你去嘅地方。’ 4 佢就离开迦勒底人嘅地方，移居哈兰。佢爸爸死咗之后，上帝吩咐佢迁移到你哋而家住嘅呢片土地。 5 不过喺呢度，上帝冇俾产业佢，连脚掌咁大嘅地方都冇俾佢。虽然佢当时未有仔女，但系上帝承诺要将呢片土地赐俾佢同佢嘅后代作为产业。 6 上帝话，亚伯拉罕嘅后代会侨居外地，当地嘅人会奴役佢哋，苛待佢哋400年。 7 上帝亦都话：‘我要惩罚嗰个奴役佢哋嘅国家。之后，佢哋会离开嗰度，喺呢个地方敬奉我’。

8 “上帝同亚伯拉罕订立咗割礼*之约。亚伯拉罕嘅仔以撒出世之后第八日接受割礼。后嚟以撒成为雅各嘅爸爸，雅各成为12个家族首领*嘅爸爸。 9 呢啲首领妒忌约瑟，将佢卖去埃及。不过上帝扶持佢*， 10 将佢从一切患难中救出嚟，赐智慧俾佢，令佢得到埃及王法老嘅喜爱。法老就派佢管理埃及同自己嘅王宫。 11 后嚟全埃及同迦南地区出现饥荒，灾情好严重。我哋嘅祖先都冇嘢食。 12 雅各听讲埃及有粮食，就派我哋嘅祖先去嗰度，呢个系第一次。 13 到咗第二次，约瑟同啲兄弟相认，法老都知道咗约瑟原来仲有屋企人。 14 之后，约瑟派人去通知佢爸爸雅各同埋所有亲人，佢哋就去咗嗰度，一共75个人。 15 就系噉，雅各落去埃及。后嚟，佢喺嗰度离世，我哋嘅祖先都一样。 16 佢哋嘅骸骨都送咗去示剑，安葬喺亚伯拉罕喺示剑买嘅墓穴，系佢向哈抹嘅族人买嘅。

17 “上帝对亚伯拉罕嘅承诺就快实现嗰阵，雅各嘅子孙喺埃及越嚟越多。 18 后嚟另一个法老登基统治埃及，佢唔认识约瑟。 19 佢用诡计迫害我哋嘅民族，强迫我哋嘅祖先遗弃婴儿，唔俾呢啲婴儿生存落去。 20 摩西就喺嗰个时候出世。佢生得好靓*，喺佢爸爸屋企抚养*咗三个月。 21 佢虽然被遗弃，但系就俾法老个女抱咗返去，当做自己个仔噉样凑大。 22 就系噉，摩西接受咗埃及最好嘅教育*，佢好有口才，办事能力都好强。

23 “摩西40岁嘅时候，决定*去睇吓佢啲弟兄以色列人嘅情况。 24 摩西见到有个以色列人受到恶待，就挺身而出，将嗰个恶待佢嘅埃及人杀死，帮佢报仇。 25 摩西以为啲弟兄会睇出上帝要通过佢拯救佢哋，但系佢哋睇唔出。 26 第二日，摩西见到两个以色列人打交，就上前调解，劝佢哋和好，佢话：‘你哋两个系弟兄，点解要打交呢？’ 27 但系嗰个伤害人嘅就推开摩西，话：‘边个派你做领袖同审判官嚟管我哋呀？ 28 唔通你想好似琴日杀死嗰个埃及人噉，杀死我呀？’ 29 摩西听到佢噉讲，就逃走去米甸。佢侨居喺嗰度，生咗两个仔。

30 “40年之后，喺西奈山嘅旷野，一位天使喺荆棘丛嘅火焰中向摩西显现。 31 摩西见到呢个景象，好惊讶，想去睇吓发生紧咩事，就听到耶和华*嘅声音： 32 ‘我系你祖先嘅上帝，亚伯拉罕、以撒、雅各嘅上帝。’摩西吓到成个人喺度震，唔敢再望。 33 耶和华*同佢讲：‘除低你对鞋，因为你企嘅地方系神圣嘅。 34 我嘅子民喺埃及受到嘅压迫，我睇得好清楚，佢哋嘅悲叹，我都听到。我嚟系要拯救佢哋。而家，我要派你去埃及。’ 35 大家曾经弃绝呢位摩西，同佢讲：‘边个派你做领袖同审判官呀？’不过，上帝委任嘅就系佢。上帝通过天使喺荆棘丛向摩西显现，要佢去带领同拯救以色列人。 36 佢带领佢哋出嚟，喺埃及同红海，仲有喺旷野嘅40年间，施行咗种种神迹同奇妙嘅事*。

37 “就系呢位摩西向以色列人讲过：‘上帝会喺你嘅弟兄当中，为你委任一位好似我一样嘅先知。’ 38 呢位摩西同以色列人一齐喺旷野。佢亦都同我哋嘅祖先一齐，而且曾经有天使喺西奈山同佢讲说话。佢领受咗长存嘅*圣言，然后传俾我哋。 39 但系我哋嘅祖先唔肯服从佢，唔愿意接受佢，一心想返去埃及。 40 佢哋同亚伦讲：‘帮我哋造啲神像带领我哋啦，都唔知嗰个带我哋离开埃及嘅摩西遇到咩事。’ 41 喺嗰段时间，佢哋造咗个牛犊像，向个像献祭，为自己造嘅呢个像庆祝。 42 于是上帝离弃佢哋，任由佢哋敬奉天上嘅日月星辰*，就好似先知书写嘅噉：‘以色列人啊，喺旷野嘅40年，你哋献嘅祭牲同祭物，根本就唔系献俾我嘅。 43 你哋抬嘅其实系摩洛神嘅帐篷同埋星神理番嘅像，呢啲都系你哋自己制造，用嚟崇拜嘅神像。所以我要放逐你哋，去仲远过巴比伦嘅地方。’

44 “我哋嘅祖先喺旷野有个存放圣谕*嘅帐幕，系上帝吩咐摩西按照佢见到嘅设计去建造嘅。 45 我哋嘅祖辈*继承咗呢个帐幕。上帝喺佢哋面前将列国赶出去之后，佢哋就同约书亚一齐将帐幕带到呢片原本属于列国嘅土地。直到大卫嘅日子，帐幕都喺嗰度。 46 大卫深受上帝喜爱，佢提出请求，希望自己有荣幸为雅各嘅上帝建造居所。 47 不过后嚟为上帝建造圣殿嘅系所罗门。 48 其实至高者唔会住喺人建造嘅殿宇入面，就好似先知所讲： 49 ‘耶和华*话，天系我嘅宝座，地系我嘅脚凳。你哋能够为我建造点样嘅殿宇呢？有咩地方可以俾我居住呢？ 50 呢一切都系我亲手造嘅。’

51 “顽固不化、无动于衷*嘅人啊，你哋一直抗拒神圣力量。你哋嘅祖先点做，你哋就点做。 52 有边个先知系你哋嘅祖先冇迫害过嘅呢？嗰啲先知预告正义嘅主会嚟到，佢哋都俾你哋嘅祖先杀死，而家你哋竟然连呢位正义嘅主都出卖，仲杀埋佢添。 53 你哋领受咗天使传达嘅法典，但系就冇遵守。”

54 佢哋*听到司提反讲嘅嘢，就恼羞成怒*，咬牙切齿。 55 司提反充满神圣力量，凝视天空，见到上帝嘅荣耀，仲见到耶稣企喺上帝右边， 56 就话：“我见到个天打开咗，人子*企喺上帝右边。” 57 佢哋就大声叫，用手揞住耳仔，一齐向佢冲过去， 58 赶佢出城外，用石头掟佢。嗰啲作假见证嘅人将外衣都放喺一个叫扫罗嘅后生仔脚前。 59 司提反俾佢哋用石头掟嘅时候，请求耶稣话：“主耶稣啊，我将生命*交俾你嘞。” 60 然后佢跪低，大声呼喊：“耶和华*啊，求你唔好追究佢哋犯嘅呢个罪。”讲完呢句说话，佢就长眠嘞。

8 杀害司提反呢件事，扫罗都赞成。

由嗰日开始，耶路撒冷嘅会众受到猛烈嘅迫害。除咗使徒之外，所有人都分散到犹地亚同撒马利亚唔同地区。 2 一啲虔诚嘅人将司提反抬去埋葬，为佢痛哭。 3 扫罗由嗰时开始残害会众，闯入每家每户，男男女女都俾佢拉去坐监。

4 分散嘅人去匀嗰啲地区，宣扬上帝话语嘅好消息。 5 腓力落去撒马利亚城*，向嗰度嘅人传扬基督嘅事。 6 人人都聚精会神噉听腓力讲说话，佢哋唔单止听，亦都见到佢施行神迹。 7 嗰度有好多人俾邪灵*附身，邪灵大嗌之后，就喺嗰啲人身上出嚟。另外，好多瘫痪同埋跛脚嘅人都被医返好。 8 城入面一片欢腾。

9 城入面有个人叫做西门，经常自吹自擂。佢一向都能够施行魔法，令撒马利亚嘅居民非常惊叹。 10 嗰度嘅人无论长幼尊卑，都会听佢讲说话，佢哋话：“呢个人拥有嚟自上帝嘅强大能力。” 11 由于大家一直对佢施行嘅魔法非常惊叹，佢哋都好留意佢讲嘅嘢。 12 但系腓力向佢哋宣扬好消息，传讲上帝嘅王国同埋耶稣基督嘅名之后，佢哋就相信咗，男男女女都受浸。 13 西门都成为信徒，受浸之后经常同腓力一齐，见到佢施行神迹同大能嘅作为，就十分之惊叹。

14 耶路撒冷嘅使徒听到撒马利亚人接受咗上帝嘅话语，就派彼得同约翰去佢哋嗰度。 15 呢两个人落到去嗰度，为佢哋祷告，等佢哋得到神圣力量， 16 因为佢哋只系奉主耶稣嘅名受咗浸，神圣力量仲未降喺佢哋任何人身上。 17 彼得同约翰将手放喺佢哋身上，佢哋就得到神圣力量。

18 西门见使徒将手放喺边个身上，边个就得到神圣力量，于是打算送钱俾使徒， 19 佢话：“请你令我都有呢种能力*吖，等我将手放喺边个身上，边个就可以得到神圣力量。” 20 彼得同佢讲：“你同你啲钱一齐被毁灭啦！上帝不求回报俾人嘅恩赐*，你竟然以为系可以用钱买嘅。 21 呢个恩赐绝对冇你份，因为你喺上帝眼中心术不正。 22 你要悔改，离开歧途。要向耶和华*恳切祈求，改变错误嘅谂法，噉或者佢会宽恕你。 23 我睇出你系毒药*，系罪*嘅奴隶。” 24 西门就话：“请为我恳切祈求耶和华*，唔好俾你哋讲嘅事发生喺我身上吖。”

25 佢哋传讲耶和华*嘅话语，作彻底嘅见证之后就返去耶路撒冷，一路上喺好多撒马利亚嘅村庄宣扬好消息。

26 耶和华*嘅天使同腓力讲：“你向南行，去嗰条由耶路撒冷落加沙嘅路啦。”嗰条系荒漠入面嘅路。 27 腓力就出发嘞。有个埃塞俄比亚*内臣*，系埃塞俄比亚女王甘大基手下一个有权势嘅人，掌管女王嘅一切财宝。佢啱啱去完耶路撒冷崇拜上帝， 28 回程途中，坐喺车度朗读以赛亚先知嘅书卷。 29 上帝通过神圣力量同腓力讲：“你去，追嗰架车吖。” 30 于是腓力紧贴住架车跑，听到呢个人朗读先知以赛亚嘅书卷，就问：“你系唔系真系明白你读紧嘅经文呀？” 31 佢话：“冇人指导我，我点会明白呢？”于是佢请腓力上车坐喺自己隔篱。 32 佢朗读嘅就系呢段经文：“佢好似绵羊噉俾人带去宰杀。佢一直冇开口，好似绵羊羔喺剪毛嘅人面前静默无声。 33 佢受到羞辱嘅时候，得唔到公正嘅对待。既然佢嘅生命要从地上被夺去，仲有边个会关心佢嘅家世呢？”

34 内臣同腓力讲：“求你话俾我知，先知喺呢度讲紧嘅系边个吖？系佢自己定系另一个人呢？” 35 腓力就由呢段经文开始讲，向佢传讲关于耶稣嘅好消息。 36 佢哋继续向前，去到一个地方，见到嗰度有水，内臣就话：“睇吓，呢度有水，我有咩理由唔受浸呢？” 37 －－－* 38 内臣吩咐人停车，然后同腓力一齐落水，腓力就为佢施浸。 39 佢哋喺水入面上返嚟，耶和华*嘅神圣力量即刻将腓力带走，内臣就冇再见到佢嘞。然后内臣继续上路，非常之开心。 40 至于腓力，佢去咗亚实突。佢去匀整个地区，喺所有城镇宣扬好消息，直到凯撒里亚。

9 扫罗仍然杀气腾腾，气势汹汹，恐吓主嘅门徒。佢去揾大祭司， 2 求佢发公函俾大马士革所有会堂，等佢一揾到奉行主道*嘅人，就可以逮捕，无论男女都押去耶路撒冷。

3 佢就快到大马士革嘅时候，天上突然有道光照射喺佢身上。 4 佢跌咗喺地，听到有把声同佢讲：“扫罗，扫罗，点解你迫害我？” 5 扫罗问：“主啊，你系边个呀？”佢话：“我就系你迫害紧嘅耶稣。 6 你起身入城吖。去到就会有人话俾你知应该点做。” 7 同扫罗一齐去嘅人都企咗喺度，惊讶到讲唔到嘢。佢哋净系听到把声，但系见唔到讲嘢嘅系边个。 8 扫罗爬返起身，虽然掰大眼，但系咩都睇唔到。佢哋就捉住佢只手，带佢入大马士革。 9 佢足足三日都睇唔到嘢，冇食嘢冇饮嘢。

