宗教最后会点样？

1．系咪所有宗教都系好嘅呢？

每个宗教都有虔诚嘅信徒，上帝都留意到呢啲人，而且好关心佢哋。但系，有啲信徒就利用宗教去做坏事。（哥林多后书4:3,4；11:13-15）根据新闻报道，有啲信徒甚至虐待儿童、参与战争同恐怖活动，或者参与种族屠杀。呢啲事令到诚心相信上帝嘅人好失望！ 请读马太福音24:3-5,11,12

正确嘅宗教使上帝得到荣耀。错误嘅宗教就令上帝讨厌，因为佢哋冇按圣经正确噉教导人，冇帮助人真正认识上帝，例如冇话俾人知上帝系个点样嘅神、人死后会点样。 请读传道书9:5,10；提摩太前书2:3-5

2．宗教最后会点样？

有啲宗教嘅信徒话自己爱上帝，但系实际上爱嘅系撒但所控制嘅世界。上帝唔钟意呢啲宗教。（雅各书4:4）圣经将所有错误嘅宗教叫做“大巴比伦”。点解呢？因为所有错误嘅宗教都嚟自古代一座叫“巴别”嘅城，呢座城喺挪亚日子嘅大洪水之后建立，后来改叫“巴比伦”。今日，好多宗教都欺骗人、迫害人。但系好快，喺人意想唔到嘅时候，上帝就会消灭所有错误嘅宗教。呢个真系一个好消息！ 请读启示录17:1,2,5,16,17；18:8

仲有冇其他好消息呢？有。喺世界各地嘅错误宗教当中，有唔少虔诚嘅人。上帝关心佢哋，教佢哋认识圣经嘅真理，使佢哋同心崇拜佢。 请读弥迦书4:2,5

3．虔诚嘅人应该点样做？

耶和华好关心热爱真理嘅人，留意到佢哋好想做啱嘅事。上帝促请佢哋快啲离开错误嘅宗教。由于爱上帝，佢哋愿意作出改变，离开以前嘅宗教，亦都唔再做错嘅事，希望令上帝开心。 请读启示录18:4

喺1世纪，有啲虔诚嘅人听咗基督徒所传讲嘅好消息，就欢欢喜喜噉接受。佢哋按照上帝嘅吩咐过一种新生活，唔单止有咗人生目标同希望，亦都生活得更加快乐。呢啲人接受好消息之后，就将上帝睇得比任何事都重要。今日，所有希望取悦上帝嘅人应该向佢哋学习。 请读帖撒罗尼迦前书1:8,9；2:13

世界各地都有崇拜上帝嘅人，佢哋系个大家庭。上帝请虔诚嘅人离开错误嘅宗教，加入佢嘅大家庭。你噉样做嘅话，就可以同上帝做朋友，亦可以感受到呢个大家庭嘅温暖，而且有希望永远生活落去。 请读马可福音10:29,30；哥林多后书6:17,18

4．上帝会点样为地上嘅人带嚟喜乐？

上帝会消灭所有错误嘅宗教。呢个唔系个好消息咩？到时，人类唔会再受到错误宗教嘅欺压，亦唔会再因为错误宗教而四分五裂。人人都会同心崇拜独一嘅真神耶和华。 请读启示录18:20,21；21:3,4