喜乐——嚟自上帝嘅特质

我哋每个人都好想过快乐嘅生活。不过喺最后嘅日子，人人都会面对“难以应付”嘅考验。（提摩太后书3:1）失业、唔公平、健康问题、痛失亲友，或者其他原因造成嘅压力同悲痛都会使人慢慢失去喜乐。上帝嘅仆人都有可能变得灰心，失去喜乐。如果呢啲情况发生喺你身上，你可以点样再次得到喜乐？

如果想知道呢个问题嘅答案，我哋首先需要明白真正嘅喜乐系乜嘢意思，了解其他人喺考验下点样保持喜乐。跟住，我哋会讨论可以点样保持，甚至增加自己嘅喜乐。

喜乐系乜嘢意思？

喜乐唔系只系开心兴奋嘅意思。例如，一个人饮醉酒嗰时睇起嚟好开心，不过清醒之后，佢仲系会因生活嘅难题而忧虑。呢种短暂嘅开心兴奋唔系真正嘅喜乐。（箴言14:13）

相反，喜乐系我哋得到或者期待得到美好事物嘅时候，喺内心产生嘅一种强烈感觉。一个喜乐嘅人，无论情况好坏，都能够保持快乐。（帖撒罗尼迦前书1:6）就算佢因某啲事烦恼，内心依然能够保持喜乐。例如，使徒曾经因为传讲基督而俾人鞭打。不过，“佢哋离开公议会，因为有荣幸配得为主嘅名受辱，就欢欢喜喜”。（使徒行传5:41）当然，佢哋唔系因为俾人鞭打而开心，而系因为自己对上帝保持忠贞而享有真正嘅喜乐。

喜乐唔系与生俱来嘅，亦都唔系自然就有嘅。点解？因为真正嘅喜乐系圣灵果实嘅一部分。喺上帝圣灵嘅帮助下，我哋可以培养“新品格”，而“新品格”亦都包括喜乐。（以弗所书4:24；加拉太书5:22）我哋努力培养喜乐呢种特质，就可以用更加积极嘅态度嚟应付生活嘅压力。

值得我哋效法嘅榜样

耶和华希望地上充满美好嘅事，而唔系今日我哋常见嘅坏事。虽然有人做坏事，但系呢个都冇令耶和华失去喜乐。圣经话：“能力同喜乐喺佢嘅圣所当中。”（历代志上16:27）上帝嘅仆人成就咗好多“使［耶和华］嘅心欢喜”嘅事。（箴言27:11）

有时事情嘅发展唔系我哋所期望嘅噉，不过我哋都可以效法耶和华，保持喜乐。与其过度忧虑，我哋不如多啲谂吓而家得到嘅福分，同时耐心等候前头更美好嘅事。a

圣经记载咗好多例子，表明人喺艰难嘅情况下仍然能够保持喜乐。亚伯拉罕就系其中一个例子。佢因为其他人嘅缘故而面临生命危险，不过喺咁大嘅压力下，佢依然保持喜乐。（创世记12:10-20；14:8-16；16:4,5；20:1-18；21:8,9）点解佢做得到？佢清楚知道自己嘅希望系喺弥赛亚统治下嘅新世界生活。（创世记22:15-18；希伯来书11:10）耶稣话：“你哋嘅父亚伯拉罕欢欢喜喜噉希望睇见我嘅日子”。（约翰福音8:56）我哋可以效法亚伯拉罕，细想前头嘅喜乐。（罗马书8:21）

好似亚伯拉罕一样，使徒保罗同佢嘅同伴西拉亦都将注意力集中喺上帝嘅应许之上。虽然经历咗好多困难，但系佢哋坚强嘅信心可以使佢哋保持喜乐。例如，保罗同西拉俾人鞭打完，韫咗入监之后，喺“半夜，［佢哋］祷告，唱歌赞美上帝”。（使徒行传16:23-25）保罗同西拉从将来嘅希望得到力量，亦都因自己可以为基督嘅名受苦而感到喜乐。如果我哋紧记自己对耶和华保持忠贞所得到嘅美好结果，就系效法保罗同西拉嘞。（腓立比书1:12-14）

今日，有好多弟兄姊妹喺考验之下仍然保持喜乐，系我哋嘅好榜样。例如，2013年11月，超强台风海燕吹袭菲律宾中部，摧毁咗超过一千个见证人家庭嘅房屋。乔治喺塔克洛班市嘅房屋俾台风完全摧毁。佢话：“虽然系噉，弟兄姊妹仲系保持喜乐。呢种喜乐好难用言语嚟形容。”喺遇到艰难情况嘅时候，如果我哋怀住感激之心去沉思耶和华为我哋所做嘅，就可以继续保持喜乐。耶和华赐俾我哋乜嘢福分，使我哋感到喜乐？