10 大马士革有个门徒叫做亚拿尼亚，主通过异象同佢讲：“亚拿尼亚！”佢话：“主啊，我喺度。” 11 主话：“你要去直街，去犹大嘅屋企揾一个嚟自大数城嘅人。佢叫做扫罗，而家祷紧告， 12 佢喺异象见到你入去*，将手放喺佢身上，令佢睇得返嘢。” 13 但系亚拿尼亚就话：“主啊，我听好多人讲过，呢个人喺耶路撒冷做咗好多唔同嘅事，残害你嘅圣民。 14 佢仲得到祭司长授权，要嚟呢度逮捕*所有呼求你嘅名嘅人。” 15 主同佢讲：“你去啦，因为呢个人系我拣选嘅工具*，我要派佢向列国嘅人、君王同埋以色列人传扬我嘅名。 16 我会令佢清楚知道，佢一定会为我嘅名受好多苦。”

17 亚拿尼亚就出发。佢入咗嗰间屋之后，将手放喺扫罗身上，话：“扫罗，弟兄，喺路上向你显现嘅主耶稣，派我嚟令你睇返嘢，亦都令你充满神圣力量。” 18 就喺嗰一刻，有好似鳞片嘅嘢由扫罗对眼跌落嚟，佢就恢复视力，然后受咗浸。 19 佢食完嘢之后，就有返体力嘞。

之后，有一段时间，扫罗同大马士革嘅门徒一齐住。 20 佢亦都即刻开始喺唔同嘅会堂传讲关于耶稣嘅事，话俾人知耶稣系上帝嘅仔。 21 啲人听到扫罗嘅事都好惊讶，佢哋话：“呢个人曾经喺耶路撒冷残害耶稣嘅门徒*㗎㖞！佢唔系特登嚟呢度逮捕佢哋，押佢哋去见祭司长*㗎咩？” 22 但系扫罗越嚟越有力量，向人传道嗰阵好有说服力，佢有条理噉证明耶稣就系基督，令住喺大马士革嘅犹太人冇办法反驳。

23 好多日之后，犹太人密谋杀死扫罗， 24 不过佢哋嘅阴谋俾扫罗知道咗。佢哋日夜喺各个城门守候，谂住杀死佢。 25 于是扫罗嘅门徒喺夜晚带佢去城墙嘅一个窗口，喺嗰度用好大嘅篮将佢吊落去。

26 扫罗到咗耶路撒冷，好想同门徒来往，但系大家都好惊佢，唔信佢已经成为耶稣嘅门徒。 27 于是巴拿巴嚟帮佢，带佢去见使徒，详细话俾佢哋知，扫罗喺路上见到主，主同佢讲说话嘅经过，仲有佢点样喺大马士革奉耶稣嘅名勇敢传道。 28 于是扫罗留喺嗰度，同佢哋一齐去匀*耶路撒冷，奉主嘅名勇敢传道。 29 佢同嗰啲讲希腊语嘅犹太人交谈辩论，但系呢啲人多次揾机会想杀死佢。 30 弟兄知道咗，就带佢落凯撒里亚，然后叫佢去大数城。

31 喺嗰段时期，犹地亚、加利利同埋撒马利亚整个地区嘅会众都平安无事，信心越嚟越坚定。佢哋敬畏耶和华*，喺生活各方面都顺应神圣力量而得到鼓励，人数不断增加。

32 彼得周游各地嘅时候，亦都去咗吕达，揾住喺嗰度嘅圣民。 33 佢喺嗰度遇到一个叫以尼雅嘅人，呢个人瘫痪咗八年，一直要瞓喺床度。 34 彼得同佢讲：“以尼雅，耶稣基督将你医好嘞。起身，收拾你嘅床铺啦。”佢就即刻起身。 35 住喺吕达同沙仑平原嘅人见到发生喺以尼雅身上嘅事，就成为主嘅信徒。

36 喺约帕，有个门徒叫塔比莎，翻译成希腊语系多加*，佢为人乐善好施。 37 彼得喺吕达嘅时候，多加病死咗。大家将佢嘅遗体清洁干净，安放喺楼上一个房间。 38 吕达距离约帕唔远，门徒听讲彼得喺吕达，就派两个人去恳求佢，话：“请你尽快嚟我哋呢度吖。” 39 彼得就跟佢哋去。佢一去到，大家就带佢去楼上嘅房间。寡妇都喊住去见佢，攞咗好多多加生前做嘅衫*俾佢睇。 40 彼得叫所有人出去之后，跪低祷告，然后拧转身向住遗体话：“塔比莎，起身！”塔比莎掰大眼，见到彼得，就坐起身。 41 彼得伸手扶佢企起身，然后叫啲圣民同寡妇入返嚟，佢哋都见到多加有返生命。 42 呢件事传遍约帕，好多人成为主嘅信徒。 43 之后，彼得喺约帕一个叫西门嘅皮革匠屋企住咗一段时间。

10 凯撒里亚有个人叫哥尼流，系“意大利部队*”嘅军官*， 2 为人虔诚，佢一家都敬畏上帝。佢经常接济穷人，亦都经常向上帝恳切祈求。 3 有一日，大约下昼3点*，佢喺异象清楚见到上帝嘅天使嚟揾佢，同佢讲：“哥尼流！” 4 哥尼流好惊噉望住佢，然后话：“主啊，有咩事呢？”天使话：“上帝已经听到你嘅祷告。佢亦都留意到你经常接济穷人。 5 而家你要派人去约帕，请一个叫西门嘅人嚟，佢又叫彼得。 6 彼得喺皮革匠西门屋企作客，西门屋企就喺海边。” 7 天使同哥尼流讲完嘢，就走咗嘞。哥尼流叫咗两个仆人，同埋随从当中一个虔诚嘅士兵嚟， 8 将件事话晒俾佢哋听，然后派佢哋去约帕。

9 第二日，佢哋就快到约帕城嘅时候，彼得上咗屋顶*祷告，当时大约系中午12点*。 10 后嚟佢好肚饿，想食啲嘢。喺大家准备食物嘅时候，佢见到一个异象， 11 望见个天打开咗，有一大块好似麻布嘅嘢从天而降，块布四只角被吊住， 12 里面有地上各种四脚走兽同爬行动物，仲有天上嘅雀仔。 13 佢听到有把声话：“彼得，起身，㓥嚟食啦！” 14 但系彼得就话：“主啊，绝对唔可以㗎，我从来都冇食过污秽不洁嘅嘢。” 15 嗰把声再次同佢讲：“上帝视为洁净嘅，你唔可以再视为污秽。” 16 佢第三次听到嗰把声讲嘢之后，嗰样嘢就即刻被收返上天嘞。

17 彼得唔知道自己见到嘅异象系咩意思，觉得好困惑，就喺呢个时候，哥尼流派嚟嘅人揾到西门屋企，企咗喺门外面。 18 佢哋大声问呢间屋嘅主人，系咪有个客人叫西门·彼得。 19 当时彼得仲谂紧异象嘅意思，上帝就通过神圣力量话：“睇吓，有三个人嚟揾你呀。 20 落楼跟佢哋走啦，唔使犹疑，因为系我派佢哋嚟嘅。” 21 彼得就落楼同嗰啲人讲：“我就系你哋想揾嘅人。有咩事呢？” 22 佢哋话：“系军官哥尼流派我哋嚟嘅。佢为人正义，敬畏上帝，得到所有犹太人嘅赞赏。佢从一个圣洁嘅天使接获上帝嘅指示，请你去佢屋企，听吓你要讲嘅嘢。” 23 彼得就请佢哋入屋，款待佢哋。

第二日，彼得起程同佢哋一齐上路，约帕有啲弟兄都一齐去。 24 跟住嗰日，佢去到凯撒里亚。哥尼流已经恭候紧佢哋，仲叫埋啲亲朋好友嚟。 25 彼得去到，哥尼流一见到佢，就跪喺佢面前，向佢下拜。 26 彼得扶起佢，话：“起身啦，我同你一样，都只不过系人。” 27 彼得一路同佢倾偈，入到屋之后，见到好多人喺里面， 28 就同大家讲：“你哋好清楚，犹太人无论系同外族人来往，定系去探佢哋，都违反咗犹太人嘅法律。不过上帝令我睇出，唔可以将任何人视为污秽不洁。 29 所以你哋请我嚟，我就嚟，冇拒绝到。请问你哋叫我嚟，有咩事呢？”

30 哥尼流话：“四日前大约呢个时候，即系下昼3点*，我喺屋企祷紧告，有个人着住发光嘅衫，企喺我面前， 31 佢话：‘哥尼流，上帝已经听到你嘅祷告。佢亦都留意到你经常接济穷人。 32 你要派人去约帕，请一个叫西门嘅人嚟，佢又叫彼得。彼得喺皮革匠西门屋企作客，西门屋企就喺海边。’ 33 于是我即刻派人去揾你。多谢你愿意嚟，而家我哋都喺上帝面前，想听耶和华*吩咐你讲嘅所有嘢。”

34 彼得就话：“而家我真系睇出，上帝系唔偏心嘅， 35 无论边个国族嘅人，只要敬畏佢，做啱嘅事，佢都接纳。 36 佢话俾以色列人听一个好消息，就系佢哋可以通过耶稣基督同上帝恢复和睦，而呢位耶稣系所有人嘅主。 37 你哋都知道，约翰传讲佢嘅浸礼之后，由加利利直到整个犹地亚地区，啲人都议论纷纷。 38 佢哋讲论关于拿撒勒人耶稣嘅事，话上帝用神圣力量任命*佢做基督，又赐力量俾佢。佢喺各地行善*，医好所有受到魔鬼压迫嘅人，因为上帝同佢同在。 39 我哋见证所有佢喺犹太人嘅地区同耶路撒冷所做嘅事。但系犹太人竟然喺木柱*度处死佢。 40 上帝喺第三日，令耶稣复活而且向人显现， 41 不过唔系向所有人，而系向上帝之前委任嘅见证人显现，就系我哋呢啲喺佢死而复生之后同佢一齐吃喝嘅人。 42 佢都吩咐我哋向民众传道，为佢彻底作证，话俾人听佢就系上帝委任嘅审判官，要审判活人同死人。 43 所有先知都为耶稣作证，指出通过佢嘅名，上帝会宽恕所有信从耶稣嘅人嘅罪。”

44 彼得仲讲紧嘢嘅时候，神圣力量就倾注喺所有听到上帝话语嘅人身上。 45 嗰啲受过割礼，同彼得一齐嚟嘅信徒*，见到上帝赐神圣力量呢份礼物*俾外族人，就好惊讶。 46 佢哋听到呢啲人讲外语*，赞美伟大嘅上帝。于是彼得话： 47 “既然呢啲人好似我哋噉得到神圣力量，就冇人可以阻止佢哋喺水度受浸嘞，系咪？” 48 于是彼得吩咐佢哋奉耶稣基督嘅名受浸。之后佢哋邀请彼得住多几日。

11 犹地亚嘅使徒同弟兄都知道有外族人接受咗上帝嘅话语。 2 彼得到咗耶路撒冷，支持割礼嘅人就开始批评佢*， 3 话：“你竟然去冇接受割礼嘅人屋企，仲同佢哋一齐食饭。” 4 于是，彼得向佢哋详细解释事情嘅经过：

5 “我喺约帕城祷告嘅时候，见到一个异象。有一大块好似麻布嘅嘢从天而降，块布四只角被吊住。 6 我仔细睇，见到里面有地上各种四脚走兽、野兽、爬行动物，仲有天上嘅雀仔。 7 我亦都听到有把声同我讲：‘彼得，起身，㓥嚟食啦！’ 8 我就话：‘主啊，绝对唔可以㗎，我从来都冇食过污秽不洁嘅嘢。’ 9 嗰把声再次从天上回应：‘上帝视为洁净嘅，你唔可以再视为污秽。’ 10 嗰把声第三次同我讲说话，之后我见到嘅嗰啲嘢就被收返上天嘞。 11 就喺嗰个时候，有三个人企咗喺我哋住嗰间屋门口，佢哋系由凯撒里亚被派嚟揾我嘅。 12 上帝通过神圣力量吩咐我即管跟佢哋去，唔使犹疑。有六位弟兄同我一齐上路，之后我哋都入咗去哥尼流屋企。

13 “哥尼流话俾我哋听，佢见到一个天使企喺佢屋企，同佢讲：‘派人去约帕，请一个叫西门嘅人嚟，佢又叫彼得， 14 佢会讲啲嘢俾你知，令你同你一家可以得救。’ 15 我一开始讲说话，神圣力量就倾注喺佢哋身上，就好似当初倾注喺我哋身上一样。 16 当时我谂起主唔止一次讲过：‘约翰为人施浸系用水，而你哋受浸，系会通过神圣力量嘅。’ 17 既然上帝将同样嘅恩赐送俾佢哋*，就好似俾我哋呢啲相信主耶稣基督嘅人噉，我系边个？点可以阻止上帝做佢想做嘅事呢？”

18 大家听到佢噉讲，就冇再批评佢*。佢哋赞美*上帝话：“照噉睇，上帝都俾外族人有机会悔改而得到生命㖞。”

19 司提反被杀之后，其他信徒都开始受到迫害*，分散到唔同地方。佢哋分散到腓尼基、塞浦路斯，同埋安提阿，净系向犹太人传讲上帝嘅话语。 20 不过，佢哋当中有啲嚟自塞浦路斯同昔兰尼嘅人去咗安提阿，向嗰啲讲希腊语嘅人传道，宣扬主耶稣嘅好消息。 21 耶和华*支持佢哋*，好多人都跟随主，成为信徒。

22 耶路撒冷嘅会众听到佢哋嘅消息，就派巴拿巴去安提阿。 23 巴拿巴到咗之后，见到上帝所赐嘅分外恩典，就好开心，鼓励大家要下定决心，继续对主保持忠心。 24 巴拿巴系个良善嘅人，充满神圣力量同信心。后嚟，有一大班人成为信徒。 25 于是巴拿巴去大数，周围揾扫罗， 26 揾到之后，就带佢去安提阿。佢哋有足足一年时间，都留喺嗰个会众，教导咗好多人。就系喺安提阿，喺上帝指引下，门徒第一次被称为基督徒。

27 喺嗰段时期，有啲先知由耶路撒冷落去安提阿， 28 其中有个叫亚迦布。佢靠住神圣力量，预告全天下将会发生严重嘅饥荒。呢件事果然喺克劳狄执政期间发生。 29 于是门徒决定，人人都可以按照自己嘅能力捐出救援物资*，送俾犹地亚嘅弟兄。 30 大家就噉样做，通过巴拿巴同扫罗将物资送过去啲长老度。

12 大约呢个时候，希律王开始迫害会众嘅一啲人， 2 用刀剑处死咗约翰嘅兄弟雅各。 3 佢见噉样做能够博取犹太人嘅欢心，于是亦都去逮捕彼得，当时系无酵节。 4 希律拉咗彼得，韫佢入监，交俾四个班次嘅士兵轮流看守，每班四个人。希律打算过咗逾越节就将彼得押出嚟，当众审问佢。 5 彼得坐紧监嘅时候，会众嘅人都为佢向上帝恳切祷告。

6 就喺希律打算押佢出嚟嘅前一晚，彼得俾两条锁链锁住，喺两个士兵之间瞓觉，监狱门口都有守卫看守。 7 突然间，有道光射入佢身处嘅监仓，耶和华*嘅一个天使企咗喺嗰度。天使拍一拍彼得嘅膊头，叫醒佢，同佢讲：“快啲起身！”佢手上嘅锁链就跌咗落嚟。 8 天使同佢讲：“绑好腰带，着返对鞋吖。”佢就照做。然后，天使又话：“披返件外衣，跟住我走。” 9 佢就出去，一路跟住天使行。佢唔知道天使做嘅事都系真嘅，仲以为自己见到嘅系异象。 10 佢哋过咗第一个哨站，过埋第二个，最后行到离开监狱、通往城嘅铁门，道门就自动打开。佢哋出咗嚟之后，喺街上面行咗阵，天使就突然离开嘞。 11 呢个时候，彼得先至意识到发生咗乜嘢事，佢话：“而家我先知道，原来系耶和华*派佢嘅天使嚟救我逃出希律嘅毒手，冇俾犹太人期待嘅事发生喺我身上。”

12 佢明白发生咩事之后，就去咗约翰嘅妈妈马利亚屋企，约翰又叫做马可。当时佢妈妈屋企有唔少人聚集，一齐祷告。 13 彼得去到大门口敲门，有个叫罗大嘅女仆应门。 14 佢认得系彼得把声，就兴奋到唔记得咗开门，跑返去同大家讲彼得企咗喺大门口。 15 大家同佢讲：“你傻咗咩！”但系佢坚持话系真嘅。佢哋话：“噉嗰个一定系天使*嘞。” 16 彼得系噉敲门。佢哋开门，见系佢，就好惊讶。 17 彼得打咗个手势，示意佢哋安静，然后详细话俾佢哋听，耶和华*点样带佢离开监狱，又话：“你哋去将呢啲事话俾雅各同其他弟兄知吖。”之后佢就离开，去咗其他地方。

18 天光之后，啲士兵由于唔知彼得去咗边，就方寸大乱。 19 希律四围去搜查，但系揾唔到佢，就盘问嗰啲守卫，然后下令将佢哋拉去处罚。后嚟，希律从犹地亚落去凯撒里亚，喺嗰度住咗一段时间。

20 希律王向泰尔同西顿嘅人大发雷霆。于是嗰两个地方嘅人一致决定去见希律，佢哋先说服王宫*总管伯拉斯都帮手，然后去向王求和。因为呢两个地方嘅粮食供应嚟自希律辖下嘅地区。 21 喺一个特定嘅日子，希律着起王服，坐喺审判座向民众公开演说。 22 聚集喺嗰度嘅人都大声话：“系神嘅声音呀，唔系人嘅声音！” 23 希律接受咗上帝先至配受嘅赞美*，所以耶和华*嘅天使即刻打击佢，佢俾虫咬，最后死咗。

24 耶和华*嘅话语继续传开，信徒亦都越嚟越多。

25 巴拿巴同扫罗喺耶路撒冷完成救济嘅任务之后就返去嘞。佢哋仲带埋又叫做马可嘅约翰一齐返去。

13 安提阿当地嘅会众有几位先知同导师，分别系巴拿巴，叫做尼结嘅西满，昔兰尼嘅路求，同分封侯希律一齐接受教育嘅马念，仲有扫罗。 2 佢哋为耶和华*服务*，禁食紧嘅时候，上帝通过神圣力量话：“你哋要为我指派巴拿巴同扫罗，去做我俾佢哋嘅一件工作。” 3 于是大家禁食祷告，将手放喺巴拿巴同扫罗身上委任佢哋，然后送佢哋走。

4 上帝通过神圣力量派佢哋落去塞琉西亚，然后佢哋由嗰度启航去塞浦路斯。 5 佢哋去到萨拉米斯，就喺犹太人嘅各个会堂宣讲上帝嘅话语，当时约翰系佢哋嘅助手。

6 佢哋穿过呢个岛，一直去到帕福斯，喺嗰度遇到一个叫巴耶稣嘅犹太人。嗰个人系巫师，亦都系假先知。 7 佢同行省总督士求·保罗关系密切。行省总督系个聪明人，佢好渴望听到上帝嘅话语，就请巴拿巴同扫罗嚟。 8 嗰个巫师又叫做以吕马，同佢哋作对，想阻止行省总督接受呢个信仰。（以吕马呢个名翻译出嚟即系巫师。） 9 扫罗，又叫做保罗，充满神圣力量，望实佢， 10 话：“你呢个魔鬼之子，谂嘅都系欺诈同埋邪恶嘅嘢。你呢个同正义作对嘅人，竟然够胆歪曲耶和华*正义嘅道理？ 11 睇吓！耶和华*出手打击你嘞，佢会令你睇唔到嘢，有一段时间睇唔到阳光。”霎时间，有浓雾同埋黑暗笼罩住佢，佢周围摸索，想揾人帮佢带路。 12 行省总督见到发生嘅事，加上对学到关于耶和华*嘅事惊叹不已，就成为信徒嘞。

13 保罗同埋同伴由帕福斯启航，去咗潘菲利亚嘅佩尔吉。但系约翰离开咗佢哋，返咗去耶路撒冷。 14 佢哋由佩尔吉继续向前行，到咗皮西迪亚嘅安提阿。佢哋喺安息日入去会堂坐低。 15 有人宣读完法典同埋先知书之后，啲会堂主管叫人去同佢哋讲：“各位弟兄，你哋有咩想鼓励大家，就请讲啦。” 16 于是保罗企起身，用手势示意大家安静，然后话：

“在座嘅以色列人同埋其他敬畏上帝嘅人，请听我讲。 17 我哋以色列人嘅上帝拣选咗我哋嘅祖先，佢哋侨居埃及嘅时候，上帝令佢哋成为强大嘅民族，后嚟仲用大有能力嘅臂膀带佢哋出嚟。 18 大约有40年，上帝喺旷野一直容忍佢哋。 19 佢消灭咗迦南嘅七个国族之后，就将土地分俾佢哋做产业。 20 呢啲事历时450年左右。

“之后上帝委任士师*带领佢哋，直到先知撒母耳嘅日子。 21 后嚟，佢哋要求立一个王，上帝就委任便雅悯部族基士嘅仔扫罗，俾佢统治咗40年。 22 上帝废除扫罗之后，为佢哋拣咗大卫做国王，为佢作证话：‘我揾到一个合我心意嘅人，就系耶西嘅仔大卫。我钟意嘅事，佢都会去做。’ 23 上帝已经按照自己嘅承诺，令以色列人嘅救主喺大卫嘅子孙当中出现，佢就系耶稣。 24 其实喺佢嚟到之前，约翰已经公开向所有以色列人传道，叫佢哋接受象征悔改嘅浸礼。 25 约翰就快完成佢嘅职务嗰阵，曾经讲过：‘你哋认为我系边个呢？我唔系基督。但系佢会喺我之后嚟到，我连帮佢解开鞋带都唔配。’

26 “各位弟兄，亚伯拉罕嘅子孙同埋其他敬畏上帝嘅人啊，呢个同得救有关嘅信息已经传咗俾我哋嘞。 27 耶路撒冷嘅居民同佢哋嘅首领唔承认呢位救主，但系佢哋审判佢嘅时候，先知书嘅说话就应验咗嘞，呢啲说话系每逢安息日都朗读出嚟嘅。 28 虽然佢哋揾唔到定佢死罪嘅理由，但系仍然要求彼拉多处决佢。 29 圣经上面关于佢嘅事全部都实现之后，有人将佢由木柱*上面攞落嚟，安放喺墓穴。 30 不过，上帝令佢死而复生。 31 喺跟住嘅好多日，佢出现喺嗰啲同佢一齐由加利利上耶路撒冷嘅人面前，而家呢啲人都为佢向民众作证。

32 “我哋要向大家宣扬嘅好消息，同上帝向我哋祖先作出嘅承诺有关。 33 上帝令耶稣复活，从而向佢哋嘅子孙，即系我哋，完全兑现咗呢个承诺，就好似诗篇第二篇所讲：‘你系我嘅仔，今日我成为你嘅爸爸。’ 34 上帝令耶稣死而复生，赐咗个唔能够朽坏嘅身体俾佢。关于呢件事，上帝保证过：‘我曾经承诺向大卫表现忠贞之爱，呢个承诺系信实可靠嘅，我都会噉样对待你哋。’ 35 诗篇嘅另一篇都话：‘你唔会俾你嘅忠贞仆人朽坏*。’ 36 大卫在生嘅时候敬奉上帝*，最后长眠，同祖先安葬埋一齐，佢嘅身体的确已经腐烂。 37 不过，耶稣靠住上帝复活咗，佢嘅身体冇腐烂。

38 “所以各位弟兄，我向你哋传讲嘅信息，就系上帝会因为耶稣而宽恕你哋嘅罪。 39 摩西法典唔能够除去你哋嘅罪，但系通过耶稣，上帝可以将所有相信嘅人视为无罪。 40 所以你哋要小心，唔好俾先知书讲中你哋。先知书话： 41 ‘你哋呢啲钟意嘲笑嘅人，睇吓我喺你哋嘅日子所做嘅事。就算有人向你哋详细讲论呢件事，你哋都绝对唔会相信。但系你哋将会惊讶万分，亦都会灭亡。’”

42 佢哋离开嗰阵，民众恳求佢哋下一个安息日再嚟讲解呢啲事。 43 会堂嘅聚会结束之后，好多犹太人同归信犹太教嘅人*跟住保罗同巴拿巴。佢哋两个同大家讲咗番说话，勉励大家唔好辜负上帝嘅分外恩典。

44 到咗下一个安息日，几乎全城嘅人都聚埋一齐，想听耶和华*嘅话语。 45 犹太人见到有咁多人聚集，就好妒忌，反驳保罗嘅说话，表明佢哋唔尊重上帝*。 46 保罗同巴拿巴勇敢发言：“上帝嘅话语系传咗俾你哋先嘅，但系既然你哋唔肯接受，表明自己唔配得到永远嘅生命，而家我哋就要去向外族人*传讲呢个信息。 47 其实耶和华*曾经吩咐我哋：‘我已经委任你做列国嘅光，要你将令人得救嘅信息传到大地嘅尽头。’”

48 听到呢番话嘅外族人就好开心，因为耶和华*嘅话语而赞美上帝*。嗰啲有正确态度而可以得到永远生命嘅人，都成为信徒， 49 耶和华*嘅话语亦都传遍整个地区。 50 但系，犹太人煽动有名望嘅虔诚妇女同埋城入面有权势嘅人，怂恿人迫害保罗同巴拿巴，将佢哋赶出嗰一带。 51 于是佢哋扽走脚上嘅尘土*，然后去以哥念。 52 门徒仍然满心欢喜，充满神圣力量。

14 喺以哥念，保罗同巴拿巴一齐入咗犹太人嘅会堂。佢哋嘅说话好有力，令一大班犹太人同希腊人成为信徒。 2 不过，不信嘅犹太人就煽动外族人反对啲弟兄。 3 佢哋两个喺嗰度住咗一段时间，凭住耶和华*赐嘅权力勇敢传道。上帝亦都通过佢哋施行神迹同奇妙嘅事*，证明关于上帝分外恩典嘅信息系可信嘅。 4 城入面嘅人分成两派，有啲支持犹太人，有啲支持使徒。 5 外族人、犹太人同佢哋嘅首领企图羞辱保罗同巴拿巴，想攞石头掟佢哋。 6 佢哋知道呢个消息之后，就逃走到利考尼亚，去咗路司得、特庇同嗰一带嘅城镇， 7 喺嗰度继续宣扬好消息。