喜乐嘅因由

我哋同耶和华享有亲密嘅关系，系我哋感到喜乐嘅最主要原因。请谂吓：我哋有机会认识宇宙嘅至高主宰；佢系我哋嘅父亲、上帝，仲系我哋嘅朋友！（诗篇71:17,18）

我哋亦都好感激耶和华赐俾我哋永生，而且使我哋能够享受生命。（传道书3:12,13）耶和华俾机会我哋亲近佢，使我哋明白佢对我哋嘅旨意。（歌罗西书1:9,10）所以，我哋知道人生真正嘅意义同方向。但系，世上大多数人都唔清楚人生有乜嘢意义。对于呢种情况，保罗话：“‘上帝为爱佢嘅人所预备嘅，系眼睛冇见过，耳朵冇听过，连人心里谂都冇谂过嘅。’但系上帝就用圣灵向我哋启示呢一切”。（哥林多前书2:9,10）能够明白上帝嘅旨意，唔系令我哋感到非常喜乐咩？

耶和华仲为我哋做咗好多事。佢使我哋嘅罪得到宽恕。（约翰一书2:12）佢使我哋有希望喺即将到来嘅新世界生活。（罗马书12:12）而家，耶和华使我哋可以同全球嘅弟兄姊妹一齐并肩事奉佢。（诗篇133:1）耶和华亦都保护佢嘅子民免受撒但同邪灵嘅伤害。（诗篇91:11）如果我哋沉思上帝所赐嘅呢啲福分，我哋就会感到更加喜乐。（腓立比书4:4）

点样可以增添喜乐

一个喜乐嘅基督徒可唔可以有更多喜乐呢？耶稣话：“我将呢啲事话俾你哋知，系要你哋心入面有我噉样嘅喜乐，噉你哋嘅喜乐就系完完全全嘅。”（约翰福音15:11）呢句话表明我哋嘅喜乐能够不断增加。我哋可以将喜乐比喻成一团火。只要加柴，火就会烧得更旺。同样，添加属灵嘅燃料就可以增加我哋嘅喜乐。要记住，上帝嘅圣灵就系促进喜乐嘅燃料。所以，我哋经常恳切祈求上帝赐我哋圣灵，而且沉思受圣灵启示嘅圣经，就可以更加喜乐。（诗篇1:1,2；路加福音11:13）

我哋可以得到更多喜乐嘅另一个方法系，积极去做耶和华喜悦嘅事。（诗篇35:27；112:1）点解？因为耶和华创造我哋，要我哋遵行佢嘅旨意。圣经话，我哋被设计成“要敬畏上帝，谨守佢嘅诫命。人嘅义务全在乎呢一点”。（传道书12:13）所以，我哋事奉耶和华，就会得到人生最大嘅喜乐。b

喜乐带嚟嘅益处

随住喜乐不断增加，我哋会体验到越来越多嘅益处。例如，我哋喺任何困境下都依然喜乐噉事奉耶和华，就可以令天父喜悦。（申命记16:15；帖撒罗尼迦前书5:16-18）由于有真正嘅喜乐，我哋弃绝属肉体嘅生活方式，更愿意作出牺牲支持上帝王国。（马太福音13:44）呢啲牺牲所带嚟嘅成果，会使我哋感到更加喜乐、心满意足，亦都会使其他人更加快乐。（使徒行传20:35；腓立比书1:3-5）

美国内布拉斯加大学嘅一位研究人员，睇咗大量同健康研究有关嘅数据之后话：“如果而家你嘅生活既快乐又满足，噉你就会更容易保持健康。”呢点同圣经所讲嘅一致。圣经话：“喜乐嘅心系治病良药”。（箴言17:22）冇错，一个人越喜乐，佢嘅身体可能就会越健康。

所以，即使我哋生活喺压力重重嘅时期，我哋都可以通过祷告、研读同埋沉思耶和华嘅话语得到圣灵，培养出真正同恒久嘅喜乐。我哋沉思而家享有嘅福分，效法其他忠心嘅人以及遵行上帝嘅旨意，就可以更加喜乐，仲会体验到诗篇64:10嘅话几咁真实。呢节经文话：“义人要因耶和华而欢喜，向佢寻求庇护”。