8 喺路司得，有个人天生跛脚，自细就行唔到路。佢坐喺度， 9 听保罗讲说话，保罗望住佢，睇出佢好有信心，可以得到医治， 10 就大声话：“企起身啦！”佢就跳起，开始行路。 11 啲人见到保罗做嘅事，就用利考尼亚语大声话：“有神明降临，化成人形嚟到我哋呢度喇！” 12 佢哋叫巴拿巴做宙斯，叫保罗做赫耳墨斯，因为带头讲说话嘅系保罗。 13 城门口宙斯神殿嘅祭司拉住公牛，拎住花环*嚟到城门，想同大家一齐献祭。

14 使徒巴拿巴同使徒保罗知道佢哋想做乜嘢，就撕裂衣服*，跑入去人群嗰度，大声话： 15 “各位，点解要噉做呢？我哋都只不过系人，同你哋一样软弱。我哋向你哋宣扬好消息，就系希望你哋唔好再做呢啲冇价值嘅事，希望你哋崇拜真神*，就系创造天、地、海同埋其中万物嘅上帝。 16 以往，佢虽然容许万国各行其是， 17 但系同时做咗好多美好嘅事，为自己作证，例如从天降雨，赐下丰收嘅时节，令你哋吃喝饱足，满心欢喜。” 18 佢哋讲完呢番说话，几经辛苦先制止到啲人向佢哋献祭。

19 有啲由安提阿*同以哥念嚟嘅犹太人挑拨教唆民众，佢哋就攞石头掟保罗，以为佢死咗，就将佢拖出城外。 20 但系门徒围住佢嘅时候，佢竟然企起身，返番入城。第二日，佢就同巴拿巴一齐离开，去咗特庇。 21 佢哋喺特庇城宣扬好消息，帮咗好多人成为门徒，然后返去路司得、以哥念、安提阿*， 22 令嗰啲地方嘅门徒更加坚强，鼓励佢哋持守信仰，话：“我哋进入上帝嘅王国之前，一定会经历好多患难。” 23 另外，保罗同巴拿巴仲喺各群会众委任长老，而且喺禁食祷告之后，将呢啲长老交托俾佢哋信从嘅耶和华*。

24 之后，佢哋两个经皮西迪亚，去到潘菲利亚， 25 喺佩尔吉传讲上帝嘅话语，然后落去亚大利， 26 由嗰度启航返安提阿*。当初，大家就系喺安提阿祈求上帝赐分外恩典俾佢哋执行任务，而家佢哋完成咗呢个任务嘞。

27 佢哋去到嗰度，就召集会众嘅人，话俾大家知上帝通过佢哋做嘅好多事，同埋上帝点样向外族人打开归信之门。 28 之后，佢哋同门徒一齐住咗好长时间。

15 有啲人喺犹地亚落嚟，教导弟兄话：“你哋要按照摩西法典接受割礼，如果唔系，就唔可以得救。” 2 为咗呢件事，保罗、巴拿巴同佢哋激烈噉争拗。大家就安排保罗、巴拿巴同埋另外几个人上耶路撒冷见使徒同长老。

3 会众送佢哋行咗一段路之后，佢哋继续上路，去到腓尼基同撒马利亚。佢哋向弟兄详细讲述外族人改信嘅经过，所有人听到都好开心。 4 佢哋一到耶路撒冷，就受到会众、使徒同埋长老嘅接待。佢哋向大家讲述上帝通过佢哋做嘅所有事。 5 不过，有几个曾经属于法利赛派嘅信徒企起身话：“外族人一定要接受割礼，我哋要吩咐佢哋遵守摩西法典。”

6 使徒同长老都聚集埋一齐讨论呢件事。 7 经过长时间激烈嘅讨论*之后，彼得企起身话：“各位弟兄，你哋清楚知道，上帝一早已经喺你哋当中拣咗我，等外族人通过我听到好消息*，成为信徒。 8 洞察人心嘅上帝将神圣力量赐咗俾佢哋，就好似赐咗俾我哋一样，表明佢哋已经得到接纳。 9 由于佢哋有信心，上帝洁净咗佢哋嘅心，冇再区分我哋同佢哋。 10 既然系噉，点解你哋而家挑战*上帝，系都要门徒背负连我哋祖先同自己都承担唔到嘅重担*呢？ 11 我哋深信，我哋同佢哋一样，都系靠主耶稣嘅分外恩典先至能够得救嘅。”

12 于是所有人安静落嚟，留心听巴拿巴同保罗讲述，上帝通过佢哋喺外族人当中施行嘅好多神迹同奇妙嘅事*。 13 佢哋讲完之后，雅各就话：“各位弟兄，请听我讲。 14 西门头先详细讲过，上帝第一次眷顾外族人嘅时候，点样从佢哋当中拣选一群子民，归于佢名下。 15 呢件事同先知书所讲嘅完全吻合，圣经话： 16 ‘呢啲事之后，我会返嚟，重新搭建大卫倒塌嘅帐篷*，重建废墟，再次竖立呢个帐篷， 17 噉剩余嘅人同所有国族当中称为我名下嘅人，就可以一齐恳切寻求耶和华*。呢个系耶和华*讲嘅。佢要成就嘅呢啲事， 18 佢好早之前就已经决定嘞。’ 19 所以我认为，唔应该为难嗰啲改信上帝嘅外族人， 20 只要写信吩咐佢哋禁戒俾偶像玷污嘅嘢，禁戒淫乱*，禁戒勒死*嘅动物，禁戒血，就可以嘞。 21 因为自古以嚟，每逢安息日都有人喺会堂朗读摩西嘅书，每座城都有人传讲佢嘅说话。”

22 于是使徒、长老同全会众决定喺佢哋当中拣啲人出嚟，派佢哋同保罗仲有巴拿巴一齐去安提阿。佢哋拣咗两个喺弟兄当中带头嘅人，分别系西拉同埋叫做巴撒巴嘅犹大。 23 佢哋写咗封信，请呢几个人带过去。封信噉样讲：

“使徒同长老，亦即系你哋嘅弟兄，写信俾安提阿、叙利亚同埋西利西亚嘅外族弟兄：你哋好！ 24 我哋听到呢度有人嚟讲咗啲令你哋不安嘅说话，想误导你哋，不过呢啲说话唔系我哋吩咐佢哋讲嘅。 25 所以我哋一致决定，拣啲人出嚟，同我哋亲爱嘅巴拿巴仲有保罗一齐去你哋嗰度。 26 巴拿巴同保罗为咗我哋主耶稣基督嘅名，连命都可以唔要。 27 我哋派去嘅犹大同西拉，都可以亲口将封信讲嘅呢啲事话俾你哋知。 28 我哋靠住神圣力量作出决定，唔加重你哋嘅负担，只有几件事系一定要禁戒嘅， 29 就系禁戒献俾偶像嘅祭牲，禁戒血，禁戒勒死*嘅动物，禁戒淫乱*。你哋继续远远避开呢啲事，就会一切顺利。祝你哋身体健康！*”

30 于是呢几个人就离开，落去安提阿，聚集大家，然后交封信俾佢哋。 31 佢哋听到信嘅内容，大受鼓励，非常开心。 32 犹大同西拉都系先知，佢哋讲咗好多说话鼓励弟兄，令佢哋嘅信心更加坚定。 33 佢哋两个喺嗰度住咗一段时间，啲弟兄就送佢哋离开，祝佢哋一路平安。佢哋就返去耶路撒冷嘞。 34 －－－* 35 而保罗同巴拿巴就留喺安提阿教导人，同好多弟兄一齐宣扬耶和华*话语嘅好消息。

36 过咗一段时间，保罗同巴拿巴讲：“之前我哋喺一啲城镇传讲过耶和华*嘅话语，我哋而家要*返去，探吓啲弟兄，睇吓佢哋嘅情况。” 37 巴拿巴坚持要带埋约翰一齐去，约翰又叫做马可。 38 不过保罗唔同意，因为马可之前喺潘菲利亚离开咗佢哋，冇同佢哋一齐传道。 39 两个人因为噉而激烈争执，结果就分开咗。巴拿巴带住马可坐船去塞浦路斯。 40 保罗拣咗西拉，啲弟兄祷告祈求耶和华*赐分外恩典俾保罗，之后佢就出发嘞。 41 佢去匀叙利亚同西利西亚，巩固各群会众。

16 保罗去咗特庇，然后到咗路司得。嗰度有个门徒叫做提摩太，妈妈系犹太人，亦都系信徒，爸爸系希腊人。 2 路司得同以哥念嘅弟兄都非常赞赏佢。 3 保罗话想带埋提摩太一齐上路。于是，保罗叫佢接受割礼，因为嗰啲地方嘅犹太人都知道佢爸爸系希腊人。 4 佢哋经过各个城镇，将耶路撒冷嘅使徒同长老所作嘅决定话俾门徒知，等佢哋可以遵守。 5 各群会众嘅信心越嚟越坚强，人数日日都有增长。

6 神圣力量禁止佢哋喺亚细亚行省传讲上帝嘅话语，佢哋就经过弗里吉亚同加拉太一带， 7 后嚟落到去密细亚，本来佢哋要入去比提尼亚*，但系耶稣通过神圣力量阻止佢哋入去。 8 于是，佢哋经过*密细亚，落去特洛阿斯。 9 到咗夜晚，保罗睇到一个异象：有个马其顿人企喺佢面前恳求佢：“嚟马其顿帮我哋吖。” 10 保罗睇到异象之后，我哋就即刻谂办法去马其顿，因为我哋睇出上帝吩咐我哋向马其顿人宣扬好消息。

11 我哋由特洛阿斯启航，直接去萨莫色雷斯，第二日去到尼亚波利， 12 再由嗰度去咗一个殖民地，就系马其顿地区嘅主要城市腓立比，我哋喺呢座城住咗一段时间。 13 喺安息日，我哋出咗城，去咗河边，因为听讲嗰度有个祷告嘅地方。我哋就坐低，向聚集喺嗰度嘅妇女传道。 14 有一个叫做吕底亚嘅女人喺嗰度听我哋传道，佢嚟自推雅推拉城，系卖紫色衫同布嘅。佢一向都崇拜上帝。耶和华*帮助*佢接受保罗传讲嘅信息。 15 佢同佢一家受浸之后，吕底亚好诚恳噉话：“如果你哋觉得我对耶和华*有信心，就一定要嚟我屋企住呀。”佢好坚持，我哋就去佢屋企嘞。

16 有一日，我哋去嗰个祷告嘅地方，喺途中遇到一个俾邪灵附身嘅女仆，邪灵令佢有占卜嘅能力。佢啲主人就因为噉而赚咗好多钱。 17 佢一路跟住保罗，喺我哋后面大嗌：“呢啲人系至高上帝嘅奴隶，要话俾你哋听点样先至可以得救。” 18 佢连续好多日都噉样做。保罗觉得好烦，就拧转身同邪灵讲：“我奉耶稣基督嘅名吩咐你，喺佢身上出嚟。”邪灵就即刻出嚟。

19 女仆嘅主人见俾人断咗财路，就捉住保罗同西拉，拉佢哋去市集广场见官员。 20 佢哋将两个人押去民政官面前，话：“呢啲人喺我哋座城周围搞事。佢哋系犹太人， 21 佢哋宣传嘅规矩都系我哋罗马人唔可以采纳、唔可以遵守嘅。” 22 民众都一齐指责佢哋。民政官下令剥咗佢哋啲衫，用棍打佢哋， 23 打完佢哋一身之后，就将佢哋韫入监，吩咐狱吏严密看守。 24 狱吏接到命令，就将佢哋韫喺最入嘅监仓，用枷锁锁住佢哋嘅脚。

25 到咗半夜，保罗同西拉一齐祷告，唱歌赞美上帝，其他囚犯都喺度听。 26 突然之间，发生咗场大地震，令到监狱嘅地基震动，啲门即刻打开晒，所有人嘅锁镣都松开咗。 27 狱吏醒咗之后，见监仓啲门全部都打开咗，以为啲囚犯都走晒，就掹把剑出嚟想自杀。 28 保罗大声话：“唔好伤害自己呀，我哋都喺呢度！” 29 狱吏叫人攞灯嚟，然后冲入去。佢成身震晒，跪喺保罗同西拉面前。 30 佢带佢哋出嚟之后，就问：“两位，我要做啲咩先至可以得救呢？” 31 佢哋答：“你同你一家要相信主耶稣，先至可以得救。” 32 佢哋就向狱吏同佢一家传讲耶和华*嘅话语。 33 嗰晚，狱吏带佢哋去洗伤口，然后佢同佢全家都冇拖延，即刻受浸。 34 狱吏将佢哋带返屋企，仲准备咗成台食物俾佢哋食。佢同佢全家因为成为咗信徒，相信上帝，就非常开心。

35 天光之后，民政官派守卫去同狱吏讲：“放咗嗰啲人啦。” 36 狱吏就将呢件事话俾保罗知，佢话：“民政官派人嚟放你哋走，而家你哋可以出嚟，安心离开喇。” 37 保罗同佢哋讲：“我哋系罗马公民，都未俾人定罪*，佢哋就当众打我哋，将我哋韫入监，而家又想偷偷哋赶我哋走？唔得！叫佢哋亲自嚟送我哋出去。” 38 啲守卫就将保罗讲嘅嘢话俾民政官知，民政官听到佢哋系罗马公民，就好惊， 39 于是民政官嚟向佢哋道歉*，送佢哋出监狱，然后请佢哋离开嗰座城。 40 佢哋离开监狱之后，去咗吕底亚屋企，同啲弟兄见面，鼓励完佢哋之后就走嘞。

17 佢哋经过安菲波利斯、阿波罗尼亚，去到帖撒罗尼迦，嗰度有一个犹太人嘅会堂。 2 保罗按照习惯入去会堂，连续三个安息日，根据圣经同人推理， 3 一边讲解，一边引用圣经证明基督一定要受难同埋死而复生。佢话：“我向你哋宣讲嘅呢位耶稣，就系基督。” 4 有啲人就成为信徒，同保罗仲有西拉密切来往，另外有一大班崇拜上帝嘅希腊人同埋唔少有地位嘅妇女都噉样做。

5 犹太人好妒忌，就聚集咗一班喺市集广场游手好闲嘅恶霸，喺城入面挑起骚乱。佢哋强行闯入耶孙屋企，想将保罗同西拉捉去交俾嗰啲暴民， 6 不过揾唔到佢哋，于是将耶孙同埋一啲弟兄拉去见治城官，大声话：“呢啲人搞到天下大乱，而家嚟埋呢度， 7 耶孙竟然接待佢哋。呢啲人违背凯撒嘅法令，话有另一个王，就系耶稣。” 8 民众同治城官听到佢哋噉讲，就好担心， 9 叫耶孙同其他人交出足够嘅保释金*，然后先至放佢哋走。

10 弟兄即刻漏夜送保罗同西拉去比里亚。佢哋一去到，就入去犹太人嘅会堂。 11 呢度嘅人比帖撒罗尼迦人开明，非常之热切噉接受上帝嘅话语，每日用心查考圣经，要确定自己听到嘅系唔系真嘅。 12 结果佢哋有好多人成为信徒，好多有名望嘅希腊妇女同一啲男人都成为信徒。 13 帖撒罗尼迦嘅犹太人听讲保罗亦都喺比里亚传讲上帝嘅话语，就去嗰度唆摆民众，引起骚动。 14 啲弟兄即刻送保罗离开，将佢送去海边，而西拉同提摩太就留喺嗰度。 15 有啲人陪保罗一齐去雅典。保罗吩咐佢哋去叫西拉同提摩太尽快嚟见佢，佢哋就离开。

16 保罗喺雅典等佢哋嘅时候，见到城入面周围都系偶像，就好不安。 17 于是佢喺会堂同犹太人仲有其他崇拜上帝嘅人推理，亦都每日喺市集广场同遇到嘅人推理。 18 不过，有啲伊壁鸠鲁派同斯多葛派嘅哲学家嚟同佢辩论。有啲话：“呢个人啰啰唆唆，到底想讲啲咩呀？”有啲就话：“睇嚟佢喺度宣传紧啲外国神明㖞。”佢哋噉样讲，系因为保罗宣扬有关耶稣同复活嘅好消息。 19 佢哋将保罗带去亚略巴古*，佢哋话：“呢套新道理，你可唔可以讲多啲俾我哋听？ 20 你讲嘅呢啲事，听落好新奇，我哋想知道系咩意思呀。” 21 原来所有雅典人同埋喺嗰度暂住*嘅外国人，得闲嘅时候最钟意倾吓偈，听吓新鲜事。 22 保罗企喺亚略巴古，佢话：

“各位雅典人，我留意到你哋做嘅所有嘢都表明你哋敬畏神明，比其他人更加虔诚。 23 例如，我一路行一路观察你哋崇拜*嘅嘢，发现有一座坛，上面写住‘献俾未知嘅神’。而家我要向你哋宣扬嘅，其实就系你哋未认识但系崇拜紧嘅神。 24 佢系创造世界同世上万物嘅真神，既然佢系天地嘅主，当然唔会住喺人建造嘅神殿， 25 亦都唔需要人服侍，好似缺乏咗啲咩噉，因为将生命、气息同一切赐俾所有人嘅就系佢。 26 佢创造咗一个人，万国万族都出自呢个人。佢俾人喺地上生活，又定下时候时期同埋人类居住嘅疆界， 27 等佢哋可以寻求真神，只要努力去揾就会揾到，其实真神离我哋每个人都唔远。 28 我哋有生命，有活动能力，能够存在，都全靠佢，就好似你哋有啲诗人所讲：‘我哋都系佢嘅仔女*。’

29 “我哋既然系真神嘅仔女*，就唔应该以为佢好似用金、银或者石头造嘅偶像，又或者好似人用手艺同心思雕刻出嚟嘅嘢。 30 喺以往嘅时代，虽然世人咁无知，真神都冇追究。不过而家佢向世界各地嘅人宣告，人人都应该悔改， 31 因为佢已经定咗日子，决定通过佢委任嘅人审判全天下，伸张正义。佢已经令呢个人死而复生，作为对所有人嘅保证。”

32 有啲人听到死人复活呢件事，就开始笑佢，另外有啲人话：“我哋下次想再听吓你讲呢件事。” 33 于是保罗离开佢哋。 34 不过都有啲人同佢来往，成为信徒，其中包括亚略巴古法庭嘅审判官丢尼修，仲有一个叫做达马里嘅女人同埋其他人。

18 后嚟，保罗离开雅典，嚟到哥林多*， 2 遇到一个喺本都出世嘅犹太人，叫做亚居拉，佢冇几耐之前带住太太百姬拉由意大利过嚟，因为克劳狄下令要所有犹太人都离开罗马。保罗去佢哋屋企， 3 同佢哋一齐住，一齐做嘢，因为佢哋嘅职业都系制造帐篷。 4 每逢安息日，保罗都去会堂演讲*，劝导犹太人同希腊人相信佢传讲嘅信息。

5 西拉同提摩太由马其顿落嚟之后，保罗就将全部精力都用嚟传讲上帝嘅话语，向犹太人证明耶稣系基督。 6 不过犹太人不断反对佢，诋毁佢，保罗就扬一扬自己件衫*，同佢哋讲：“你哋灭亡嘅话，都系咎由自取*，我系清白嘅。从今以后，我要去列国嘅人嗰度嘞。” 7 于是佢离开会堂，去咗提提奥·犹士都屋企，呢个人崇拜上帝，佢屋企就喺会堂隔篱。 8 会堂主管基利司布同佢一家都成为咗主嘅信徒。好多听到好消息嘅哥林多人都相信，亦都受咗浸。 9 有一晚，主喺异象同保罗讲：“唔使惊，即管继续传道啦，唔好放弃*。 10 我会同你一齐*，冇人可以伤害到你，因为我仲要喺呢座城召集好多子民。” 11 于是保罗喺嗰度住咗一年零六个月，教人学习上帝嘅话语。

12 迦流做亚该亚行省总督嘅时候，犹太人合谋攻击保罗，押佢去审判座前面， 13 佢哋话：“呢个人教唆人用唔合法嘅方式崇拜上帝。” 14 保罗准备开口嗰阵，迦流就同犹太人讲：“各位犹太人，如果有人做咗错事或者犯咗严重嘅罪，我当然应该耐心听你哋讲埋先嘅。 15 但系如果你哋争论嘅，只系一啲字眼、称呼同埋你哋嘅法律，噉你哋就要自己处理，我唔想审理呢啲事。” 16 于是迦流赶佢哋离开嗰度。 17 佢哋就捉住会堂主管所提尼，喺审判座前面打佢。喺呢啲事上，迦流并冇插手。

18 保罗喺嗰度继续住咗一段时间，然后同弟兄道别，启航去叙利亚。百姬拉同亚居拉都陪佢一齐去。喺坚革里，保罗将头发剃短，因为佢曾经许下一个誓愿。 19 到咗以弗所，佢哋留喺嗰度，而保罗就入咗会堂，同犹太人推理。 20 大家再三请求保罗住多一段时间，不过佢冇应承， 21 跟住佢向大家道别，佢话：“如果系耶和华*嘅意思，我就会再返嚟你哋呢度。”于是佢由以弗所启航， 22 落去凯撒里亚，然后上耶路撒冷问候会众，再落去安提阿。

23 佢喺嗰度住咗一段时间，就出发去加拉太一带同弗里吉亚，喺一座又一座城巩固所有门徒嘅信心。

24 有一个喺亚历山大出世嘅犹太人叫亚波罗，去咗以弗所。佢能言善辩，非常熟悉圣经。 25 佢受过教导认识耶和华*嘅道路，充满神圣力量，满腔热诚，正确噉讲解同教导关于耶稣嘅事，不过佢净系熟悉约翰嘅浸礼。 26 佢喺会堂勇敢向人传道。百姬拉同亚居拉听过佢讲嘅嘢，就私下去揾佢，帮佢更加准确噉明白上帝嘅道路。 27 后嚟佢想去亚该亚，弟兄就写信俾当地嘅门徒，请大家接待佢。佢去到之后，对嗰啲因为上帝嘅分外恩典而成为信徒嘅人帮助好大。 28 佢讲嘢嗰阵充满信念，公开证明犹太人嘅主张系错嘅，亦都引用圣经证明耶稣就系基督。

19 亚波罗喺哥林多期间，保罗去匀内陆地区，然后落去以弗所，喺嗰度见到一啲门徒。 2 保罗同佢哋讲：“你哋成为信徒嗰阵，有冇得到神圣力量？”佢哋话：“冇呀。我哋从来都冇听过可以得到神圣力量㗎㖞。” 3 保罗问：“噉你哋接受嘅系乜嘢浸礼呀？”佢哋话：“约翰嘅浸礼。” 4 保罗话：“约翰嘅浸礼系象征悔改嘅，佢吩咐民众要相信喺佢之后嚟嗰位，亦即系耶稣。” 5 佢哋一听到佢噉讲，就奉主耶稣嘅名受浸嘞。 6 保罗将手放喺佢哋身上，佢哋就得到神圣力量，开始讲唔同嘅外语*，受上帝启示发言*， 7 当时大约有12个男人。

8 连续三个月，保罗都喺会堂勇敢向人传道，用令人信服嘅论据讲解上帝嘅王国。 9 不过有啲人好固执，唔肯相信，仲当众诬蔑主道*。于是保罗带埋门徒离开，唔同佢哋一齐。保罗日日喺推拉诺嘅讲堂发表演讲， 10 噉样持续咗两年，结果亚细亚行省嘅居民，无论系犹太人定系希腊人，全部都听到上帝*嘅话语。

11 上帝不断通过保罗施行非凡嘅奇迹， 12 有人甚至将保罗掂过嘅手巾、围裙放喺病人身上，佢哋嘅病就好返嘞，邪灵亦都喺啲人身上出嚟。 13 有啲犹太人周围去驱逐邪灵，企图用主耶稣嘅名去驱逐附喺人身上嘅邪灵，佢哋话：“我奉保罗传扬嘅耶稣之名，命令你哋出嚟。” 14 犹太祭司长士基瓦嘅七个仔都噉样做。 15 不过邪灵就话：“我识耶稣，亦都知保罗系边个，但系你哋系边个呀？” 16 俾邪灵附身嗰个人即刻扑去佢哋身上，攻击佢哋，将佢哋一一制伏，结果佢哋全部都受咗伤，赤身由间屋走出嚟。 17 所有住喺以弗所嘅犹太人同希腊人都知道呢件事，人人都因为噉而敬畏上帝，从嗰时起，耶稣嘅名更加受到尊崇。 18 好多成为信徒嘅人都喺大家面前，坦白承认自己曾经做过嘅嘢。 19 唔少经常施行魔法嘅人将佢哋啲书攞出嚟，堆埋一齐，当众烧咗佢。佢哋计一计书嘅价值，先至知道总共值五万块银钱。 20 就系噉，耶和华*嘅话语继续发挥强大嘅力量，不断传开，节节得胜。

21 呢啲事结束之后，保罗决定去完马其顿同亚该亚，就去耶路撒冷。佢话：“我去完嗰度之后，都要去罗马。” 22 于是佢派提摩太同以拉都呢两个助手去马其顿先，而自己就暂时留喺亚细亚行省。

23 嗰个时候，因为主道引发咗一场骚乱。 24 有个银匠叫底米特，佢制造阿耳忒弥斯银龛，令到啲工匠赚咗好多钱。 25 佢召集呢啲工匠同其他同行，话：“各位，你哋都好清楚，我哋系靠呢门生意发达嘅。 26 你哋见到亦都听到㗎啦，呢个叫保罗嘅人唔单止喺以弗所，仲喺几乎成个亚细亚行省，说服咗一大班人改信另一套道理，话用人手造出嚟嘅并唔系神。 27 噉样落去，我担心唔单止我哋呢个行业嘅名声会受到影响，而且伟大嘅女神阿耳忒弥斯嘅神殿都会俾人蔑视，就连呢位喺全亚细亚行省同全世界受人崇拜嘅女神都会威严尽失。” 28 民众听到呢番说话，就非常之激气，开始大嗌：“以弗所人嘅阿耳忒弥斯伟大非凡！”

29 于是全城大乱，啲人拉住同保罗一齐嚟嘅同伴，就系该犹同亚里达古呢两个马其顿人，一齐冲入剧场。 30 保罗本来好想走入人群，但系门徒唔俾佢噉做。 31 有啲负责筹备节期同竞技活动嘅官员一向对保罗好友善，佢哋都派人嚟劝佢唔好冒险去剧场。 32 当时情况好混乱，有啲人嗌呢样，有啲人嗌嗰样，其实大部分人都唔知道点解喺嗰度聚集。 33 有人将一个叫亚历山大嘅人由人群当中拉出嚟，犹太人将佢推去前面。亚历山大想向民众发言，就用手势示意大家安静。 34 不过大家一认出佢系犹太人，就异口同声噉大嗌：“以弗所人嘅阿耳忒弥斯伟大非凡！”佢哋就噉样嗌咗大约两个钟。

35 城入面嘅书记官终于使大家安静落嚟，之后佢话：“各位以弗所人，世上有边个唔知道以弗所城守护伟大嘅阿耳忒弥斯神殿，同埋从天而降嘅神像呢？ 36 既然呢个系事实，冇办法否认，你哋就唔好咁冲动，应该平心静气。 37 你哋带嚟嘅呢啲人，冇抢劫我哋嘅神殿，亦都冇亵渎我哋嘅女神。 38 我哋有开庭嘅日子，亦都有行省总督，如果底米特同埋啲工匠想控告边个，佢哋到时大可以互相控告。 39 但系如果你哋有其他要求，就一定要召开一个正式会议去解决。 40 今日发生嘅事，我哋实在有被控叛乱嘅危险。噉样聚集一大班人引起骚乱，我哋根本揾唔到理由去交代。” 41 讲完之后，佢就打发啲人走嘞。

20 骚乱平息之后，保罗请门徒嚟，鼓励完佢哋，就同佢哋道别，起程去马其顿。 2 佢去匀嗰一带，讲咗好多说话鼓励弟兄，然后去到希腊， 3 喺嗰度住咗三个月。佢准备启航去叙利亚，但系因为知道犹太人密谋害佢，就决定经马其顿返去。 4 同佢一齐去嘅，有比里亚人毕罗斯嘅仔所巴特、帖撒罗尼迦人亚里达古同西公都、特庇嘅该犹，仲有提摩太，同埋嚟自亚细亚行省嘅推基古同特罗非摩。 5 呢啲人出发先，喺特洛阿斯等我哋。 6 过咗无酵节，我哋先至喺腓立比启航，五日之后去到特洛阿斯同佢哋会合，喺嗰度住咗七日。

7 跟住嗰个星期嘅第一日，我哋一齐食饭。由于保罗第二日要走，就同大家讲咗好多嘢，一直讲到半夜。 8 我哋喺楼上聚会嘅房点咗好多灯。 9 有个叫犹推古嘅后生仔坐喺窗边，喺保罗讲嘢嘅时候瞓着咗，而且瞓得好稔，结果由三楼*跌咗落去，啲人扶起佢嗰阵已经死咗。 10 保罗落楼，伏喺佢身上，揽住佢，然后话：“唔使惊，唔使咁伤心，佢有返生命嘞*。” 11 然后保罗上楼上食嘢*，食完之后，仲倾咗好耐，直到天光先离开。 12 佢哋带个男仔返屋企。大家都因为佢有返生命而觉得好安慰。

13 我哋上咗船，出发去阿索斯，不过保罗打算自己徒步去嗰度，我哋就按照佢嘅吩咐，去嗰度接佢上船。 14 佢喺阿索斯同我哋会合，我哋接佢上船，然后去咗米推利尼。 15 跟住嗰日，我哋由米推利尼起程，然后停靠喺希俄斯，第二日喺萨摩斯靠岸，第三日去到米利都。 16 保罗早就决定唔去以弗所，唔想喺亚细亚行省停留，因为佢想尽快赶去耶路撒冷，希望可以喺五旬节嗰日去到。

17 不过，保罗喺米利都派人去以弗所，叫会众啲长老嚟。 18 啲长老嚟到，保罗就同佢哋讲：“由我第一日嚟到亚细亚行省，我点样待人处事，你哋都好清楚。 19 我一直谦卑为主服务，经常流泪，亦都因为犹太人密谋害我而受尽考验。 20 你哋都知道，只要系对你哋有益嘅事，我都毫无保留噉话俾你哋知，无论系逐家逐户定系喺公众场所，我都教导你哋。 21 无论系对犹太人定系希腊人，我都作咗彻底嘅见证，劝人悔改崇拜*上帝，信从我哋嘅主耶稣。 22 而家我受神圣力量推动，要去耶路撒冷。我唔知喺嗰度会遇到咩事， 23 净系知道上帝通过神圣力量，喺一座又一座城入面，再三话俾我知，监禁同患难等紧我。 24 但系对我嚟讲，我嘅性命一啲都唔重要*，我只希望喺呢场比赛能够跑完全程，完成主耶稣交俾我嘅职务，为上帝分外恩典嘅好消息作彻底嘅见证。

25 “以前我向你哋传讲过上帝嘅王国，不过我知道，你哋冇一个会再见到我。 26 所以我今日叫你哋嚟作证，无论边个灭亡，我都系清白嘅，唔使承担血债， 27 因为我已经毫无保留噉将上帝嘅旨意讲晒俾你哋知嘞。 28 你哋要留意自己同埋整个羊群，因为上帝通过神圣力量委任咗你哋做羊群嘅监督，吩咐你哋牧养佢用自己个仔嘅血买返嚟嘅会众。 29 我知道我离开之后，残暴嘅狼会混入你哋当中，佢哋唔会爱惜羊群， 30 连你哋当中都会有人颠倒是非，拉拢门徒跟从佢哋。

31 “所以你哋要时刻警醒，记住我呢三年嚟，点样流住眼泪，不分昼夜一直劝诫你哋每一个人。 32 而家我将你哋交托俾上帝，同埋佢分外恩典嘅话语*，呢个话语能够令你哋坚强，令你哋同成圣*嘅人一齐得到产业。 33 我从来都冇贪图任何人嘅金银或者衣服。 34 你哋都知道，我用双手照顾咗自己同埋同伴嘅需要。 35 我喺各方面都努力工作*，等你哋知道必须帮助软弱嘅人。你哋亦都必须紧记主耶稣嘅说话，佢话：‘施与比接受更加快乐。’”

36 讲完呢番说话，保罗就同大家一齐跪低祷告。 37 所有人都痛哭流泪，揽住保罗，温柔噉亲吻佢。 38 最令佢哋伤心嘅，就系听到保罗话佢哋唔会再见到佢嘞。之后，佢哋送咗保罗上船。

21 我哋依依不舍噉同佢哋道别之后，就顺风航行，直接去到科斯，第二日抵达罗得斯，再由嗰度去咗帕大拉。 2 我哋揾到一艘开去腓尼基嘅船，就上船出发， 3 望到塞浦路斯岛之后，就喺岛嘅南边驶过，向住叙利亚航行，喺泰尔上岸，因为艘船要喺嗰度卸货。 4 我哋去揾当地嘅门徒，揾到之后，就喺嗰度住咗七日。佢哋知道神圣力量透露嘅事，就一再劝保罗唔好去耶路撒冷。 5 探访完佢哋之后，我哋就出发继续上路，佢哋所有人连同妇女、小朋友一齐送我哋去城外，大家喺海滩跪低祷告， 6 然后互相道别。之后我哋上咗船，佢哋亦都返屋企。

7 我哋由泰尔启航，到咗托勒密，去问候嗰度啲弟兄，同佢哋一齐住咗一日。 8 第二日，我哋出发，到咗凯撒里亚，去咗传福音者腓力屋企，喺嗰度留宿。腓力系嗰七个人之一， 9 有四个女，都系未婚嘅*，佢哋都喺上帝启示下讲预言*。 10 我哋住咗一段时间之后，有个叫亚迦布嘅先知喺犹地亚落嚟。 11 佢嚟见我哋嗰阵，拎起保罗嘅腰带绑住自己嘅手脚，佢话：“上帝通过神圣力量噉样讲：‘呢条腰带系边个嘅，边个就会噉样喺耶路撒冷俾犹太人绑住，交喺外族人嘅手。’” 12 我哋听到佢噉讲，就同其他在场嘅人一齐恳求保罗唔好上耶路撒冷。 13 保罗话：“你哋点解要喊，动摇我嘅决心*呢？为咗主耶稣嘅名，我唔单止准备好会俾人囚禁，就算死喺耶路撒冷都心甘情愿。” 14 我哋说服唔到保罗，就冇再坚持嘞*，只系话：“愿耶和华*嘅旨意实现。”

15 后嚟我哋收拾好行李，出发去耶路撒冷。 16 凯撒里亚有啲门徒都同我哋一齐去，带我哋去塞浦路斯人拿孙屋企留宿*。拿孙喺好耐之前已经系门徒。 17 我哋去到耶路撒冷，啲弟兄好开心噉欢迎我哋。 18 第二日，保罗同我哋一齐去见雅各，当时所有长老都喺嗰度。 19 保罗问候完佢哋，就详细讲述上帝通过佢嘅传道工作，喺列国嘅人当中所做嘅事。

20 佢哋听完之后，赞美*上帝，但系就同保罗讲：“弟兄，你睇，有成千上万嘅犹太人成为信徒，佢哋都热心维护摩西法典。 21 不过佢哋听到谣言，话你教导所有住喺列国当中嘅犹太人背弃摩西法典，叫佢哋唔好为自己嘅仔施行割礼，唔使遵守惯例。 22 而家应该点做好呢？佢哋迟早都会知道你嚟咗。 23 噉啦，你按照我哋讲嘅去做。我哋呢度有四个曾经许下誓愿嘅人。 24 你带佢哋去，同佢哋一齐举行仪式令自己洁净*，帮佢哋交钱，等佢哋可以剃头*。噉大家就会知道，之前关于你嘅谣言都系冇根据嘅，知道你一直循规蹈矩，遵守法典。 25 至于外族信徒，我哋已经写信将我哋嘅决定话咗俾佢哋知，就系佢哋要禁戒献俾偶像嘅祭牲，禁戒血，禁戒勒死*嘅动物，禁戒淫乱*。”

26 第二日，保罗带嗰几个人去，一齐举行洁净嘅仪式，然后入圣殿话俾人知洁净嘅仪式喺边日结束，等祭司到时为佢哋每个人献祭。

27 嗰七日就快结束嗰阵，由亚细亚行省嚟嘅犹太人见到保罗喺圣殿入面，就煽动民众，引起骚乱。佢哋捉住保罗， 28 大嗌：“各位以色列人，快啲嚟帮手！就系呢个人四围教唆人藐视我哋嘅族人、我哋嘅法典同埋呢个地方，佢仲带希腊人入圣殿，玷污呢个神圣嘅地方。” 29 佢哋噉讲，系因为之前见到以弗所人特罗非摩喺城入面同保罗一齐，就以为保罗带咗佢入圣殿。 30 全城陷入骚乱，民众一齐跑去圣殿，捉住保罗，拖佢出去，圣殿嘅门就即刻闩埋。 31 佢哋准备杀死保罗嘅时候，有人向部队嘅将军报告，话耶路撒冷陷入一片混乱。 32 将军即刻带住士兵同军官跑落去。大家一见到将军带住士兵嚟到，就冇再打保罗嘞。

33 将军上前逮捕保罗，下令用两条锁链锁住佢，然后问佢系边个，做咗乜嘢事。 34 当时有啲群众嗌呢样，有啲嗌嗰样。将军见场面咁混乱，查唔到真相，就吩咐人带保罗去军营。 35 保罗啱啱行上楼梯，啲人就涌埋嚟想伤害佢，士兵唯有将保罗掅起带走。 36 有一班人一直跟喺后面大嗌：“杀死佢！”

37 保罗就快俾人带入军营嘅时候，同将军讲：“我可唔可以同你讲啲嘢呀？”将军话：“你识讲希腊语？ 38 早排有个埃及人煽动叛乱、带领4000个匕首党徒去旷野，嗰个人系咪你呀？” 39 保罗话：“我系犹太人，喺西利西亚著名嘅大数城出世，系嗰度嘅公民。求你俾我向民众讲几句。” 40 将军应承咗，保罗企喺楼梯上面，向民众做咗个手势，大家就安静落嚟。于是保罗用希伯来语同佢哋讲：

22 “各位乡亲父老，各位兄弟，请听吓我申辩。” 2 佢哋听到保罗用希伯来语同佢哋讲说话，就更加安静。保罗话： 3 “我系犹太人，喺西利西亚嘅大数城出世，喺耶路撒冷接受迦玛列嘅教育，受教导要严格遵守祖先嘅法典，就好似你哋而家所有人一样热心崇拜上帝。 4 我曾经迫害奉行主道*嘅人，置佢哋于死地。我将男女信徒都捉去坐监。 5 呢啲事大祭司同长老议会嘅所有成员都可以作证。当时我仲请佢哋出公函俾大马士革嘅兄弟，等我可以去逮捕嗰度嘅人，带去耶路撒冷受罚。

6 “大约中午，我就快到大马士革嗰阵，天上突然有一道强光照射喺我身上。 7 我跌咗落地，听到有把声同我讲：‘扫罗，扫罗，点解你迫害我？’ 8 我就问：‘主啊，你系边个呀？’佢话：‘我就系你迫害紧嘅拿撒勒人耶稣。’ 9 当时同我一齐嘅人都见到嗰道光，但系就听唔清楚主同我讲乜嘢。 10 我问：‘主啊，我应该做啲乜嘢呢？’主话：‘起身，入大马士革城，喺嗰度有人会将你应该做嘅嘢，话晒俾你知。’ 11 因为嗰道强光，我乜嘢都睇唔到，同行嘅人就捉住我嘅手，带我入大马士革。

12 “有个人叫亚拿尼亚，佢好虔诚，一向谨守法典，住喺大马士革嘅犹太人全部都好赞赏佢。 13 佢嚟揾我，企喺我身边话：‘扫罗，弟兄，而家你睇得返嘢嘞！’当时我一岳高头就见到佢。 14 佢话：‘我哋祖先嘅上帝拣选咗你，令你知道上帝嘅旨意，见到正义嘅主，听到佢亲口讲嘅说话， 15 因为你要为耶稣作证*，将你见到、听到嘅一切讲俾所有人知。 16 而家你仲等乜嘢呢？你去受浸啦！你呼求耶稣嘅名，上帝就会宽恕你嘅罪*。’

17 “我返到耶路撒冷之后，喺圣殿祷告嗰阵睇到一个异象， 18 见到主同我讲：‘快啲离开耶路撒冷，快啲走！因为佢哋唔会接受你为我所作嘅见证。’ 19 我话：‘主啊，佢哋都知道，我曾经去一个又一个会堂，监禁同拷打嗰啲相信你嘅人。 20 你嘅见证人司提反被杀害嗰阵，我都赞成，仲企喺附近为杀佢嘅人看守外衣。’ 21 不过主同我讲：‘你去啦，因为我要派你去远方嘅列国。’”

22 佢哋听保罗讲到呢度，就大嗌：“呢个人系抵死嘅，杀咗佢啦！” 23 佢哋喺度嗌，又除低外衣抛出去，亦都将尘土扬到空中。 24 于是将军吩咐人带保罗去军营，叫人鞭打拷问佢，想知道大家点解大嗌话要杀佢。 25 士兵绑起保罗对手，准备鞭打佢嘅时候，保罗同企喺嗰度嘅军官讲：“鞭打仲未定罪*嘅罗马公民，系合法㗎咩？” 26 军官一听到佢噉讲，就向将军报告：“你谂住点做呀？呢个人系罗马公民。” 27 将军上前问保罗：“话俾我知，你系咪罗马公民呀？”佢话：“系。” 28 将军话：“我使咗一大笔钱，先至买到呢个公民权。”保罗话：“我一出世就系罗马公民。”

29 于是，嗰啲本来要严刑拷问保罗嘅人即刻向后褪。将军知道保罗系罗马公民就好惊，因为佢曾经用锁链锁过保罗。

30 第二日，将军想知道保罗到底点解俾犹太人指控，就解开佢嘅锁链，仲吩咐祭司长同成个公议会聚集一齐，然后带保罗落嚟，叫佢企喺佢哋当中。

23 保罗望住公议会嘅人话：“各位弟兄，我喺上帝面前，一直都本住良心处事为人，无愧于心，直到今日。” 2 大祭司亚拿尼亚一听到，就吩咐企喺侧边嘅人掌佢嘴。 3 保罗同佢讲：“你呢个虚伪嘅人*，上帝要打击你。你一边坐喺度根据法典审判我，一边又违反法典下令打我？” 4 企喺侧边嘅人话：“你竟然够胆侮辱上帝委任嘅大祭司？” 5 保罗话：“各位弟兄，我唔知佢系大祭司。圣经话：‘唔可以侮辱人民嘅首领。’”

6 保罗知道佢哋有啲系撒都该派嘅，有啲系法利赛派嘅，就喺公议会大声话：“各位弟兄，我系法利赛派嘅，系法利赛派嘅子孙。我今日受审判系因为我相信死人会复活。” 7 听到佢噉讲，法利赛派同撒都该派就开始争执，出现分歧。 8 噉系因为撒都该派一向都话冇复活，冇天使，亦都冇灵体，但系法利赛派就话三样都有。 9 佢哋大吵大闹，有几个法利赛派嘅抄经士企起身，激烈争辩，佢哋话：“我哋揾唔到呢个人做咗乜嘢错事，话唔定有灵体或者天使同佢讲咗啲咩……” 10 争执越嚟越激烈，将军担心保罗会俾佢哋杀死，就派一队士兵落去，将保罗喺人群当中救出嚟，带去军营。

11 当晚，主企喺保罗身边，话：“你要鼓起勇气！你已经喺耶路撒冷为我彻底作见证，都要喺罗马为我作见证。”

12 天光之后，犹太人策划阴谋，仲发毒誓*话，唔杀咗保罗先，就咩都唔食，咩都唔饮。 13 发誓同策划呢个阴谋嘅，一共有40几人。 14 佢哋去见祭司长同长老，话：“我哋郑重噉发咗毒誓*，唔杀咗保罗先，就乜嘢都唔食。 15 而家你哋要同公议会一齐话俾将军知，请佢将保罗带嚟你哋呢度，诈谛想更加彻底噉查明佢嘅案件。我哋会准备好，喺佢嚟到之前就杀咗佢。”

16 保罗嘅外甥听讲佢哋打算埋伏，就入军营同保罗讲。 17 于是保罗叫咗一个军官嚟，同佢讲：“请你带呢个后生仔去见将军，佢有事禀告。” 18 军官就带佢去见将军，话：“嗰个叫保罗嘅囚犯请我带呢个后生仔嚟见你，佢有事禀告。” 19 将军拉住佢只手，行埋一边，私下问佢：“你有乜嘢要同我讲？” 20 佢话：“犹太人已经约定，要请你听日带保罗去公议会，诈谛想更加彻底噉查明佢嘅案件。 21 你千祈唔好听佢哋讲，因为有40几个人准备好，要伏击保罗。佢哋发咗毒誓*，唔杀咗保罗先，就咩都唔食，咩都唔饮。而家佢哋准备好晒，等你批准㗎咋。” 22 将军吩咐佢：“唔好俾任何人知道你讲咗呢啲事俾我听。”然后，将军就叫佢走嘞。

23 将军召见咗两个军官，同佢哋讲：“安排200个步兵，70个骑兵，200个长矛手，喺夜晚9点*出发去凯撒里亚。 24 另外，要为保罗准备马匹，护送佢去总督腓力斯嗰度。” 25 将军仲写咗一封公函话：

26 “克劳狄·吕西亚写信俾总督腓力斯：向大人请安！ 27 呢个人俾犹太人捉住，争啲俾佢哋杀死。我一知道佢系罗马公民，就即刻带咗队士兵赶去救佢出嚟。 28 我想知道佢哋点解指控佢，于是带佢落去佢哋嘅公议会。 29 我查出佢俾人指控嘅，只不过系同佢哋法典有关嘅问题，根本唔系啲咩应该被处死或者囚禁嘅罪名。 30 后嚟我知道有人密谋害佢，就即刻送佢去你嗰度，又吩咐指控佢嘅人要喺你面前提出控诉。”

31 于是士兵按照吩咐接走保罗，漏夜送佢去安提帕底。 32 第二日，骑兵继续护送保罗，其他士兵就返去军营。 33 骑兵去到凯撒里亚，就攞封公函俾总督，将保罗交俾佢。 34 总督读完封公函，就问保罗嚟自边个行省，保罗话佢嚟自西利西亚。 35 总督就同佢讲：“等指控你嘅人都嚟埋，我就会仔细听你辩白。”于是佢下令将保罗拘押喺希律嘅宫殿。

24 五日之后，大祭司亚拿尼亚带住几个长老同埋一个叫帖土罗嘅雄辩家*落嚟，向总督控告保罗。 2 佢哋叫帖土罗发言，佢就开口指控保罗：

“我哋因为大人而安享太平，我哋嘅民族亦都因为大人嘅远见而进行咗各种改革。 3 腓力斯大人，无论几时，无论喺边度，我哋都因为呢一切而对你感激不尽。 4 但系我唔敢阻你太耐，只系希望大人你耐心听我哋讲几句。 5 我哋查到呢个人周围惹是生非*，喺全天下嘅犹太人当中煽动叛乱。佢系嗰啲拿撒勒人嘅异端教派嘅一个首领。 6 佢仲企图亵渎圣殿，所以我哋先至拉咗佢。 7 －－－* 8 只要大人亲自审问佢，就可以查出我哋对佢所作嘅指控全部都系真嘅。”

9 犹太人都附和，仲好肯定噉话呢啲事都系真嘅。 10 总督向保罗点头，示意佢发言，佢就话：

“我清楚知道，多年嚟我哋民族嘅事务都承蒙大人审理，所以我好乐意为自己申辩。 11 大人可以亲自查证，由我上耶路撒冷崇拜上帝到而家，都唔够12日。 12 冇人见过我喺圣殿同任何人争执，或者聚集暴民搞事。喺会堂同城入面任何地方，我都冇做过呢啲事。 13 呢啲人亦都唔能够向你证实佢哋而家指控我嘅事。 14 不过有一点我系要向大人承认㗎，我的确遵守佢哋所讲嘅‘异端教派’嘅崇拜方式，敬奉我祖先嘅上帝，因为我相信法典同先知书所写嘅一切。 15 我同呢啲人一样，都热切期待上帝复活正义*嘅人同唔正义嘅人。 16 所以，无论对上帝定系对人，我都力求良心清白*。 17 我离开咗耶路撒冷好多年，今次返去系为咗将救济物资带俾同胞同埋献祭。 18 我办理呢啲事期间，佢哋见到我喺圣殿嘅时候，我已经按照法典规定令自己洁净，并冇聚集群众闹事。当时，在场有啲系由亚细亚行省嚟嘅犹太人， 19 如果佢哋有嘢想告我，就应该喺你面前提出指控。 20 如果唔系，就等今日在场嘅人讲吓，我企喺公议会受审嘅时候犯咗乜嘢错。 21 如果佢哋认为我有错，可能就只系因为我曾经企喺佢哋当中大声话：‘我今日受审判系因为我相信死人会复活！’”

22 其实腓力斯好了解同主道*有关嘅事，不过佢想拖延，就话：“等吕西亚将军落嚟，到时我先至为你哋定夺啦。” 23 佢吩咐军官拘留保罗，不过就俾啲自由佢，仲容许保罗嘅亲友嚟照顾佢。

24 过咗一段时间，腓力斯同佢太太杜西拉一齐嚟，佢太太系犹太人。腓力斯召保罗嚟，想听佢解释同基督耶稣有关嘅信仰。 25 保罗一讲到正义、自制，仲有同将来审判有关嘅事，腓力斯就开始惊，佢话：“而家你走啦，有机会我先再叫你嚟。” 26 不过腓力斯都不断召见保罗，同佢倾偈，因为佢希望保罗送钱俾佢。 27 过咗两年，波求·非斯都接任腓力斯嘅职位。腓力斯想讨好犹太人，就继续拘留保罗。

25 非斯都嚟到犹地亚行省，上任之后三日，就由凯撒里亚上耶路撒冷。 2 祭司长同犹太人嘅首领向佢控告保罗，仲恳求佢， 3 请佢送个人情，传召保罗嚟耶路撒冷。佢哋打算喺路上埋伏，杀死佢。 4 不过非斯都话保罗要留喺凯撒里亚，佢自己都就快会返去嗰度， 5 仲话：“你哋当中有权力嘅人可以同我一齐落去。呢个人如果做咗啲咩唔啱嘅事，就喺嗰度指控佢啦。”

6 非斯都喺佢哋嗰度留咗十日八日，就落去凯撒里亚。第二日佢坐喺审判座，下令带保罗嚟。 7 保罗嚟到，由耶路撒冷落嚟嘅犹太人就围住佢，控告佢犯咗好多严重嘅罪，但系就冇证据。

8 保罗申辩话：“我冇犯罪，冇违反犹太人嘅法典，冇轻视圣殿，亦都冇冒犯凯撒。” 9 非斯都想讨好犹太人，就同保罗讲：“你愿唔愿意上耶路撒冷，喺嗰度，喺我面前为呢啲事接受审判呀？” 10 保罗话：“我而家企喺凯撒嘅审判座前面，应该喺呢度接受审判。我冇做过乜嘢唔啱嘅事冒犯犹太人，呢点你都好清楚㗎。 11 如果我真系做咗唔啱嘅事，犯咗死罪，噉要死就死啦，我唔会恳求开恩。但系如果呢啲人对我嘅指控系毫无根据嘅，噉冇人能够为咗讨好人而将我交俾佢哋。我要向凯撒上诉！” 12 非斯都同佢啲谋士商量之后，就话：“既然你要向凯撒上诉，噉你就去凯撒嗰度啦。”

13 过咗一段时间，亚基帕王同百妮基去凯撒里亚拜会非斯都。 14 佢哋喺嗰度住咗一段时间，非斯都将保罗嘅事同王讲，佢话：

“呢度有个人，系腓力斯留低嘅囚犯。 15 我喺耶路撒冷嘅时候，祭司长同犹太人嘅长老控告佢，要求我判佢有罪。 16 我回复佢哋，话被告未同原告当面对质，冇机会为自己受到嘅指控申辩，如果我将佢当做人情交俾其他人，噉系违反罗马人嘅规矩㗎。 17 所以佢哋到咗之后，我冇拖延呀，第二日就坐喺审判座，下令将嗰个人带嚟。 18 指控保罗嘅人企起身，佢哋提出嘅罪名，都唔系我以为嘅嗰啲坏事。 19 嗰啲人同保罗争辩嘅，只不过系同佢哋崇拜嘅神*有关嘅事，仲有嗰个叫耶稣嘅人嘅事。嗰个人已经死咗嘞，但系保罗就口口声声话佢仲在生。 20 我唔肯定应该点样处理呢件事，所以问佢想唔想去耶路撒冷，喺嗰度接受审判。 21 不过保罗请求留喺度，等凯撒*定夺，我就下令将佢拘留，直到我送佢去凯撒嗰度。”

22 亚基帕同非斯都讲：“我想亲自听吓呢个人讲乜嘢。”非斯都话：“听日你就可以听佢讲嘞。” 23 第二日，亚基帕同百妮基好大阵仗噉嚟到，带住好多将军同城入面有权势嘅人入咗大厅，然后非斯都吩咐人带保罗嚟。 24 非斯都话：“亚基帕王，在座各位，你哋面前嘅呢个人，无论系耶路撒冷定系呢度嘅犹太人，都向我提出请求，嘈住话要处死佢。 25 不过我查唔到佢犯过啲咩死罪。所以佢要求向皇上上诉，我就决定送佢去嘞。 26 关于呢个人，我冇乜嘢可以向皇上*禀告。所以我带佢嚟你哋面前，特别系亚基帕王你面前，噉经过审讯之后，我就可以写明具体嘅情况嘞。 27 因为我认为，押送囚犯但系唔讲清楚佢嘅罪状，系唔合理㗎。”

26 亚基帕同保罗讲：“你可以为自己申辩嘞。”于是保罗伸出手，开始申辩：

2 “亚基帕王啊，我今日可以喺你面前，为犹太人指控我嘅事申辩，真系好荣幸， 3 特别系因为你非常熟悉犹太人嘅所有规矩同争议。所以，求你耐心听我讲。

4 “我自细喺耶路撒冷，喺同胞当中过住点样嘅生活， 5 识得我嘅犹太人都好清楚。只要佢哋愿意作证，都可以话俾你知，我以前属于法利赛派，即系我哋嘅宗教当中最严格嘅教派。 6 不过而家我就因为盼望上帝实现对我哋祖先嘅承诺，而要企喺呢度受审。 7 其实我哋12个部族日夜热切敬奉上帝，盼望嘅就系呢个承诺能够实现。王啊，我就系因为呢个希望而俾犹太人控告。

8 “点解你哋认为*上帝复活死人系唔可信嘅呢？ 9 我都曾经认定，一定要用各种办法去对付嗰啲跟从拿撒勒人耶稣嘅人*， 10 我喺耶路撒冷就系噉做嘞。我得到祭司长授权之后，拉咗好多圣民去坐监。佢哋俾人处决，我亦都支持*。 11 我喺各个会堂，再三严惩佢哋，想迫佢哋放弃信仰。我对佢哋充满愤恨，甚至去其他城镇迫害佢哋。

12 “我得到祭司长授权之后，就去大马士革执行任务。 13 王啊，我喺中午嘅时候，喺路上见到有道光，由天上照射出嚟，比阳光更加猛烈，照射喺我同埋同行嘅人身上。 14 我哋全部跌喺地下，然后我听到有把声用希伯来语同我讲：‘扫罗，扫罗，你点解迫害我呀？你不断踢刺棒*，只会伤害自己。’ 15 我话：‘主啊，你系边个？’主话：‘我就系你迫害紧嘅耶稣。 16 企起身啦。我喺你面前出现，系要拣选你做我嘅仆人同见证人，为你见到嘅事同埋我将来会俾你见到嘅事作证。 17 我会搭救你免受本族人同埋外族人伤害。我派你去佢哋嗰度， 18 打开佢哋嘅眼睛，引导佢哋离开黑暗，走向光明，摆脱撒但嘅辖制，归向上帝。噉样，佢哋因为对我有信心，罪就会得到宽恕，亦都会同成圣*嘅人一齐得到产业。’

19 “亚基帕王啊，我见到呢个嚟自天上嘅异象，就照住做嘞。 20 我首先喺大马士革，然后喺耶路撒冷同埋全犹地亚，最后喺列国当中向人传扬呢个信息，劝人悔改归向上帝，行为同悔改嘅心一致。 21 犹太人就系因为呢啲事喺圣殿捉住我，想杀死我。 22 但系我得到上帝嘅帮助，到今日仲可以继续向所有人作见证，包括尊卑贵贱嘅人。其实我讲嘅，全部都系先知同摩西嘅书预告嘅事， 23 就系基督必须受难，佢系第一个死而复生嘅，而且向本族人同埋外族人传道，为人带嚟光明。”

24 保罗仲申辩紧嘅时候，非斯都大声话：“保罗，你癫咗呀！你系咪读太多书，读到傻咗呀？” 25 保罗话：“非斯都大人，我唔系傻嘅，我讲嘅都系真话，我嘅头脑亦都好清醒。 26 事实上，王好清楚呢啲事，所以我先至够胆照直同王讲。我深信呢啲事，王都知道，因为呢啲事都唔系暗中做嘅。 27 亚基帕王啊，你相唔相信先知嘅说话呢？我知道你系信嘅。” 28 亚基帕同保罗讲：“你再讲落去，睇怕好快就说服到我做基督徒嘞。” 29 保罗话：“快又好，慢又好，我向上帝求嘅，唔单止系你，仲有今日所有听我讲说话嘅人，都能够好似我一样成为基督徒，只不过，唔使带住呢啲锁链。”

30 于是亚基帕企起身，总督、百妮基同在座嘅人都企起身。 31 佢哋走嘅时候，喺度讲：“呢个人冇做过乜嘢应该被处死或者囚禁嘅事㖞！” 32 亚基帕同非斯都讲：“如果呢个人唔系向凯撒上诉，本来已经可以释放嘞。”

27 佢哋决定俾我哋坐船去意大利，就将保罗同其他囚犯交俾奥古斯都部队一个叫犹流嘅军官。 2 我哋上咗一艘由亚大米田开去亚细亚行省沿岸一带嘅船，然后就启航嘞。帖撒罗尼迦嘅马其顿人亚里达古亦都同我哋一齐去。 3 第二日，我哋喺西顿上岸。犹流好有人情味，批准保罗去朋友嗰度，等佢哋可以照顾佢。

4 我哋由嗰度开船，因为逆风，就沿住塞浦路斯嘅背风面航行， 5 驶过西利西亚同潘菲利亚一带嘅大海，到咗吕基亚嘅米拉港。 6 军官喺嗰度揾到一艘由亚历山大开去意大利嘅船，就叫我哋上船。 7 连续好多日，船开得好慢，几经辛苦先至嚟到尼多斯。因为逆风，我哋冇办法前行，唯有经撒摩尼，沿住克里特嘅背风面航行。 8 我哋沿住海岸航行，终于嚟到拉西亚城附近一个叫佳港嘅地方。

9 过咗好耐，赎罪日禁食嘅嗰一日都过咗嘞。喺呢个时候航行好危险，所以保罗建议， 10 话：“各位，我认为而家继续航行，唔单止货物同架船会毁坏，损失惨重，就连我哋自己都性命难保。” 11 不过军官宁愿听船长同埋船主讲，都唔肯听保罗讲。 12 加上呢个港口唔适合过冬，大部分人都建议开船出发，尽快赶去菲尼斯过冬。菲尼斯系克里特嘅一个港口，一面向东北，一面向东南。

13 当时有轻轻嘅南风吹过嚟，所以佢哋以为可以照原定计划抵达目的地，就起锚，沿住克里特嘅海岸航行。 14 点知，过咗冇几耐，有股强劲嘅东北风*吹过嚟。 15 我哋架船俾强风吹袭，冇办法逆风前行，唯有任由佢随风漂流。 16 跟住，我哋沿住一个小岛嘅背风面急行，呢个岛叫卡乌达，我哋几经辛苦先至保得住船尾嘅艇仔*。 17 大家将只艇仔拉上嚟之后，就用绳索将船底绑紧，又因为担心喺赛耳底*搁浅，就收起船帆，任由架船漂流。 18 但系风暴令到架船抛得好犀利，所以第二日，船上嘅人为咗减轻重量，就揼咗啲货物。 19 去到第三日，佢哋连船上面嘅用具都揼埋。

20 连续好多日，我哋都睇唔到太阳同星星，仲不断俾狂风吹袭，最后大家都觉得冇生还嘅希望。 21 船上嘅人已经好耐冇食嘢，于是保罗喺佢哋当中企起身，话：“各位，如果你哋听我嘅劝告，冇喺克里特开船，就唔会损失惨重嘞。 22 不过，其实你哋唔使担心*，因为你哋只会损失呢艘船，冇人会丧失生命。 23 我崇拜敬奉*嘅上帝，今晚派咗一个天使嚟，企喺我身边， 24 话：‘保罗，唔使惊。你一定会企喺凯撒面前。上帝会搭救你同埋所有同船嘅人。’ 25 所以，各位唔使担心*，我相信上帝同我讲嘅事都一定会完全实现。 26 不过，我哋艘船将会喺某个岛搁浅。”

27 到咗第十四日嘅夜晚，我哋架船喺阿德里亚海抛嚟抛去。午夜时分，啲水手觉得已经靠近陆地嘞， 28 就度吓水深，大约有36米*，船向前航行咗一阵，又再度一度，大约有27米*。 29 佢哋惊艘船会撞到岩石，就由船尾抛四个锚落海，好期待快啲天光。 30 后嚟啲水手想弃船逃走，就诈谛喺船头放啲锚落去，其实系偷偷哋放只艇仔落去。 31 保罗对军官同埋士兵讲：“呢啲人如果唔留喺船度，你哋就冇可能获救嘞。” 32 于是士兵斩断绳索，只艇仔就跌咗落去。

33 就快天光嘅时候，保罗劝大家食啲嘢，佢话：“今日系第十四日嘞，你哋一直好心急想快啲脱险，乜嘢都冇食。 34 我劝你哋为自己着想，都系食啲嘢啦，因为你哋唔会有人失去一条头发。” 35 讲完之后，保罗就拎起饼，喺大家面前感谢上帝，搣开啲饼开始食。 36 大家就唔再担心，拎啲嘢嚟食嘞。 37 船上面一共有276人。 38 人人都食饱之后，就将船上面嘅小麦揼落海，减轻船嘅重量。

39 天光嘅时候，佢哋认唔出前面系乜嘢地方，净系见到一个有沙滩嘅海湾，就决定尽量将船靠近海滩。 40 于是佢哋将船锚全部斩断，等啲锚跌落海，同时将绑住舵桨*嘅绳索松开，拉起前帆，向住海滩顺风航行。 41 点知佢哋撞到海里面嘅沙洲，船就搁浅嘞，结果船头棘住咗，郁唔到，船尾都俾海浪冲到烂晒。 42 士兵就决定要杀死啲囚犯，唔想有人乘机跳海逃走。 43 但系军官为咗救保罗，就阻止佢哋噉做。佢吩咐嗰啲识游水嘅人跳落海，游上岸先， 44 其余嘅人之后可以借助木板或者船身嘅残骸上岸。就系噉，人人都安全上岸嘞。

28 我哋平安上岸之后，先至知道嗰个岛叫马耳他。 2 当地居民*非常有人情味。当时落紧雨，天气又好冻，佢哋起咗个火，殷勤噉接待我哋所有人。 3 保罗执咗啲树枝，放喺火堆，有条毒蛇热得滞，就捐出嚟缠住佢只手。 4 当地啲人*见到有条毒蛇繑住佢只手，就话：“呢个人实系个杀人犯，俾佢执返条命，平安逃过海难，实在天理*难容呀。” 5 不过保罗将条毒蛇揈落火堆，完全冇受伤。 6 佢哋以为保罗嘅手臂会肿起，又或者会突然倒地身亡，但系等咗好耐，见佢竟然咩事都冇，佢哋就改变谂法，话佢系个神。

7 嗰度附近嘅土地属于一个叫部百流嘅人，佢系呢个岛嘅首领。佢好欢迎我哋，热情款待咗我哋三日。 8 当时部百流嘅爸爸发紧烧，患咗痢疾，卧病在床。保罗去为佢祷告，将手放喺佢身上，医好咗佢。 9 于是岛上其他病人都嚟揾保罗，所有人都俾佢医好咗。 10 佢哋为咗表达谢意，送咗好多礼物俾我哋。到咗启航嘅时候，佢哋亦都将我哋需要嘅嘢送上船。

11 我哋留咗喺呢个岛三个月之后，上咗一艘由亚历山大嚟嘅船，呢艘船亦都喺岛上过冬，船头有“宙斯双子”像。 12 我哋艘船去到叙拉古港，停留三日之后， 13 由嗰度继续前行，去到利基安，一日之后刮起南风。我哋离开利基安之后第二日，就到咗部提奥利。 14 我哋见到一啲弟兄，接受咗佢哋邀请，喺嗰度住咗七日，然后出发去罗马。 15 罗马嘅弟兄姊妹听到我哋去紧嗰度，就去亚比乌市集广场同埋三旅馆迎接我哋。保罗一见到佢哋，就感谢上帝，大受鼓励*。 16 后嚟，我哋终于去到罗马，保罗获准独自居住，由士兵看守*。

17 过咗三日，保罗请犹太人嘅首领嚟。佢哋到咗之后，保罗就同佢哋讲：“各位弟兄*，虽然我冇做过对唔住同胞嘅事，亦都冇违反我哋祖先嘅规矩，但系就成为囚犯，俾人由耶路撒冷送到罗马官员手上。 18 经过审讯，佢哋揾唔到理由判我死罪，本来想释放我， 19 但系犹太人反对，我唯有向凯撒上诉，不过噉唔系因为我有咩事想指控我嘅同胞。 20 所以，我就请你哋嚟见面倾吓。我系因为以色列人盼望嘅事，先至俾呢条锁链锁住嘅。” 21 佢哋同保罗讲：“我哋冇从犹地亚收到关于你嘅信，嗰度嚟嘅弟兄亦都冇讲过你做咗乜嘢唔好嘅事。 22 但系，我哋认为应该听吓你亲自讲自己嘅谂法。因为我哋知道呢个教派真系到处受人批评。”

23 于是佢哋同保罗约定日子见面。到咗嗰日，去佢间屋嘅人比之前更加多。保罗就一整日向佢哋传道，为上帝嘅王国作彻底嘅见证，引用摩西法典同埋先知书嘅说话，尽力说服佢哋相信耶稣。 24 听佢讲说话嘅人，有啲信，有啲唔信。 25 佢哋之间意见不合，就开始离开，于是保罗噉样讲：

“神圣力量通过先知以赛亚向你哋祖先讲嘅说话，一啲都冇错， 26 经文话：‘你去同呢族人讲：“你哋听系听咗，但系完全唔明白；睇系睇咗，但系完全唔理解。 27 呢族人嘅心已经麻木，耳仔听到都冇反应，仲合埋对眼，费事对眼睇到，耳仔听到，内心理解咗，回头改过，就俾我医返好。”’ 28 所以你哋要知道，上帝嘅救恩*已经传到外族人嗰度嘞，佢哋一定会听。” 29 －－－*

30 保罗喺租返嚟嘅屋住咗足足两年。佢接待所有嚟见佢嘅人， 31 向呢啲人传讲上帝嘅王国，教导佢哋认识主耶稣基督嘅事，佢勇敢无惧，放胆发言，冇受到乜嘢阻碍。